Diuteronomi 17 - Edo Bible (E Baibol Ẹdo) Version 1996

¹ “Ghẹ ya ẹmila ra ohuan ne ọ mwẹ okan zọ ese ghe Nọyaẹnmwa Osanobua ruẹ, emwi ne ọ sọnnọ e Nọyaẹnmwa ọna khin.

² “Gie a kha ighẹ u họn wẹ ikpia ra ikhuo eso ru khọ ghe Nọyaẹnmwa vbe ọkpa vbe uwu ẹvbo ne ọ re ọwuẹ, ighẹ iran rra uhi ẹre.

³ Vbekpa ne iran na ga kevbe ne iran na gho ẹbọ ọvbehe ra owẹn, uki ra avbe orhọnmwẹ emwi ne Nọyaẹnmwa wẹ ne a ghẹ ru.

⁴ U gha họn egbe ẹmwẹ vberriọ, u ghi kakabọ gualọ otọ ẹre a deghẹ ẹmwata na sunu vbe Izrẹl.

⁵ Wa ghi rhie ọmwa nii ladian hin ore agọ rre, ne uwa filo okuta gbe ẹe rua.

⁶ Sokpan arhin eva ra eha gha sẹ osẹe gbe ọmwa, a sẹtin gbe ẹe rua, sokpan a ghẹ gbe ẹe rua vbe orhiọn ọkpa a sẹ osẹ gbe ẹe.

⁷ Iran ni sẹ osẹe ni ọ re ọ gha ka filo okuta gbe ẹe, emwa ni dekẹe hia ghi do filo okuta gbe ẹe. Odẹ vbenian ọ re u gha ya sẹtin gbe ukhu na an.

⁸ “U gha ghe a ghi miẹn ẹzọ eso ne ọ wegbe sẹ ọmwa ne ọ bu ohiẹn ọghe ẹvbo nii ẹi mwẹ emwi ne ọ re ọghe ọmwa, ra ẹmwẹ ikuan egbe ye, ẹmwẹ nii laghe vbene izigha ra izigha ọyẹvbu ye. Ọ gha ye vberriọ, wa ghi gha rrie ihe ọkpa ni ne a na ga ni ne Nọyaẹnmwa ne Osanobua uwa zẹe.

⁹ Ne uwa ya gui ẹzọ uwa ma avbe ohẹn Livai kevbe ọbuohiẹn ne ọ mu unu vbe ẹghẹ nii, ne iran bu ohiẹn nii.

¹⁰ Iran gha bu ohiẹn nii, vbene iran tama ruẹn zẹe, ọ re uwẹ gha ru.

¹¹ Gie ẹko ohiẹn ne iran buru vuọn ọn, ne u vbe lele igiodẹ ne iran ru vbe odẹ hia fẹẹrẹ.

¹² Ọmwa ne ohan gie ẹe fieghe uhunmwu ye ẹmwẹ ne ne ọ bu ohiẹn ra ohẹn ne iruemwi sẹ ọ re egbe ẹghẹ nii ta ẹe, a ghi gbe ẹe rua, odẹ vbe nian, u gha wabọ emwi dan vberriọ hin egbe ivbi Izrẹl rre.

¹³ Emwa hia ghi họn, ohan ghi do gha mu iran, a i ghi vbe miẹn ọmwa ne ohan gha ye gie ẹe ru emwi vberriọ ọvbehe.

¹⁴ “Wa ghẹ ghi yan otọe ne Nọyaẹnmwa Osanobua ra mu ne uwa nẹ ighẹ uwa ghi gbe ẹkun sẹ otọ nẹ, ẹghẹ nii, wa gha kha wẹ wa ho ne uwa gha mwẹ ọba zẹ vbe avbe ẹvbo ni lẹga uwa.

¹⁵ Wa gie aro da ẹe wẹ emwa ne uwa zẹ ne ọ gha re ọba ighẹ ọmwa ne Nọyaẹnmwa zẹ nẹ ọ re nọ. Ọ ghi gha re ọkpa vbe uwu avbe ivbi uwa, wa ghẹ ye ọrriọvbe ma ọba uwa.

¹⁶ Ọ ma kei ne ọba gha mwẹ ẹsin ni bun, ne ọ gha re ọghe ivbiyokuo ẹre, ọ ghẹ vbe gie emwa gha rrie Igipt ya dẹlẹ ẹsin rre, rhunmwuda, e Nọyaẹnmwa ta ẹe wẹ emwa irẹn i ra dọlegbe gha rrie odọ.

¹⁷ Ọba ghẹ viọ ikhuo ni bun, ọna gha ya ẹe fi iyeke gbe Nọyaẹnmwa, ọ ghẹ ya esiliva kevbe igoru họn ẹfe ne egbe ẹre.

¹⁸ Ọ ghẹ ghi rriọba nẹ, ọ ghi gha mwẹ ọkpa vbe ebe uhi ni ọghe Osanobua, kevbe iruemwi ne a gbẹnnẹ ladian vbe ẹmwẹ arre ne ọ gu avbe ohẹn e Livai.

¹⁹ Ọ ghi rhie ebe na sikẹ egbe ne ọ gha tie ẹre vbe ẹdẹ agbọn rẹn hia, ne ọ miẹn ehe na ruẹ vbene a ya mu ohan e Nọyaẹnmwa hẹẹ ne ọ vbe ya ẹkoata gha ye uhi ne ọ rrọ ru emwi.

²⁰ Ọ na gha bu ẹre ude ne ọ ghẹ ya gha ro ighẹ rẹn ma an sẹ ivbi Izrẹl ne ihua ẹre kevbe ne ọ ghẹ ya rra uhi e Nọyaẹnmwa vbe odẹikodẹ. Ẹghẹ ni ọ re irẹn vbe ivbi ẹre gha na rriọba yan ivbi Izrẹl la orre ni bun.