Ezikiẹl 1 - Edo Bible (E Baibol Ẹdo) Version 1996

UMIAN NE EZIKIẸL KA MIẸN VBE ỌGHE OSANOBUA ( 1:1—7:27 ) Ẹkete Osanobua

¹ Vbe Ikpẹdẹ ne ogisẹn ọghe uki ne ogienẹ vbe ukpo ne ogiwera, mẹ ne Ezikiẹl, ne ohẹn, ne ovbi e Buz, keghi gu ivbi e Ju ni rre iwe rre ọkpẹn Ẹzẹ e Kiẹba vbe Babilọn. Iso keghi kie yotọ, I na miẹn umian ọghe Osanobua.

² (Ukpo ne ogisẹn ne a ghi mu e Jehoiakin gha rrie iwe ọre nọ).

³ Vbe ọkpẹn Ẹzẹ e Kiẹba nii, I keghi họn vbe Nọyaẹnmwa gunmwẹ guan, I keghi vbe họn obọ ẹtin ẹnrẹn vbe egbe mwẹ.

⁴ Mẹ keghi tọn aro mu, I na ya bẹghe vbe okpẹhoho hoho ke odẹ okuo dee. Ayan kegha yan ke uwu okuku amẹ nọkhua ladian, iso ne ọ lẹga ẹre kegha fi wainwain. Ehe ne ayan nii ke yan ladian, emwi okpa keghi rrọ ne ọ yan kpoo zẹ vbe oze.

⁵ Vbe adesẹneva okpẹhoho nii, I keghi bẹghe emwi eso ni ma he wu, ni yevbe emwa nagbọn.

⁶ Sokpan, ọkpọkpa vbe uwu iran keghi mwẹ ugbaro enenẹ kevbe ifuẹn enenẹ.

⁷ Owẹ iran keghi ye kpasi, iran keghi mwẹ ihiẹn owẹ ne ọ yevbe ọghe ẹkhuia ẹmila. Iran keghi vbe yan kpoo vbe oze ne a kpee.

⁸ Deba ugbaro enenẹ kevbe ifuẹn enenẹ ne iran mwẹ, iran keghi vbe mwẹ obọ ọmwa nagbọn enenẹ, ọkpọkpa vbe ototọ ifuẹn ọkpọkpa.

⁹ Avbe emwi na keghi nien ifuẹn eveva ladian, vbene avbe aranmwẹ na ghi ya ifuẹn iran gba ogba ne ọ mwẹ ugọngọn enẹ, ukpe ifuẹn iran keghi dekan egbe. Iran gha khian, iran hia ọre ọ wa zẹ owẹ okpa vbene iran i na vbe fi egbe werriẹ.

¹⁰ Ugbaro ughughan enenẹ ọre ọkpọkpa vbe uwu avbe emwi na mwẹ: ugbaro ọmwa vbe odaro, ugbaro oduma vbe obọ erha ọmwa, ugbaro ẹkhuia vbe obọ iye ọmwa, kevbe ugbaro oghohọn vbe odieke.

¹¹ Avbe emwa na keghi tọn ifuẹn eveva mu vbene ukpe ifuẹn ọkpọkpa na dekan ukpẹ ifuẹn ọghe ne ọ diake ẹe. Iran keghi ya ifuẹn eveva ni dekẹe gbalọ egbe.

¹² Dọmwadẹ emwi na keghi viọ aro da igienenẹ, vbene a na miẹn wẹẹ, iran hia sẹtin koko khian ghe obọ ne ọ khọn iran vbene iran i na vbe fi egbe werriẹ.

¹³ Emwiọkpa ne ọ yevbe ukpekhọe ne ọ baa, kegha rre uwu avbe emwi na, te irẹn wa khian yo khian rre. Erhẹn nii ghẹghi ba ghe odukhunmwu, ọ ghi kpannọ asan ọghe ayan ladian.

¹⁴ Avbe emwi na tobọ iran keghi vbe gha vin ghe aro vin ghe iyeke, vbene okhian na wa vbe kẹ iran vbe ayan.

¹⁵ Ugbẹn vbe I ghi ghe avbe emwi enẹ na, I keghi bẹghe vbe emwi ne khurubu vbe owẹ imọto enẹ sẹ otọ, ọkpọkpa vbe ọkpẹn ọkpọkpa vbe uwu iran.

¹⁶ Emwi ne khurubu na hia keghi wa khẹ egbe, ọkpọkpa vbọ keghi fi wainwain vbe okuta ighobioye, emwi ne khurubu ọvbehe keghi vbe dekọ ọkpọkpa vbe ugbugbe.

¹⁷ Vbene a gha miẹn wẹ avbe emwi ne khurubu na sẹtin laghe igienenẹ.

¹⁸ Aro keghi gba okhiẹ emwi ne khurubu na.

¹⁹ Eheikehe ne a vbe emwi na a rhirhi laghe, avbe emwi ne khurubu na ghi vbe lele iran laghe odọ, avbe emwi na gha vbe viọ owẹ hin otọe rre, avbe emwi ne ọ yevbe owẹ imọto na ghi vbe kpao lele iran.

²⁰ Ehe ne ọ rhirhi khọn avbe emwi na ọ re iran laghe, emwi ne avbe emwi na ru zẹ, ọ re avbe emwi ne khurubu nii vbe ru, rhunmwuda avbe emwi na ọ re ọ ta vbene iran gha ru hẹ.

²¹ Rhunmwuda ọnii, ẹghẹikẹghẹ ne avbe emwi na ya zẹ owẹ ra te iran demudia, ra te iran laghe odukhunmwu, avbe emwi ne khurubu na ghi vbe ru vberriọ zẹẹ.

²² Emwi ne ọ yevbe ne a fi ekharha kegha rre odukhunmwu uhunmwu avbe emwi na, ehia kegha fi wainwain vbene a ya okuta ighobioye e kiristal ru.

²³ Avbe emwi na kegha rre ototọ emwi ne ọ yevbe ekharha ne a fi na, ọkpọkpa keghi niẹn ifuẹn eveva da emwi ne ọ diakẹe, ọ keghi vbe ye ifuẹn eva ne ọ dekẹe kinnọ egbe.

²⁴ I keghi họn ulamwẹ ifuẹn iran vbe iran a gha tin khian, ọ yevbe uwemwẹ okun, zẹ vbe owogho ivbiyokuo nibun, vbe urhu Osanobua ne Oghodua. Iran gha dobọ utinmwẹ yi, iran ghi gba ifuẹn iran ginna egbe.

²⁵ Sokpan, urhu okpa ye ke odukhunmwu emwi ne ọ yevbe ekharha ne a fi ni rre, vbe odukhunmwu uhunmwu iran.

²⁶ Ẹkete ne ọ yevbe ne a ye okuta ighobioye safaia ru kegha rre odukhunmwu emwi ne ọ yevbe ekharha ne a fi nii, emwi okpa ne ọ yevbe ọmwa nagbọn keghi tota yan ẹkete nii.

²⁷ Ọ keghi yevbe ne emwi ne ọ fi wainwain zẹvbe oze vbe adesẹ erhẹn. Awanwan keghi wa lẹga ẹre egbe hia,

²⁸ awanwan na kegha mwẹ ẹmu ughughan ne ọ rre ere nukhunmwu. Ọnọna ọrọre ne awanwan ne ọ gbe ebiebi ye ọmwa aro, ne ọ vbe rhie ma wẹ e Nọyaẹnmwa rre evba. Ugbẹn vbe I ghi miẹn ọna, I keghi de mu aro rhu otọ, I keghi họn urhu okpa ne ọ khare wẹẹ,