Ezikiẹl 20 - Edo Bible (E Baibol Ẹdo) Version 1996

Iho Ọghe Osanobua Kevbe Otilua Ọmwa Nagbọn

¹ Ikpẹdẹ ne ogigbe ọghe uki ne ogisẹn ọ re gha nọ, a tie ẹre ukpo ehairrọvbugie ne ima kegha rre iwe, eso vbe uwu ivbi Izrẹl keghi rre do nọ mwẹ emwi ne Osanobua ho, iran keghi tota vbe odaro mwẹ.

² Ẹre Nọyaẹnmwa na gunmwẹ guan wẹẹ,

³ “Ovbi ọmwa, gu avbe emwa na guan, ne u tama iran vbene Nọyaẹnmwa ne Udazi kha hẹ wẹ. Te uwa rre do nọ emwi ne ọ rrọ mwẹ ekhọe, ra ẹ i re erriọ? Omwa vbene a na miẹn wẹ mẹ ọrọre Osanobua ne ọ rrọọ, mẹ i ra kue ne uwa nọ mwẹ emwi rhọkpa. Mẹ ne Nọyaẹnmwa ne Udazi tae nẹ.

⁴ “Ovbi ọmwa, wẹ mu egbe ne u gha ya bu ohiẹn iran ra? U ghi ru vberriọ khekherriọ. Ye iran avbe emwi osọnnọ ne avbe erha iran ru rre.

⁵ Tama iran vbene I khare. Ẹghẹ ne I na hannọ Izrẹl zẹ, te I ve iran emwi. I rhie egbe mwẹ ma iran vbe Igipt, I keghi tama iran wẹẹ: Mẹ ọrọre Nọyaẹnmwa ne Osanobua rua.

⁶ Ẹghẹ nii ọ re I na tama iran ighẹ I gha viọ iran hin Igipt rre, I ghi viọ iran gha rrie otọe ne I mu khẹ iran, otọe ne ẹfe ye ne ọ maa emwiokọ ẹsẹse, otọe ne ọ maa sẹ vbe uwu ehia.

⁷ I keghi tama iran ne iran viọ ẹbọ osọnnọ ne iran ho ẹmwẹ ọnrẹn kua, kevbe ne iran ghẹ ye ẹbọ ohoghe ọghe Igipt mu awua ye egbe iran egbe, rhunmwuda, mẹ ọrọre Nọyaẹnmwa ne Osanobua iran

⁸ sokpan, iran yagha mwẹ, iran ma danmwehọ, iran ma viọ amazẹ osọnnọ iran kua ra ne iran sẹ avbe ẹbọ Igipt rae. Mẹ keghi te wa mu egbe ne iran họn ẹmwẹ obọ ohu ne ọ mu mwẹ vbe egbe vbe Igipt vbe odọ niii.

⁹ Sokpan, I ma ru vberriọ rhunmwuda, ọnii gha mu ozan gie eni mwẹ, rhunmwuda, sirra avbe emwa ne iran gba yin kugbe ọre I na tae ma Izrẹl wẹ, I gha viọ iran ke Igipt ladian.

¹⁰ Rhunmwuda ọnii, I keghi viọ iran ke Igipt ladian la uwu ato.

¹¹ I yi iyi mwẹ ma iran, I keghi vbe ma iran uhi mwẹ ne ọ rhie arrọọ ne ọmwaikọmwa ne ọ yae ru emwi.

¹² I keghi ya Ẹdẹ Ikẹtin ne a ya hẹwẹ ru ama ye ile ne ima gba ta, ne ọ gha ye iran rre wẹ te imẹ ne Nọyaẹnmwa ya iran khian nọhuanrẹn.

¹³ Uhin wẹ vbe uwu ato, iran ke wa gha yagha mwẹ. Iran rra uhi mwẹ, iran keghi vbe fi iyeke gbe iyi mwẹ ne ọ rhie arrọọ ne ọmwaikọmwa ne ọ ya ẹe ru emwi. Iran ke wa mu Ẹdẹ Ikẹtin rhiaa fẹẹrẹ, I te wa mu egbe ne I gie iran họn obọ ohu mwẹ vbe egbe vbe uwu ato nii, ne I wa fuẹn iran an.

