Ezikiẹl 18 - Edo Bible (E Baibol Ẹdo) Version 1996

¹ E Nọyaẹnmwa keghi gunmwẹ guan wẹẹ,

² “Vbe ọ na khun itan ne iran kpa vbe Izrẹl yi wẹẹ, “ ‘Evbibiemọ ọ re ọ rri alimo ni kaẹn, sokpan ivbi iran ọ re akọn ghi do khẹkhẹ.’

³ “Omwa vbene a na miẹn wẹ mẹ ọrọre Osanobua ne ọ rrọọ,” erriọ Nọyaẹnmwa ne Udazi khare, “Wa i ghi ra dọlegbe kpa itan na vbe Izrẹl ọvbehe.

⁴ Mẹ ọ re ọ yan orhiọn emwa hia, orhiọn ọghe avbe evbibiemọ kevbe ọghe avbe emọ. Ọmwa ne ọ ru orukhọ ọ re ọ ra gha wu.

⁵ “Gie a kha wẹ ọmwa esi okpa gele rrọọ, ọmwa ẹmwata ke ne ọ ta uhunmwu ẹmwẹ.

⁶ Ẹ i gho ẹbọ ivbi Izrẹl, ra ne ọ vbe gha rri evbare ne a ya zọ ese vbe aro ẹbọ ne a wua. Ẹ i miẹn amwẹ ẹrrẹe, ra ne ọ gu okhuo ne ọ mu obọ mwẹ gha ru emwi.

⁷ Ẹ i rha ọmwa ẹ i do ọmwa oyi. Ọ vbe rhie emwi ne ọmwa ne ọ mọmọ ẹre emwi rhie ne ẹẹn da yi, werriegbe ne ẹẹn, ọ koko ne ohanmwẹ gbe, ọ vbe rhie ukpọn ne ne ọ rre irhunmwuirhun.

⁸ Ẹ i rhie igho isu ne ọmwa. Ọ he ne ọ ru orukhọ, ọ vbe ta uhunmwu ẹmwẹ vbe ẹmwẹ ne a wẹ ne a guan yi hia.

⁹ Ọmwa vberriọ ye iyi mwẹ ru emwi, ọ keghi vbe kakabọ rhie uhi mwẹ mwẹ. Ọmwata nọ, ọ gha rre agbọn.” Erriọ Nọyaẹnmwa ne Udazi khare.

¹⁰ “Gie a kha nian wẹ okpia na mwẹ ọmọ okpia ne ọ rhaa kevbe ne ọ de izigha, ọ ru,

¹¹ avbe emwi na ne erha ẹe ma ru. Ọ rri evbare emwi ne a ya zẹ ese vbe aro ẹbọ ne a wua, ọ ghi vbe gha miẹn amwẹ ẹrrẹe.

¹² Ọ gbe ivbiogue rhu, ọ rha, ọ wa rhie emwi ne ọmwa ne ọ mọmọ ẹre emwi rhie ne ẹẹn dayi. Ọ yo avbe aro ẹbọ iran ni ga ẹbọ, ọ vbe ga avbe ẹbọ osọnnọ.

¹³ Ọ vbe rhie igho isu ne emwa mọmọ. Rẹn gha diagbọnya ra? Hiehiere, ẹ i diagbọnya. Ọ ru avbe emwi osọnnọ na hia nẹ, rhunmwuda ọnii, te ọ gha wu. Obọ irẹn ọ re a ra vbe lẹ ẹmwẹ uwu irẹn ginna.

¹⁴ “Banbanna nian, gie a kha ighe okpia nọkpa na mwẹ ọmokpia, ọ miẹn avbe orukhọ hia ne erha ẹe ru sokpan, ọ ma rhie vbe obọ ẹre.

¹⁵ Ẹ i ga ẹbọ ivbi Izrẹl ra ne ọ rrie evbare ne a ya zọ ese vbe aro ẹbọ ne a wua. Ẹ i miẹn ọmwa amwẹ

¹⁶ ra ne ọ gha zẹ ọmwa kpokpo ra ne ọ gha do emwa emwi hẹ. Emwi ne ọmwa ne ọ rhie emwi na mọmọ rhie ne ẹẹn da yi, ọ vbe rhie ẹre werriegbe ne ẹẹn. Ọ koko ne ohanmwẹ gbe, ọ vbe rhie ukpọn ne nọ rre irhunmwuirhun.

¹⁷ Ọ lẹ hin orukhọ ne a ru rre, ẹ i vbe rhie igho isu ne ọmwa mọmọ. Ọ rhi uhi mwẹ mwẹ, ọ keghi vbe ya iyi mwẹ ru emwi. Ẹ i ra wu ye orukhọ erha ẹe sokpan, te ọ gha rre agbọn.

