Ijosuwa 17 - IWE ỌNỊNỊ

Ẹtẹ achẹva Anịmanasẹ nịnị

¹ Avọọ a mẹmẹ ga ẹtẹ dị ọ tu achẹva Anịmanasẹ ana vọ nị. Ịmanasẹ ọ vị ozi ọzọkụ Ijosẹẹhụ nị. Imakiri ana vị ozi ọzọkụ Ịmanasẹ vị ọka ịrẹkụ. Ezi anị a vịdị sị ẹtẹ Igiriyadi ọnịrị Ịbasanị ana ya akẹnẹ irehu Ijodani eyi ịzị ọyị zị vẹ yị nị.

² Ezi Ịmanasẹ ana vọ ẹ vị Abiyezeri, Ihereki, Asirẹrị, Ịsẹkẹmị, Ihehwẹrị ọnịrị Ịsẹmịda. Abara aza ẹnẹnị a vana sị ẹtẹ yị tụ eyi ịzị ọyị zị na ngụ ẹtẹ a jịnẹ irehu Ijodani vẹ nị.

³ Ama Izerohwehadi ana vị ozi Ihehwẹrị, aazị Igiriyadi, ẹmazị Imakiri, Ịmanasẹ vị ana ma ezi anẹẹ kẹnẹ. Ịrẹha ezi ẹnẹẹ ẹ rị Imahira, Inowa, Ihogira, Imirika, ọnịrị Itiriza nị.

⁴ Dị ẹnịnị vẹ tu Eriyaza, ohirẹsụ Irehi Ohomorihi ọnịrị Ijosuwa, ozi Inuni ne beri ọdọvịdị nịnị, dị ẹ kà Ẹnẹyịmavara ộ mẹ̀ ọda yị Imosiisi ka ọ sị ẹtẹ yị ẹnị beri anda ẹnịnị anọrụ. Ịzẹyịza, dị Ijosuwa sị ẹtẹ yị wa beri anda ẹnịnị anọrụ anka ọda Ohomorihi mẹ kà a.

⁵ Ọnị ọ mẹ ka ẹtẹ oze ẹẹwụ ò tu Anịmanasẹ nịnị vaka Igiriyadi ọnịrị Ịbasanị, akẹnẹ Ijodani eyi ọnị ọyịị̄ zịị vẹ nị,

⁶ agụvị ka ezi anẹẹ anị vị ana a sị ẹtẹ yị anka a mẹ̀ rẹ sị yị ezi anọrụ anị. Ẹtẹ Igiriyadi vị ana a sị yị ezi Ịmanasẹ nịnị ana vọ.

⁷ Ẹtẹ Ezi Ịmanasẹ nịnị ộ hụrẹ Aseri na ngụ Imikimetati, eyi ọnị ọyịị̄ zịị vẹ Ịsẹkẹmị. Ẹhwị ẹtẹ ẹnịnị ô tu eyi ụvẹtẹ na ngụ ịdị aza ana ra Enitapuwa.

⁸ Anịmanasẹ nịnị ẹ nyị avaba ẹtẹ ana kara Itapuwa nị. Ama ezi Ehwireemi nịnị ẹ nyị Itapuwa ụvọta ana na yà ẹhwị ẹtẹ Ịmanasẹ nịnị nị.

⁹ Ẹhwị ẹtẹ ẹnịnị ọ na ngụ okuha Ikana. Anehwireemi nịnị ẹ nyị ẹkụra ene hi eyi ụvẹtẹ okuha ọnọọ nị; ama ịnị ẹtẹ Ịmanasẹ nịnị ẹ yà nị. Ẹhwị ẹtẹ Ịmanasẹ nịnị ọ vavọọ na zị oze eyi ẹbẹẹba okuha ọnọọ, dị ọ na zẹtẹ tụ Òkū Imeditareniya nị.