¹⁴ Sokpan, I ma ru vberriọ, rhunmwuda, ọnii gha mu ozan gie eni mwẹ vbe ehe ne avbe uhunmwu ẹvbo nii ye, iran ne aro ẹre se ọe vbe I viọ ivbi Izrẹl ke Igipt ladian.

¹⁵ “Rhunmwuda ọnii, mẹ keghi yan vbe ato wẹ, mẹ i ghi viọ iran gha rrie otọe ne I mu ne iran, otọe ne ẹfe ye ke ne ọ maa emwiokọ, otọe ne ọ maa sẹ vbe uwu ehia.

¹⁶ I yan eyan ni rhunmwuda, iran he iyi mwẹ yotọ, iran rra uhi mwẹ, iran keghi vbe mu Ẹdẹ Ikẹtin rhia, ẹbọ iran ne iran ga ọ re ọ yẹ iran sẹ.

¹⁷ “Sokpan, I keghi tohan iran, I na ghi kha wẹ I i ra gbele iran an ye uwu ato vbe evba sokpan,

¹⁸ I keghi ya obọ sekhae ne avbe igbama ni rrọọ wẹẹ: Wa ghẹ ya avbe uhi ne avbe erha uwa odede mu yotọ ru emwi, wa ghẹ lele avbe emwi ne iran ru dee ẹdẹ, ra ne uwa ya ye avbe amazẹ gha mu awua ye egbe uwa egbe.

¹⁹ “Mẹ ọrọre Nọyaẹnmwa ne Osanobua rua. Wa gha ya uhi mwẹ kevbe iyi mwẹ ru emwi.

²⁰ Wa ya Ẹdẹ Ikẹtin khian ẹdẹ nọhuanrẹn, ne ọ miẹn ehe na gha re ama ile ne ima gba ta, ọ ghi vbe gha ye uwa rre wẹ mẹ ọrọre Nọyaẹnmwa ne Osanobua uwa.

²¹ Sokpan, orre nii keghi vbe yagha mwẹ. Iran rra uhi mwẹ, iran ma ya iyi mwẹ ru emwi, iyi ne ọ rhie arrọọ gie ọmwaikọmwa ne ọ ya ẹe ru emwi. Iran mu Ẹdẹ Ikẹtin rhia. Mẹ te wa mu egbe ne I gie iran họn ẹmwẹ obọ ohu mwẹ vbe egbe vbe uwu ato vba, ke ne I wa gbele iran hia a.

²² Sokpan, I ma ru vberriọ, rhunmwuda, te ọnii gha mu ozan gie eni mwẹ vbe ẹbu uhunmwu ẹvbo ni miẹn mwẹ vbe I viọ ivbi Izrẹl ke Igipt ladian.

²³ “Rhunmwuda ọnii, I keghi vbe yan eyan ọvbehe vbe uwu ato vbe evba. I keghi yan wẹ, I gha zagha iran kua lele ehehia vbe otọ agbọn.

²⁴ I ru ọna, rhunmwuda, iran he iyi mwẹ yotọ, iran rraa uhi mwẹ, iran mu Ẹdẹ Ikẹtin rhia, iran keghi vbe gha gho avbe ẹbọ ne avbe erha iran ghoro.

²⁵ Vbe iyekọnii, I keghi do rhie uhi ne ẹ i ma ne iran, kevbe iyi ne ẹ i rhie arrọọ gie ọmwa.

²⁶ I keghi gie iran gha ya emwi imuohan iran mu awua ye egbe iran egbe, I keghi vbe gie iran gha ya ivbi iran ne ọdiọn ne ikpia zọ ese. Ọna keghi re ne a ya rri iran oya, kevbe ne a ya rhiema iran ighe mẹ ọrọre Nọyaẹnmwa.

