Asan-Ibo 9 - Edo Bible (E Baibol Ẹdo) Version 1996

¹ I kakabọ roro emwi na, I keghi miẹn wẹ Osanobua ọ re ọ kha vbene emwa esi kevbe ni wan gha ru emwi hẹ, uhin ya sẹ egbe aho ẹmwẹ ọmwa kevbe ikhuiwu ne iran mwẹ. Orhunmwu ọkpa ne ọ rẹn emwi ne ọ rre ọre odaro i rrọ.

² Ọnii ma si emwi rhọkpa, emwi okpa ọ re ọ rruan ọmwa esi kevbe ọmwa dan, ọmwa ne ọ maa kevbe ne ẹ i maa, iran ni mwẹ ekhọe ugamwẹ Osanobua kevbe iran ni i mwẹ, iran ni zọ ese kevbe iran ni i zọ. Ọghe ọmwa esi ma maa sẹ ọghe ọmworukhọ, ọmwa ne ọ vẹn ihẹn ma maa sẹ ọmwa ne ẹ i vẹn.

³ Emwi okpa ọ re ọ rruan ehia vbe abọkpa nii, ọna ma vbe zẹdẹ kei, zẹ vbene emwi nibun ni sunu vbe agbọn na ye. Omwa vbene a na miẹn wẹ emwa ye rre agbọn, te ekhọe iran vuọn ne ọkhọ kevbe emwẹmwẹ, iran ghi gha wulo uwu udomwurri.

⁴ Sokpan, ọmwaikọmwa ne ọ rre agbọn emwa nagbọn, ye mwẹ idanmwehọ, ekita ne ọ ma he wu ọ re ọ maa sẹẹ oduma ne ọ wu nẹ.

⁵ Erriọ nọ, emwa ni rre agbọn rẹnrẹn ighe iran gha wulo, sokpan, iran ni wulo nẹ ma rẹn emwi rhọkpa. Iran i ghi vbe mwẹ ere ọvbehe, a mianmian iran nẹ fẹẹrẹ.

⁶ Ahoẹmwọmwa iran, ẹko khọmwẹ iran, kevbe emwi ne ọ fifi iran egbe ehia wulo lele iran. Iran i ghi sẹtin mwẹ obọ vbe emwikemwi ne a ru vbe agbọn na.

⁷ Gie obọ gha kẹe, rri evbare ruẹ ne u gie ẹko gha sẹ uwẹ ọyẹnmwẹ, da ayọn ruẹn ne u dọlọ aro yi vbe uhunmwu. Erhọkpa i khọ vbe aro Osanobua.

⁸ Gie ọyẹnmwẹ gha sẹ uwẹ vbe ẹghẹ hia ne u vbe gie aro gha ma ruẹn vbe uhunmwu.

⁹ Gu okhuo ne u ho ẹmwẹ ọnrẹn lo agbọn ruẹn vbe ẹghẹ ne u gha ya vbe agbọn ọrhiae ne Osanobua ya ru uẹ ẹse na. Lo nene avbe ẹdẹ ne ọ ma maa na hia, rhunmwuda, ọna okpa ọrọre ere ne u ra re vbe uwu ẹsọn ne u miẹn hia.

¹⁰ Mu aro ye iwinna ne u a rhirhi a gha winna rhunmwuda, a gha rrie a i wua nẹ, a i ghi ru emwi rhọkpa, iro i ghi rrọ, irẹnmwi i ghi rrọ, ẹwaẹn i ghi rrọ, ehe ne uwẹ rrie ọ re onii khin.

¹¹ I keghi vbe miẹn emwi okpa ọvbehe vbe agbọn na wẹ, ẹ i re iran ni rhulẹ sẹẹ ọ re ọ mu okaro vbe ulẹ, ẹ i vbe re iran ni din sẹ ọ re ọ khọn miotọ vbe okuo. Avbe umẹwaẹn i mobọ sẹtin khuan okhuan unu iran, emwa ni fu ẹro i mobọ vbe sẹtin fe, emwa ni guẹ sẹẹ i mobọ sẹ ukpo ni yo. A i miẹn ọmwa ne emwi i beghe.

¹² U i sẹtin rẹn ẹghẹ ne ẹghẹ ruẹ gha ya rre. Zẹ vbene ifi mu ahianmwẹ vbe udomwurri, zẹ vbe ehẹn ne ọga mu, erriọ ọ re emwi dan zẹdia sunu vbe egbe mwa, vbe a ma ro a ma kọ.

Ẹmwẹ Ẹwaẹn Kevbe Ukọnmwẹ

¹³ Emwi ọvbehe yevbe rrọ ne i vbe miẹn, igiemwi ọghe ne a ya ghe ẹwaẹn vbe agbọn na.

¹⁴ Ẹvbo okpa ne ọ ye kherhe kegha rrọ, emwa ni rrọ i vbe bun. Ọba ne ọ mwẹ ẹtin ẹsẹse okpa keghi mu okuo gha khian, ọ keghi lẹ khinkhian ẹẹn, ọ na wẹ rẹn ra guọghọ ekẹn ọnrẹn gberra.

¹⁵ Okpia okpa ne ọ re ovbiogue, sokpan ọmọ ne ẹwaẹn gba na, keghi rre evba, ọ gha te sẹtin miẹn ẹvbo nii fan, sokpan a ma miẹn ne ọ ziro kan rẹn.

¹⁶ Ọkpẹre ne I kegha ta ẹe wẹ ẹwaẹn ọ re ọ maa sẹ ẹtin, sokpan, a i miẹn ne ọ kha ighe ovbiogue wan, ra ne ọ zẹ ye ẹmwẹ ne ọ guan.

¹⁷ A hẹko gbe ehọ kotọ gha danmwehọ ẹmwẹ nekhuẹrhẹ ọghe umẹwaẹn, ọ re ọ maa sẹẹ ne a gha danmwehọ uvannọmwẹ ọghe ne ọ khaemwisẹ vbe iko avbe ọzuọ.

¹⁸ Ẹwaẹn ọ re ọ dunna na sẹ umozo, sokpan, ọmworukhọ gha sẹtin mu emwi esiesi ọrhẹnrhẹn rhia.