Ẹksọdọs 8 - Edo Bible (E Baibol Ẹdo) Version 1996

Ẹkirẹ

¹ Ẹre Nọyaẹnmwa na tama e Mosis wẹẹ, “Bu ọba gha khian ne u ya kha ma rẹn wẹẹ, ‘Vbe nian ọre Nọyaẹnmwa khare, “Gie emwa mwẹ gha khian ne iran ya ga mwẹ.

² Danmwehọ, a deghẹ u ma kue ne iran gha khian, I gha ya ẹkirẹ ru emwa ẹvbo ruẹ hia emwi.

³ Iran gha vuọn ẹzẹ Nail hia, iran ghi ke evba kpao gha die uwu ẹguae ruẹ, ughugha ruẹ, ukpo ne u vbiẹ, ughugha avbe ekhaẹmwẹ ruẹn kevbe emwa ruẹn, kevbe uwu aroewu kevbe uwu ọkpan ebrẹd ruẹ.

⁴ Iran ghi gha san yan ruẹn, ekhaẹmwẹ ruẹn kevbe emwa ruẹn hia.” ’ ”

⁵ E Nọyaẹnmwa keghi tama e Mosis ne ọ kha ma Errọn wẹẹ, “Niẹn ọkpọ ruẹ da avbe ẹzẹ, ẹzẹ ne a fian miẹn egbe kevbe ọghọdọ, ne u gie ẹkirẹ vẹ la otọ Igipt.”

⁶ Ẹre Errọn na niẹn ọkpọ ẹre da ehe ne amẹ ghi ye hia, ẹkirẹ keghi vẹ rre, iran na gba otọe nii.

⁷ Sokpan, avbe ọbo edunna keghi vbe ya ọbo edunna iran viọ ẹkirẹ ladian.

⁸ Ọba keghi tie Mosis kevbe Errọn, ọna wẹẹ, “Wa na erhunmwu ghe Nọyaẹnmwa ne ọ viọ avbe ẹkirẹ hin imẹ kevbe emwa mwẹ egbe rre, I gha gie emwa uwa gha khian ne iran ya zọ ese ghe Nọyaẹnmwa.”

⁹ E Mosis keghi wanniẹn wẹẹ, “Ẹko rhiẹnrhiẹnmwẹ ọre I gha ya na erhunmwu nuẹn, ekhaẹmwẹ ruẹn kevbe emwa ruẹn, ne ẹkirẹ kpao hin ehe hia ne u ye rre ne a miẹn wẹ ẹzẹ Nail ọkpa ọre iran ghi ye.”

¹⁰ Ọba keghi tama rẹn wẹẹ, “Na erhunmwu mẹ akhuẹ.” E Mosis na kha wẹẹ, “Ọ gha wa sẹ, vbene u khare ne u miẹn ehe na rẹn wẹ ẹbọ ọkpa irrọ ne ọ ye vbe Nọyaẹnmwa ne Osanobua mwa.

¹¹ Avbe ẹkirẹ gha suẹ rae ke owa ruẹ, kevbe ekhaẹmwẹ ruẹn kevbe emwa ruẹn, uwu ẹzẹ Nail ọkpa ọre iran ghi gha ye.”

¹² Ẹre Mosis kevbe Errọn na kpao sẹ ọba rae, e Mosis keghi kakabọ na erhunmwu ghe Nọyaẹnmwa ye ẹmwẹ ẹkirẹ ne ọ tue yan ọba.

¹³ E Nọyaẹnmwa keghi ru zẹ vbene Mosis nọ rẹn, avbe ẹkirẹ nii rre uwu owa, ore kevbe oha hia keghi wulo.

¹⁴ Ivbi Igipt keghi silo ehia gboo ogege, ẹwia ẹre keghi gba ẹvbo nii hia.

¹⁵ Ọba ghi miẹn wẹ emwi hia vbe maa nẹ, ọ na dọlegbe yin ehọ, ọ ma ghi vbe zẹ ye Mosis kevbe Errọn re zẹ vbene Nọyaẹnmwa kha re.

Ẹkhunkhun

¹⁶ E Nọyaẹnmwa keghi tama e Mosis wẹẹ, “Tama Errọn wẹẹ, ‘Ya ọkpọ ruẹ fi otọ emwi, ebubẹ gha khian ẹkhunkhun vbe otọ Igipt hia.’ ”

¹⁷ Errọn keghi ru vberriọ. Errọn keghi tọn ọkpọ nii mu, ọ na ya ẹe fi otọ emwi, ekhae keghi khian ẹkhunkhun.

