Ezikiẹl 16 - Edo Bible (E Baibol Ẹdo) Version 1996

E Jerusalẹm Ne Ẹ I Yin Ẹse

¹ E Nọyaẹnmwa keghi dọlegbe gun mwẹ guan, ọ wẹẹ,

² “Ovbi ọmwa, rhie uyinmwẹ osọnnọ ne Jerusalẹm yin ma rẹn.

³ Tama e Jerusalẹm, emwi ne Nọyaẹnmwa tama rẹn na wẹẹ: “Otọe Kenan ọ re a na biọ. Ovbi Amọri ọre erha gha khin, iye uẹ ke gha re ovbi e Hiti.

⁴ Ẹghẹ ne a na biọ, a ma miẹn ọmwa ne ọ fian an ukhọn, ra ne ọ khue ruẹ ra ne ọ ya umwẹ wo ruẹ, ra ne ọ ya ukpọn vbuẹ ruẹ.

⁵ A ma miẹn ne ọ tohan ruẹn ne ọ ru avbe emwi na rhọkpa nuẹn. Ẹghẹ ne a na biọ, ọmwa rhọkpa ma ho ẹmwẹ ruẹn a keghi wa fi ọ fi oha kẹkan.

⁶ “Mẹ ghi la evba nii gberra, I keghi bẹghe ruẹ vbe u wunnu vbe uwu esagiẹn ruẹn. Te esagiẹn wa ro gue ruẹ, sokpan I ma se uẹ rae ne u wu.

⁷ I keghi guẹ wan ghe ukhunmwu zẹvbe ovbi erhan ne egbe rranrẹn. U keghi wan do gha re ọmwa ne ọ wegbe ke ne ọ zogọ, u na do gha re uvbi. U wa vbe ho ewẹn ẹse, eto ruẹ keghi tan sokpan u keghi rre irhunmwuirhun.

⁸ “I ghi vbe dọlegbe gberra, I keghi miẹn wẹ ẹghẹ sẹ nẹ ne ẹmwẹ okpia gha ya gha rre uẹ aro. I keghi ya ẹwu mwẹ gue egbe ruẹ ne u bannọ yotọ, I keghi yan ma ruẹn ighe I gha ho ẹmwẹ ruẹn. Vbe ẹmwata, I keghi guẹ rhie obọ ye ebe wẹ I gha rhie ruẹ rọnmwẹ, wẹ na ghi do gha re ọghomwẹ.” Erriọ ọre Osanobua ne Udazi khare.

⁹ “Vbe iyekọnii, I keghi mu amẹ I na kpe esagiẹn ni hin ruẹn egbe rre. I keghi ya ofigbọn oliv wo ruẹ egbe.

¹⁰ I viọ ẹwu ne a do emwi lele ne uẹn yọ, I keghi viọ ibata ye uẹ owẹ, ibata ọghe ohian ne ọ maa sẹẹ. I rhie ugbaleto etovbiohuẹ ne uẹn deba ẹwu ne a mu yan egbe ọghe esiliki.

¹¹ I viọ emwi ya te ruẹ egbe, avbe emwiobọ kevbe emwi urhu ikpẹrọnmwọ.

¹² I rhie oroka ihue kevbeemwi-ehọ ne uẹn, deba ẹde ne mose mose ne u mu rhuẹ.

¹³ U kegha mwẹ emwi itegbe ọghe igoru kevbe esiliva, ukpọn ne u yọ ẹghẹ hia kegha re ọghe etovbiohuẹ kevbe esiliki ne a munọ ona lele. Ebrẹd ne a ya irhuarhua ne ọ maa sẹ le ọ re u re, u keghi miẹn owọn kevbe ofigbọn oliv gha re. Ose ruẹ kegha nọnọ, u na do gha re ọba okhuo.

¹⁴ Otiti ruẹ keghi gba uhunmwu ẹvbo hia rhunmwuda ose ruẹ ne ẹ i mwẹ okan rhunmwuda mẹ ọrọre ọmwa ne ọ ya uwa khian olose vberriọ.” Erriọ ọ re Nọyaẹnmwa ne Udazi khare.

¹⁵ “Sokpan, ẹmwẹ ose ruẹ keghi la ruẹ uhunmwu sẹrriọ wẹ okpia ne ọ ghi wa rre hia ọ re u kue na.

¹⁶ U ya ukpọn eso ne u mwẹ te ehe ne u na ga, u kegha kue ne emwa hia zẹ vbene igberagie gha ru zẹẹ,

¹⁷ emwi itegbe ọghe igoru kevbe esiliva ne I viọ ne uẹn, u keghi viọ iran ya gha mannọ amazẹ ikpia, u na gha gu iran ru oghẹ.

