Oyinyima 30 - IWE ỌNỊNỊ

Ụhị ọyịkụ̀ ana ya ịnị akakana Irechẹrị ọnịrị Iriya

¹ Irechẹrị ô re ka ọnị ọ yị ma ozi yị Ijekọvụ. Di o nyima di ee pè onyeyiza anịị kụ̀ ụ̄hị nị. Dị ọ ka Ijekọvụ ọ̀ yị si ozi yị ọnị ma, vị ọnị ee sú nị.

² Di ayị sị kụ́ Ijekọvụ, dị ọ ka, “Ọnị ọ́ọ́ vị Ohomorihi ana ka asị o re ozi ma nị?”

³ Di Irechẹrị ka ọ̀ sị Ibiriha ozi ahụ anị ọnọnị di ọnịrị ọ ọ̀ọ zị, ịsavọọ ọ̀ ma ozi dị ọnị ọ̀ sị mẹ aanị.

⁴ Ịzẹyịza dị ọ sị Ibiriha yị Ijekọvụ ka ọnịrị ọ̀ ọ̀ọ zị nị.

⁵ Chee kẹnẹ di Ibiriha ee zyẹẹ, dị ọ sị ozi ọnọrụ ọnya ma yị Ijekọvụ nị.

⁶ Di Irechẹrị ka, “Ohomorihi ka ọnị ọ yị rị ịvị. Ọ kà ộ wụ́ aduwa anị, ọ raà si ozi ọnọrụ ọnyaa yị ọnị.” Dị ọ ka ozi ọnọọ ọ rị Ịdaanị nị.

⁷ Ibiriha ozi ahụ Irechẹrị o re zyẹẹ, dị ọ rẹ ma ozi ọnọrụ ọsa yị Ijekọvụ nị.

⁸ Di Irechẹrị ka, “Ọnịrị onyeyiza anị mẹ̀ gẹ ịrẹvụ ọbanyị ọnị o si o hú.” Dị ọ ka ozi ọnọọ ọ rị Inahwitari nị.

⁹ Iriya mè re ka ọnị ọ sị jẹẹ ọnị ọ yị kụkụ ma ozi, di ọnị rẹ sị Iziripa ozi ahụ anị dị ọ sị yị Ijekọvụ ka ọnịrị ọ ọọ zị nị.

¹⁰ Di Iziripa ma ozi ọnọrụ ọnya yị Ijekọvụ nị.

¹¹ Di Iriya ka, “Ọnị ọọ dà nyị ịrẹsụ ọyịza.” Dị ọ ka ozi ọnọọ ọ rị Igadi nị.

¹² Iziripa ozi ahụ Iriya ọ rẹ ma ozi ọnọrụ ọhụva yị Ijekọvụ.

¹³ Di Iriya ka, “Ọnị ọ dà rị aha kẹnẹ! Anyẹnẹẹ vị ana kụkụ vaa hị́ ọnị.” Dị ọ ka ozi ọnọọ ọ rị Aseri nị.

¹⁴ Ịnị ụmẹ ọnya a màa mẹ̀ ịsa ịnị aarẹ ana aā hị́ ihwiti, di Irubẹnị ne hèé ẹbaatụ ịnị aarẹ nị. Di Irubẹnị kụ́ ọ va yi Iriya ọnyị anị nị. Di Irechẹrị hị́ Iriya dị ọ ka, “Aarịhịnị ọ̀ sị ịnị ẹbaatụ ẹnẹẹ ọnị ozi anị kụ́ va yọ avọọ yị ọnị de.” Ịnị ẹtẹ Anisirẹrị, ẹbaatụ vị ọnya ịnị avị ene hi ịzọọ. A sịị̄ mẹ ahọ̀nọ ene e ro ka ọ zụ mẹ ka ọnẹẹ ò zyẹẹ. E re ro ka ẹbaatụ ọ zụ mẹ ka ọnọrụ ọ̀ nyị ẹngụ anị.

¹⁵ Di Iriya ka: Ọva anị ọnị ọ dọ ọnị avọọ ọ yị hụ ọ? Ọ kà o ree sì ka ọnị ọ dọ ẹbaatụ oni ozi anị kụ́ vẹẹ? Di Irechẹrị ka: Ọ̀ọ sị ẹbaatụ ozi ọnọọ yị ọnị, oruva di ọnịrị adarehi anị sụ aha ọnya.

¹⁶ Oruva Ijekọvụ mẹ̀ hụrẹ aarẹ aa vẹ, di Iriya jịnẹ na gẹrị ọ nị. Di Iriya ka: ịdị anị aa sụ ajịnị nị o! Ọ kà ẹbaatụ oni ozi anị sị vẹ ọnị sị si ụta di o ve tù ọnị ụvọ nị. Ịzẹyịza di ahịka ọnịrị ọ sụ aha ọnya ịnị ịrahụ ịhị ọnọọ nị.

