Ọdọvịdị 2 - IWE ỌNỊNỊ

Anisirẹrị nịnị ệ mẹ̀ akamawụ hi Ẹnẹyịmavara

¹ Â nyị ụmẹ ọnya aanị ọnị anggẹẹrị Ẹnẹyịmavara sị hụrị Igirigari na ngụ Ibokimi. Ộ kà a ọnị ọ̀ kụ wa hụrị ẹtẹ Ijipiti na ngụ ịnị ẹtẹ ọnị ọnị hị́ eku anị ka ọnị aa sị yị ohiku ẹnịnị nị. Ộ kà a ọnị ẹ yị vaa sị ahụ jịnẹ eku ọnị ọnị hị́ yị wa.

² Ộ kà a yị wa ka asị ẹnịrị aza ana raa hi ịzọọ hị́ eku ẹnyẹnyị yị ẹngụ. Ẹnịnị wu ụta ori ene hi ịzọọ ha. Ama ẹnịnị ẹ yị vaa saasa ọda anị. Ẹnịnị ee re ịsị ẹ mẹ aanị.

³ Avọọ, anggẹẹrị Ẹnẹyịmavara kà ọnị ẹ yị vaa dụ aza ene hi ịzọọ jịnẹ yị wa eyi ẹnịnị. Ori ọnị ẹ yaa hẹkẹ vị ene vee tura wa.

⁴ Ịjị ịrẹyị anị ta a ka, dị avaba Anisirẹrị nịnị va orere hi, di e yee nowu boro-boro nị.

⁵ Dị ẹnịnị hị́ ịzọọ Ibokimi (orere aza). Dị ẹ mẹ̀ ịsọvọ ịzọọ yị Ẹnẹyịmavara nị.

Ijosuwa ô wusu

⁶ Ịjị Ijosuwa sị mẹ ta, dị ọ hụrẹ wa ụvọ dị ọzọza o na sị ẹtẹ ene tu ọ nị.

⁷ Anisirẹrị nịnị ẹ hẹkẹ Ẹnẹyịmavara ịnị ụmẹ Ijosuwa ọnịrị azọkụ ene ku orubo ana yẹ ịsa ọbanyị ọnị Ẹnẹyịmavara mẹ yị Isirẹrị.

⁸ Ijosuwa ozi Inuni ana vị ozi ahụ Ẹnẹyịmavara ò su ọ mẹ sị gụ ịrayị ẹchẹhị tụra oohu.

⁹ Di e ne e tụ ịnị ẹhụ ẹtẹ ana vaa anị ịnị Itiminati-Ịhẹrẹsị ịrẹsụ ataba ẹtẹ Ehwireemi eyi ẹbẹẹba ataba Igaasi.

¹⁰ Ịrẹma ọnị anụmẹ Ijosuwa wusu kwooze, anụmẹ ọsa ẹnẹ ẹ yị yẹ Ẹnẹyịmavara ọnịrị ịsa ọnị ọ mẹ yị Anisirẹrị vana kwẹẹtẹ nị.

Anisirẹrị nịnị kụkụ aa hẹkẹ ori

¹¹ Di e nyima aa mẹ̀ ebira odivi hi Ẹnẹyịmavara, dị ẹ yaa hẹkẹ ori ana a hị́ Ịbaarị nị.

¹² Di e yi Ẹnẹyịmavara ana vị Ohomorihi ohiku ẹnịnị ana kụ wa jịnẹ hụrị Ijipiti tịtẹ, dị ẹ yaa saasa ori ene hi ịzọọ ọnị aza ana ra kara wa aa hẹkẹ nị. Ọsọnị o du Ẹnẹyịmavara ayị.

¹³ Ẹnịnị vị ana kụkụ a hẹkẹ ori ana a hị́ Ịbaarị ọnịrị Asịtọrẹtị, di e yi Ẹnẹyịmavara tịtẹ nị.

¹⁴ Ebira odivi ẹnịnị, dị Ẹnẹyịmavara kụ ayị dị ọ hụrẹ wa ụvọ yị ọnịvị ẹnịnị, dị ẹ kụ wa ẹnya nị. Dị ọ navọ wa chire ọnịvị ẹnịnị ụvọ ka ẹ nyị ẹbẹẹba ẹnịnị dị asị ẹ zụ sị ụvọ jị nị.

¹⁵ Ụmẹ tụra ụmẹ ọnị ẹnịnị ẹ nọ ịrẹkụ dị Ẹnẹyịmavara va eyi ka wa agụvị e huna wa anka ọ mẹ kà a. Dị ẹnịnị ya ịnị ẹngụkata nị.

Ẹnẹyịmavara ộ dọ Anisirẹrị nịnị há

¹⁶ Ẹnẹyịmavara ộ sị ọdọvịdị nịnị va yị wa ka ẹ dọ wa ha hụụnị ụvọ ọnịvị ẹnịnị ana kụ wa ẹnya.

¹⁷ Ẹnẹyịmavara mẹ maanị ẹ̀ wa, ẹnịnị ẹ yị wụ́ chire ọdọvịdị ẹnịnị nị. Ẹnịnị vị ana yịị dụ ori zị, dị ẹ yaa hẹkẹ wa. Ẹ ra va hụrẹ ịrẹma ohiku ẹnịnị ana saasa ọda Ẹnẹyịmavara. Ẹnịnị ẹ yị hama wa vụrụ-vụrụ.

¹⁸ Ụmẹ tụra ụmẹ ọnị Ẹnẹyịmavara ọ̀ọ nyị ọdọvịdị yị wa ọọ jẹẹ pe wa, dị ọ dọ wa ha hụụnị ụvọ ọnịvị ẹnịnị pooro di e su nị. Ẹnẹyịmavara vị anaā vayị ẹnịnị agụvị aza ana mẹ ẹvaya yị wa, dị a sị ụya rị wa.

¹⁹ Ama ụmẹ tụra ụmẹ ọnị ọdọvịdị ẹnịnị òo su, dị ẹ rẹ varẹma naa mẹ̀ ebira ene divi hu ohiku ẹnịnị. Dị ẹ yaa saasa ori, dị ẹ yaa hẹkẹ wa. Ẹnịnị ẹ yị hụrẹ ebira akamawụ ẹnịnị tịtẹ.

Ẹnẹyịmavara ộ navọ ka ọnịvị Anisirẹrị ọ zama wa re

²⁰ Agụvị avọọ, Ẹnẹyịmavara ộ kụ ayị hi Anisirẹrị nịnị ka ẹ ra sị ahụ jịnẹ ọda eku ọnị ọnịrị ohiku hị́ yị ẹngụ. Ẹnịnị ẹ yị wụ́ ịrẹyị anị.

²¹ Ẹnẹyịmavara kà ọnị ẹ yị kụkụ vaa dụ anẹkụra ọnị Ijosuwa navọ tịtẹ di o vee su jịnẹ kwooze yị wa.

²² Ộ kà ọnị a sị zama wa re, ẹnịnị ẹ vaa tẹsị ka ẹnị ẹ saasa oze anị anka ohiku ẹnịnị

²³ Dị Ẹnẹyịmavara navọ anẹkụra ẹnẹẹ dị ọ yị hụ wa eyi Ijosuwa a vị ịrẹma ọnị o wusu nị.