Ịrịka 36 - IWE ỌNỊNỊ

Ogu ẹtẹ mẹmẹ tu anyẹnẹẹ ịnị ovwoovu

¹ Â nyị ụmẹ ọnya aanị ọnị ohi-ohi ovwoovu ịrẹsụ Igiriyadi ana vị ozi Imakiri aazị Ịmanasẹ ozi Ijosẹẹhụ ẹnịrị ohi-ohi ovwoovu ana vọ ịnị ẹtẹ Isirẹrị ne tu Imosiisi.

² Dị ẹ kà Ẹnẹyịmavara ọ mẹ̀ ọda ka ọ ga ẹtẹ yị Anisirẹrị nịnị, dị ọ sị ọnyịrẹva Izerohwehadi ọhụva ẹnịnị yị ezi anẹẹ anị.

³ Ẹnịnị ẹ̀ẹ nyị anịrẹsụ ọsa, a sị ẹtẹ ana vị ẹnịnị ịnị ẹtẹ ohiku na vaka ẹtẹ aza ẹnị nyị. Avọọ aa mẹ vaa sị ọ hụụnị ẹtẹ ana vị ịrẹsụ ẹnịnị nị.

⁴ Ịnị ịrayị ẹvarẹwụ ọnị Anisirẹrị nịnị sị dọ ogu ẹnịnị varẹma yị ọza ana nyị ịsa anị, a vaa sị ẹtẹ ezi anẹẹ Izerohwehadi hụụnị ẹtẹ ịrẹsụ ada ẹnịnị yị wa, dị kụkụ vị ogu anịrẹsụ ọva ẹnịnị pooro zịna-zịna.

⁵ Agụvị avọọ Imosiisi mẹ ọda ọnị Ẹnẹyịmavara kà yọ yị Anisirẹrị nịnị nị. Ọ kà ịrẹyị ọnị ịrẹsụ Ịmanasẹ ka vị ịzẹyịza.

⁶ Agụvị avọọ Ẹnẹyịmavara kà ezi anẹẹ Izerohwehadi ẹ zụ va ọnọrụ ene ze wa eyi, ama ẹ̀ vị anẹkụra ẹnịnị kẹnẹ.

⁷ Ogu Anisirẹrị ọzọza vị ana vaa ya ịnị ogu ẹkụra anị.

⁸ Ọnyẹnẹẹ ana àa sị ogu yi hụụnị ovwoovu anị ịnị ẹkụra ọnyọọnyị ịnị ẹtẹ Isirẹrị, anẹkụra ọnọọ ọ rẹ vaa va nị. Àa maanị aa mẹ̀ ẹ, Anisirẹrị ọzọza vaa sị ụvọ za ogu ohiku ẹnịnị.

⁹ Ogu ẹnẹẹ ẹ yị vaa hụụnị ụvọ anẹkụra ẹnyị naa ngụ ịnị ụvọ anẹkụra ọsa. Ẹkụra ọzọza vaa sị ụvọ za ogu anị.

¹⁰ Ịzẹyịza ezi anẹẹ Izerohwehadi ệ na mẹ anka Ẹnẹyịmavara mẹ̀ ẹ ọda yị Imosiisi.

¹¹ Ezi anẹẹ Izerohwehadi ẹnẹnị ẹ rị: Ịmara, Itiriza, Ihogira, Imika ọnịrị Inowa nị. Ẹnịnị ệ na va ẹnị ẹnịrịị vị ezi ẹyịnyara ịnị ada.

¹² Ịnị ịrẹsụ ezi Ịmanasẹ ozi Ijosẹẹhụ ẹnịnị va ọnọrụ hi nị. Ogu ẹnịnị vana yị ya ịnị ịrẹsụ ada ẹnịnị ịnị ẹkụra ẹnịnị.

¹³ Ẹsẹnị ẹ vị ọda ọnị Ẹnẹyịmavara raà sị̀ yị Imosiisi ka ọ sị yị Anisirẹrị nini ịnị inozi Imowabi ọ gụrị Ijodani akẹnẹ Ijeriko ana vịdị hị́ Okuha Ịjọdanị.