Emọs 6 - Edo Bible (E Baibol Ẹdo) Version 1996

Ufuẹnmwẹ Izrẹl

¹ U miẹn vbe ọ gha ba so uwa hẹ, wa ni wa zẹ ọwọbu vbe Zaiọn, kevbe uwa ni kha wẹ vbe nene ẹbe ke dee, ni rre Sameria, wa ne okpemwa ni rre Izrẹl ne okpẹvbo na, wa ne emwa do gha lẹ vba nọ iyobọ!

² Wa ya ghe ore Kalnẹ. Wa ghi vbe ke evba kpao ya ghe ore nọkhua ighẹ Hamat kevbe ya sẹ e Gat ne ẹvbo e Filistin. Emwi rrọ ne iran ya maa sẹ otọ arriọba e Juda kevbe Izrẹl ra? Ehe ne otọe iran lae vbe digba sẹ ọwua ra?

³ Wa ma ho ne uwa miẹn họn wẹ ẹdẹ ọfuan dee, sokpan, te emwi ne uwa ru hia wa si nene ẹdẹ kẹ otọ.

⁴ U miẹn vbe ọ gha ba so uwa hẹ, wa ni nien obọ nien owẹ ua ye aga ne pọrhọ ọwua, wa ni rri emiowo oteghe ẹkhuia kevbe oteghe ohuan.

⁵ Ihuan ne a ya rre ne aso vbene Devid gha ru ẹe, wa yẹ uwa, wa ghi vbe gha kpe ẹre vbe akpata.

⁶ Ọkpan nọkhua ọ re uwa ya ru ukpu da ayọn, ori ne ọ ghi winhin sẹẹ ọ re uwa ya wo, sokpan, ọ ma da uwa vbe Izrẹl rẹnkhẹn uan.

⁷ Rhunmwuda ọnii, wa ọ re ọ khian gha re asa ni karo ni gha yo iwe. A ghi ho emwiukpo kevbe okpe evbare ne uwa le bẹkun.

⁸ Udazi ne Nọyaẹnmwa ne Oghodua ọ re ọ tua unu mu ẹmwẹ na taa ẹe wẹẹ, “Uhiomwẹ ne ivbi Izrẹl hio wa sọnnọ mwẹ, ẹko i rhiẹnrhiẹn mwẹ ye owa nekhua ọghe ọkpọkua ne iran bọlọe. I gha mu igiogbẹ ẹvbo iran, kevbe emwi ni rre uwu ẹre hia ne avbe eghian.”

⁹ Adeghẹ arhingbe kẹrre vbe ẹgbẹe ọkpa, te iran ra wulo.

¹⁰ Ọtẹn ọmwa ne ọ wu, ne ọ vbe yan irorinmwi, ọ re ọ ra dada ikun orinmwi ni hin uwowa rre. Ọtiọnrẹn ni ghi vbe nọ ọmwa ne ọ rhirhi ghi kẹe vbe owa ni wẹẹ, “Wẹ vbe ọmwarhọkpa gba rre evba ra?” Ọmwa ni ghi wanniẹn wẹẹ, “Ẹn o!” Ọtiọnrẹn ni ghi kha wẹẹ, “Gia họn ẹmwẹ! Te ima gha mwẹ ẹwaẹn ne a ghẹ vbe ya gbe unu ye eni e Nọyaẹnmwa.”

¹¹ E Nọyaẹnmwa ghẹghi taa ẹe nẹ, owa nekhua kevbe ne giere, te a ra rẹnkhẹn ehia a.

¹² Ẹsin vbe gbe ọkuẹkuẹ vbe uhunmwu okuta ra? Avbe ya ẹmila vulo otọ vbe amẹ okun ra? Sevba, wa ye ohiẹn ẹmwata khian eruan, wa keghi vbe ya ne ọgbae khian ne ọ magba.

¹³ Wa gha ghagha i ghẹ wa sẹtin khọn ẹvbo Lodeba. Wa gha rhuọ wẹẹ, “Te ima mwẹ ẹtin sẹ ọe ne ima na khọn e Kanaem.”

¹⁴ E Nọyaẹnmwa ne Osanobua ne Oghodua tobọ ẹre ta ẹe wẹẹ, “Wa ne ivbi Izrẹl, I ra gie ivbiyokuo ẹrrẹe ne iran do mu uwa ẹvbo dia. Iran gha wọ uwa uhunmwu ke Ada e Hamat kpao vbe odẹ okuọ yasẹ ovbi ẹzẹ Araba vbe odẹ ekẹn.”