Ịrịka 3 - IWE ỌNỊNỊ

Ezi Eerọnị

¹ Aza ẹnịnị ẹ vị ezi Eerọnị ịnị ụmẹ ọnị Ẹnẹyịmavara sị ka ịrẹyị Imosiisi ịrẹsụ ataba Ịsịnayị.

² Ịrẹha ezi Eerọnị ẹ vị Inadabi ana vị ozi ọzọkụ anị, Abihu, ọnịrị Erizari ne beri Ịtama nị.

³ Ezi Eerọnị anaa hị́ ịrẹha ẹnịnị aanị aa vaa nyị ka ẹ vị ohirẹsụ irehi Ohomorihi nị.

⁴ Ama Ẹnẹyịmavara ộ wụ Inadabi ọnịrị Abihu ịnị ụnọmị Ịsịnayị agụvị ka ẹnịnị ẹ rị eturare ịra ini oze ẹnẹ ẹ yị vọrọ.

 nyị Anireevi nini ka ẹ vị ọnọgụvọ ohirẹsụ irehi Ohomorihi nini

⁵ Ẹnẹyịmavara kà yị Imosiisi ka;

⁶ Ọ nyị Anireevi nini dị ẹ vị ọnọgụvọ Eerọnị

⁷ Ẹnịnị vaa mẹ̀ ụkọrọ yị Eerọnị ọnịrị avaba Anisirẹrị nịnị.

⁸ Ẹnịnị e vee si eyi pe avaba ẹnya ene hi ajẹngụ Ẹnẹyịmavara ọnọọ nị.

⁹ A nyị wa hụụnị ịnị akakana Anisirẹrị ka ẹnịnị ẹ vị ọnọgụvọ Eerọnị ọnịrị ezi anị nị.

¹⁰ Eerọnị ọnịrị ezi anị kẹnẹ a nyị ka ẹẹ mẹ̀ ụkọrọ ohirẹsụ irehi Ohomorihi nị. Àa nyị ọza ẹnẹsa anaa na hama wa, aa wụ̀ ọ.

¹¹ Dị Ẹnẹyịmavara kà yi Imosiisi ka,

¹² Ọnị ộ raa sị Anireevi nịnị dọ ịrẹsụ avaba ezi ịpaapa Anisirẹrị nịnị. Ẹnịnị ẹ kụkụ sị vara aanị.

¹³ Avaba ezi anọrụ ịpaapa Anisirẹrị vị Ẹ́ẹnẹyịmavara. Ụmẹ ọnị ọ sị wụ ezi ịpaapa Anigipiti nịnị, ọ sị nyị avaba ezi ịpaapa Anisirẹrị ọnịrị ezi ịpaapa ịsụpa ẹnịnị ka ẹ vị aanị nị.

 za Anireevi nini ịrịka

¹⁴ Ịrẹsụ ataba Ịsịnayị Ẹnẹyịmavara ọ̀ varẹma pe Imosiisi ka ịrẹyị.

¹⁵ Ọ kà Imosiisi ọ za anọrụ ịrẹsụ Ireevi ịrịka hụụnị ovwoovu-ovwoovu na ngụ abara-abara ẹnịnị.

¹⁶ Dị Imosiisi mẹẹ anka Ẹnẹyịmavara mẹ ka yị o nị.

¹⁷ Ịrẹha ezi Ireevi ẹyịta ẹ rị, Igẹsọnị, Ikohati, ọnịrị Imerari nị.

¹⁸ Ịrẹha ezi Igerisoni ẹ rị Iribini ọnịrị Isimeyi nị.

¹⁹ Ezi Ikohati ẹ rị Amịramị, Iziha, Ihebirọnị ọnịrị Uziyẹrị nị.

²⁰ Ezi anọrụ Imerari ẹ rị Imahiri ọnịrị Imusi nị.

²¹ Anigerisoni ẹyịva aa hị́ Aniribini ọnịrị Anisimi nị.

²² Ezi anọrụ ẹnịnị hụrị ozi ụhwẹ ọnya na ngụ ọzọkụ vị aza ịrịka akawụ-akawụ oze ẹẹta tụra akahị tụra akavarẹchẹhị (7,500).

²³ Ẹnịnị ẹ̀ jị ajẹngụ ẹnịnị tụ ịrẹma ajẹngụ Ẹnẹyịmavara eyi ịzị ọyịị̄ zịị ngụ ẹtẹ.

²⁴ Ọdọvịdị ẹnịnị ọ vị Eriyasahwi ana vị ozi Irayeri nị.

²⁵ Ẹnịnị e si eyi pe ajẹngụ Ẹnẹyịmavara ọnịrị Ịsa ene si ku ajẹngụ ịrẹsụ, ne beri ịsa ene si ku oze ovwoovu anị

²⁶ Ẹnị ee si eyi pe achị anaa sị kara ajẹngụ ọnọọ ọnịrị ẹnya ana vọ nị.

²⁷ Abara ẹẹna ene hi ini Ikohati ẹ vị Anamịramị, Aniziha, Anihebirọnị, ọnịrị Anuziyeri.

