Ezikiẹl 2 - Edo Bible (E Baibol Ẹdo) Version 19961 “Ovbi ọmwa, kpaegbe mudia ighe I ra guẹ guan.” 2 Ugbẹn vbe urhu nii ghi gunmwẹ guan, orhiọn Osanobua keghi la uwu imẹ, ọ keghi mu mwẹ mudia, I keghi họn vbe urhu nii ye gha guan khian wẹẹ, 3 “Ovbi ọmwa, I ra giọ bu ivbi Izrẹl gha khian. Iran sọtẹ, iran keghi mu aro igbinna da mwẹ, etẹ nii ọ re iran ye khin na, zẹ vbene avbe erha iran odede vbe gha ye. 4 Iran ze vbe ẹkoko udu, iran i vbe ya ọghọ mẹ, rhunmwuda ọnii, I ra giọ ne u ya tama iran vbene imẹ ne Nọyaẹnmwa ne Udazi kha hẹ. 5 A deghẹ iran ne etẹ nii ghi họn ra iran ma họn, iran gha rẹn wẹ, akhasẹ rre ehe ne iran ye. 6 “Sokpan wẹ ovbi ọmwa, ghẹ gie ohan iran mu ẹẹn, ra ẹmwẹ ne iran ta. Iran gha yagha a; iran ghi fa ruẹ ua, te ọ ra yevbe ne ọmwa rre uwu ẹbu ekpakpahuangan. Sevba, ghẹ gie ohan avbe etẹ nii mu ẹẹn ra emwi ne iran a rhirhi ta. 7 U ghi gha tama iran, ẹmwẹ ne I gha tama ruẹn wẹ ne u ta, deghẹ iran hoẹn ra iran ma họn. Yerre wẹ etẹ ọ re iran khin. 8 “Ovbi ọmwa, danmwehọ ẹmwẹ ne I tama ruẹn. Ghẹ sọtẹ vbene iran ye. Rhan unu uan ne u rri emwi ne I ra rhie ne uẹn.” 9 I keghi miẹn obọ ne a niẹn da mwẹ, ọ keghi vbe da ebe ohian yi. 10 Obọ nii keghi rhan ebe ohian nii, I keghi miẹn wẹ te a gbẹnnẹ ọre aro kevbe iyeke — emwi ne a gbẹnnẹ yọ kegha re eve akhiẹ, ugomwẹ kevbe irriakọn. |
@ The Bible Society of Nigeria, 1996
United Bible Societies