Ezikiẹl 17 - Edo Bible (E Baibol Ẹdo) Version 1996

Itan Avbe Oghohọn Kevbe Azara

¹ E Nọyaẹnmwa keghi gunmwẹ guan wẹẹ,

² “Ovbi ọmwa, kpa itan okpa ma ivbi Izrẹl.

³ Ne iran rẹn emwi ne imẹ ne Nọyaẹnmwa ne Udazi tama iran na. Oghohọn ne gẹdẹgbẹẹ okpa kegha rrọọ, igan rẹn hia wa kọnkọn, ehia keghi vbe mose, ọ ghi wa rhan ifuẹn ni uan gbadaa. Ọ keghi tin gha rrie uhunmwu oke Lebanọn, ọ na kpan ukpe sida ọkpa,

⁴ ọ na mu ẹẹn gha rrie otọe ne a na do ẹki, ọ na vbe mu ẹẹn ye ẹvbo ne a na do ẹki.

⁵ Vbe iyeke ọnii, ọ keghi vbọ ovbi erhan okpa vbe Izrẹl, ọ keghi ya gbọ ẹre ye otọe ne ọ maa emwiokọ ẹsẹse, ehe ne amẹ wa ye ne ọ gha miẹn ya gha wan vbe ẹghẹ hia.

⁶ Ovbi erhan na keghi gbọọ, ọ na khian erhan azara ne ọ ma tan ne ọ wa valọ abọ gba ehe hia. Abọ ẹre keghi tan ghe odukhunmwu gha rrie ehe ne oghohọn ni ye, avbe inian rẹn ke wa dinmwi la uwu otọ. Azara, abọ, ke ebe ke wa gba ẹre.

⁷ “Oghohọn ne gẹdẹgbẹ ọvbehe keghi vbe gha rrọ ne ọ mwẹ ifuẹn ni taẹn kevbe igan nibun ẹsẹse. Azara nii keghi viọ inian rẹn gha rrie ehe ne ọ ye, ọ na vbe viọ avbe ebe ẹre da ẹre vbe idaehọ wẹ ọ gha miẹn amẹ vbe obọ ẹre sẹ vbene ọ ye vbe ehe ne a kọe yi vbe uwu ogba ne ọ na waan nii.

⁸ Ehe ne a kọ azara na yi keghi re ehe ne ọ maa emwiokọ ne amẹ wa ye ne ọ miẹn ehe na họn ebe ẹsẹse kevbe ne ọ vbe mọ, ne ọ gha re azara nọ mose ẹsẹse.

⁹ “Ọta ne imẹ ne Nọyaẹnmwa ne Udazi ghi nọ nian ọrọre. Azara na gha sẹtin gha rrọ ra ne ọ vbe gha wan yọ? Ẹ i re te oghohọn ne okaro ra si ẹe vbọ fua ne ọkhuọn ẹre ọmọ kua, ne ọ bunnọ ẹre abọ, ne ọ gie ehia vbe kaka a? A i vbe gualọ olẹtin ra okpẹvbo nọkhua ne ọ gha do si ẹe vbọ fua.

¹⁰ Ẹmwata nọ wẹ a gbọ ẹre sokpan, ọ gha sẹtin gha rrọ ne ọ vbe wan ra? Ẹ i re te ọ ra luẹ luẹ vbe ẹhoho odẹ ahọ a dekun ẹnrẹn. Ẹ i re te ọ ra luẹluẹ ye ehe ne ọ na wan khian nii?”

A Rhan Otọ Itan Ni

¹¹ E Nọyaẹnmwa keghi tama mwẹ wẹẹ,

¹² “Nọ avbe etẹ nia, a deghẹ iran rẹn emwi ne a ya itan na kha. Tama iran wẹ ọba e Babilọn rre, ọ keghi do mu ọba kevbe avbe ekhaẹmwẹ vbe Jerusalẹm gha rrie Babilọn.