¹⁸ Avbe ọbo edunna hia ni rre Igipt keghi te hia ne iran vbe ya ẹbo iran ru ẹkhunkhun, sokpan iran ma sẹtin. ẹkhunkhun keghi gba ehe hia.

¹⁹ Avbe ọbo edunna keghi tama ọba wẹẹ, “Osanobua ọre ọ ru emwi na!” Sokpan ọba keghi yin ehọ, ọ ma zẹ ye Mosis kevbe Errọn re zẹ vbene Nọyaẹnmwa kha re.

Ikian

²⁰ E Nọyaẹnmwa keghi tama e Mosis wẹẹ, “Vbe owiẹ vbirrivbirri akhuẹ, u ghi ya vba ọba vbe ọ gha rrie ẹzẹ, ne u khama rẹn wẹẹ, ‘Ẹmwẹ ne Nọyaẹnmwa ta ẹe ọrọre wẹẹ, “Gie emwa mwẹ gha khian ne iran ya ga mwẹ.

²¹ A deghẹ u ma gie emwa mwẹ gha khian, I yan ma ruẹn wẹ, I gha gie ikian rre ne iran vẹ rhu uẹ kevbe ekhaẹmwẹ ruẹn, avbe emwa ruẹn kevbe avbe owa ruẹ, owa ivbi Igipt hia ya sẹ egbe otọ ne iran viọ owẹ yi, gha vuọn ne ikian.

²² Vbe ẹdẹ ne ẹdẹrriọ, mẹ gha sẹ otọe Gosiẹn rae, ehe ne avbe emwa mwẹ ye, a ghi miẹn wẹ ikian i rre odọ, ne u miẹn ehe na rẹn wẹ mẹ ne Nọyaẹnmwa ọre ọ winna vbe ẹvbo na.

²³ I gha rhie alughaẹn ye ẹkpo emwa mwẹ kevbe emwa ruẹn. Akhuẹ ọre ọyunnuan na ra sunu!” ’ ”

²⁴ E Nọyaẹnmwa keghi ru emwi na, ikian keghi bi la ẹguae ọba Igipt kevbe owa ekhaẹmwẹ ọnrẹn kevbe otọe Igipt hia. Ikian keghi rhia ẹvbo nii uan.

²⁵ Ẹre ọba na tie Mosis kevbe Errọn, ọ wẹẹ, “Wa gha khian ya zọ ese ghe Osanobua uwa vbe ore ẹvbo na”

²⁶ E Mosis keghi wanniẹn wẹẹ, “Ẹ i re emwi ne ọ gbae ne ima ru vberriọ, rhunmwuda avbe aranmwẹ ne ima ya zọ ese ghe Nọyaẹnmwa Osanobua mwa gha sọnnọ ivbi Igipt, ma gha ye aranmwẹ ne ivbi Igipt wua zọ ese vbe ehe ne iran gha na bẹghe mwa, iran gha filo okuta gbele ima an.

²⁷ Te ima gha khian okhian ikpẹdẹ eha la uwu ato ya zọ ese ghe Nọyaẹnmwa Osanobua mwa zẹ vbene ọ tama mwa.”

²⁸ Ọba keghi kha wẹẹ, “I gha gie uwa ya zọ ese ghe Nọyaẹnmwa Osanobua rua vbe ato a deghẹ wa ma khian rrei gbe. Wa na erhunmwu mẹ.”

²⁹ E Mosis keghi kha wẹẹ, “I gha wa da kpao, I gha na erhunmwu ghe Nọyaẹnmwa ne a miẹn wẹ akhuẹ, ikian gha sẹ uẹ rae, kevbe ekhaẹmwẹ ruẹn kevbe emwa ruẹn, sokpan ghẹ ghi dọlegbe hiẹ ima vbe ekpa ne u i na gie emwa nii ya zọ ese ghe Nọyaẹnmwa.”

³⁰ E Mosis keghi kpao sẹ ọba rae, ọ na na erhunmwu ghe e Nọyaẹnmwa.

³¹ E Nọyaẹnmwa keghi ru vbene Mosis nọ rẹn. Avbe ikian keghi sẹ ẹe rae ke ẹe kevbe ekhaẹmwẹ ọnrẹn kevbe emwa rẹn, ikian ọkpa ma ghi vbe ke ẹe.

³² Uhin ye vbe do sẹ egbe ona, te ọba ye dọlegbe yin ehọ, ọ ma gie emwa nii kpao.