Ijosuwa 10 - IWE ỌNỊNỊ

Anisirẹrị e hu Anamọrị ẹtẹ

¹ Â nyị ọnọrụ ọnya aanị ọnị ịrẹha anị rị Adonizedeki. Ọnị ọ vị ohinọyị Ijerusarẹmị ịnị ụmẹ ọnọọ nị. Ộ wụ́ ọ ka Ijosuwa ọ ra rị Eyayị, dị ọ du ẹkụra ọnọọ ha nị. Dị ọ wụ́ ohinọyị ana ya ịzọọ anka ọ mẹ rẹ mẹ Ijeriko nị. Ama dị ọ Anisirẹrị ẹnịrị Anigibiyọnị dọ yị ẹngụ ka ẹnị ra vabẹ ịnị ẹngwọọrọ nị.

² Ịjị Adonizedeki ọnịrị aza maanị wụ́ kẹnẹ, dị angwa ngụ wa ẹngụ agụvị ka Igibiyọnị vị ẹkụra ọdẹngụ. Ọnị ọ banyị hụụnị Eyayị ọnịrị ẹkụra ana vọ ana nyị ohinọyị nị. Anigibiyọnị nịnị vị ọkụrẹkụ ọkụmị-ọkụmị.

³ Avọọ, dị Adonizedeki tụ́ hị́ ohinọyị ẹkụra ẹẹna ka ẹ va gụ́ ọnị ụvọ gẹ ịrẹkụ tu Anigibiyọnị nị. Ô hị́ Ihohamị ohinọyị Ihebirọnị, Ipiramị ohinọyị Ijarimuti, Ijapiya, ohinọyị Irakisi, ọnịrị Idebiri ohinọyị Egironi.

⁴ Adonizedeki ọ́ hị́ wa ka e beri ọnị wụ́ Anigibiyọnị ha agụvị ka ẹnịnị ẹ ra va ụvọ beri Ijosuwa ọnịrị Anisirẹrị.

⁵ Dị ohinọyị ẹyịịhị ẹnẹẹ kụ isoja ẹnịnị vabẹ dị ẹ nọ ịrẹkụ Anigibiyọnị nịnị nị.

⁶ Adonizedeki me re wa kẹnẹ, ô tụ́ ụtụ eyiha-eyiha ne tu Ijosuwa Ígirigari ịzị e hi nị. Dị ọ da ịpẹ ka Ijosuwa ọ va dọ ẹnị ha hụụnị ụvọ ohinọyị Anamọrị ẹẹhị ana gẹ tu ọnị aanị. Dị ọ ka Ijosuwa ọ navọ asị ụhị nyị ẹnị ana vị Ezi ahụ anị aanị. Aarịhịnị ụsẹ ọ hụụ ọ ịra.

⁷ Ịzẹyịza, dị Ijosuwa vavọọ kụ avaba isoja anị kụ ịrẹma na gụ Anigibiyọnị ụvọ nị.

⁸ Dị Ẹnẹyịmavara kà asị Ijosuwa hí angwa ẹnịnị agụvị ka ọnị vaa sị wa nyị ẹbẹẹba ẹnịnị nị; vaa nyị ọza ikonya ana vaa nyẹngụ jẹẹ zị wa.

⁹ Dị Ijosuwa ọnịrị isoja anị nịnị sị ịrahụ hụrẹ Igirigari na ngụ Igibiyọnị ịzị ẹ hụrẹ na sụ Anamọrị avaavo.

¹⁰ Dị Ẹnẹyịmavara sị angwahi va wa zịị, dị Anisirẹrị wụ̀ wa va ha ẹtẹẹtẹrẹ nị. Dị ẹ dụ wa va tụra oze na ngụ Ịbẹtị-Ihoroni, dị ẹ wụ̀ wa oze Azeeka ọnịrị Imakeda.

¹¹ Anamọrị nịnị mẹ vavọọ e zwe hụrẹ Ịbẹtị-Ihoroni, dị Ẹnẹyịmavara zụ ịrẹta ọdẹngụ-ọdẹngụ hụrẹ ẹbẹẹba va wụ̀ wa ha nị. Isoja ẹnị ịrẹta wụ̀ ẹ rụrụ hụụnị aza ọnị Anisirẹrị sị ụ̀hwọ̀ wụ̀ nị.

¹² Ịhị ọnọọ ọnị Ẹnẹyịmavara sị Anisirẹrị nyị ẹbẹẹba Anamọrị nịnị, Ijosuwa ọ̀ mẹ̀ aduwa eyi aza anị. Dị ọ ka Ẹnẹyịmavara ọ mẹ ka ọyị ọ jẹẹ ịrẹsụ ẹkụra Igibiyọnị dị ụhwẹ ọ jẹẹ ịnị osuusu Ayijaroni.

¹³ Avọọ gẹdẹ-gẹdẹ ọyị ọnịrị ụhwẹ mẹẹ jẹẹ pooro dị Anisirẹrị huna ọnịvị ẹnịnị nị. A sị ịrẹyị jị ahẹ ana chẹrẹ tụ ịnị iwe Ijasarị ka ọyị ô jẹẹ dị ẹ yị ngụ ẹtẹ ịnị ẹkụhị ọyịvụrụ ịhị ọnọọ.

¹⁴ E yị vịdị nyị dị ọza ẹ yị vene re ẹngụ ẹkụhị ọnọọ, ọnị Ẹnẹyịmavara wụ́ ọngwẹ ọzarẹyịrẹsụ mẹ ịrẹyị. Ẹnẹyịmavara ọ kụ́ ịrẹkụ yị Anisirẹrị nịnị ịhị ọnọọ nị.

