Ẹsta 5 - Edo Bible (E Baibol Ẹdo) Version 1996

Ẹsta Le Evbare Tie Ọba Kevbe Haman Sowa

¹ Ọ ghi rre ikpẹdẹ eha ne Ẹsta ghi suẹn gha yo aguẹ, ọ keghi hẹ ukpọn ọba ẹre ye egbe, ọna gha khian ya mudia ye ikun ne ọ ke ẹguae, ọ na mu aro da ugha ne ẹkete ye. Ọba kegha rre uwu owa, ọ tota ye ẹkete, ọna mu aro da onurho.

² Ugbẹn vbe ọba ghi bẹghe oloi ighẹ Ẹsta, vbe ọ mudia ye ore, ọ keghi miẹn aro ne ọ maa vbe obọ ọre, ọba keghi nọ rẹn wẹẹ,

³ vbọ khin yi Oloi Ẹsta? Tama mwẹ emwi ne u ho, ọ gha sẹ uẹ obọ, ọ gha khọn rẹn ne ọ gha re ne a wa otọe arriọba mwẹ ye eva nọ.

⁴ Ẹsta keghi wanniẹn wẹẹ, “Adeghẹ ọ yẹ ruẹ Umogun, I ho ne uwẹ vbe Haman gha die owa mwẹ ota na rhunmwuda I le evbare khẹ ruẹ.”

⁵ Ọba keghi gie ne a tama e Haman wẹ ne ọ gha dee ẹgiẹgiẹ ne iran mu otuẹ gie Ẹsta. Ẹre ọba kevbe Haman na gba gha rrie ehe ne Ẹsta na le evbare ye otọ.

⁶ Ehe ne iran ghi na da ayọn nii, Ọba keghi nọ Ẹsta wẹẹ, “Tama mwẹ emwi ne u ho, ọ gha sẹ uẹ obọ, I gha rhie emwi ne u nọrẹn ne uẹn, ọ gha rhe gha re ya sẹ obọkpa vbe arriọba mwẹ nọ.”

⁷ Ẹsta keghi wanniẹn wẹẹ,

⁸ “A deghẹ u gele wẹ u gha ye itohan rhie emwi ne I nọ rẹn mẹ, Umogun I gha wẹ ne uwẹ vbe Haman mu otuẹ gunmwẹ akhuẹ ne I vbe le evbare ọvbehe khẹ uwa. Ẹghẹ nii ọ re I gha na tama ruẹn emwi ne I ho.”

E Haman Vbe Khuan Ye otọ Ne Ọ Gbe Modekai Rua

⁹ Ugbẹn vbe Haman ghi ke isi evbare ladian, ẹko hia kegha sẹ ọre ọyẹnmwẹ, egbe na gha mu ẹẹn. Sokpan, ọ keghi do miẹn Modekai vbe onurho ẹguae, ugbẹn vbe Modekai ma guakpao ra ne ọ vbe rhie ọghọ nẹẹn hiehiere vbe odẹikodẹ, ohu e Haman keghi hin ukhunmwu ghe ẹre.

¹⁰ Sokpan, ọ keghi zin egbe, ọ na gha rrie owa, ọ keghi tie avbe esiọre hia gha die owa ẹre, ọ na wẹ ne Zeres ne amwẹ ọnrẹn vbe deba iran.

¹¹ Ọ keghi gha rhuọ ma iran vbene irẹn fe hẹ, inu emọ ikpia ne irẹn mwẹ vbene ọba vbe rhie irẹn ye ukpo nọkhua hẹ kevbe vbene irẹn mwẹ uyi sẹ emwa ọvbehe hia ni rre ukpo asẹ vbe oga ọba hẹ.

¹² E Haman keghi rhie te ẹe wẹẹ, “Ne ọ ghi wa sẹ vbe ena hia, ọmwa ọvbehe ne Ẹsta ne Oloi le evbare tie sẹ owa ẹ i rrọọ gberra ọba kevbe imẹ. Ọ wẹ ne ima vbe dọlegbe gha dee akhuẹ.

¹³ Sokpan, ena hia i re emwi rhọkpa vbe aro mwẹ vbe I gha ye bẹghe Modekai ne Ju vbe ọ gha tota ye onurho ẹguae.”

¹⁴ Ẹkpo nii, ọ re amwẹ ọnrẹn kevbe avbe esiọre na gue ẹe zẹ iro wẹẹ, “Wẹ ghi gba erhan ne a ya si emwa rrọọ ne uyomwẹ ọnrẹn re ibata isẹn irrọ vbe iyenẹ? Owiẹ nakhuẹ, u sẹtin tama ọba wẹ ne ọ si e Modekai rrọ yọ. Ẹghẹ nii, u sẹtin ye ọyẹnmwẹ gha rrie ehe ne uwa ra na rri evbare.” E Haman na wẹ iro esiesi ọna wa khin, ọ keghi gele ya gba erhan ne a si ọmwa rrọ yi nii.