Ẹsta 2 - Edo Bible (E Baibol Ẹdo) Version 1996

Ẹsta Do Gha Re Oloi

¹ Vbe iyeke emwi na, uhin, vbe ohu ọba ye dọyọ nẹ, ọ keghi ye gha mu emwi ne Vasti ru ro kevbe ẹmwẹ ne irẹn ya gie emwa hia uhunmwu vbe ekpa ẹre.

² Eso vbe uwu iran ni gue ẹe ziro, ni vbe sikẹ ọre vbọ keghi tama rẹn wẹẹ, “U ghi gbe aro kotọ ẹsẹse gualọ avbe uvbi eso ni mose?

³ U sẹtin gie avbe ekhaẹmwẹ ruẹn ni rre otọe ẹvbo na hia ne iran viọ avbe ibiẹka ikhuo ni mose hia gha die ẹrriẹ vbe Susa ne igiogbẹ otọe na? U ghi viọ iran gie Hagai ne ọghẹrriẹnoguan ne ọ gbe aro ghe avbe ikhuo ne uẹn ne ọ gha gbe aro ghe iran, ne ọ vbe gha mu iran egbe ose.

⁴ Ẹghẹ nii, u ghi rhie ọmọ okhuo ne ọ yẹ ruẹ sẹ vbe ehia ya ru oloi ye ihe Vasti.” Ọba keghi miẹn wẹ ude esi ọ re ọna khin, ọ na rhie owẹ lele ẹe.

⁵ Okpia ọkpa ne Ju kegha rre Susa, a keghi tie eni ẹnrẹn Modekai, ovbie e Jea, ovbi ẹwae e Bẹnjamin ọ re nọ vbe uniẹn ọghe Kis kevbe Simẹi.

⁶ Ẹghẹ ne Nebukiadneza ne ọba e Babilọn na mu e Jehoiakin ne ọba e Juda hin e Jerusalẹm rre gha rrie iwe, ọ na vbe viọ avbe oghunmwu eso lele ẹẹ, uwu iran na ọ re Modekai gha ye.

⁷ Ọ keghi mwẹ ovbi ọtiọnrẹn ọkpa, ọmọ okhuo nọ, a kegha tie ẹre Ẹsta, sokpan eni ne a tie ẹre re vbe Hibru kegha re Hadasa, rẹn kegha re ọmọ okhuo ne ọ mose, ọ wa zọ ẹsẹse. Evbibiẹ ọe ghi wulo nẹ, e Modekai keghi ya ẹe ye ọmọ, ọ na koko ẹẹ wan zẹ vbe ovbi ẹre.

⁸ Ẹghẹ ne ọba na gie uhunmwu nii, a keghi gha viọ ibiẹka ikhuo nibun rrie Susa, Ẹsta kegha re ọkpa vbe uwu iran. A keghi vbe rhie irẹn ye ẹguae ne Hegai ne ọ gbearoghe ẹrriẹ vbe gha gbearoghe ẹre.

⁹ E Hegai keghi wa ho ẹmwẹ Ẹsta, ẹmwẹ ọnrẹn keghi la ẹre ekhọe. Ẹgiẹgiẹ na, ọ na wa suẹn gha ma ẹre egbe ose, vbe ekpa ne ọ na yo obọ lọ ẹre egbe ọ ghi vbe gha rhie evbare kpataki ne ẹẹn. Ọ keghi rhie ehe ne ọ maa sẹ vbe ẹguae nii ne ẹẹn, ọ na vbe viọ ibiẹka ikhuo ihinrọn ni rre ẹguae ne ẹẹn wẹ ne iran gha ru emwi ne ẹẹn.

¹⁰ Zẹ vbene Modekai tama rẹn zẹẹ, Ẹsta ma gie emwa rẹn wẹ e Ju ọ re irẹn khin.

¹¹ Ẹdẹgbegbe ọre Modekai yo ya gha gbe ọrrẹrrẹ yo gbe ọrrẹrrẹ rre vbe odaro ẹguae ne ọ miẹn ehe na gha rẹn vbene ọ ye ẹe hẹ kevbe emwi ne ọ ghi ra sunu vbe egbe ẹre.

¹² Egbe ose ne a ma iran re na, ukpo ọ re ọ ya ẹe vbe otọ — a ghi ya ori e maia lọ ẹre egbe la uki ehan, a ghi vbe ya ori ọghe basan lọ ẹre la uki ehan. Vbe iyeke ọna, a ghi gha viọ iran gie ọba Kzakzis ọsegbe ọsegbe.

