Ẹksọdọs 10 - Edo Bible (E Baibol Ẹdo) Version 1996

Irhiso

¹ E Nọyaẹnmwa keghi tama e Mosis wẹẹ, “Bu ọba gha khian. I gie irẹn kevbe ekhaẹmwẹ ọnrẹn yin ehọ nẹ ne I miẹn ehe na winna avbe iwinna ọyunnuan ma iran.

² Ne uwa vbe miẹn ya kpa itan ma avbe ivbi uwa kevbe eyẹ uwa vbe ne I do ivbi Igipt ọzuọ hẹ vbe I winna iwinna ọyunnuan mwẹ ma iran. Wa hia fẹẹrẹ gha vbe rẹn wẹ mẹ ọrọre Nọyaẹnmwa.”

³ Ẹre Mosis kevbe Errọn na bu ọba, iran ke tama rẹn wẹẹ, “Vbe nian ọre Nọyaẹnmwa ne Osanobua ivbi e Hibru khare, ‘De ẹghẹ ne uwa gha fieghe uhunmwu ye ẹmwẹ ne I khama uwa la? Gie emwa mwẹ kpao ne iran ya ga mwẹ.

⁴ A deghẹ te uwa ye hẹ ighẹ wa ma gie emwa mwẹ gha khian, vbe ẹdẹ ne akhuẹ, I gha gie avbe irhiso rrie ẹvbo uwa.

⁵ Iran gha bun sẹrriọ wẹ, iran ghi mama rhu otọ. Iran gha rri avbe emwi hia ne avan ne ukhunmwu ma mu rhia, iran gha rri erhan uwa hia ni ghi ke ẹe.

⁶ Iran gha vuọn ẹguae ruẹ hia kevbe owa avbe ekhaẹmwẹ ruẹn kevbe emwa ruẹn hia, iran gha khọ sẹ emwikemwi ne avbe erha uwa he ka miẹn. Ọba keghi fi ọdelegbe, ọ na kpao.’ ”

⁷ Ekhaẹmwẹ ọba Igipt keghi tama rẹn wẹẹ, “Inu ẹghẹ oko na ra kpokpo ima la vbe otọe yi? Gie ivbi Izrẹl nikpia kpao ne iran ya ga e Nọyaẹnmwa ne Osanobua iran. Wẹ ma he ye rẹn nian ighẹ Igipt khian ne ọ rẹnkhẹn uan?”

⁸ Ẹre iran na dọlegbe viọ e Mosis kevbe Errọn bu ọba Igipt gha dee, rẹn keghi tama iran wẹẹ, “Wa sẹtin gha khian ne uwa ya ga e Nọyaẹnmwa ne Osanobua uwa, sokpan, gha ọ khian vbọ?”

⁹ E Mosis wanniẹn wẹẹ, “Te ima hia khian kevbe ivbi ima negiẹrẹ kevbe avbe ọmaẹn, te ima viọ ivbi ima nikpia kevbe ivbi ima nikhuo khian, ohuan kevbe ẹwe kevbe ẹmila rhunmwuda te ima ra tie eghọ ugamwẹ ne Nọyaẹnmwa Osanobua ima.”

¹⁰ Ọba keghi tama iran wẹẹ, Mẹ ya eni e Nọyaẹnmwa vẹn ihẹn wẹ! Mẹ i ra gie uwa viọ amwẹ uwa kevbe ivbi uwa. Arodae nian wẹ emwi dan ọre ọ rre uwa ekhọe.

¹¹ Hiehiere! Wa ne ikpia ọre ọ gha yo ya ga Osanobua, a deghẹ ọnii wa ho. “Ọnii ọre iran ghi ya khulo iran hin odaro ọba rre.

¹² E Nọyaẹnmwa keghi tama e Mosis wẹẹ, nian obọ ruẹ da otọ Igipt ne u gie avbe irhiso gha dee. Iran gha do rri emwi hia ne ọ ghi wan nẹ, avbe emwi hia ne avan ne ukhunmwu fi yi.”

¹³ Ẹre Mosis na niẹn ọkpọ ẹre, e Nọyaẹnmwa na gie ẹhoho hoho la otọe nii hia la ẹghẹ avan kevbe ẹghẹ asọn hia ke odẹ ọlarre ovẹn gha dee. Ẹdẹ ghi gbe, ọ viọ avbe irhiso nii hia rre nẹ.

