Ireevi 19 - IWE ỌNỊNỊ

Ebira ayị ka Ohomorihi ọnịrị ọnọhụva ayị na

¹ Ẹnẹyịmavara ộ kà a yị Imosiisi ka

² Ọ̀ kà a yị ịragụ Anisirẹrị nịnị ka; Ẹnịnị ẹ̀ sị ẹngụ tụ irenyi, agụvị ka ọnị Ẹnẹyịmavara, Ohomorihi ẹnịnị vị ana sị ẹngụ anị tụ irenyi.

³ Ọzọza ọ̀ sị ụbanyị yị ada anị ọnịrị ọnyị anị, dị ẹ̀ sị ụvọ za ịrẹyị ẹkụhị ụhwọtụ anka ọnị mẹ mẹẹ ọda yị wa, ọnị ọ vị Ẹnẹyịmavara, Ohomorihi ẹnịnị nị.

⁴ Ọ kà à sị ẹ và ịrẹma anị naa hẹkẹ ori. À sị ẹ sị enyusẹ mẹ uyi ori nịnị dị waa tana tụra ẹtẹẹ hẹkẹ wa. Ọnị ọ vị Ẹnẹyịmavara, Ohomorihi ẹnịnị nị.

⁵ Ẹnịnị àaa wụ̀ ịsụpa ọ̀ yị mẹ̀ ịsọvọ ẹngwọọrọ hi ọnị Ẹnẹyịmavara, ẹnịnị ẹ̀ saasa ọda ọnị ọnị mẹ yị wa, ka, ọnị vaa dọ ịsọvọ ẹnịnị.

⁶ Ịhị ọnị ẹ mẹ̀ ịsọvọ ọnọọ gẹdẹ-gẹdẹ ẹ̀ vaa rị uye anị nị. Ẹ́ rẹ zụ rị ọ eyinẹhẹ anị; uye ana àa vọ tu ịhyẹgwẹta anị vị ana vaa rị ịra.

⁷ Enyisi ọ́ vị ka à rị uye ọnọọ ịhyẹgwẹta anị nị ọnị ẹ́ yị vaa dọ.

⁸ Ẹnẹyịmavara kà ọza ana àaa rị ọ vaa rị ịvị, agụvị ka ọ́ raa sị eyi oweyi ré ịsa ana a sị tụ irenyi yi ọnị Ẹnẹyịmavara. Ọnị é yi kuku ve rò ọza ọnọọ tụ ịnị aza anị

⁹ Ọ kà ẹnịnị àaa kụ ịsa ịnị aarẹ ẹnịnị gụ, asị ẹ kụ ọ na ngụ ụtụụtọ aarẹ ẹnịnị. À sị ẹ varẹma vatụra aarẹ na tọ̀ọ ịzaha ana á parahu.

¹⁰ Ẹ̀ẹ yaa há ẹtụtụ ọchị ịvayịnị ẹnịnị, ẹ̀ vọ tịtẹ. Ana àa hụrẹ hi ẹtẹ, asị ẹ varẹma na tọ̀ ọ yọ. Ọ kà ẹnịnị ẹ̀ naavọ yị oniruwa ẹnịnị anẹkụra ọsa nịnị ene hi ịzọọ, Ọnị ọ vị Ẹnẹyịmavara, Ohomorihi ẹnịnị nị.

¹¹ Ọ kà à sị ẹnịnị yi oyi. À sị ẹ mẹ ọza rị; dị à sị é re cheeche yị ẹngụ.

¹² À sị ẹ sị ịrẹha anị hị́ eku tụ ịrẹsụ ịrẹyị ẹnẹ ẹ̀ yị vị ịzẹyịza, dị ẹ̀ va sị mẹ̀ ụhị nyị ịrẹha ọnị Ohomorihi ẹnịnị. Ọnị ọ vị Ẹnẹyịmavara nị.

¹³ Ọ kà à sị ẹ mẹ ẹvaya yị ọnọhụva ẹnịnị à vị ka ẹ̀ mẹ akoo yị ọ. Ọza ọnị ẹ̀ẹ dọ ka ọ̀ mẹ̀ ụkọrọ yị ẹnị, à sị ẹ́ za a ku tu eyinẹhẹ anị dị è si ọ ụta.