²⁸ Avaba ezi anọrụ ẹnịnị anaa za ịrịka hụụnị ẹhụ ụhwẹ ọnya vị (8,600). Ẹnị ẹnẹnị e si eyi pe irehi Ohomorihi nị.

²⁹ Avaba abara Anikohati nịnị vị ana a jị ajẹngụ ẹnịnị tụ eyi ụvẹtẹ irehi Ohomorihi.

³⁰ Erizahwani ana vị ozi Uziyẹrị ọ vị ọdọvịdị ẹnịnị nị.

³¹ Ẹnịnị e si eyi pe irehi Ohomorihi ịzị apoti oto, iteburu, ọchị ịra, ụta irenyi-irenyi ọnịrị ẹnya irenyi-irenyi ana a sị mẹ̀ ụkọrọ ịzọọ hi nị.

³² Eriyaza ana vị ozi Eerọnị ọ vị ohirẹsụ avaba ọdọvịdị Anireevi nịnị ana si eyi pe irehi Ohomorihi ọnọọ nị.

³³ Abara ẹẹva ana ya ịnị ịrẹsụ Imerari ẹ vị Imahiri ọnịrị Imusi nị.

³⁴ Avaba ezi anọrụ ẹnịnị anaa za ịrịka vị ẹnị (6,200)

³⁵ Izureri ana vị ozi Abiheri ọ vị ohirẹsụ ẹnịnị nị. Ẹnịnị vị anaa jị ajẹngụ ẹnịnị tụ oze eyi ẹbẹẹba akaha irehi Ohomorihi

³⁶ Ẹnị aa nyị ka e si eyi pe avaba ẹnya anaā sịị jị ajẹngụ anka ọtụ, ohinẹ, ẹwaara, ọnịrị ẹnya ana vọ.

³⁷ Ẹnị e re si eyi pe ọchị ohinẹ, obo ọnịrị ẹnya ana vọ ana sị da ohweje anị.

³⁸ Imosiisi ọnịrị Eerọnị ne beri ezi ẹnịnị vị ana da aha ẹnịnị tụ ọvịdị irehi Ohomorihi oze eyi ịzị ọyị hụrẹ vẹ. Ẹnị e si eyi pe a mẹ vọrọ ka Anisirẹrị ẹ mẹ ahẹkẹ ini irehi Ohomorihi nị. Àa nyị ọza ẹnẹsa ana hama wa na mẹ̀ ụkọrọ ọnọọ vị anaa wụ ịzịzọọ.

³⁹ Avaba ezi anọrụ Anireevi ọnị Imosiisi ọnịrị Eerọnị za ịrịka vị (22,000).

 sị Anireevi nini dọ ịrẹsụ ezi ịpaapa Anisirẹrị

⁴⁰ Ẹnẹyịmavara ộ ka yị Imosiisi ka ọ za ezi anọrụ ịpaapa Anisirẹrị ịrịka hụrẹ ozi ụhwẹ ọnya.

⁴¹ Ẹnẹyịmavara kà Anireevi nịnị aa vaa sị dọ wa ịrẹsụ nị. Avọọ a mẹ rẹ vaa sị ịsụpa ẹnịnị dọ ịrẹsụ avaba ezi ịpaapa ịsụpa Anisirẹrị nịnị nị.

⁴² Ịzẹyịza, dị Imosiisi za ezi anọrụ Anisirẹrị nịnị ịrịka anka Ẹnẹyịmavara mẹ̀ ka a nị.

⁴³ Dị avaba ẹnịnị vị ịrịka (22,273).

⁴⁴ Dị Ẹnẹyịmavara kà yị Imosiisi ka,

⁴⁵ ọ sị avaba ezi anọrụ Anireevi nịnị ọnịrị ịsụpa ẹnịnị dọ ịrẹsụ ezi ịpaapa Anisirẹrị nịnị ọnịrị ịsụpa ẹnịnị. Ẹnẹyịmavara kà avaba Anireevi nịnị vị anị, dị ọnị rẹ vị ẹnịnị nị.

⁴⁶ Ka ezi anọrụ Anisirẹrị ẹ rụrụ huni anọrụ Anireevi. Anọrụ akahị tụra ẹtarẹwụ tụra ẹẹta ọnị e si huna Anireevi vị ana a va sị ẹkẹhị jị.

⁴⁷ Dị Ẹnẹyịmavara kà Imosiisi ọ dọ isiriva ẹẹhị ịrẹsụ ọzịnya-ọzịnya ana a vị ẹhụ ẹkẹhị ịnị irehi Ohomorihi.

⁴⁸ Ẹkẹhị ana a dọ vị anaa sị yi Eerọnị ọnịrị ezi anị.

⁴⁹ Ịzẹyịza, dị Imosiisi dọ ẹkẹhị anaa sị jị ẹnịnị ana tụra nị.

⁵⁰ Avaba ẹkẹhị ọnị ọ dọ vị isiriva (1,365).

⁵¹ Dị Imosiisi sị avaba ẹkẹhị ọnọọ yị Eerọnị ọnịrị ezi anị nị anka Ẹnẹyịmavara kà a.