Ẹksọdọs 2 - Edo Bible (E Baibol Ẹdo) Version 1996

Vbene A Biẹ Mosis Vbe Miẹn Rẹn Fan Hẹ

¹ Vbe uwu ẹghẹ na, okpia ọkpa vbe uniẹn Livai keghi vbe rhie okhuo ọkpa vbe uniẹn nii rọnmwẹ.

² Okhuo nii keghi hanmwa ọ na biẹ okpia nẹẹn. Okhuo nii ghi miẹn vbene ọmọ nii mose hẹ, ọ keghi mu ẹẹn lẹre la uki eha.

³ Ugbẹn vbe ọ ma ghi gie ẹe rhie lẹre, ọ keghi mu okhuae ne a ya irunmwu do, ọ na ya ọdan vbe ibi rhu ẹe ne amẹ ghe larọ, ọ keghi mu ọmọ nii ye uwu ere, ọ keghi ya muẹn ye uwu irunmwu ne ọ wan ẹsẹse vbe ọkpẹn ẹzẹ.

⁴ Ọtiọnrẹn ne okhuo keghi ya mudia ye urria ne ọ miẹn ehe na miẹn emwi ne ọ gha sunu vbe egbe ẹre.

⁵ Ovbi ọba ne okhuo ke gha die ẹzẹ do khuẹ, avbe ọkpọmwa rẹn kegha lele ọkpẹn ẹzẹ khian. Rẹn keghi bẹghe okhuae nii vbe ọkpẹn ẹzẹ, ọ na gie ọviẹn ọnrẹn ne okhuo ne ọ ya muẹn rre.

⁶ Ovbi ọba ghi wẹ ẹre, ọ keghi miẹn ọmọ okpia ọkpa vbọ, ọ gha viẹ, ohan rẹn keghi to ẹe, ọ na wẹẹ, “Usun ivbi e Hibru ọre ọ na khin.”

⁷ Ọtiọnrẹn ne okhuo keghi nọ rẹn wẹẹ, “Ne I ya tie okhuo ọkokọmọ vbe uwu emwa Hibru guẹ ra ne ọ koko ọmọ na nuẹn?”

⁸ Ọ keghi tama rẹn wẹẹ, “Gha khian.” Ọvbokhan okhuo nii keghi ya tie iye ọmọ nii rre.

⁹ Ovbi ọba ne okhuo keghi tama rẹn wẹẹ, “Mu ọmọ na ne u ya koko ẹe mẹ, I gha ha ruẹ osa ẹre.” Ẹre okhuo nii na mu ọmọ nii, ọ na ya kokẹe.

¹⁰ Ugbẹn vbe ọmọ nii ghi wan sẹ nẹ, ọ keghi muẹn gie ovbi ọba ne okhuo, ọ na ya ẹe ye ọmọ. Rẹn keghi kha wẹẹ, “Uwu amẹ I na muẹn ladian na hẹ ẹre Mosis.”

E Mosis Lẹ Gha Rrie Midian

¹¹ Ọ ghi kpẹe fua kherhe vbe Mosis ghi wan nẹ, ọ keghi ladian ne ọ ya tue avbe emwa rẹn, ighẹ ivbi e Hibru, ọ ke do miẹn vbe a ya ẹtin ya iran miẹn ẹsọn. Ọ na miẹn vbe ovbi Igipt ọkpa gbe ovbi e Hibru, ọkpa vbe uwu avbe emwa irẹn rua.

¹² E Mosis keghi ghe lẹga, ugbẹn vbe ọ ghi miẹn wẹ ọmwa rhọkpa i rre evba, ọ na gbe ovbi Igipt nii uan, ọ na tọnnọ ọẹn ye uwu uzekhae.

¹³ Ẹdẹ ne ọ lele ẹe, ọ na vbe gha khian, ọ na miẹn ivbi e Hibru eva ni gu egbe iran gbinna, ọ keghi tama ne ọ ho ẹmwẹ vbọ wẹẹ, “Vbọzẹ ne u na gbe ovbi e Hibru ne ihua yi?”

¹⁴ Rẹn keghi wanniẹn wẹẹ, “Gha ọ ya a ru enọkhaemwisẹ ra enọbuohiẹn yan ima yi? Te u ra do gbe mwẹ uan vbene u gbe ovbi Igipt nii uan ra?” Ohan keghi mu e Mosis, ọ na roro ẹe wẹẹ, “Emwa rẹn emwi ne I ru nẹ.”

^15-16 Ọba ghi do họn emwi ne ọ sunu, ọ keghi te ra gbe Mosis ua, sokpan rẹn keghi lẹ fe, ọ na gha rrie otọe Midian ya diẹe ya. Ọ ghi sẹ ẹdẹ ọkpa, ugbẹn vbe Mosis ghi tota ye ọkpẹn uhae, ohẹn ne ọ rre Midian kegha mwẹ emọ ikhuo ihinrọn. Iran keghi rre, iran na do sa amẹ, iran na vbe sa amẹ vuọn uroroamẹ ne ohuan kevbe ẹwe erha iran na wọn amẹ.

¹⁷ Sokpan, avbe ọsuohuan keghi rre, iran na khulo ivbi e Jẹtro kua. E Mosis keghi bu iran rre, ọ na sa amẹ ne emwirri iran.

¹⁸ Ugbẹn vbe iran ghi bu erha iran gha die owa, ọ keghi nọ iran wẹẹ, “Vbe uwa na rherhe rre sẹrriọ hẹ ere na yi?”

¹⁹ Iran wanniẹn wẹẹ, “Ovbi Igipt ọkpa ọre ọ do miẹn ima fan vbe obọ avbe ọsuohuan, rẹn ọre ọ wa sa amẹ ne ima, ọ na vbe mu ne avbe emwirri wọn.”

²⁰ Rẹn keghi nọ ivbi ẹre wẹẹ, “Rẹn ghi vbo nian? Vbọzẹ ne uwa na sọrae ye odẹ yi? Wa ya tie ẹre rre ne ọ do gu ima rri evbare.”

²¹ E Mosis na ghi wa tota vba, ọre Jẹtro na rhie ovbi ẹre ne a tie ẹre Zipora nẹẹn ne ọ rhie rọnmwẹ.

²² Okhuo nii keghi biẹ ọmọ okpia ọkpa. E Mosis ke kha wẹẹ, “Ọrriọvbe ẹre I khin vbe ẹvbo ẹrrẹe, ọre I na he ere Gẹsiọm.”

²³ Ọ ghi kpẹe fua, ọba Igipt keghi wu. Ivbi Izrẹl kegha khiẹkhiẹ egbe vbe uwu ọviẹn ne iran ye, iran na gha tu nọ iyobọ. Eve iran keghi sẹ ehe ne Osanobua ye.

²⁴ Ọ keghi ghe ikhiẹkhiegbe iran, ọ na ye ile ne ọ gu Ebraham ta rre kevbe Aizik kevbe Jekọb.

²⁵ Ọ keghi miẹn ihe ọviẹn ne ivbi Izrẹl ye, ọ na ya egbe ne iran miẹn.