Ezikiẹl 12 - Edo Bible (E Baibol Ẹdo) Version 1996

Akhasẹ, Zẹ Vbe Ọmwa Ne Ọ Lẹ Fi Ẹvbo Ẹrrẹe

¹ E Nọyaẹnmwa keghi tama mwẹ wẹẹ,

² “Ovbi ọmwa, uwu ẹbu etẹ ọ re u ye. Iran mwẹ aro sokpan, iran i bẹghe emwi rhọkpa, iran mwẹ ehọ, sokpan, iran i họn ẹmwẹ rhọkpa, rhunmwuda, etẹ ọ re iran khin.

³ “Banbanna nian, ovbi ọmwa kun emwi zẹ vbe ne ọmwa ne ọ lẹ la ẹvbo ẹrrẹe gha wa ru zẹẹ, ne u deyan okhian vbe ẹdẹ te mu. Gie emwa hia bẹghe ruẹ vbe u a ra kpao ne u gha rrie ehe ọvbehe. Ughaghe, avbe etẹ nii gha bẹghe ruẹ.

⁴ Vbe ẹghẹ avan kun emwi ruẹn zẹ vbe ọmwa ne ọ rrie iwe, ne iran miẹn ehe na bẹghe ruẹ, gie iran hia vbe bẹghe ruẹ vbe u a kpa hin ore ẹvbo nii rre vbe ota vbene a miẹn wẹ te u rrie iwe.

⁵ Ehe ne iran na ghe ruẹ nii, u ghi ha uvun la ekẹn owa ruẹ ladian, avbe emwi ne u kunrun nii, u ghi viọ ehia la evba ladian.

⁶ Gie iran bẹghe ruẹ vbe u gha mu ihẹ ne u kunrun yan izabọ, kevbe vbe u a vbe ladian la uwu ebiebi vbe aro ne a gbalọe, sẹrriọ wẹ u i ghi bẹghe ehe ne u rrie. Emwi ne u ru ghi gha re ne a ya ta ẹmwẹ ma ivbi Izrẹl yotọ khẹ ọ dee.”

⁷ I keghi ru vbene e Nọyaẹnmwa tama mwẹ ne I ru. Vbe ẹdẹrriọ, I keghi kun emwi vbene ọmwa ne ọ lẹ fi ẹvbo ẹrrẹe gha ru. Ọ ghi sẹ ota vbe ebiebi ghi da so khian, I keghi ya obọ mwẹ fian uvun la ekẹn, I keghi ladian, vbene iran na wa ghe mwẹ nii, I mu ihẹ ne I kunrun ye izabọ, I na kpao.

⁸ Vbe owiẹ ne ọ lele ẹe, e Nọyaẹnmwa keghi tama mwẹ wẹẹ,

⁹ “Ovbi ọmwa, vbene avbe ivbi Izrẹl ne etẹ ghi na nọ ruẹn emwi ne u ru,

¹⁰ tama iran emwi ne imẹ ne Nọyaẹnmwa ne Udazi tama iran. Ovbi ọba ne ọ khaemwisẹ vbe Jerusalẹm kevbe avbe emwa hia ni rrọ, ọ re a giee uhunmwu na gie.

¹¹ Tama iran wẹ emwi ne u ru hia kegha re ama emwi ne ọ gha sunu vbe egbe iran — iran gha khian emwa ni lẹ ku ẹvbo ẹrrẹe kevbe oghunmwu.

¹² Ovbi ọba ne ọ gbearoghe iran, asọn ọ re ọ ra ya kun emwi ẹnrẹn yan izabọ, ọ ghi la uvun ne a ha la ekẹn nẹ lẹfua. Ọ gha gbalọ aro, ẹ i ra vbe bẹghe ehe ne ọ rrie.

¹³ “Sokpan I gha tan ọga ye odẹ, I ghi ya ẹe mu ẹẹn. I ghi mu ẹẹn gha rrie ore e Babilọn, ehe ne ọ ra na wu vbe ne ẹ i na bẹghe ẹre.

¹⁴ I gha zagha iran ku ehe hia ighe emwa ẹguae ẹre, iran ni gu ẹe zẹ iro kevbe iran ne ọ ya khẹ egbe, emwa gha vbe gualọ iran ne a gbele iran an.

