Ụhịrẹyị 31 - IWE ỌNỊNỊ

Ajuwe ohinọyị

¹ Â nyị ọza ịnya aanị ana a hị́ Ịrẹmụwẹrị. Ộ vịdị vị ohinọyị Imasa da. Ịrẹyị ẹnẹnị ọ vị ịrẹyọyẹ ọnị ọnyị anị sị zụ ọ nị.

² Eyiye ozi emi! Eyiye ozi ịnị ịnẹ amị. Eyiye ozi ọnị mị hị́ eku tụra ịrẹsụ.

³ Asị ụ zẹ ka anyẹnẹẹ o du wu ẹhẹ ha. Avọọ ẹnịnị mẹẹ̄ va ohinọyị ọrụrụ-ọrụrụ nẹtẹ nị.

⁴ Dị ộ ka, ẹ yị zoza ka ohinọyị nịnị e hu eche dị ọ̀ọ mẹrị wa dị ọ vaa sị vị eche ọkatẹngụ bẹẹ.

⁵ Ẹyị vị avọọ ọ vaa mẹ ka asị ẹ saasa ọda Ohomorihi dị ẹ kụkụ à mẹ ẹvaya yị onosiye nịnị.

⁶ Sị eche yị ọza ene vee su ọnịrị ọza ọnị ayị anị du.

⁷ Navọ wa e hụ eche dị e hi ayị ụzọngwa ọnịrị ụya ọnị ẹ yaa rị.

⁸ Ohinọyị a vọrọ ka ọ vị irenu ọkarẹyị aza ẹnẹ ẹ zụ̀ ka ịrẹyị nị. Dị ọ̀ rẹ dọ ọkụmị nịnị tịtẹ hụụnị ụvọ aza ana a mẹ̀ wa eyi ngwẹ́ngwẹ̀ nị.

⁹ Dị ọ̀ọ ka ịzẹyịza, dị asị aza re oze mẹ̀ onosiye nịnị rị.

Ebira ọnẹẹ obooro

¹⁰ Ọnẹẹ obooro ọọ zwọ. Ọnị ọ nyị ụbanyị huni ẹkẹhị nị.

¹¹ Ẹngụ ọnẹẹ ọnọọ vị ọnị ọva anị sị ayị tụra. Uruwa ọ yị mā za ọva anị.

¹² Avaba ẹhẹ anị vị eneē si sii ọyịza yị ọva anị. Ọ yị dọ ka a nyị odivi ene tu ọ.

¹³ Ọ maā kara ụvọ anị hi agada, oō ngwẹ òwù dị e hi ịta nị.

¹⁴ Ọọ̄ nọ aha ẹnẹẹnẹ na kụ ịsọyịrị vee hi ini eehi anka ẹpa ana kụ osohu nịnị avọọ nị.

¹⁵ Ụmẹ etumeyọnị ọọ̄ sị kwẹẹtẹ mẹ̀ ịsa yị aza anị, dị ọ ka yị ezi ahụ anị ịsị a vọrọ ka ẹ mẹ̀ nị.

¹⁶ Ọnyẹnẹẹ ana yẹ a mẹmẹ hị́ ẹtẹ dị ọ kụ ịsa tụ ọ ịnị ụmẹ ọ vị nị.

¹⁷ Ọza ana zụ mẹ̀ ụkọrọ ọ vị nị.

¹⁸ Ọnyẹnẹẹ ana yara sẹ̀ ohu ọ vị nị. Ọnị o hu ịra mẹ̀ ụkọrọ naa sụ nị.

¹⁹ Ọnị o ngwẹ owu ọnị oō sii hí ịta anị nị.

²⁰ Ọza ana gụ onosiye ụvọ ọ vị nị.

²¹ Ọ maā hụrẹ ayịnẹ ahị agụvị ka aza anị ẹ nyị ịta ọyị sị kụ ẹngụ.

²² Oni oō hí ịta enee ku ẹngụ, dị ọ sị achị ovivi ene zoza chire.

²³ Ọva anị vị ọnị eyi yẹ ịzị ọdọvịdịị kụụ gụ ịnị ẹkụra, dị a sị ụbanyị yọ nị.

²⁴ Ọọ̄ jị awuru hi ẹtẹ dị aā náa yị ọnịnyama nịnị.

²⁵ Ọza ana nyị ebira ozoza ọnị aza sị ụbanyị yị ọ vị nị, o tenyi ẹngụ ẹ ma hụrị ayịnẹ ụhwọọ.

²⁶ Ọ̀ọ ha irenu, ịrẹyọyẹ ọ kà nị. Ọ kọ aza ka ee sì ịrẹyị ẹngụ nị.

²⁷ Ọnẹẹ anaā sịị ụvọ mẹ̀ ịsa pooro kẹnẹ ọ vị nị. Ọọ̄ tẹsị anineehi anị.

²⁸ Ezi anị vị anaā kà ebira ọyịza anị. Ọva anị vị anaā ga a.

²⁹ Dị ọ ka, ọnẹẹ ozoza gwẹtẹ de ama ose anị ọnọnị o hu nị.

³⁰ Uzoza ọ zụ vene ọza o, ọ vaa sa, ama ọnẹẹ ana nyị angwahi Ẹnẹyịmavara vị ana vọrọ ka àa ga.

³¹ Sị ụbanyị yị ẹngụ ọnẹẹ ọnọọ dị ọzọza ọ̀ọ ga a, ịzị aa kụ gụ ịnị ẹkụra.