Ireevi 2 - IWE ỌNỊNỊ

Ịsọvọ ana aā sị akụụ mẹ

¹ Ọza ọnyọọnyị ọ̀ọ sị ẹ̀hụ́ akụ avọọ aa vaa mẹ̀ ịsọvọ hi Ẹnẹyịmavara, aa nyị ka ọza ọnọọ ọ̀ kwọ̀ ọ dị ọ̀ vị́ ẹtẹẹtẹrẹ. Ọza ọnọọ vaa và angwẹ hi ọ ịrẹsụ, dị ọ rẹ sị eturare anaa dà agụ ohine àa ka a hi ịra vaka a,

² dị ọ sị ọ ve tu ezi Eerọnị nịnị ana vị ohirẹsụ irehi Ohomorihi, ohirẹsụ irehi Ohomorihi anaa mẹ̀ ụkọrọ ụmẹ ọnọọ vaa ká ayị ọyịkwọ ọnịrị angwẹ ọnọọ uvoku ọnya beri avaba eturare ọnọọ, dị ọ rị wa ịra ịrẹsụ ụta ịsọvọ. Ọnọọ vaa sịị zụ̀ ka avaba anị asị va yị Ẹnẹyịmavara nị. Agụ ịsị ịsọvọ ọnọnị vị eneē hine Ẹnẹyịmavara.

³ Ịsị ẹẹ vọ ịnị ịsọyịrị ana sị va mẹ̀ ịsọvọ aanị vị ẹẹnị ohirẹsụ irehi Ohomorihi. Ịsa Ohomorihi ọ vị nị agụvị ka ana vọ ẹtẹ ịnị ịsọyịrị ana sị va mẹ̀ ịsọvọ yị Ẹnẹyịmavara yọ nị.

⁴ Àa vị ịbụrẹdị ọza sị aa vaa mẹ̀ ịsọvọ nị, asị a sị owu tụ ịnị anị. Ọ zụ vị ịbụrẹdị ana sị angwẹ va hura ayị mẹ, ọ rẹ zụ vị Ịbụrẹẹdị ana jị pẹtẹ-pẹtẹ dị a da angwẹ sisi ọ kẹnẹ.

⁵ Àa vị ịbụrẹdị ana sị ịchacha pata anaā sịị mẹ̀ ịsa mẹ yọ nị, à sị angwẹ vahụra ayị kẹnẹ mẹ̀ ẹ, dị à sị ọ nyị owu.

⁶ Wàaa sị ọ vẹ vaa mẹ̀ ịsọvọ, ụ dà a wuri-wuri, dị a và angwẹ ọnọọ hi ọ.

⁷ Àa vị ịbụrẹdị ana asị ịchacha ana sịị̄ mẹ̀ ịsa mẹ, ọza aa sị vaa mẹ̀ ịsọvọ nị, à sị ayị ọnịrị angwẹ orivi mẹ̀ ẹ.

⁸ A vaa sị ịbụrẹdị ana maanị sị ịsa ẹnẹnị mẹ aanị vaa yị Ẹnẹyịmavara. Àa raa sị ọ yị ohirẹsụ irehi Ohomorihi, dị ọọ sị ọ vẹ ịnị ụta ịsọvọ.

⁹ Ohirẹsụ irehi Ohomorihi ọnọọ vaa dàa hụụnị ịbụrẹdị ọnọọ ana vaa sị zụ ka avaba anị a sị va yị Ẹnẹyịmavara nị. Dị ọ rị ọ ịra ịrẹsụ ụta ịsọvọ. Agụ ịsị ịsọvọ ọnọọ vị eneē hine Ẹnẹyịmavara.

¹⁰ Ịsị ẹ̀ẹ vọ ịnị ịbụrẹdị ana sị va mẹ̀ ịsọvọ aanị vị ẹẹnị ohirẹsụ irehi Ohomorihi. Ịsa Ohomorihi ọ vị nị agụvị ka ana vọ ẹtẹ ịnị ịsọyịrị ana sị va mẹ̀ ịsọvọ yị Ẹnẹyịmavara yọ nị.

¹¹ Asị a nyị ịbụrẹdị ana a sị a vaa yị Ẹnẹyịmavara, dị a sị owu tụ ọ. Wẹ yị nyayịnẹ sị owu avị ẹhụ tụ ịnị ịsọyịrị ana aa sị va yị Ẹnẹyịmavara; ka ẹ́ yị nyị ịsa ana a sị owu à vị ẹhụ tụ ana aa rị ịra yị Ẹnẹyịmavara.

¹² Wa zụ sị akụ ịpaapa ọnị ụ sị hụụnị aarẹ awụ, ọnịrị owu avị ẹhụ va yị Ẹnẹyịmavara ama a sị a rị ọ ịra ịrẹsụ ụta ịsọvọ ka ọ̀ da agụ ohine hi Ẹnẹyịmavara.

¹³ Asị a nyị ka wẹ yị sị anọ tụ ịnị avaba ịsọyịrị ọnị wàaa sịị va yị Ẹnẹyịmavara nịnị, agụvị ka anọ ọ jẹẹ yị oto ọnị ẹwụrị Ohomorihi awụ nịnị hị́ eku anị yị ẹngụ nị.

¹⁴ Wàa ha apaapa ịpaapa hụụnị aarẹ awụ nịnị aa vaa yị Ẹnẹyịmavara, wara a nịnị dị à varẹma kwọ̀ ọ.

¹⁵ Dị ụ sị angwẹ ovivi ọnịrị eturare ohuru-ohuru ana aā kà a tụ ịnị ịra vaka a nịnị.

¹⁶ Dị ohirẹsụ irehi Ohomorihi sị hụụnị ịsa ọnọọ ọnịrị angwẹ ọyị tamayị, beri avaba eturare ọnọọ dị ọ rị wa ịra anka ịsọyịrị ana sị va mẹ̀ ịsọvọ yị Ẹnẹyịmavara.