¹⁵ “I gha zagha iran ku uwu ẹbu uhunmwu ẹvbo nekpa nẹ, kevbe ẹvbo ẹrrẹe, iran gha rẹn wẹ mẹ ọrọre Nọyaẹnmwa.

¹⁶ I gha gie ihozẹghẹ vbe uwu iran miẹn uhunmwu vbe nene okuo, ukhunmwu kevbe emianmwẹ, vbene a gha na miẹn wẹ iran ghẹ ghi gha rre uwu ẹbu ẹvbo ọvbehe nẹ, iran gha rẹn vbene uyinmwẹ iran zughu ọmwa ẹko hẹ, iran ghi miẹn kue ighe mẹ ọrọre Nọyaẹnmwa.”

Ama Ọghe Akhasẹ Ne Ọ Guọ Zẹzẹzẹ

¹⁷ E Nọyaẹnmwa keghi tama mwẹ wẹẹ,

¹⁸ “Ovbi ọmwa, gha guọ vbe u a gha rri evbare ne u vbe gha mian ba ẹmwẹ ohan vbe u gha wọn amẹ.

¹⁹ U ghi tama avbe uhunmwu ẹvbo hia wẹ uhunmwu na ọ re Nọyaẹnmwa ne Udazi gie gie ivbi e Jerusalẹm ni ye rre otọ iran. Iran gha guọ vbe iran a gha rri evbare, iran ghi vbe gha mian ba ẹmwẹ ohan vbe iran a gha wọn amẹ. A gha wabọ emwi hia hin otọe iran rre rhunmwuda iran ni rrọ, emwa dan iran khin.

²⁰ Avbe ore ẹvbo ni te vuọn ne ẹvbo nian, a gha dunmwu ehia a, a ghi ya ẹvbo nii khian otọe ẹgbo. Ẹghẹ nii ọ re iran gha na rẹn ighe mẹ ọrọre Nọyaẹnmwa.”

Itan Esi Kevbe Uhunmwu Dan Ne A Gie

²¹ E Nọyaẹnmwa keghi tama mwẹ wẹẹ,

²² “Ovbi ọmwa, vbọzẹ ne ivbi Izrẹl na kpa itan na yi wẹẹ, ‘Ẹghẹ gberra, emwi ne a taa yotọ ma sunu.’

²³ Tama iran ẹmwẹ ne imẹ ne Nọyaẹnmwa ne Udazi taa ye ọnii. I gha dobọ itan nii yi. A i ghi dọlegbe kpae vbe Izrẹl ọvbehe. Ye ihe ọnii, u ghi tama iran wẹẹ, ‘Ẹghẹ sẹ nẹ nian, emwi ne a taa ye otọ wa vbe sunu nian!’

²⁴ “A i ghi ra dọlegbe miẹn umian ohoghe ra ẹmwẹ akhasẹ ne ọ de ọmwa odẹ.

²⁵ Mẹ ne Nọyaẹnmwa gha gu iran guan. A gha vbe ru vbene I khare. A i ghi dọlegbe yae rhọ ẹghẹrẹ ọvbehe. Wa ne etẹ na, vbe ẹghẹ ne uwa na he ye rre agbọn na, ọ re I ra na ru emwi ne I khare ighe I gha ru. Erriọ I tae,” erriọ Nọyaẹnmwa ne Udazi khare.

²⁶ E Nọyaẹnmwa keghi tama mwẹ wẹẹ,

²⁷ “Ovbi ọmwa, te avbe ivbi Izrẹl ro ighe umian ne u miẹn kevbe ẹmwẹ akhasẹ ne u ta, ọ ghe; ẹghẹ ne ọ kpẹre ne ọ dee ọre nọ.

²⁸ Rhunmwuda ọnii, tama iran wẹẹ, Mẹ ne Nọyaẹnmwa ne Udazi khare wẹẹ: A i ghi si ẹe kpee vbe otọ ọvbehe. Ẹmwẹ ne I tae gha sunu. Mẹ ne Nọyaẹnmwa ne Udazi ọ re ọ tae.”