¹⁸ U viọ ukpọn ne a munọ ona lele ne I viọ ne uẹn, u keghi yọ avbe amazẹ ni re. Ofigbọn oliv kevbe eturari ne I viọ ne uẹn, u kegha ya iran mu ohan gie iran.

¹⁹ I viọ evbare ne uẹn — avbe irhuarhua ne ọ maa sẹẹ ke ofigbọn oliv kevbe owọn, sokpan, u keghi ya ehia mu ohan, ne avbe amazẹ miẹn ehe na gha ghe ruẹ ẹse.” Erriọ Nọyaẹnmwa ne Udazi khare.

²⁰ “Iyeke ọnii, u keghi viọ emọ ikpia kevbe emọ ikhuo ne u biẹlẹ mẹ, u na ya iran zọ ese ne ẹbọ. Adeghẹ te u ma ga mwẹ,

²¹ ighẹ u ma viọ mwẹ emọ ya zọ ese ne ẹbọ, ọnii ma he ye rhia sẹ ra?

²² Ẹghẹ ne u na gha lo ẹdẹ ruẹ ye uyinmwẹ ẹwia ọghe igberagia, u ma ghi dọlegbe ye ẹghẹ ne u na gha rre ọvbokhan rre ọvbehe, ẹghẹ ne u na gha rre irhunmwuirhun, ne u na gha wunnu vbe uwu esagiẹn ruẹn.”

Ẹdagbọn E Jerusalẹm Zẹvbe igberagia

²³ E Nọyaẹnmwa ne Udazi khare wẹẹ, “Ọwuẹ fo! Ọ fo vbe otọ! U ru avbe emwi dan ni hia nẹ, u keghi bọlọ owa,

²⁴ lele ọkpẹn odẹ hia, ne u na gha gho ẹbọ kevbe ne u miẹn na gha gbe igberagia.

²⁵ U ya ose ruẹ kpolo ọrho, te uwa gha kue ne emwa hia ni rre, edẹgbedẹgbe ọ re u ya gha guẹ iwinna igberagia yọ.

²⁶ Emwa ẹdogbo ruẹ ne ọ fifi ẹre egbe ighe ivbi Igipt, u ke vbe gie iran guẹ ru emwi, u keghi ye igberagia ne u gbe gha ya ohu mu mwẹ.

²⁷ “Banbanna nian, I tọn obọ mwẹ mu nẹ ne I ya rri uwẹ oya, kevbe ne I miẹn ruẹn afiangbe mwẹ ne ọ te sẹ uẹ obọ. I rhie ruẹ yan avbe Filistin obọ nẹ, emwa ni wa khuiwu ruẹ kevbe ne uyinmwẹ ukẹkẹmwẹ ne u yin wa sọnnọ.

²⁸ Rhunmwuda ighe ẹko iran nekpa ma vuọn ọn, u keghi vbe kpe lele ivbi Asiria. U ke gha re igberagia iran sokpan, iran ma sẹtin sẹ uẹ ọkẹn.

²⁹ Igberagia e Babilọn ọ re u vbe gha khin sokpan, iran ma vbe sẹ uẹ ọkẹn ighe ẹvbo nii ni wa sẹtin fian emwi gbe ua.”

³⁰ Vbenian ọ re Nọyaẹnmwa ne Udazi ghi kha nian: “Te uwa ru avbe emwi na hia zẹ vbe igberagia ne okhuo ekhue i mu awa.

³¹ U bọlọ ivbi owa lele idunmwu hia ne u na ru ẹbọ ke ne u na gbe igberagia. Sokpan, wẹ ma gha koko igho zẹ vbene avbe igberagia kẹkan ru ẹe.

³² Te u ye vbe okhuo ne ọ ya gha gu avbe orhunmwuyẹn ru ọghe vbene ọ gha na te gha ho ẹmwẹ ọdọ ẹre.

³³ Te a ha osa ne igberagia, sokpan te uwẹ gha viọ emwi gie avbe egbakhian ruẹn, u na zẹ igho ya rinmwian iran ne iran gha ke ehe hia rre do gha guẹ ru emwi.

³⁴ Egbe igberagia ne uwẹ khin vbọ wa lughaẹn. Ọmwa ne ọ ye obọ yọn ruẹn urhu ne u gha re igberagia, ẹ i rrọ. A ma gha ha osa ne uẹn; te uwẹ gha ha osa ne iran, wẹ wa lughaẹn fẹẹrẹ.”