¹⁸ Vbe odẹ ne ogieva, erha ẹe do oyi, ọ vbe rha, ọ vbe ru emwa hia emwi dan vbe ẹghẹ hia. Rhunmwuda ọnii, orukhọ ne ọ tobọ ẹre ru ọ re ọ wu yi.

¹⁹ “Wẹ sẹtin nọ wẹẹ, ‘Vbọzẹ ne ọmọ i ra na rri oya ye orukhọ ne erha ẹe ru yi?’ Ewanniẹn ne ọ rrọ ọrọre wẹ ovbi ẹre yin uyinmwẹ ne ọ gbae kevbe ne ọ hẹnhẹn, ọ rhie avbe uhi mwẹ mwẹ, ọ keghi vbe gha ru ẹe khian hẹnnẹ hẹnnẹ, rhunmwuda ọnii, te ọ gha diagbọnya.

²⁰ Ọmwa ne ọ ru orukhọ ọ re ọ gha wu. Ọmọ i rrioya ye orukhọ erha ẹe, ra ne erha rri oya ye orukhọ ne ọmọ ru. A gha san ọmwa esi ẹse ye emwi esi ne ọ ru, ọmwa dan gha vbe rrioya ye emwi dan ne ọ ru.

²¹ “A deghẹ ọmwa dan dobọ orukhọ yi, ọ na rhie uhi mwẹ mwẹ, adeghẹ ọ ru emwi ne ọ kere kevbe ne ọ hẹnhẹn, rẹn i ra wu te ọ gha diagbọnya.

²² A gha ya orukhọ ẹre hia bọ ẹe, ọ ghi diagbọnya rhunmwuda, ọ ru emwi ne ọ kere.

²³ Wẹ yayi wẹ te ẹko rhiẹnrhiẹn mwẹ vbe ọmwa dan a wu ra?” Ọta ne Nọyaẹnmwa ne Udazi nọrẹn ọ re ọnii khin. “Hiehiere, emwi ne I ho ọrọre ne ọ fiwerriẹ; ne ọ diagbọnya.

²⁴ “Sokpan, a deghẹ ọmwa esi dobọ emwi esi ne ọ ru yi, ọ na suẹn ya gha ru emwi osọnnọ dan ne avbe emwa dan ru, ọ gha miẹn uhunmwu ra? Hiehiere! A i ghi ye avbe emwi esi ne ọ te ka ru rhọkpa rre. Ọ gha wu ye a i ta ẹmwata kevbe orukhọ ẹre.

²⁵ “Sokpan wa keghi kha wẹẹ, ‘Emwi ne Nọyaẹnmwa ne Udazi ru ma khuia.’ Wa danmwehọ mwẹ, wa ne ivbi Izrẹl, wa ro wẹ odẹ ne I ru emwi la ma khuia.

²⁶ Ọmwa esi gha dobọ emwi esi ne ọ ru yi, ọ na gha ru emwi dan, ọ na ghi wu, te ọ wu rhunmwuda emwi dan ne ọ ru.

²⁷ Ọmwa dan gha dobọ orukhọ ne ọ te ru yi, ọ na gha ru vbe ne ọ kere ke ne ọ hẹnhẹn, te ọ sinmwi uhunmwu ẹnrẹn ye agbọn.

²⁸ Ọ do ghe uyinmwẹ ne irẹn yin, ọ keghi dobọ emwi dan ne a ru yi, vbe ne a i na gbe awẹawẹ, ẹ i wu, ọ gha diagbọnya.

²⁹ Wa ne ivbi Izrẹl keghi kha wẹẹ, ‘Emwi ne Osanobua ne Udazi ru ma kei.’ Te uwa wẹ vbene I ya ru emwi ma kei? Vbene uwa ya ru emwi ọ re ọ ma kei.

³⁰ “Mẹ ne Nọyaẹnmwa ne Udazi ọ re ọ tama uwa ne ivbi Izrẹl na nian wẹ emwi ne dọmwadẹ ọghọe vbe uwu uwa ru ọ re I ra ya bu ohiẹn ọnrẹn. Wa rhie obọ hin emwi dan ne uwa ru hia rre, ne uwa ghẹ gie orukhọ ne uwa ru gbe uwa uhunmwu.

³¹ Wa sẹ avbe emwi dan ne uwa te ka ru de yi rae, ne uwa gie iro ọgbọn kevbe ekhọe ọgbọn la uwa orhiọn. Vbọzẹ ne uwa na ho ne uwa wulo yi, wa ne ivbi Izrẹl.”

³² E Nọyaẹnmwa ne Udazi khare wẹẹ, “Mẹ iho ne ọmwarhọkpa wu. Wa zobọ vbe orukhọ ne uwa ru, ne uwa he diagbọnya.”