¹⁷ Ohomorihi ộ wụ́ aduwa Iriya, di o zyẹẹ dị ọ ma Ijekọvụ ana vị ozi anị ọhụhị nị.

¹⁸ Di Iriya ka: Ohomorihi ọ raà sị ọgụ anị yị ọnị agụvị ka ọnị ô sị ozi ahụ anị yị ọva anị. Dị ọ ka ozi ọnọọ ọ rị Iisaka nị.

¹⁹ Iriya o re zyẹẹ dị ọ ma ozi anị ọhụhịnọnyị dị ọ rẹ vị ọnọrụ nị.

²⁰ Di Iriya ka: Ohomorihi o raà sị ẹyịza ozoza yị ọnị. Ọnị ọ yẹ ka ọva anị kụkụ vee tere ọnịị pe ẹngụ, agụvị ka ọnị osi ozi ọnọrụ ịhịnọnyị maa yọ. Dị ọ yị ozi ọnọọ Izeburuni nị.

²¹ Iriya ọ rẹ vana ma ozi ọnẹẹ ọnya, dị ọ hị́ ọ Idina nị.

²² Di Ohomorihi va tamayị Irechẹrị nị. Ohomorihi ộ wụ́ aduwa anị dị ọ mẹ ka ọ̀ zụ ma ozi nị.

²³ Ô zyẹẹ, dị ọ ma ozi ọnọrụ ọnya nị. Dị ọ ka: Ohomorihi ọ raà mẹ ka asị ụhị kụkụ nyị ọnị.

²⁴ Dị ọ ka ozi ọnọọ ọ rị Ijosẹẹhụ nị. Dị ọ ka: Ẹnẹyịmavara ọ̀ navọ ọ̀ rẹ sị ozi ọnọrụ ọsa yị ọnị.

Ohu oni Ijekọvụ ọnịrị Ịrabanị sẹ̀.

²⁵ Irechẹrị mẹ̀ sị Ijosẹẹhụ ma, ẹkụhị ọnya di Ijekọvụ hị́ Ịrabanị dị ọ ka: Ọ̀ navọ ọnị ọ̀ọ nọ eehi anị.

²⁶ Ọ kà ọ kụ́ ese anị ọnịrị ezi anị yị ọnị dị ọnị ọ̀ọ na. Ọ kà agụvị ẹnịnị ọnị aa mẹ ụkọrọọ yọ nị. Dị ọ rẹ ka ọ yẹ ọpa ụkọrọ ọnị ọnị mẹ yọ.

²⁷ Di Ịrabanị ka: Ọ̀ jẹẹ ọnị ọ̀ kà ịsa ọnya. Ọ kà ọnị mẹ̀ na zama ẹtẹ ọnị ọ sị yẹ ka Ẹnẹyịmavara ọ raà hụ agụvị Ijekọvụ mẹ ka ò zee yị ọnị.

²⁸ Dị ọ ka ọ ka ẹ yị ọnị sị a vọrọ ka oni o si ọ, dị ọnị ọ̀ sị yọ.

²⁹ Di Ijekọvụ tụ́ o ohi dị ọ ka: Ịrabanị ụvọta ộ yẹ ọnị mẹmẹ mẹ̀ ụkọrọ yọ. Ọ kà ộ yẹ ịsụpa anị mẹ há ịnị ụvọ anị.

³⁰ Ọ kà dị ọnị vavẹ, ịsụpa anị aa chee aanị, ama booro aanị ệ ta rụrụ. Ọ kà ịsa tụra ịsa ọnị ọnị ọ̀ọ sị ụvọ tụra vị anị Ẹnẹyịmavara aa mẹ ka ò zoza yọ. Dị ọ ka o si tụ́ ka ọnị ọ rẹ kụkụụ tẹsị aza anị booro anị.

³¹ Di Ịrabanị ka: Sị ọnị aa sịị yọ? Di Ijekọvụ ka: Ọ̀ọ zẹẹ ka ọnị ọ̀ dọ ịrẹyị ọnị ọnị vaa kà aanị, ọnị ọ mẹ yị kà ka ọ̀ sị ịsa ọnyọọnyịị yị ọnị. Ọ kà ịsụpa anị vị ọnị ọnị aa yịị tẹsị anị.

³² Ọ kà ọ jẹẹ ọnị ọ̀ ngụ ịnị avaba atẹmẹ ọnịrị ẹvụ anị na para hu ajịnị. Dị ọ navọ ọnị ọ̀ kụ́ avaba atẹmẹ ọnịrị ẹvụ ana àa dà achẹrẹ beri atẹmẹ ojooji. Ọ kà avaba ịsị ọnị ee sì ka o si si ọnị ụta ọ vị ọnọọ nị.