Osanobua Buohiẹn E Jerusalẹm

³⁵ Rhunmwuda ọnii nian, e Jerusalẹm ne ẹwia! Danmwehọ vbene Nọyaẹnmwa ne Udazi kha hẹ.

³⁶ Vbenian ọ re Nọyaẹnmwa ne Udazi khare: “U bannọ ukpọn ruẹn hia kua u keghi wẹ iran larre ighẹ egbakhian ruẹn kevbe avbe ẹbọ osọnnọ ruẹn hia, zẹ vbe igberagia zẹẹ, u keghi gbele avbe ivbuẹ ya zọ ese ne avbe ẹbọ.

³⁷ Rhunmwuda emwi na, I si avbe egbakhian ruẹn nẹdẹ hia koko, iran ne ẹmwẹ ọnrẹn gha yẹ ruẹ kevbe iran ne u ma ho ẹmwẹ ọnrẹn, I gha viọ iran rre ne iran do doga ruẹ, I ghi bannọ ọn ukpọn hẹ kua, ne iran miẹn uwẹ eban ra vbe u rre irhunmwuirhun.

³⁸ I gha bu ohiẹn gbe uẹ rhunmwuda ọghe kevbe izigha, ke vbe uwu ohu ne ọ mu mwẹ, I gha ya uwu rri ọ oya gbua.

³⁹ I gha rhie ruẹ ye iran obọ, iran ghi dunmwu ehia ighẹ ehe ne u na gbe igberagia kevbe ne u na gho ẹbọ, iran gha miẹn ruẹn avbe ikpẹrọnmwọ ne u ya te egbe, kevbe avbe ukpọn ruẹn, iran ghi sẹ uẹ rae ye irhunmwuirhun.

⁴⁰ “Iran gha tie oguo ye uẹ egbe ne iran filo okuta gbe uẹ ua. Iran gha vbe ya umozo iran giagia a ukhiọnmwu khiọnmwẹ.

⁴¹ Iran gha gien owa ruẹ sẹ otọ, iran ghi vbe gie avbe ikhuo do gha bi ghe oya ne a rri ọ re. I gha da ruẹ obọ igberagia ne u gbe yi, I ghi vbe ru ẹe ne u ghẹ ghi ya emwi ne avbe egbakhian ruẹn.

⁴² Ẹghẹ nii, ohu gha fo mwẹ vbe ẹko, I ghi hẹwẹ vbọ. I i ghi mu ohu ra ne ẹko ye gha khọ mwẹ ọvbehe.

⁴³ U mianmian obọ ne I ya mu ẹẹn vbe u ye kherhe nẹ, u ke do ye avbe emwi ne u gha ru mu mwẹ ohu. Ọnii ọ sii ẹe ne I na ru ẹe ne u rrioya ye ehia. Vbọzẹ ne u na vbe rhie ọghe ba uyinmwẹ ẹwia hia ne u yin?” E Nọyaẹnmwa ne Udazi guan nẹ.

Emwi Ne Iye Guee Ọre Ovbi Ẹre Nokhuo Vbe Guee

⁴⁴ E Nọyaẹnmwa keghi kha wẹẹ, “Emwa gha kpa itan na vbekpa ruẹ Jerusalẹm: ‘Emwi ne iye guee ọ re ovbi ẹre nokhuo guẹe.’

⁴⁵ Vbe ẹmwata, iye uẹ ọ re ọ gele biẹ ọ. Te ẹmwẹ ọdọ ẹre kevbe avbe ivbi ẹre wa gha sọnnọ ẹẹn. Te uwẹ wa vbe yevbe avbe ivbiye uẹ, ovbi e Hiti ọ re iye uwa gha khin, ovbi Amọri ọ re erha uwa gha khin.

⁴⁶ Ọtuẹn nokhuo nọdiọn, ke ẹe ke avbe igue ne ọ mwẹ, ọrọre Sameria ne ọ rre odẹ okuọ. Ọtuẹn nokhuo nekherhe, ke ẹe ke avbe igue ẹre, ọrọre Sọdom vbe odẹ ekẹn.

⁴⁷ “Ọ ma sẹ uwẹ ọkẹn ra ne u gha la odẹ ne iran lae, ne u vbe gha yegbe ta uyinmwẹ ẹwia iran? Hiehiere, vbe ovbi ẹghẹ kherhe, u ke ru emwi ne ọ rhia sẹ ọghe iran vbe emwi ne u ru hia.”

⁴⁸ E Nọyaẹnmwa ne Udazi khare wẹẹ, “Omwa vbe ne a na miẹn wẹ mẹ ọrọre Osanobua ne ọ rrọọ, e Sọdom ne ọtuẹn nokhuo kevbe avbe igue ẹre ma ru avbe emwi dan ne uwẹ vbe avbe igue ruẹ ru.

