Aizaia 48 - Edo Bible (E Baibol Ẹdo) Version 1996

Osanobua Ọrọre Nọyaẹnmwa Ẹdẹnakhuẹ

¹ Ivbi Izrẹl wa danmwehọ ẹmwẹ na, wa ne ivbi uniẹn e Juda. Wa ọ re ọ ya eni Nọyaẹnmwa vẹn ihẹn wa na vbe gha kha ighẹ Osanobua Izrẹl ọ re uwa ga. Sokpan, ẹmwẹ ne uwa ta, te uwa ba tae kẹkan.

² Sevba wa ghi ye gha ya unu hia tae wẹ ivbi ore nọkhua ọghe ẹvbo nọhuanrẹn nii ọ re uwa khin, kevbe wẹ Osanobua Izrẹl ọ re uwa ya egbe kọ ọmwa ne eni ẹnrẹn re e Nọyaẹnmwa ne Oghodua.

³ E Nọyaẹnmwa tama Izrẹl wẹẹ, “Ọ kpẹre ne I ghi ta emwi ne ọ gha sunu yotọ. I keghi vbe ru ẹe vbe udomwurri ne ọ sunu.

⁴ I rẹnrẹn ighẹ wa gha rhie ma ighẹ wa zevbudu wa na ye gbain vbe ematọn, kevbe ne ẹ i vbe vbokho zẹ vbe ẹgere.

⁵ Ọ re I na tae yotọ ke ẹkpo nii gha dee vbene ẹdẹ agbọn uwa ra gha ye hẹ, a ghi taa emwi yotọ ọ ke do sunu, ne uwa ghẹ miẹn ehe na kha ighe amazẹ kevbe ẹbọ uwa ọ re ọ ru ẹe ne iran na sunu.

⁶ “Avbe emwi ne I taa yotọ hia sunu nẹ nian ọ kere ne uwa miẹnkue nian wẹ emwi ne I taa yotọ hia, ẹmwata ọ re iran khin. Banbanna nian, I gha ta avbe emwi ọgbọn ni he dee, emwi ni gha sunu, ne I ma he ka ta yi.

⁷ Eban nian mẹ ra do gha ru ẹe ne iran sunu emwi vbenian ma he ka sunu vbe ẹghẹ ne ọ gberra. Akpawẹ te iran sunu, wa gha te kha wẹ wa ka rẹn ehia nẹ.

⁸ Mẹ rẹnrẹn wẹ wa i gia mu ẹtin yan wẹ, etẹ ọ re a rẹn uwa yi ẹdẹ. Onii ọ sii ẹe ne uwa ma na zẹdẹ họn vbekpa ọnọna hiehiere ne ifi ẹmwẹ ọkpa vbọ ma na vbe fi la uwa ehọ.

⁹ “I gbe ibiẹ rrie vbe ohu ne ọ te mu mwẹ ne emwa miẹn ehe na gha rho eni mwẹ. I kie ẹre werriegbe ne I ghẹ ya fuẹn uwa a.

¹⁰ I danmwẹ uwa ghe nẹ vbe erhẹn irrioya zẹ vbene a kpe esiliva vbe uwu erhẹn sokpan, I keghi miẹn wẹ akpa ọmwa i rre uwa egbe hiehiere.

¹¹ Emwi ne I ru, rhunmwuda ekpẹn ne egbe mwẹ ọre I na ruẹe. Mẹ i ho ne a ya iruẹn ye eni mwẹ ra ne ọmwa ọvbehe rhokpa ghae vbe uyi nii ne ọ kere ne ọ gha re ọghomwẹ, ọ ghi mẹ ọkpa.”

E Sairọs, Ọkaolotu Ne Nọyaẹnmwa Zẹe

¹² E Nọyaẹnmwa khare wẹẹ, “Wa danmwehọ mwẹ, ivbi Izrẹl, emwa ne imẹ tiere, mẹ ọrọre Osanobua, okaro, okiekie ọkpa kẹkan ne ọre Osanobua.

¹³ Obọ mwẹ ọ re ọ gbe ẹyotọ agbọn ọ na vbe tan iso gbadaa. I gha gie ne a tie otọe kevbe iso, iran ghi rre vbe ọwarọkpa do rhie egbe ma.

¹⁴ “Wa hia si koko, ne uwa danmwehọ! Ọkpa i rrọ vbe avbe ẹbọ ne ọ sẹtin tae yotọ wẹ ọmwa ne imẹ zẹe gha mu okuo yo Babilọn; emwi ne I ho ne ọ ru, ọ re ọ ra ru.

¹⁵ Mẹ ọ re ọ guanrẹn, I na vbe tie ẹre I su ẹe ladian, I na vbe rhie akhọnmiotọ ne ẹẹn.

¹⁶ “Banbanna nian, wa sikẹ mwẹ ne uwa họn ẹmwẹ ne I guan. Ke omuhẹn gha dee, te iwa ta ẹmwẹ mwẹ vbe azagba I keghi vbe gha ru ẹe ne ẹmwẹ mwẹ sẹ.” (Banbanna nian, e Nọyaẹnmwa ne Udazi rhie ẹtin ẹnrẹn mẹ nẹ, ọ na gie mwẹ.)

Emwamwa Ne Nọyaẹnmwa Mwamwaẹn Ne Emwa Rẹn

¹⁷ Osanobua Nọhuanrẹn ọghe Izrẹl, e Nọyaẹnmwa ne ọ miẹn uwa fan khare wẹẹ, “Mẹ ọrọre Nọyaẹnmwa ne Osanobua uwa ọmwa ne ọ ho ne ọ ma uwa emwi ne umamwẹ uwa, ne ọ vbe gha su uwa lele odẹ ne uwa gha la.

¹⁸ “Akpawẹ te uwa lele uhi mwẹ nian, afiangbe gha a lẹ bu uwa rre, zẹvbe ẹzẹ ne ẹ i ka. Akhọnmiotọ, gha a re ọghe uwa zẹ vbe uromwẹ ẹzẹ ne ọ lẹ sẹ oke.

¹⁹ Ivbi uniẹn uwa gha a bun zẹvbe ikpekhae mẹ gha vbe ru ẹe ne a miẹn wẹ a ma fuẹn iran an ẹdẹdẹmwẹdẹ.”

²⁰ Wa ladian vbe Babilọn, wa gha khian vbe abọ kẹkan wa ya oghọghọ ya nene iyẹn go wa gie emwa họn ẹẹn vbe ehe hia: “E Nọyaẹnmwa miẹn Izrẹl ne ọguọmwadia ẹre fan!”

²¹ Ẹghẹ ne Nọyaẹnmwa na viọ emwa la uwu ato ne ọ kae kevbe ne ọ tọn ovbamẹ ma gbe iran. Ọ gie amẹ ke uwu okuta vẹ ladian ne iran, ọ wa gha okuta yotọ, amẹ keghi vẹ ladian.

²² “Egberọkhọmwẹ i rrọ ne emwa orukhọ,” erriọ Nọyaẹnmwa khare.