Ezikiẹl 10 - Edo Bible (E Baibol Ẹdo) Version 1996

Uyi E Nọyaẹnmwa Kpao Vbe Ọgua Osa Rre

¹ I keghi tọn aro mu ya ghe emwi ne ọ yevbe ekharha ne a fi ne ọ rre odukhunmwu avbe emwi ne a yi ni ma he wu nii, vbe odukhunmwu iran, emwi okpa ne ọ yevbe ẹkete ne a ye okuta ighobioye e safaia ru ke gha rrọọ.

² Osanobua keghi tama ọmwa ne ọ yọ ẹwu ukpọn eto ovbiohuẹ nii wẹẹ, “La ẹkpo emwi ne khurubu ni rre ototọ avbe emwi ne a yi na ne u ya zẹ uguobọ okpa ọghe ogiọnmwẹ ẹrhẹn. Iyekọnii, u ghi zẹ ogiọnmwẹ erhẹn yan ore ẹvbo nii.” I kegha ghe ẹre vbe ọ khian.

³ Odẹ okuo ọghe Ọgua Osa ọ re avbe emwi ne a yi na mudia yi vbe irẹn la owa, okuku keghi vuọn ẹghodo ne ọ ke uwu ẹre.

⁴ Uwanmwẹ ne ọ gbe ebiebi ye ọmwa aro nii, ne a ya rẹn ighe Osanobua rre evba, keghi ke ehe ne avbe aranmwẹ na ye kpao, ọ na laghe onurho Ọgua Osa, okuku nii keghi gba uwu Ọgua Osa, ẹghodo keghi vuọn ne uwanmwẹ ne wainwain.

⁵ Owogho ne ifuẹn avbe aranmwẹ nii gbe, a keghi wa gha họn ẹẹn vbe ẹghodo ne ọ ke ore. Ọ keghi ye vbe urhu Osanobua ne Oghodua.

⁶ E Nọyaẹnmwa ghi tama ọmwa ne ọ yọ ukpọn eto ovbiohuẹ ne ọ ya gua ogiọnmwẹ erhẹn vbe ẹkpo emwi ne khurubu ne ọ rre ototọ avbe aranmwẹ nii, okpia nii kegha khian ya mudia ke okpa vbe uwu avbe emwi ne khurubu nii.

⁷ Ọkpa vbe uwu avbe aranmwẹ nii keghi niẹn obọ la uwu erhẹn ne ọ rre uwu ehe ne iran ye nii. ọ keghi zẹ ogiọnmwẹ erhẹn eso, ọ keghi viọ ẹre ye obọ ọmwa ne ọ yọ ukpọn eto ovbiohuẹ nii. Ọmwa ni keghi viọ nene ogiọnmwerhẹn ọ na kpao.

⁸ I keghi miẹn wẹ dọmwadẹ ọghọe vbe uwu avbe aranmwẹ nii mwẹ emwi ne ọ yevbe obọ ọmwa nagbọn vbe ototọ ifuẹn ọnrẹn ọkpa.

^9-10 I kevbe miẹn wẹ emwi ne khurubu enẹ Ọ re ọ mwẹ, ehia wa vbe khọ egbe, ọkpọkpa vbe ọkpẹn aranmwẹ ni ọkpọkpa. Avbe emwi ne khurubu nii kegha fi wainwain zẹ vbe okuta ẹrọnmwọ, emwi ne khurubu ọvbehe kevbe yakọ ọkpọkpa vbọ ugbugbe.

¹¹ Avbe aranmwẹ nii gha si kpao, iran sẹtin wa laghe obọ ne ọ rhirhi a khọn iran vbene ai na vbe fi egbe werriẹ. Ehia ghi wa koko laghe ehe ne iran a rhirhi a gha ho ne iran laghe vbene ai na fi egbe werriẹ.

¹² Ikinnegbe iran, odieke, obọ, ifuẹn, kevbe avbe emwi ne khurubu nii, te aro wa gba ẹre.

¹³ Avbe emwi ne khurubu na, egbe ne I ka vbe miẹn vbe umian ne okaro nọ.

¹⁴ Ugbaro enenẹ ọ re ọkpọkpa vbe uwu avbe aranmwẹ na mwẹ. Ne okaro keghi re ugbaro ẹkhuia ẹmila, ne ogieva, ọghe ọmwa nagbọn, ne ogieha, oduma kevbe ne ogienẹ, ọghe oghohọn.

¹⁵ (Avbe aranmwẹ ne I ka vbe miẹn vbe ọkpẹn Ẹzẹ Kiẹba ọ re nọ.) Avbe aranmwẹ gha laghe odukhunmwu;

¹⁶ iran na gha khian, avbe emwi ne khurubu nii ghi kpao lele iran. Ẹghẹ ne iran a rhirhi ya rhan ifuẹn iran ya gha tin, avbe emwi ne khurubu ni ghi ye vbe lele iran.

¹⁷ Avbe aranmwẹ nii gha demudia, avbe emwi ne khurubu nii ghi vbe demudia, avbe aranmwẹ nii gha vbe tin, avbe emwi ne khurubu ni ghi vbe lele iran, rhunmwuda, avbe emwi nii ọ re ọ ta vbene iran gha ru hẹ.

¹⁸ Ẹghẹ nii, uwanmwẹ ne yanyanyan ne a ya rẹn ighe Osanobua rre evba keghi kpao vbe onurho Ọgua Osa rre, ọ keghi laghe ihọkpa vbe odukhunmwu avbe aranmwẹ na.

¹⁹ Iran keghi rhan ifuẹn iran an, iran na tin hin otọe rre vbe I wa ghe iran nii. Avbe emwi ne khurubu nii keghi lele iran kpao. Iran keghi yakọ kherhe vbe onurho odẹ ahọ ọghe Ọgua Osa, uwanmwẹ ne yanyanyan nii kegha rre odukhunmwu iran.

²⁰ I keghi do rẹn iran wẹ avbe aranmwẹ ne I ka vbe miẹn vbe ototọ Osanobua Izrẹl vbe Ẹzẹ Kiẹba nọ.

²¹ Ugbaro enenẹ ọre ọkpọkpa vbe uwu iran mwẹ, kevbe ifuẹn enẹ, kevbe emwi ne ọ yevbe obọ ọmwa nagbọn vbe ototọ ifuẹn iran ọkpọkpa.

²² Ugbaro iran keghi wa yevbe egbe ne I ka miẹn vbe ọkpẹn Ẹzẹ Kiẹba zẹẹ. Odaro taa ra ọ re dọmwadẹ ọghọe vbe avbe aranmwẹ nii wa laghe.