Ẹfisọs 5 - Edo Bible (E Baibol Ẹdo) Version 1996

A Rrọọ Vbe Uwu Uwanmwẹ

¹ Vbene a na miẹn ighẹ ivbi Osanobua ne ọ ghan wa khin, te uwa gha hia ne uwa gha ye vbe irẹn.

² Wa gie aho ẹmwẹ ọmwa gha kha yan ẹdẹ agbọn uwa, zẹ vbene Kristi ho ẹmwẹ mwa, ne ọ na ya ẹdẹ agbọn rẹn fi ohan ne ima, zẹ vbe emwi imuohan kevbe emwi izọ ese ne ọ winhin, ne ọ yẹ Osanobua.

³ Vbene a na miẹn wẹ emwa Osanobua wa khin, ẹ i re emwi ne ọ gbae ne a zẹdẹ gha họn ẹmwẹ alama oghẹ, ra ohọhọ ra uzuanmwẹ, vbe ehe ne uwa ye.

⁴ Erriọ ọre ọ ma vbe zẹdẹ ma ne uwa ne uwa gha ta ẹmwẹ ihi, ẹmwẹ akpa, ra ẹmwẹ iruẹn. Sokpan te ọ kere ne uwa gha rhie ekpọnmwẹ ne Osanobua.

⁵ Wa kakabọ rhie ọna ye ekhọe, ọmwaikọmwa ne ọ gbe alama oghẹ ra ne ọ họhọ ra ne ọ zuan (rhunmwuda ozuan, esa ẹbọ ne a ga nọ) ne ọ gha mwẹ oghae vbe Arriọba Kristi kevbe ọghe Osanobua, ẹ i rrọọ.

⁶ Wa ghẹ gie ọmwa rhọkpa ya ẹmwẹ ọzuọ mu uwa rẹrẹ, usun emwi ne ọ si ẹe ne izohu Osanobua gha na rhurhẹ yan iran ne ẹ i họn ẹmwẹ nẹẹn, ọre ena khin.

⁷ Rhunmwuda ọnii, wa ghẹ gu emwa vberriọ mu obọ hiehiere.

⁸ Wa tobọ uwa te ka vbe gha rre uwu ebiebi yi, sokpan, banbanna nian, ne uwa ghi na khian emwa ọghe Nọyaẹnmwa nẹ, uwu uwanmwẹ ọre uwa ghi ye.

⁹ Rhunmwuda, uwanmwẹ ọre ọ rhie otọ ne avbe emwi esi, vbene umamwẹ, emwi ne ọ gbae kevbe ẹmwata ye, ne a mọ ọmọ wọrhọwọrhọ.

¹⁰ Wa hia ne uwa gha ruẹ emwi ne ọ yẹ Nọyaẹnmwa.

¹¹ Wa ghẹ gu iran ni ru emwi oya ne a ru vbe uwu ebiebi mu obọ. Sokpan wa gha viọ iran ladian la idagbo. (

¹² Ekhue i gia sunu ye emwi ne iran ru vbe uwu ebiebi.)

¹³ A ghẹ ghi viọ emwi hia ladian idagbo nẹ, a ghi do gba iran vbene iran ye hẹ.

¹⁴ Rhunmwuda emwi ne a ghi rhie ladian ne aro gba nẹ, uwanmwẹ ghi nọ, ọnii ọ si ẹe ne a na tae wẹẹ, “Rhiọrre, olovbe. Rhiọrre vbe orinmwi, Kristi gha wan uwanmwẹ muẹn.”

¹⁵ Rhunmwuda ọnii, gha gbe aro ke otọ ẹsẹse vbene u ru emwi hẹ. Ghẹ gha yin uyinmwẹ enọ ma rẹn ne a ye, sokpan gha ru emwi umẹwaẹn.

¹⁶ U gha miẹn ẹkpo otọ ya ru emwi, u ghi lo ẹre ẹsẹse rhunmwuda, ẹghẹ ne a ye na i maa.