¹⁴ À sị ẹnịnị kụ̀ ogutọ ụhụ, dị à sị ẹ́ rẹ sị ịsa ana zụ gụ ọza hyẹdụ jị ogweyi oze; ama ẹnịnị ee hí angwa Ohomorihi: Ọnị ọ vị Ẹnẹyịmavara nị.

¹⁵ Ẹnẹyịmavara kà ẹnịnị ẹ̀ẹ sị ịzẹyịzaa mẹ̀ ọkarẹyị; à sị ẹ nyị ọza remeyi agụvị ka ọọ vị onosiye, dị à sị e re hí angwa ọzọbanyị.

¹⁶ Ọ kà à sị ẹnịnị yà ịnị akakana anda ẹnịnị dị ee du ọza ịrẹma. À sị a nyị ọza ana na dọ ivenu ireche ana vaa mẹ ka à wụ ọnọhụva anị.

¹⁷ Asị ẹ sị ịrẹyị ọhịmị ọza tụ ịnị ịnẹ, ama ọza ọnị ẹnịrị ọ̀ọ nyị ịrẹyị, ẹnịrị wa ẹ̀ kà a, agụvị à sị ẹ na hụvị ọza mẹ̀ ịvị.

¹⁸ À sị ẹ na họ̀ oponu ịrẹyị ka ọza ọnyọọnyị na, à vị ka ẹ̀ sị ịrẹyị ọhịmị ọza ọnọọ tụ ịnị ịnẹ; ama ẹnịnị è sì ịrẹyị ọnọhụva anka é me sì ịrẹyị ẹngụ ẹnịnị. Ọnị ọ vị Ẹnẹyịmavara nị.

¹⁹ Ọ kà ẹnịnị ẹ̀ saasa ọda anị. À sị ẹnịnị zẹẹ ka ịsụpa irenyi-irenyi ẹẹva ẹnẹ ẹ́ pa ẹ̀ tụra ẹngụ dị ẹ̀ ma ozi. À sị ẹnịnị chire ịsa oze ẹẹva tụ ịnị aarẹ ọnya. Dị à sị e chire awuru ana a sị achị irenyi-irenyi ẹẹva gẹ.

²⁰ Ọnọrụ aa sị ọnyẹnẹẹ ana vị ọrịhị ọnị ọza ẹnẹsa nyị tụ oze, ama dị ọza èee yi si ụta anị varẹma dị à va hụrẹ ẹ ụvọ nị, ẹ vaa rị ụya ama à sị a wụ̀ wa, agụvị ka ọnyẹnẹẹ ọnọọ yị vị ọrịhị.

²¹ Ama ọnọrụ ọnọọ vaa sị ịdẹbaa vẹ enoze ajẹngụ ọnị Ẹnẹyịmavara, dị ọ sị va mẹ̀ ịsọvọ yị ẹngụ anị ka ọnị ọ́ọ rị ịvị.

²² Ohirẹsụ irehi Ohomorihi vaa mẹ ịsị a vọrọ ka à mẹ ọyị nyịna ọza dị à sị kụ ịvị ọnọrụ ọnọọ mẹ̀ kwooze, Ohomorihi vaa vagu ọ.

²³ Ẹnẹyịmavara kà, ẹnịnị ẹ̀ẹ va sị ngụ ẹtẹ Ikanaani, dị é chire ọchị ireyi-ireyi ana aā rị ẹtụtụ anị nị, ẹtụtụ ọchị ẹnẹnị vị ẹnẹ ẹ́ vaa zá ịrịkaa tụ ịnị ịsa ọnị ọza ẹ̀ yị ma rị. Avọọ ẹ́ mẹ vaa mẹ ịrayị ẹẹta ịpaapa ọnị ọchị ẹnẹẹ èe nyima aa tụ́ nị. Ẹnịnị ẹ́ yị vaa rị ẹtụtụ ọchị ẹnẹẹ ịnị ịrayị ẹẹta ịpaapa ẹnẹẹ.

²⁴ Ọ kà avaba ẹtụtụ ọnị ọchị ẹnẹẹ ẹ̀ẹ tụ ịnị ịrayị ọhụna, vị ana vaa sịị tụ irenyi ọ̀ yị kụ ọnị Ẹnẹyịmavara kà ọnị ộ mẹẹ o.

²⁵ Ama ịnị ịrayị ọhụhị anị, ẹnịnị ẹ́ zụ aa rị ẹtụtụ ọchị ẹnẹẹ, ọ ka ẹnịnị ẹ̀ẹ maanị mẹ avaba ẹsẹnị, ọchị ẹnịnị vaa tụ́ ẹtụtụụ yị wa hu avọọ. Ọnị ọ vị Ẹnẹyịmavara, Ohomorihi ẹnịnị nị.