²⁷ “Rhunmwuda ọnii nian, ovbi ọmwa, tama ivbi Izrẹl vbene imẹ ne Nọyaẹnmwa ne Udazi kha ma iran hẹ, odẹ ọvbehe ne avbe erha iran ya la ekpa uyinmwẹ ne ọ ma gba iran yagha mwẹ, ọre ọna khin. Iran keghi ya ese ne iran gien ye ohu mu mwẹ kevbe ayọn ne iran ya zẹ ọhẹ rre.

²⁸ I viọ iran gha die otọ ne I wẹ I gha mu ne iran. Iran ghi miẹn avbe oke ni yo kevbe avbe erhan ni mwẹ ebe nunuunu, iran kegha zọ ese vbe ehe ne ehia ye.

²⁹ I keghi nọ iran wẹẹ: De emwi ne avbe uhunmwu oke ne uwa yo na khin yi? A keghi rhunmwuda ọnii gha tie iran ‘Uhunmwu Oke,’ ke ẹghẹ nii gha dee.

³⁰ Banbanna nian, tama ivbi Izrẹl vbene I kha hẹ wẹẹ: Vbọzẹ ne uwa gha na gha ru avbe orukhọ ne avbe erha uwa ru yi, ra ne uwa vbe gha rhikhan lele avbe ẹbọ iran?

³¹ Ye do sẹ ẹdẹ nẹrẹ na, emwi ọkpa ọ re uwa ye ya muohan, wa ghi vbe mu awua ye egbe uwa egbe vbekpa nene ẹbọ nii, vbekpa ne uwa na ya ivbi uwa zọ ese ne iran vbe uwu erhẹn. Sevba, wa ne ivbi Izrẹl ghi ye do gha nọ emwi ne ọ rrọ mwẹ ekhọe. Zẹ vbene aro wa dae ighe mẹ ọrọre e Nọyaẹnmwa ne Udazi, erriọ, mẹ ọrọre Osanobua ne ọ rrọọ. Mẹ i ra kue ne uwa nọ mwẹ ẹmwẹ rhọkpa.

³² Wa tae mu olọ yan rẹn nẹ wẹ te uwa ra gha yevbe avbe ẹvbo nekpa, zẹvbe emwa ni rre ẹvbo ọvbehe, iran ni gho erhan kevbe okuta. Sokpan, ọnii i gba hiehiere.

Osa Ọre Ọ Rriaikhi, Rẹn Ọre Ọ Vbe Yabọ Ọmwa

³³ “Zẹ vbene aro dae wẹ, mẹ ne Nọyaẹnmwa ne Udazi ọrọre Osanobua ne ọ rrọ, I tama uwa yotọ nẹ wẹ ohu gha mu mwẹ, I gha ya obọ ne ọ tọn mu uwa vbe ẹtin mwẹ hia.

³⁴ I gha rhie ẹtin kevbe ohu mwẹ ma uwa, vbe i a ghi si uwa koko nẹ, I na vbe viọ uwa werriegbe ke avbe ẹvbo ne a zagha uwa lele gha dee.

³⁵ I gha viọ uwa gha dee ‘Ato agbọn ẹvbo Nibun,’ evba nii ọ re I gha na ta ku uwa.

³⁶ I gha bu ohiẹn gbe uwa vbene I vbe bu ohiẹn gbe avbe erha uwa vbe Ato Sainai,” erriọ ọ re Nọyaẹnmwa ne Udazi khare.

³⁷ “I gha ya obọ ne ọ tọn mu uwa, I ghi ru ẹe ne uwa gha ru vbene ile mwẹ khare.

³⁸ I gha viọ iran ni sọtẹ kevbe ni ru orukhọ. I gha viọ iran hin otọe ne iran ye na rre sokpan mẹ i ra gie iran werriegbe gha rrie otọ Izrẹl. Ẹghẹ nii, wa gha na rẹn ighe mẹ ọrọre Nọyaẹnmwa.”