¹⁰ Ẹtẹ Ehwireemi nịnị vị ana yà eyi-ụvẹtẹ, dị ẹtẹ Ịmanasẹ nịnị yà eyi ẹbẹẹba, dị oku tẹ̀ ẹhwị ẹtẹ yị wa nị. Àa zi oze eyi ẹbẹẹba, di e tu Aseri nini, àa zị oze eyi-ụvẹtẹ, di e tu Aniisaka nịnị.

¹¹ Anịmanasẹ nịnị ẹ nyị ẹkụra ẹnẹnị ene hi ini ẹtẹ Iisaka ọnịrị Aseri nịnị nị. Ẹkụra ẹnẹẹ ẹ vị: Ịbẹtị-Isani ọnịrị ẹkụra eweyi-eweyi anị, Ibiriyami ọnịrị ẹkụra eweyi-eweyi anị, Ịdọọ ọnịrị ẹkụra eweyi-eweyi anị, Ẹndọ, Itaanaki, Imegido, beri ẹkụra eweyi-eweyi ana kara wa.

¹² Ama Anịmanasẹ nịnị ẹ yị va nyẹngụ dụ aza ana ra hi ẹkụra ẹnẹẹ. Anikenaani nịnị ẹ vana yị ra hi ịzọọ nị.

¹³ Ịjị Anisirẹrị nịnị sị ụkata nyị ẹtẹẹtẹrẹ, ẹnịnị ẹ yị dụ Anikenaani nịnị kwooze, ama dị ẹ vanaa sị ụkataa za waa mẹ̀ ụkọrọ nị.

Ezi Ijosẹẹhụ ka a dà tụ ịnị ẹtẹ ẹnịnị yị ẹnị

¹⁴ Ezi Ijosẹẹhụ ệ kà a yị Ijosuwa ka: Sị ẹ vẹ dị ahịka ẹtẹ oze ọnya kẹnẹ ọ sị yị ẹnị nị? Ẹ ka, ẹnị ệ rụrụ, agụvị ka Ẹnẹyịmavara ộ mẹ̀ ọyịza yị ẹnị.

¹⁵ Ijosuwa ô tu wa ohi ka, ẹnịnị ẹ̀ẹ vavọọ sị rụrụ, dị ẹkụra ana yà ịrẹsụ ataba Ehwireemi si weyi yị wa nị, ẹnịnị ẹ̀ nọ ini iruku, dị ẹ̀ na dà ẹtẹ yị ẹngụ ẹnịnị ịnị ẹtẹ Aniperizi ọnịrị Anirehwayimi nịnị

¹⁶ Ezi Ijosẹẹhụ ka: Ịrẹsụ ataba ọnọọ ọ sị weyi yị ẹnị, ama avaba Anikenaani nịnị ana ra hi inozi ệ nyị ụkẹkẹ ịrẹkụ enyusẹ-enyusẹ. Ẹnị ana ra hi Ịbẹtị-Isani ọnịrị ẹkụra eweyi-eweyi ana kara a, ọnịrị ẹ na ra hi inozi Ijezirẹẹrị.

¹⁷ Ijosuwa ộ kà a yị Ezi Ijosẹẹhụ, Anehwireemi, ọnịrị Anịmanasẹ nịnị ka, ịzẹyịza wâ rụrụ nịnị, dị ụ rẹ nyị ụkata ẹnịnị ẹtẹẹtẹrẹ nị. Ẹ yị vị ẹtẹ oze ọnya kẹnẹ ụ vaa nyị nịnị.

¹⁸ Ẹwụ nịnị ọ rẹ́ vaa nyị ịrẹsụ ataba anị, ọ̀ọ daka vị ka iruku ọ vị nị. U ve nee du ọ nịnị, dị ụ wa sị ọ nịnị hụrẹ eyi ọnya na ngụ ịzị ọ zẹtẹ tụ nịnị. Anikenaani nịnị ẹ̀ẹ da ka nyị ụkẹkẹ ịrẹkụ enyusẹ-enyusẹ, dị ẹ nyị ụkata pooro nị ẹwụ nịnị ọ vaa dụ wa nị.