³³ Dị ọ rẹ ka ịhị oo ve re ịsa ọnị o sị yị ọnị ịrẹma ụhwọọ, ọ vaa yẹ ka ọnị ọ yị mẹ̀ ẹ rị. Ọ kà o ne re atẹmẹ ọnịrị ẹvụ ẹnẹ ẹ̀ yị dà achẹrẹ, àa vị atẹmẹ ẹnẹ ẹ yị vị ojooji, dị ọ̀ yẹ ka vi ọnị yi ẹnẹẹ nị.

³⁴ Di Ịrabanị ka ộ vavọọ zoza, ọ̀ vavọọ na mẹ̀ ẹ anka ọ mẹ̀ yị kà a avọọ.

³⁵ Ama ịhị ọnọọ gẹdẹ-gẹdẹ, di Ịrabanị nọ ịnị ịsụpa anị dị ọ tọ̀ọ́ avaba ịdẹ ọnịrị ọnyẹvụ aanị ana dà achẹrẹ, dị ọ maanị nyị ọvụ chee nị. Dị ọ rẹ tọ̀ọ́ avaba atẹmẹ anị ana vị ojooji nị. Dị ọ kụ́ avaba ọnị ọ maanị tọ̀ọ́ anị yị ezi anọrụ anị ka ẹ kụkụ si eyi pè wa nị.

³⁶ Dị ọ kụ́ ọnị ọ tọ̀ọ́ aanị na aha huu ana ahịka ọza aa zị ụsẹ ẹkụhị ẹẹta dị ọza ọ̀ va zụ hụrẹ ịzị Ijekọvụ yà na ngụ ịzọọ. Di Ijekọvụ ọnị re sị eyi pè ịsụpa Ịrabanị ana vọ nị.

³⁷ Di Ijekọvụ dà avọ́ ọchị ohwoohu ẹnyị aanị ana aā hị́ irivine, Iruzi arịmọndị ọnịrị irivine erimoni nị. Dị ọ dà achẹrẹ tụ́ wa, dị ọza ee re achẹrẹ ọvwọọvụ woro-woro ene hi ịnị ọchị ẹnẹẹ nị.

³⁸ Dị ọ kụ́ ọchị ẹnẹẹ hi ọvịdị ịsụpa ẹnẹẹ ịzị ẹ yàa hú enyi nị. Iruvo ọnọ sị kụ́ wa hi ịzọọ, ọ vị ka ịsụpa enee eè hú enyi ẹẹ̄ tụra ẹngụ.

³⁹ Ịsụpa ẹnẹẹ ẹ̀ẹ vavọọ tụra ẹngụ ọvịdị ọchị ẹnẹẹ, ozi ẹnẹ ẹ̀ẹ ma, dị ẹ dà achẹrẹ hi ẹngụ.

⁴⁰ Di Ijekọvụ gà ịsụpa ẹnẹẹ hi nị. Ộ kụ́ atẹmẹ hi aha irenyi, dị ọ kụ́ wa và hura ịdẹba Ịrabanị ana dà achẹrẹ ọnịrị ana vị ojooji nị. Ama ịsụpa anị ụvọta vị ọnị ọ kụ́ hi aha irenyi, ọ yị zẹẹ ka ẹ̀ và hura ịsụpa Ịrabanị.

⁴¹ Ịjị ịsụpa ana ahịka ẹ yị nyị ịzị aa zị aa tụra ẹngụ, di Ijekọvụ kụ́ ọchị ẹnẹẹ hi ọvịdị ẹnịnị ịzị ẹ yà ee hú enyi. Dị ịsụpa ẹnẹẹ ee re ọchị ẹnẹẹ, dị ẹ yaa tụra ẹngụ ịnị akakana ọchị ẹnẹẹ.

⁴² Ama ịsụpa ana vị ọkụmị aa tụra ẹngụ, ọ mā sị ọchị ẹnẹẹ tụ́ ọvịdị ẹnịnị. Ịjị o nee kù, avaba ịsụpa ana vị ọkụmị kụkụ vị ịsụpa Ịrabanị, di ahịka Ijekọvụ ọ nyị avaba ịsụpa ẹnị ẹngụ anị gụ nị.

⁴³ Aanị Ijekọvụ mẹ̀ mẹ dị ọ vara ọzọbanyị rawụ-rawụ nị. Ộ nyị ịsụpa ẹtẹẹtẹrẹ, avọọ ọ mẹ̀ rẹ nyị ezi ahụ, ịnyaakụmị ọnịrị ịkẹrịkẹtẹ nị.