Ezikiẹl 13 - Edo Bible (E Baibol Ẹdo) Version 1996

Ẹmwẹ Akhasẹ Vbekpa Avbe Akhasẹ Ohoghe Nikpia

¹ E Nọyaẹnmwa keghi tama mwẹ wẹẹ,

² “Ovbi ọmwa, ta ku avbe akhasẹ ni rre Izrẹl, emwa ni zẹ ẹmwẹ obọ iran ta zẹvbe ẹmwẹ akhasẹ. Tama iran ne iran danmwehọ ẹmwẹ e Nọyaẹnmwa.”

³ Vbenian ọre Nọyaẹnmwa ne Udazi khare: “Ọghe avbe akhasẹ ne akpa na fo. Iran ọ tobọ iran fian ọghae ye egbe iran uhunmwu, iran ghi vbe gha zẹ ẹmwẹ akhasẹ iran ta.

⁴ Wa ne ivbi Izrẹl, avbe akhasẹ uwa rhia sẹ avbe umuọkhọkhọ ni rre uwu itowa vbe adesẹ ore ẹvbo.

⁵ Iran i khẹ avbe ehe ne ekẹn na deguọghọ rua nẹ, a ma ghi wẹ ne iran dọlọ ekẹn nii gbe, rhunmwuda ọnii, a i sẹtin khẹ igbinna vbe ẹdẹ ne okuo gha la e Jerusalẹm vbe ẹdẹ e Nọyaẹnmwa.

⁶ Imamase ọ re umian iran khin, ohoghe ọ re ẹmwẹ ne iran guan yotọ vbe khin. Iran ghi kha wẹ uhunmwu ne I gie ọ re iran ta, vberriọ, I ma zẹdẹ gie iran. Iran ghi ye vbe gha kha wẹ ẹmwẹ iran gha sẹ!

⁷ I tama iran wẹẹ: Wa khare wẹ ẹmwẹ imẹ ọre eni khin, sokpan, I ma ta ẹmwẹ rhọkpa ma uwa hiehiere.”

⁸ Rhunmwuda ọnii, e Nọyaẹnmwa ne Udazi tama iran wẹẹ, “Emwi ne a zẹ ta ọ re ẹmwẹ uwa khin, ohoghe ọ re umian uwa vbe khin, rhunmwuda ọnii, ohu uwa wa mu mwẹ.

⁹ Ẹ i ghi rrei gbe I rri uwa ne akhasẹ ni miẹn umian ohoghe oya, ne uwa na vbe ta emwi ne a miẹn yotọ ni de ọmwa odẹ. Wa i ra gha rre evba vbe ẹghẹ ne avbe emwa mwẹ gha na si koko ne iran ta vbene iran gha ru emwi hẹ, a i ra vbe gbẹnnẹ eni uwa ba ọghe ivbi emotọ Izrẹl, wa i ra vbe dọlegbe gha rrie otọe uwa ẹdẹdẹmwẹdẹ. Ẹghẹ nii, wa gha na rẹn ighe mẹ ọrọre e Nọyaẹnmwa ne Udazi.

¹⁰ “Avbe akhasẹ ọ re ọ de avbe emwa mwẹ odẹ vbekpa ne iran na bọ ọma ọma ne iran. Ẹ i zẹdẹ ye ẹse hiehiere. Avbe emwa mwẹ ye okuta ne wẹghẹwẹghẹ gbe ekẹn ọlẹga ẹvbo nẹ, avbe akhasẹ na do ya orhue dọlọ ẹe.

¹¹ Tama avbe akhasẹ ighe ekẹn iran gha de. I gha si okpamẹ, avbe isan avan gha dele gbe ẹe, okpẹhoho gha vbe bi ẹe.

¹² Ekẹn ni gha de. Emwa hia gha do nọ uwa asa ne orhue ne a ya dọlọ ẹe ghi khin vbọ.”

¹³ Banbanna nian, vbenian ọ re Nọyaẹnmwa ne Udazi khare: “Vbe uwu ohu ne ọ mu mwẹ, I gha gie okpẹhoho, okpamẹ kevbe isan avan ni dele, ne iran dunmwu ekẹn nii uan.