¹³ Ọvbokhan okhuo nii gha ke ẹrriẹ rrie ẹguae ọ sẹtin hẹ emwi ne ọ ye ọre ye egbe.

¹⁴ Ọ ghi gha khian, vbe ota, ẹdẹ gha ghi gbe a ghi rhie ẹre gha rrie ẹrriẹ ọvbehe, a ghi rhie ẹre ne Siasgaz ne ọghẹrriẹnoguan ne ọ gbearoghe avbe egbakhian ọba. Ẹ i ghi dọlegbe yo ehe ne ọba ye ọvbehe, sokpan a ma wẹ te ọba ho ẹmwẹ ọnrẹn ọ na so eni ẹnrẹn ya nọ ẹmwẹ ọnrẹn.

¹⁵ Ọ keghi do sẹ egbe Ẹsta ne ọ gha rrie ehe ne ọba ye. Ẹsta ne ovbi Abihẹl, kevbe ọtẹn e Modekai ne ọ ghi mu ẹẹn biẹ, zẹ vbe ovbi ẹre ne okhuo, Ẹsta ne a miẹn wẹ ọmwa ne ọ rhirhi miẹn ọẹn hia ọre ọ ho ẹmwẹ ọnrẹn. Ọ ghi sẹ egbe ẹre, ọ keghi mu egbe zẹ vbene Hegai ne ọghẹrriẹnoguan, ne ukọ ne ẹrriẹ tama rẹn.

¹⁶ Erriọ a miẹn ọẹn wẹ vbe ukpo ne ogihinrọn ne Kzakzis rriọba, vbe uki ne ogigbe ne a tie ẹre Tẹbẹt, a keghi rhie Ẹsta bu ọba Kzakzis vbe ẹguae ọba.

¹⁷ Ọba keghi ho ẹmwẹ ọnrẹn sẹ ibiẹka ikhuo nekpa. Ẹmwẹ ọnrẹn keghi la ẹre ekhọe sẹ hia. Ọ keghi mu ẹde ọba rhu ẹre uhunmwu, ọ keghi ya ẹe ma Oloi ye ihe Vasti.

¹⁸ Ẹre ọba na le evbare nọkhua tie emwa sẹ owa ya mu ọghọ ye Ẹsta egbe, ọ keghi tie ekhaẹmwẹ kevbe eghaẹvbo ẹre hia. Ọ keghi rhie ẹghẹ ne emwa ya hẹwẹ vbe iwinna la otọe arriọba nii hia fẹẹrẹ. Ọ keghi ghae emwi ya gie emwa hia zẹ vbene ọ kere ne ọba.

E Modekai Miẹn Ọba Fan

¹⁹ Vbe uwu ẹghẹ na, ọba keghi rhie Modekai ye ukpo eghaẹvbo.

²⁰ Ẹsta tobọ ẹre ma he ye gie ọmwarhọkpa rẹn wẹ e Ju ọ re irẹn khin. e Modekai tama rẹn wẹ ne ọ ghẹ tama ọmwa rhọkpa. Ọ keghi ye vbe họn ẹmwẹ ne ẹẹn vbe ọnọna zẹ vbene ọ ka họn ẹmwẹ nẹẹn yi vbe ẹghẹ ne ọ na re ọvbokhan okhuo ne ọ gue ẹe.

²¹ Ẹghẹ ne Modekai na gha rre ukpo asẹ vbe ẹguae, e Bigtana kevbe Tẹrẹs, eva vbe uwu avbe ọghẹrriẹnoguan ni khẹ onurho ne a la la ughugha ọba, keghi gha kakabọ khọ ẹko Ọba Kzakzis, iran na khuan khẹ ọre ne iran gbe ẹe rua.

²² E Modekai keghi họn ẹmwẹ na, ọ na tama Ẹsta ne Oloi, ọnii na vbe tama ọba wẹ ghe emwi ne Modekai ta ladian.

²³ A keghi gie emwa ni iran gualọ otọ ẹmwẹ na, a keghi miẹn wẹẹ, ẹmwata ọ re wa nọ. A keghi rhunmwuda ọnii silo emwa na rrọọ. Ẹre ọba na wẹ ne a gbẹn emwi na ye otọ vbe ebe isiemwiẹro ọghe otọe arriọba nii.