¹⁴ Iran ke wa vẹ gba otọe nii hia, iran na gha rre ẹvbo nii hia. Ọna ke gha re oghẹn irhiso ne ọ bun sẹẹ ne a he miẹn ra ne a ghẹ ghi miẹn.

¹⁵ Iran keghi wa rhu gba otọ sẹrriọ ne ehia ghi na biua nunuunu. Iran na rri emwi ne ọ ghi zọ nẹ vbe otọe nii, ke vbe ọmọ erhan hia ne avan ne ukhumwu ghi fi yi. Emwi ọkpa ne ọ mwẹ ebe ne a ghi sẹrae i rrọọ vbe erhan kevbe irunmwu nii rre otọe Igipt.

¹⁶ Ẹre ọba na zẹgiẹgiẹ tie Mosis kevbe Errọn, ọ wẹẹ, “I ru orukhọ ghe Nọyaẹnmwa Osanobua uwa kevbe uwa.

¹⁷ Banbanna nian, lahọ ya orukhọ mwẹ bọ mwẹ uhukpa na ne uwa na erhunmwu ghe Nọyaẹnmwa ne Osanobua uwa ne ọ mu irriaikhi ne ọ gbe ọmwa uhunmwu na hin mwẹ egbe rre.”

¹⁸ E Mosis keghi kpao vbe ehe ne ọba ye rre, ọ na ya na erhunmwu ghe Osanobua.

¹⁹ E Nọyaẹnmwa keghi fi ẹhoho nii werriẹ khian ọ ghe odẹ orrie ne ọ viọ avbe irhiso nii, ọ ke kpolo ehia ku okun Irunmwu. Irhiso ọkpa ma vbe ke ẹe vbe otọ Igipt.

²⁰ Sokpan e Nọyaẹnmwa keghi ya ọba yin ehọ, ọ ma gie ivbi Izrẹl kpao.

Ebiebi

²¹ E Nọyaẹnmwa keghi tama e Mosis wẹẹ, “Niẹn obọ ruẹ da odukhunmwu ne ebiebi ne ọ so sẹrriọ wẹ ọ ke ghi mwẹ imi so yan otọ Igipt.”

²² E Mosis keghi tọn obọ ẹre mu ghe odukhunmwu, ebiebi ne ọ mwẹ imi keghi so gba otọ Igipt hia la ẹdẹ eha.

²³ Ivbi Igipt i ghi sẹtin dẹghe egbe. Ne ọ vbe kpao vbe owa ẹre rre vbe ikpẹdẹ eha ẹi rrọ, sokpan uwanmwẹ ke gha rre ehe ne ivbi Izrẹl ye hia.

²⁴ Ọba keghi tie Mosis, ọ keghi khama rẹn wẹẹ, “Wa sẹtin gha khian ya ga e Nọyaẹnmwa, avbe amwẹ uwa kevbe ivbi uwa sẹtin lele uwa gha khian, sokpan ama wẹ avbe ohuan, ẹwe kevbe ẹmila uwa, a ghi sẹ eni rae ye edinran.”

²⁵ E Mosis keghi tama rẹn wẹẹ, “Ọnii rhiema wẹ, wẹ ọre ọ ghi viọ aranmwẹ ne ima gha ya zẹ ese ke ihaoko ne a giẹn uan ne ima gha ya zẹ ese ghe Nọyaẹnmwa ne Osanobua mwa.

²⁶ Te avbe emwirri ima vbe lele ima khian. Ma i ra fi ọkpa ye odieke. Te ima ra hannọ emwi ne ima ra ya zọ ese ghe Nọyaẹnmwa ne Osanobua mwa, vbe ẹi re te ima sẹ evba nii nẹ, ma tobọ ima i khian rẹn emwi ne ima gha ya ga e Nọyaẹnmwa.”

²⁷ E Nọyaẹnmwa kevbe ya ọba yin ehọ, ọ ma vbe gie iran kpao.

²⁸ Ọ keghi tama e Mosis wẹẹ, “wa kpao vbe ehe ne I ye rre. Wa mwẹ ẹwaẹn ne uwa ghẹ dọlegbe bu mwẹ rre, rhunmwuda, ẹdẹ ne uwa gha ye rre, a gha gbele uwa a.”

²⁹ E Mosis keghi tama rẹn wẹẹ, “U ta ẹe nẹ! Mẹ i ghi ra dọlegbe miẹn uwẹ aro ọvbehe.”