Ezikiẹl 11 - Edo Bible (E Baibol Ẹdo) Version 1996A Bu Abe Gbe Jerusalẹm 1 Orhiọn Osanobua keghi tọn mwẹ mu, ọ na mu mwẹ gha rrie onurho odẹ ahọ ọghe Ọgua Osa. I keghi miẹn ikpia isẹnyan ugie vbe onurho nii, usun ne iran ye ighe Jaazanaia ne ovbi Azọ kevbe Pelatia ne ovbi Benaia, eva vbe uwu avbe ọkaolotu ẹvbo nii. 2 Osanobua keghi tama mwẹ wẹẹ, “Ovbi ọmwa, avbe emwa na, emwamwa dan ọ re iran mwamwa, iran keghi bu emwa ude dan vbe ore ẹvbo na. 3 Iran khare wẹẹ, ‘Ma gha rherhe suẹn gha dọlegbe bọlọ owa. Ẹvbo yevbe akhe ne a ya le evbare, ma keghi vbe yevbe emiowo ne ọ rrọọ, sokpan, ọ yevbe degue ima hin obọ erhẹn rre.’ 4 Rhunmwuda ọnii, kha ighe te iran diyi, ovbi ọmwa.” 5 Orhiọn Osanobua keghi hin yan mwẹ, ẹre Nọyaẹnmwa na wẹ ne I ta uhunmwu ne irẹn gie ma avbe emwa nii wẹẹ, “Ivbi Izrẹl, I rẹn ẹmwẹ ne uwa ta kevbe emwamwa ne uwa mwamwa. 6 Emwa ne uwa he gbele ua vbe ore ẹvbo na bun sẹrriọ wẹ te ikun orinmwi ghi gba ehehia. 7 “Rhunmwuda ọnii nian, wa họn vbene imẹ ne Nọyaẹnmwa ne Udazi tama uwa hẹẹ. Ẹmwata, te ore ẹvbo gele yevbe akhe ne a ya le evbare, sokpan, de emwi ne emiowo ne ọ rrọ khin yi? Ikun avbe emwa ne uwa gbele ua! Wa i di emwa na ya hiehiere, te I ra filo uwa kua hin ore ẹvbo na rre. 8 “Te ohan umozo mu uwa ra? I gha viọ emwa ni mwẹ umozo rre ne iran do gu uwa gbinna. 9 I gha viọ uwa hin ore ẹvbo rre, I ghi viọ uwa ne avbe erhunmwuyẹn. I bu ohiẹn uwu gbe uwa nẹ. 10 A gha vbe gbele uwa a vbe ore ẹvbo uwa, vbe okuo, ẹghẹ nii, emwa hia gha rẹn wẹ mẹ ọrọre Nọyaẹnmwa. 11 Ẹvbo na i ra degue uwa zẹ vbe ne uwawa degue emiowo ne ọ rrọọ, I gha rria uwa ikhi vbe eheikehe ne uwa a rhirhi gha ye vbe otọe Izrẹl. 12 Wa gha rẹn wẹ mẹ ọrọre Nọyaẹnmwa, kevbe wẹ ẹghẹ ne uwa na gha ya uhi avbe emwa ni lẹga uwa ru emwi, te uwa gha rra uhi mwẹ, wa na vbe gha fieghe uhunmwu ye uhi mwẹ.” 13 Ehe ne I na wa guan ẹmwẹ akhasẹ nii, e Pelatia degbotọ, ọ keghi wa wu. I keghi de mu aro rhuotọ, I na datu wẹẹ, “Ẹ i re erriọ, e Nọyaẹnmwa ne Udazi, te u ra wa gbele emwa ni ghi kẹe vbe Izrẹl hia fo ra?” Eyan Ne Osa Ru Ne Iran Ni Rre Iwe 14 Osanobua keghi gunmwẹ guan wẹẹ, 15 “Ovbi ọmwa, emwa ni rre Jerusalẹm gha ta ẹmwẹ ruẹn kevbe ọghe avbe ivbi Izrẹl ne ihua ni rre iwe. Iran wẹẹ, ‘Ehe ne iran ni rre iwe ye rrei gbe ne iran gha na sẹtin ga e Nọyaẹnmwa. Rẹn ya otọe na ghae ukhu ne ima nẹ.’ 16 Banbanna nian, tama avbe ihua ne uwa gba rre iwe vbene I kha hẹ. Mẹ ọre ọmwa ne ọ viọ iran gha rrie ẹvbo ne ọ rrei ne iran gha rre odọ, I keghi vbe zagha iran gba ẹvbo ọvbehe hia. Sokpan, vbe ọghe banbanna, I gha gu iran gha rrọ vbe ẹvbo ne iran ye. 17 “Rhunmwuda ọnii, tama iran vbene imẹ ne Nọyaẹnmwa ne Udazi kha hẹ. I gha si iran koko kevbe avbe ẹvbo ne I zagha iran kui gha dee, I ghi dọlegbe mu otọ Izrẹl ne iran. 18 Iran gha dọlegbe rre, iran ghi viọ avbe ẹbọ iruẹn ne ọ zughu ọmwa ẹko ne iran a rhirhi miẹn kua. 19 I gha rhie orhiọn kevbe ekhọe ọgbọn ne iran. I gha miẹn iran ekhọe okuta ni zevbudu nii, I ghi rhie orhiọn ne ọ họn ẹmwẹ ne iran. 20 Ẹghẹ nii, iran gha rhie uhi mwẹ mwẹ, iran ghi vbe ya iyi mwẹ hia ru emwi vbe ẹko ata. Iran ghi gha re emwa mwẹ, mẹ ghi vbe gha re Osanobua iran. 21 Sokpan, I gha rria iran ikhi ighe iran ni ho ne iran gha ga avbe ẹbọ iruẹn ni zughu ọmwa ẹko. I gha rria iran ikhi ye emwi ne iran ru.” E Nọyaẹnmwa ne Udazi guan nẹ. Uyi E Nọyaẹnmwa Kpao Vbe Jerusalẹm Rre 22 Avbe aranmwẹ ni ma he wulo ni keghi suẹn gha tin, avbe emwi ne khurubu nii keghi lele iran kpao. Uwanmwẹ ne yanyanyan ọghe Osanobua Izrẹl keghi rre odukhunmwu iran. 23 Uwanmwẹ ne yanyanyan nii keghi kpao vbe ore ẹvbo rre, ọ keghi laghe uhunmwu oke ne ọ rre odẹ ahọ vbọ. 24 Vbe aro umian nii, orhiọn Osanobua keghi tọn mwẹ mu, ọ na mu mwẹ werriegbe bu iran ni rre iwe vbe Babilọn gha dee. Ẹre umian ni na ru gbẹnnẹ. 25 I na talọ emwi hia ne Nọyaẹnmwa rhie ma mwẹ ma iran ni rre iwe. |
@ The Bible Society of Nigeria, 1996
United Bible Societies