Oyinyima 13 - IWE ỌNỊNỊ

Abụramị ọnịrị Ịrọọtị ệ hahi

¹ Abụramị ộ sị ose anị, dị ọ kụ́ avaba ogu ọnị ọ nyị dị ẹnịrị Ịrọọtị hụrẹ Ijipiti dị ẹ nọ eyi ụvẹtẹ ịnị ẹtẹ Ikanaani nị.

² Abụramị vị ọzọbanyị ẹtẹẹtẹrẹ. Ộ nyị imaaru, ọnịrị atẹmẹ beri ẹvụ dị ọ rẹ nyị igooru ọnịrị enyusẹ ẹkẹhị-ẹkẹhị nị.

³ Abụramị ộ hụrẹ ịzọọ dị ọ na pooro na ngụ Ịbẹtẹrị ịzị ọ vịdị jị ajẹngụ tụ́ nị. Ajẹngụ ọnọọ vị ana yà ịnị akakana Ịbẹtẹrị ọnịrị Àyị.

⁴ Ô vịdị mẹ aha ịsọvọ tụ́ ịzọọ, dị aa hẹkẹ Ẹnẹyịmavara ịzọọ nị.

⁵ Ịrọọtị ọnị ọnịrị Abụramị zi ọnị ọ rẹ nyị imaaru ẹtẹẹtẹrẹ ọnịrị atẹmẹ beri ẹvụ. Avọọ ọ mẹ̀ rẹ nyị aza ana aa dụ ọ na nị.

⁶ Ẹtẹ ọnọọ ọ yị kụkụ dọ ẹnịrị Abụramị. Ogu ẹnịnị ọ sị rụrụ baaba, avị ene hi ịzọọ ọ yị kụkụ hụ ịsụpa ẹnịnị gà rị.

⁷ Di aza ana aa kụ́ ịsụpa Abụramị rị ọnịrị aza ana aa kụ́ Ịrọọtị rị kụkụ aa zyaazị nị. Ụmẹ ọnọọ Anikenaani ọnịrị Aniperizi nịnị ẹnị re hi ịnị ẹtẹ ọnọọ.

⁸ Ẹkụhị ọnya di Abụramị va hị́ Ịrọọtị dị ọ kà a yọ ka: Ẹ yị vọrọ ka ọnịrị ọ ọ̀ọ zyaazị. Ọ kà a yị rẹ vọrọ ka aza ana aa kụ́ ịsụpa ọnịrị ọ rị ẹ̀ẹ zyaazị. Ọ kà ộ yẹ ka anda ẹnị vị nị.

⁹ Dị ọ rẹ ka aanị ka ẹ yị vị ẹtẹ ọ tịtẹ ẹnị re aanị. Ọ kà ọ da okokooro anị oni èe sì dị ọ̀ọ nọ ịzọọ dị ọnị ọ rẹ yà aha anị. Ọ kà ọọ ka ọnị aa sị eyi ụvọrị, dị ọnị sị eyi ụvọha. Ọ̀ọ va ka ọnị aa sị eyi ụvọha, dị ọnị sị eyi ụvọrị.

¹⁰ Di Ịrọọtị kana eyi ré ẹtẹ ọnọọ, huu na ngụ Izowa nị di o re ka ô hunẹnẹ nị. Ẹtẹ anị ô zoza ẹtẹẹtẹrẹ vị ọ sị mẹẹ anka ụbazị Ẹnẹyịmavara, anka ẹtẹ Ijipiti. Avọọ ẹtẹ ọnọọ mẹ̀ yà di Ẹnẹyịmavara va kụ́ anẹkụra Isodọmị ọnịrị Igomora kwooze nị.

¹¹ Di Ịrọọtị ka ọnị aa sị avaba ini ozi Ijodani, dị ọ kà nọ eyi ọnị ọyịị̄ zịị vẹ ịzọọ nị. Avọọ ọnịrị Abụramị mẹ̀ há ẹngụ hi nị.

¹² Dị Abụramị ọnị yà ịnị ẹtẹ Ikanaani, dị Ịrọọtị ọnị aa ku udii ngụ ịnị ẹkụra ene hi ịzọọ zị, dị ọ jị ajẹngụ tụ́ ọgụrị Isodọmị nị.

¹³ Ama Anisodọmị vị aza edivi hangụ-hangụ, dị ẹ nyayịnẹ aa mẹ̀ ebira odivii ene du Ẹnẹyịmavara ayị nị.

¹⁴ Ịrọọtị mẹ̀ vavọọ sị hụụ ịda Abụramị, dị Ẹnẹyịmavara va kà a yị Abụramị dị ọ ka: Ọ kụ̀rà eyi tụ́ ẹba, di ò re ẹtẹ kara ẹngụ.

¹⁵ Ọ kà avaba ẹtẹ ọnị ọ maanị re aanị ọnị ne beri Ụnanka anị ịrẹma-ịrẹma ọnị vaa sịị yị, dị ọ vị ẹẹnịnị pooro zịna-zịna nị.

¹⁶ Ọ kà ọnị vaa mẹ ka ịpa anị ẹ̀ rụrụ anka ezi ene hi ịnị ẹhẹ. Ọ kà ọza ana àa zụ za ezi ịrịka ọ rẹ va zụụ za ịpa anị nịnị ịrịka nị.

¹⁷ Dị ọ rẹ ka ọ̀ kwẹẹtẹ dị ọ̀ maanị che ẹtẹ ọnọọ ajaajẹẹ ọnịrị ẹvẹnẹ-ẹvẹnẹ na para hu. Ọ kà ọnị ọnị vaa sịị yị nị.

¹⁸ Dị Abụramị kú ajẹngụ anị dị ọ va yà iruvo ọchị. Ụbazị Edẹnị: A ka ụbazị Ẹnẹyịmavara, aroni Imamire ịnị ẹkụra Ihebirọnị nị. Dị ọ mẹ aha ịsọvọ tụ́ ịzọọ yị Ẹnẹyịmavara nị.