Ịrẹyị Ọzwọzịsa 9 - IWE ỌNỊNỊ

Sị ẹngụ dọ enee tụ́ wụ

¹ Ọzwọzịsa ka ọnị ô ro avaba ịrẹyị ọnọnị, dị ọnị zama wa re nị. Ọnị ô re ka ọza ọyịza ọnịrị ọyẹrẹyị beri avaba ụkọrọ ẹnịnị vị ana ya ịnị ụvọ Ohomorihi. Ẹ yị nyị ọza ana yẹ ịsa ana vẹ ụhwọọ. À vị e vee sì ịrẹyị anị nị o, a vị ka vị a vaa nyị ịhyẹrẹ anị nị. Avaba ịsa vị osusu eyi ẹyị ọza.

² Ịsị ọnyọọnya ọ vaa za ẹhẹ avaba ọza ẹtẹ nị. Ẹ yị nyị ọba irenyi yị ọnịrẹyịzẹyịza ọnịrị ọza odivi, ọza ọyịza ọnịrị ọza ọhịmị, ọza ọnịnị ọnịrị ọnịdọtị, ọza anaa mẹ ahẹkẹ ọnịrị ọza ẹnẹ ẹ yị mẹ ahẹkẹ. Ọ mẹ ya yị ọza ọyịza, avọọ ọ mẹ ya ọza odivi nị. Ọ mẹ ya yị aza ana hị́ eku, avọọ ọ mẹ ya yị aza ẹnẹ ẹ yị nyayịnẹ hị́ eku nị.

³ Ọsọnị ọ vị ịrẹyị odivi ịnị avaba ịsị anaa mẹ ịnị ẹhẹ: ka ahịka ịsị ọnyọọnya ọ za ẹhẹ avaba aza ẹtẹ nị. Ayị aza bẹẹ vị ohihi yị ịrẹyị odivi ọnịrị ụra ẹ mẹ yị́ yara, ịrẹma anị dị è ve su.

⁴ Ọza ana yara ọọ nyị ọyịtura eyi nị, agụvị ka irezi ana yara ọ dahi huni idu ene wu usu nị.

⁵ Ịzẹyịza ọza ana yara ọọ yẹ ka ọnị vee su, ama ẹ yị nyị ịsị oku ene wu usu kụkụ yẹ. Ẹ yị nyị ọgụ sẹ kụkụ zụ rị; aza ẹ ma vana kụkụ tamayị ẹnịnị.

⁶ Aza ene wu usu ẹnịrị ịrẹyị ọza oyisì ẹnịnị, ọyị nyị ịhyẹrẹ ọza ẹnịnị beri ụhị ọyị kụ ẹnịnị e su nị. Ẹnịnị ẹ ma vana bẹ ụvọ tụ ịnị ịsị anaa na ịnị ẹhẹ pàá.

⁷ Wa naa sị ayohine rị ịsa ọnị waa nyị, dị wee hu waa mẹrị kẹnẹ; agụvị ka Ohomorihi ọ raa sị ụvọ tụ ịnị ịsị ọnị waa mẹ yị wụ.

⁸ Wee hine ayị nịnị dị waa jẹ ịrajẹ nịnị pooro kẹnẹ.

⁹ Ọpa ụmẹ ọnị Ohomorihi ọ̀ọ sị yị wụ ka wa mẹ ịnị ẹhẹ osusu ọnọnị, ẹwụrị ose wu ọnị u sì ịrẹyị anị ọọ mẹ ẹhẹ dị wa mẹrị ẹngụ nịnị, ka ọnị Ohomorihi gà tu wu ịnị ẹhẹ ọnịrị ịnị ụkọrọ ọnị waa mẹ ọ vị ọnọọ nị.

¹⁰ Ịsa tụra ịsa ọnị wàa ka waa mẹ, ụ sị avaba awụ mẹẹ agụvị ka ịnị ikuta ọnị ụ vaa nọ, ẹ yị nyị ụkọrọ ịzọọ avị ịrẹyị ò yị ro. Ẹ yị nyị ka maa yẹ ịsa ịzọọ avị ka maa da yẹ ịrẹyị.

¹¹ Ọzwọzịsa ka aa nyị ịsị ọsa ọnị ọnị re re: ịnị ẹhẹ ọnọnị ẹ yị vị ọza ana rẹ́ hu ọọ sị ọvịdị èe ne zwe eehi, dị ẹ̀ yị rẹ vị ọza ana kata hu ọọ nyị ẹbẹẹba aa nọ ịrẹkụ nị. Ẹ yị vị ịrẹyọyẹ baaba ọza sii re ịsaa rị, dị ẹ̀ yị vị ọza mẹ sị yẹ ịrẹyị ẹhẹ sịị mẹ yị ọza nị. Ẹ yị vị ọza ana yẹ a mẹ mẹẹ mẹ̀ ịsa hu oo ree mẹ hu. Ama ẹhẹ vanaa mẹ yị ọza kẹnẹ. À kà ka ọza ọ̀ yà aha ana vọrọ ịnị ụmẹ ana vọrọ.

¹² Ẹ yị nyị ọza ana ka ọnị ọọ yẹ ụmẹ aanị. Ẹ yị nyị ọza ana zụ yẹ ụmẹ ọnị ẹngụkata vaa sị vẹ. Anka ivovo ọnị ọha za, à vị inomi ọnị ịrẹpa za avọọ, avọọ ịrẹyị odivi mẹẹ hụraa sụ̀ aza avaavo dị ọ za wa anka ịrẹpa avọọ nị.

Ịrẹyọyẹ o huni Ụ̀ra nị

¹³ Ọzwọzịsa ka ọnị ô re ịrẹyọyẹ ọsa ịnị ẹhẹ ọnọnị ana wụ rị ọza kọsẹ. Oo zee ọnị eyi ẹtẹẹtẹrẹ.

¹⁴ Â nyị ẹkụra ọnyara kiiki aanị, aza chee anị ẹ ra ịnị anị nị. Dị a nyị ohinọyị ọnya aanị ana nyị ụkata ẹtẹẹtẹrẹ ana kụ́ ịrẹkụ ve tu ọ nị. Dị ẹ ta kara a eyi ụvọnị-ụvọnị, dị ẹ kụ ịsa kara a okiri-okiri nị.

¹⁵ Ama â nyị onosiye ọnya aanị ana ya ịnị ẹkụra ọnọọ, ọyẹrẹyị ọ vị nị. Dị ọ sị ịrẹyọyẹ dọ ẹkụra ọnọọ ha nị. Ama ẹ yị nyị ọza ana tamayị anị.

¹⁶ Ọnị ọ mẹ ka ọnị ọ̀ ka a ka ịrẹyọyẹ o huni ụkata nị, ọ̀ọ daka vị ka aa sị eyi wụ ịrẹyọyẹ onosiye ọnọnị dị aza ẹ yị kụkụ hị́ ịrẹyị anị ịrẹyị nị.

¹⁷ Ọza ọ̀ọ saasa ịrẹyị ọnị ọyẹrẹyị tangwa kà, ọ gụ yị ọza hu owu ọnị ohinọyị ọnụra nịnị aa na nị.

¹⁸ Ọza ọ̀ọ nyị ịrẹyọyẹ, oo huna ẹnya ịrẹkụ, ama ọza odivi ọnyara ọ zụ du ịsa ọyịza ọrụrụ-ọrụrụ ha.