Ụhịrẹyị 5 - IWE ỌNỊNỊ

Asị ọza gụrị ọsẹrẹka

¹ Ozi emi, batọ dị wa wụ́ ịrẹyị ịrẹyọyẹ ọnịrị eyohweyi ọnị maa ka yị wụ,

² agụvị wa yẹ ịsa a vọrọ ka wa mẹ̀, dị ịrẹyị irenu awụ ọọ sị zụ ka wa nyị ịrẹyọyẹ.

³ Ịrẹyị irenu ịbẹhị o hine anka ẹhụ, dị ịrarẹ anị swa hụụnị angwẹ nị.

⁴ Ama ẹngụkata anaā vatụra a, ọ̀ nyịrẹyị hu ẹchịpa, dị ọọ̄ tụ̀ ọza ụnava anka ụhwọ ọ nyị eyi ẹẹva avọọ nị.

⁵ Wàa saasa ọsẹrẹka, aa sị ụ na gẹrị ozu awụ nị. Ẹhẹ anị vị ana sị uswọọza gẹ ẹngụ aa zị.

⁶ Ọ sị ha hụrị oze ẹhẹ obooro, dị ọ kụkụ e vu na kẹnẹ nị, ọ yị yẹ ịsa aa mẹ̀.

⁷ Ezi emi, wụ́ ịrẹyị amị. Asị ụ hi ayị ịsa maa kà a wụ aanị.

⁸ Noze hi ẹngụ ọnyẹnẹẹ ọnọọ. Asị ụ zị oze ọgụ anị ne hu vụrụ-vụrụ.

⁹ Ẹ̀ yị vị avọọ, ụ waa tẹ ịnị ụvọ aza nị, dị ọza odivi jị ọyị yị ẹhẹ awụ,

¹⁰ dị ahịka ọzẹnẹsa kẹnẹ ọ rị ogu ọnị ụ sị ẹhị ẹngụ awụ si nị.

¹¹ Ịjị ẹngwẹngụ anị ọ̀ọ vẹ, di u wee tii ịrẹsụ ode, dị ụ ta mẹ pẹpẹpẹ ee zii isu.

¹² Ịjọnọọ dị ụ kụkụ aa su ụmayịyẹ ka wẹ yị vịdị dọ ịrẹyị ọza tụ ịzọọ.

¹³ Wẹ yị batọ ịrẹyị aza ana aa zụ wụ ịsa. Wẹ yị sị ụtọ nọ ịnị ịrẹyị ẹnịnị vụrụ-vụrụ.

¹⁴ Ama o me tu odivi booro aanị, ụhị aa nyị ụ eyi ịnọyị-ịnọyị.

¹⁵ Jẹẹ pe ose ewu kẹnẹ, ẹwụrị ọ kẹnẹ ọọ̄ mẹrị ẹngụ.

¹⁶ Sị ẹ vẹ dị iruvo awụ e yi ku ẹtẹ aha ọnya? Sị ẹ vẹ dị ụ waa séré-séré zịịzị?

¹⁷ Ẹwụrị ose ewu kẹnẹ ọọ mẹ ẹvarose, asị ụ rẹ zị ụsẹ ịrẹmarehi.

¹⁸ Ayị awụ ó hine tu ose ewu. Waa mẹrị ọnẹẹ ọnị ụ nyị hụụnị ozweyi awụ.

¹⁹ Ọnẹẹ ene zoza vọnọ-vọnọ anka akọnọ avọọ. Navọ ịrẹyị anị ọ dọ wụ ayị, dị oyisì anị ọ vị ụkụ tụ wụ ayị pooro.

²⁰ Ozi emi, sị ẹ vẹ dị ịrẹyị ose ọza maanị vị ụkụ tụ wụ ayị? Sị ẹ vẹ dị ahịka ịbẹhị ọ zee wu eyi hụụnị ọsẹ ẹwụ nị?

²¹ Ẹnẹyịmavara ee re avaba ịsa ọnị waa mẹ̀. Ọ yẹ avaba ụsẹ ọnị waa zị.

²² Ebira odivi aza ọhịmị vị anaa va ịrẹpa ee zi wa. Ebira ịvị ọnị ẹ yaa mẹ̀ ọ vị ọha ana za wa nị.

²³ Ụra ọbanyị ẹngụ ẹnịnị ee vu wa ẹtẹ, dị eyọhụrẹ ẹngụ ẹnịnị aa wụ̀ wa ha nị.