⁴⁹ Te irẹn kevbe ivbi ẹre nikhuo gha hio rhunmwuda ọkpọkua ne iran gha re, iran keghi vbe gha rrọ vbe ọfumwegbe kevbe a i mwẹ oyanghan, sokpan iran ma gbearoghe avbe ivbiogue kevbe iran ne ọ ma dunna na.

⁵⁰ Iran wa gha hio, iran kevbe ze vbe ẹkoko udu, iran na gha ru avbe emwi ni sọnnọ mwẹ. rhunmwuda ọnii, I keghi fuẹn iran an zẹ vbene uwẹ tobọruẹ rẹnrẹn.

⁵¹ “E Sameria ma ru orukhọ vba ukhiọnmwẹ ọghe uwẹ. Uyinmwẹ ruẹn kakabọ sọnnọ sẹẹ ọghe ọe ẹsẹse. Vbene uwẹ ghi rhia sẹ, a gha ya uwa vbe iran gie egbe, iran ghi gha re ne ẹ i mwẹ orukhọ.

⁵² Banbanna nian, u ghi ye egbe miẹn efa ne ọ khẹ ke uẹ. Orukhọ ruẹ ye ọrhẹnrhẹn rhia sẹ ọghe avbe etuẹn sẹrriọ wẹ, iran gha mudia ke uẹ, iran ghi gha re ne ẹ i mwẹ orukhọ. Banbanna nian, mu aro lẹre ne u gie oya ruẹ vbiẹ ruẹ egbe rhunmwuda, te u ghi gia gha ghe etuẹn zẹ vbe emwa ni i mwẹ orukhọ.”

A Gha Viọ E Sọdom Kevbe Sameria Ye Ihe

⁵³ E Nọyaẹnmwa keghi tama e Jerusalẹm wẹẹ, “I gha dọlegbe gie agbọn maa iran ighẹ Sọdom kevbe avbe igue ẹre kevbe Sameria deba avbe igue ẹre, ẹn, I gha ru ẹe ne agbọn vbe ma uwẹ tobọruẹ.

⁵⁴ Egbe ruẹ, gha sọnnọ ọn, efa ne ọ rre egbe uẹ ọ re ọ ghi ra tama avbe etuẹn nikhuo ighẹ agbọn esiesi ọ re iran ye.

⁵⁵ Agbọn gha dọlegbe maa ruẹn deba ẹre, a gha dọlegbe rhie uwẹ kevbe avbe igue ruẹ ye ihe.

⁵⁶ Ẹghẹ nii uwẹ na gha hio, ẹghẹ nii, te uwẹ gha ta e Sọdom gie.

⁵⁷ Vbe ẹghẹ nii ne a ma na he fannọ ọn uhe ua. Banbanna nian, okpa wẹ vbe ọre ghi gba khin, emwi ne iran ta giẹ ighẹ ivbi Idom, ivbi Filistin, kevbe ẹdogbo ruẹ nekpa ne ohu ruẹ mu.

⁵⁸ Te u gha rrioya ye emwi ọrhiae ne ọ wia ne u ru.” E Nọyaẹnmwa guan nẹ.

Ile Ne Ọ Rrọ Ẹdẹdẹmwẹdẹ

⁵⁹ E Nọyaẹnmwa ne Udazi khare wẹẹ, “I gha ru uwẹ emwi ne ọ ma uwẹ. Rhunmwuda u yangbe eyan ne u yan rẹn, u ke mu ile ne a tae fua.

⁶⁰ Sokpan, mẹ gha da ile ne I gu uẹ ta ẹghẹ ne u na ye kherhe yi. I ghi vbe do gu uẹ ta ile ne ọ gha rrọ rhinrin ẹdẹdẹmwẹdẹ.

⁶¹ U gha rẹn emwi ne u ru, ekhue ghi vbe mu ẹẹn vbe avbe otuẹn nokhuo nọdiọn ke ọtuẹn nokhuo nekherhe a rre. I gha gie iran gha yevbe emọ ikhuo ne uẹn, a gha rhe rẹn ighe ọna i rre ile ne I gu uẹ ta.

⁶² I gha dọlegbe rhie obọ ye ile ne I gu uẹ ta, wẹ ghi do rẹn ighe mẹ ọrọre Nọyaẹnmwa.

⁶³ I gha ya emwi ne u baku ru hia bọọ. Sokpan wẹ gha ye iran rre, ekhue i ra gie uwẹ vbe rhan unu ruẹn.” E Nọyaẹnmwa ne Udazi tae nẹ.