¹⁴ I wẹ I gha guọghọ ekẹn nii ne iran ya orhue dọlọ gbotọ, ne I wiẹghẹ ọe rua, ke ne I vbe ya okuta ẹyotọ ẹre khian ne a ghi bẹghe. Ọ gha de guọghọ ua, ọ ghi gbele uwa hia a. Ẹghẹ nii, emwa hia gha rẹn i ghẹ mẹ ọrọre Nọyaẹnmwa.

¹⁵ “Nene ekẹn kevbe avbe emwa ni ya orhue dọlọ ẹe gha họn ẹmwẹ obọ ohu mwẹ vbe egbe, ẹghẹ nii, I ghi tama uwa ighe ekẹn nii la ọrhiae rrie nẹ, erriọ vbe nọ ighe iran ni ya orhue dọlọ ẹe —

¹⁶ avbe akhasẹ ni gha bọ ọ maa, ọ maa ne Jerusalẹm nii, vbe emwi i zẹdẹ maa!” E Nọyaẹnmwa ne Udazi guan nẹ.

Ẹmwẹ Akhasẹ Vbekpa Avbe Akhasẹ Ohoghe Nikhuo

¹⁷ E Nọyaẹnmwa keghi kha wẹẹ, “Banbanna nian, ovbi ọmwa, ghe avbe ikhuo ni rre uwu emwa ruẹn, iran ni zẹ ẹmwẹ ne a ta yotọ ta. Ta ku iran.

¹⁸ Ne u vbe tama iran ẹmwẹ ne Nọyaẹnmwa ne Udazi tama iran wẹẹ: “Wa ne ikhuo na, ọghe uwa fo. Wa ru emwiobọ ẹbo ne emwa, wa ghi vbe gha sele ukhiọnfọ ẹyaẹn ẹbo ne emwa gha rri ye urhu ne iran sẹtin gha mwẹ ẹtin vbe uhunmwu ẹdagbọn emwa ọvbehe. Wa ho ne uwa gha mwẹ asẹ uwu kevbe ẹfe vbe uhunmwu emwa mwẹ, ne uwa miẹn ehe na gha ya iran ru enegbe uwa.

¹⁹ Wa sirra emwa mwẹ yagha mwẹ ne iran miẹn ehe na zẹ uguobọ ọka eso ne uwa, ne iran vbe viọ iku ebrẹd eso ne uwa. Wa gbele avbe emwa ne uwu ma khẹ ke, emwa ni ma khẹke ne iran gha rre agbọn, wa ghi sẹ iran rae. Erriọ wa ya ta ohoghe ma emwa mwẹ, iran ghi vbe gha rhie ẹmwẹ uwa.”

²⁰ Banbanna nian, vbenian ọ re e Nọyaẹnmwa ne Udazi khare: “Egba ne uwa mu ye obọ, vbe uwu ne uwa na ho ne uwa sẹtin gha ta vbene ẹdagbọn ọmwa gha khian hẹ, ọ wa sọnnọ mwẹ. I gha sanmwẹ ọẹn hin obọ uwa rre, I ghi fannọ iran ighe avbe emwa ne uwa te digiẹn yan ẹre ẹdagbọn.

²¹ I gha sanmwẹ ukhiọnfọ ẹyaẹn uwa kua, I ghi vbe gie avbe emwa mwẹ lẹ obọ ẹtin uwa fe ọghe ọfo vbotọ ẹdẹdẹmwẹdẹ. Ẹghẹ nii wa gha na rẹn ighe mẹ ọrọre Nọyaẹnmwa.

²² Wa wa ya ohoghe ne uwa tae gbin emwa esi ẹtin, avbe emwa ne imẹ i ho ni ru ẹre emwi rhọkpa. Wa i gie emwa dan zobọ vbe emwi dan ne iran ru, ne iran rhie uhunmwu iran ke ẹbe ladian.

²³ “Ghe nian ighe ọfo vbotọ ighẹ umian emamase kevbe a ta yotọ, ne ọ de ọmwa odẹ, ne uwa ta. Mẹ ra wọlọ emwa mwẹ hin obọ ẹtin uwa rre nian, ne uwa miẹn ehe na rẹn ighẹ mẹ ọrọre Nọyaẹnmwa.”