¹³ Ọ keghi rhie okpa vbe uwu ivbi ẹgbẹe ọba, ọ keghi gu ẹe rhie obọ ye ebe wẹ ne ọ gha ga gie irẹn vbe ekhọe esi. Ọ keghi viọ emwa kpataki ye iyoha.

¹⁴ Ne avbe uhunmwu ẹvbo nii hia ghẹghi dọlegbe sọtẹ kevbe ne a vbe miẹn wẹ ile ne iran gba ta, a ya ẹe ru emwi.

¹⁵ Sokpan, Ọba Izrẹl keghi sọtẹ, ọ keghi gie gha rrie Igipt ne iran ya viọ avbe ẹsin kevbe ivbiyokuo nibun gie irẹn. Ọ gha dunna ne ẹẹn ra? Emwi hia gha wa lẹ ọre fe vberriọ ra? Rẹn i sẹtin rra ile ne ọ wa gha khian vbe ne a i na rrioya!

¹⁶ “Omwa vbene a na miẹn wẹẹ mẹ ọrọre Osanobua ne ọ rrọọ, erriọ e Nọyaẹnmwa ne Udazi khare, e Babilọn ọ re ọba na ra wu yi rhunmwuda ọ rra iyi kevbe ebe ne ọ gu ọba e Babilọn ne ọ ma ẹre ọba rhie obọ yi.

¹⁷ Ivbiyokuo ni wegbe ne ọba Igipt mwẹ i ra sẹtin ru iyobọ vbe ẹghẹ ne ivbi e Babilọn gha na do gbe ekẹn, iran ghi vbe tọnnọ uvun lẹga ẹre ne iran miẹn ehe na gbele emwa nibun.

¹⁸ Ọ rri ihen ne ọ vẹn, ọ rra ebe ne ọ rhie obọ yi. Ọ ru avbe emwi na hia, banbanna nian, ẹ i miẹn uhunmwu.”

¹⁹ E Nọyaẹnmwa ne Udazi khare wẹẹ, “Omwa vbene a na miẹn wẹ mẹ ọrọre Osanobua ne ọ rrọ, I gha rri ọre oya ye ne ọ na rra ile ne ọ ya eni mwẹ vẹn ihen yi wẹ rẹn gha ya ẹe ru emwi.

²⁰ I gha fi oga ohuẹ, I gha ya ẹe mu ẹẹn, I gha mu ẹẹn gha rrie Babilọn, I ghi ya rri ọre oya vbe odọ rhunmwuda, ọ ma gun mwẹ yin uyinmwẹ ẹmwata.

²¹ “A gha gbele avbe ivbiyokuo ẹre ni maa sẹ vbe okuo, a ghi zagha iran ni miẹn uhunmwu vbọ gba ehehia. Ẹghẹ nii, wa gha na rẹn wẹ mẹ ne Nọyaẹnmwa ọre ọ tae.”

Eyan Idaehọ Ọghe Osanobua

²² Vbenian ọ re Nọyaẹnmwa ne Udazi khare: “I gha rhie ukpe isida ne ọ taẹn I ghi bun ehọn ne sọguọsọguọ I ghi ya gbọ ẹre ye oke ne ọ yo

²³ ye oke ne ọ yo sẹẹ vbe Izrẹl. Ọ gha zẹlẹ abọ, ọ ghi vbe mọ, ọ ghi do khian isida ne mose mose. Ahianmwẹ ughughan gha di evba ya, iran ghi miẹn ehe dia vbe irhu ẹre.

²⁴ Avbe erhan ni rre otọe nii hia gha rẹn wẹ mẹ ọrọre Nọyaẹnmwa. I tọnnọ avbe erhan ni taẹn gbotọ, I keghi ya erhan negiẹrẹ khian ni taẹn, I ya erhan ni mwẹ ebe khian ni luẹluẹe, I keghi ye avbe erhan ni kaka a, khian ni họn ebe kukuku. Mẹ ne Nọyaẹnmwa ta emwi ne I wẹ I gha ru nẹ, te I ru ẹe.”