²⁶ Ẹnẹyịmavara kà à sị Anisirẹrị nịnị rị uye o. À sị ẹ na dọ ụkata hụụnị ụvọ ụhwẹ echu di è sii ré ẹtẹẹ yị ọza, dị à sị ẹ rẹ na mẹ ẹbẹ o.

²⁷ Ọ kà à sị ẹ kụ́ ẹyị ini okura ẹnịnị, dị à sị ẹ rẹ dà hụụnị ịrẹwa ẹnịnị o.

²⁸ À sị ẹ zị ẹngụ ọza ene sú nini pooro dị ẹ̀ naa sị ịsaa tọ̀ ẹngụ ẹnịnị ụnava. À sị ẹ́ tụ ẹsa hi ẹngụ nịnị o.

²⁹ À sị ẹ́ mẹ̀ ụhị nyị ezi anẹẹ ẹnịnị dị ẹ̀ mẹ ka ẹnịnị ẹ̀ naa mẹ ori. Ẹ̀ẹ vavọọ mẹ, vị́ avaba ẹnịnị kụkụ a vàa ka ori nịnịị na, dị ẹtẹ ẹnịnị kuku hi yi ebira odivi-odivi nị.

³⁰ Ẹnịnị ẹ̀ saasa ọda ẹkụhị ụhwọtụ anị, dị ẹ̀ sị ụbanyị yị aha ana a yaa hẹkẹ ọnị, ọnị ọ vị Ẹnẹyịmavara nị.

³¹ Ẹnẹyịmavara kà à sị Anisirẹrị nọ ịdị aza anaa họ̀ oku nini use ịrẹyị ka ẹ̀ sị ajuwe yị ẹnị, ẹnịnị ẹ̀ẹ vavọọ mẹ, vị́ eyee du ẹngụ ẹnịnị ẹngụ nị. Ọnị ọ vị Ẹnẹyịmavara, Ohomorihi ẹnịnị nị.

³² Ọ́ ka ẹnịnị ẹ̀ kwẹẹtẹ jẹ yị azọkụ nịnị, dị ẹ̀ sị ụbanyị yị wa. Ẹnịnị ẹ̀ sị ụbanyị ọnị Ohomorihi ẹnịnị dị ẹẹ saasa ịrẹyị anị; ọnị ọ vị Ẹnẹyịmavara nị.

³³ À sị ẹnịnị mẹ ẹvaya yị anẹkụra ọsa ana va ra pe wa ịnị ẹtẹ ẹnịnị.

³⁴ Ọ kà anẹkụra ọsa ana va ra pe wa vị ẹnẹ vaa sị eyi ozi ẹtẹẹ re. Ẹnịnị ẹ̀ sì ịrẹyị anẹkụra ọsa ẹnẹẹ anka e me sì ịrẹyị ẹngụ ẹnịnị; agụvị ka azọga ẹnị rẹ vịdị vị tụ ẹtẹ Ijipiti nị. Ọnị ọ vị Ẹnẹyịmavara, Ohomorihi ẹnịnị nị.

³⁵ À sị ẹ mẹ ọza ọnyọọnyị rị dị ẹ̀ sị ịsa ẹnẹ ẹ̀ yị vị ịzẹyịza mọ ịsa yị ọ, ọ̀ọ vị ụgọdọ ịsa, ọ̀ọ vị ịsa mẹmẹ rata, ọ̀ọ va vị ịsa mẹmẹ rụrụ.

³⁶ Ẹnẹyịmavara kà Anisirẹrị nịnị ẹẹ sị ịzẹyịzaa mọ ịsa, dị ẹ rẹẹ sị ịzẹyịza ngọ ịsaa yị aza. Avaba ịsị ẹẹ yaa sị mọ ịsa ọ̀ vị ịzẹyịza. Ọnị ọ vị Ẹnẹyịmavara Ohomorihi ẹnịnị ana kụ wa tụ ẹhẹ hụrị ẹtẹ Ijipiti nị.

³⁷ Ẹnịnị ẹẹ mẹ avaba ịsa ọnị ka yị wa, dị ẹ saasa avaba ọda anị. Ọnị ọ vị Ẹnẹyịmavara nị.