¹⁷ Rhunmwuda ọnii, wa ghẹ gha re akpa sokpan, hia ne u gha gualọ otọ ẹre ighẹ emwi ne Nọyaẹnmwa ho ne u ru.

¹⁸ Ghẹ da ayọn gbe egbe, rhunmwuda te ọ ra miẹn ruẹn uhunmwu, sokpan gha re ne ọ vuọẹn ne Orhiọn.

¹⁹ Wa gha ya ẹmwẹ e Psalm gu egbe guan, deba ihuan kevbe ihuan ugie, wa gha so ihuan kevbe Psalm ghe Nọyaẹnmwa, deba oghọghọ vbe uwu ekhọe uwa.

²⁰ Gha kpọnmwẹ Osanobua ne Erha emwi hia vbe ẹghẹ hia, vbe eni Nọyaẹnmwa Jesu Kristi.

Avbe Ọdọ Vbe Amwẹ

²¹ Wa gha gbe uhunmwu ke otọ ne egbe, rhunmwuda ọghọ ne uwa ya ne Jesu.

²² Avbe amwẹ, wa gha gbe uhunmwu ke otọ ne avbe ọdafẹn uwa zẹ vbe ọghe Nọyaẹnmwa.

²³ Ọdọ mwẹ ẹtin vbe uhunmwu amwẹ ọnrẹn, zẹ vbene Kristi mwẹ ẹtin vbe uhunmwu esọsi, Kristi tobọ ẹre ọrọre Ọmiọnmwafan esọsi ne ọre egbe ẹre.

²⁴ Rhunmwuda ọnii, ọ kere ne avbe amwẹ gha gbe uhunmwu ke otọ ne avbe ọdafẹn iran fẹẹrẹ, zẹ vbene esọsi vbe gbe uhunmwu ke otọ ne Kristi.

²⁵ Wa ne avbe ọdọ, wa gha ho ẹmwẹ amwẹ uwa, zẹ vbene Kristi ho ẹmwẹ esọsi, ne ọ na ya ẹdẹ agbọn rẹn fi ohan nẹẹn.

²⁶ Te irẹn ru ọna, ne ọ miẹn ehe na ya ẹmwẹ ọnrẹn ya esọsi fi ohan ne Osanobua, vbe iyeke vbe ọ ghi ye amẹ kpe ẹe huan nẹ.

²⁷ Ne ọ miẹn ehe na rhie esọsi gi egbe irẹn, ke ẹe kevbe ose ẹre hia, ne ọ huanrẹn kevbe ne ẹ i mwẹ okan, ne emwi ma sa, ne ọ ma bunnọ ikuẹnkuẹn, kevbe ne ẹ i mwẹ ehe ne ọ kẹe yi hiehiere.

²⁸ Te ọ kere ne ikpia gha ho ẹmwẹ amwẹ iran, zẹ vbene iran ho ẹmwẹ ikinnegbe iran. Okpia ne ọ ho ẹmwẹ amwẹ ọnrẹn, egbe ẹre ọ re ọ ho ẹmwẹ ọnrẹn. (

²⁹ A i miẹn ọmwa ne ọ khọ ẹko ikinnegbe ẹre, sokpan te ọ koko ẹe, ọ ghi gha gbe aro ghe ẹre zẹ vbene Kristi gbe aro ghe esọsi.

³⁰ Rhunmwuda egbe ẹre ọre ima khin.)

³¹ Zẹ vbe ne ebe tae, “Rhunmwuda ọnii ọre okpia gha na sẹ erha ẹe kevbe iye ẹe rae, ọ ghi rhie egbe mu amwẹ ọnrẹn, iran eva ghi khian ọkpa.”

³² Ẹmwata nọkhua ọre a rhie maa vbe ebe na, mẹ vbe rẹn wẹ Kristi kevbe esọsi ọre a ta ẹe gie.

³³ Sokpan avbe ta ẹe gie uwa, ọ kere ne dọmwadẹ ọdọ gha ho ẹmwẹ amwẹ ọnrẹn, zẹ vbe egbe ẹre, dọmwadẹ amwẹ ghi vbe gha ye ọghọ ne ọdọ ẹre.