³⁹ E Nọyaẹnmwa ne Udazi khare wẹẹ, “Banbanna nian, wa ne ivbi Izrẹl, wa gie ẹe gua uwa egbe ro! Wa gha khian ne uwa ya ga ẹbọ uwa. Sokpan, I tama uwa yotọ nian wẹ vbe iyeke ọnọna, te uwa gha họn ẹmwẹ mẹ, wa ghi dobọ eni mwẹ nọhuanrẹn ne uwa yagha yi, ne uwa na ya gha ye imuohan gie avbe ẹbọ.

⁴⁰ Wa ne ivbi Izrẹl hia gha ya ga mwẹ vbe evba, vbe otọe nii, vbe uhunmwu oke mwẹ nọhuanrẹn, oke nọhuanrẹn ọghe Izrẹl. Ẹko mwẹ gha rhiẹnrhiẹn ghe uwa, I gha vbe rhie aro yọ wẹ wa gha viọ emwi izọese uwa gunmwẹ, emwi izọhẹ uwa ni maa sẹẹ, kevbe emwi imuohan uwa nihuanrẹn.

⁴¹ “I gha ghi viọ uwa ke avbe ẹvbo ne a zagha uwa kui gha dee nẹ, I na vbe do si uwa koko, I gha rhan obọ miẹn ese ne uwa gien rẹn, avbe uhunmwu ẹvbo gha vbe miẹn wẹ ọmwa nọhuanrẹn ọ re imẹ khin.

⁴² I gha ghi viọ uwa dọlegbe gha die otọ Izrẹl, otọe ne I khare ighe I gha mu ne avbe erha uwa odede, ẹghẹ nii, wa gha do rẹn ighe mẹ ọrọre Nọyaẹnmwa.

⁴³ “Ẹghẹ nii, wa gha na do ye avbe emwiekhue ne uwa ru hia rre, ke vbene uwa mu awua ye egbe uwa egbe hẹ. Egbe uwa gha sọnnọ uwa, rhunmwuda emwi dan hia ne uwa ru.

⁴⁴ I gha ghi yin uyinmwẹ ne ọ gha da uyi mwẹ yi nẹ, wa ne ivbi Izrẹl gha rẹn ighe mẹ ọ re Nọyaẹnmwa, rhunmwuda, I ma ru uwa emwi ne ọ ma uwa zẹ vbe uyinmwẹ dan ne uwa yin.” E Nọyaẹnmwa ne Udazi guan nẹ.

Erhẹn Vbe Odẹ Ekẹn

⁴⁵ E Nọyaẹnmwa keghi gunmwẹ guan wẹẹ,

⁴⁶ “Ovbi ọmwa, tọn aro mu ghe odẹ ekẹn. Ta ku odẹ ekẹn ne u vbe guan ẹmwẹ akhasẹ ghe avbe ẹgbo ni rre odẹ ekẹn.

⁴⁷ Tama avbe ẹgbo ekẹn wẹ ne iran danmwehọ ẹmwẹ ne Nọyaẹnmwa ne Oghodua tama iran wẹ: Ghe! Iran hie erhẹn, ọ gha gien erhan hia ni rre uwu uwẹ, ke ne ọ re ọghe ọgbọn kevbe ne ọ wu nẹ. Emwi ne ọ gha sẹtin dọ ẹre yọ, ẹ i rrọọ. Ọ gha gien ke odẹ ekẹn ya sẹ odẹ okuọ. Emwa hia gha họn ẹmwẹ owowo erhẹn nii vbe egbe.

⁴⁸ Iran gha miẹn wẹ mẹ ne Nọyaẹnmwa ọ re ọ mu erhẹn yọ, kevbe wẹ, a i miẹn ọmwa ne ọ gha sẹtin dọ ẹre yọ.”

⁴⁹ Sokpan, mẹ keghi wẹ, ẹn o “E Nọyaẹnmwa, ghẹ gie mwẹ ne I ya ru ẹe, emwa hia tae khian nẹ wẹ itan itan ọ re I ya guan.”