¹⁵ Ịjị ịrẹkụ sị jị, dị Ijosuwa ọnịrị aza anị varẹma nọ ịzị e chi Igirigari nị.

Ijosuwa ộ za ohinọyị Anamọrị ẹẹhị

¹⁶ Ụmẹ ọnị ịrẹkụ ọ sị jị odo, dị isoja ọnịvị nịnị e zwe, dị ohinọyị ẹnịnị ẹẹhị ẹnẹẹ zwe na tẹ̀ ịnị ụtẹha ana gụrị Imakeda nị.

¹⁷ Ijosuwa mẹ wụ́ ka isoja anị e re wa ịnị ụtẹha ọnọọ.

¹⁸ Dị ọ kà ẹnịnị e zina ịrẹta kụ irenu ụtẹha ọnọọ dị aa nyị aza che ene sere e nị.

¹⁹ Dị ọ ka aza ana vọ ẹ kụ chire isoja ọnịvị ẹnịnị dị asị e re oze ngụ ẹkụra ẹnịnị ana jị ọvọ kara. Asị a nyị ọza ẹnịnị ene zwe agụvị ka Ẹnẹyịmavara Ohomorihi vaa gu Anisirẹrị nịnị ụvọ dị ẹ wụ̀ wa saka-saka.

²⁰ Ijosuwa ọnịrị aza anị vana nyayịnẹ wụ̀ wa ẹnẹmẹhị, dị ahịka aza che ẹnịnị ẹ javọ ịrẹsụ-ịrẹsụ na ngụ ẹkụra ẹnịnị nị.

²¹ Dị isoja Anisirẹrị ve tu Ijosuwa me zi wa ịzị ẹ jị ajẹngụ hị́ Imakeda nị. Ẹ yị nyị ọza ana nyayịnẹ ka ịrẹyị odivi Anisirẹrị nịnị ịzọọ.

²² Ịjọnọọ Ijosuwa kà yị isoja ka e na oze ụtẹha ọnọọ dị ẹ kụ́ ohinọyị ẹyịhị ẹnẹẹ va yị ọnị nị.

²³ Ịzẹyịza, dị isoja ẹnẹẹ kụ ohinọyị Ijerusarẹmị, Ihebirọnị, Ijarimuti, Irakisi, ọnịrị Egirọnị tụ ẹhẹ nị.

²⁴ Ịrẹma ọnị Ijosuwa raa hị́ avaba isoja gụ, dị ọ kà ẹnị ọdọvịdị isoja anị ana nọ ịrẹkụ ohinọyị ẹnẹẹ, ẹ sị ahụ hi wa ọrọkọ jẹẹ. Dị ẹnịnị mẹ ịsị Ijosuwa kà yị wa nị.

²⁵ Dị Ijosuwa kà yị wa ka asị e hí angwa, asị o hi wa eyi. Eyayị ẹnịnị ẹ vị, dị ẹ nyị ọtụtụrụma, ka avọọ Ẹnẹyịmavara mẹ vaa mẹ ọnịvị ẹnịnị ene beri wa kụ ịrẹkụ nị.

²⁶ Ịrẹma ana a vavọọ mẹ wa, Ijosuwa wụ̀ ohinọyị ẹnẹẹ, dị ọ ka a kụ wa gẹ ịrẹsụ ọchị ẹẹhị ne tu oruva anị nị.

²⁷ Ẹtẹ mẹẹ hozi kẹnẹ, Ijosuwa kà a ka a hụrẹ wa, di e ne ne wa tụ ịnị ụtẹha ịzị vịdị tẹ tụ. Dị a sị ịrẹta ọbanyị ku ọ irenu pooro ve tu ajịnị nị.

Ijosuwa ộ vana rẹ dọ ẹtẹ Anamọrị ọrụrụ-ọrụrụ

²⁸ Ịhị ọnọọ ọnyọọnya, Ijosuwa vu ẹkụra ọbanyị ana a hị́ Imakeda ẹtẹ, dị ẹ yị nyị ọza ana ha ịzọọ anka ọ mẹ Ijeriko avọọ nị.

²⁹ Dị Ijosuwa ọnịrị Anisirẹrị nọ Iribina na kụ ịrẹkụ nị.

³⁰ Ẹnẹyịmavara sị ẹkụra ọnọọ chi wa ụvọ, dị ẹ wụ̀ avaba aza ọnịrị isoja ẹnịnị ha nị. Ijosuwa ọnị ụvọta wụ ohinọyị Iribina anka ọ mẹ wụ ohinọyị Ijeriko avọọ nị.

³¹ Dị Ijosuwa ọnịrị Anisirẹrị hụrị ịzọọ kụ ịrẹkụ ne tu ẹkụra ana a hị́ Irakisi

³² Eyinẹhẹ ọnị ẹ ngụ ịzọọ, Ẹnẹyịmavara za wa chire Anisirẹrị ụvọ, di e vu wa ẹtẹ saka-saka anka Iribina nị.

³³ Ihoramị ohinọyị Ịgẹzẹrị ana vẹ ịnị ọgụvọ Anirakisi vị ọnị Ijosuwa wụ̀ ọnịrị isoja ọnị ọ kụ nọ ịrẹkụ.

³⁴ Dị Ijosuwa ọnịrị isoja Anisirẹrị rẹ nọ ịrẹkụ Egirọnị nị.

³⁵ Ẹkụhị ọnya ẹ sị rị wa, dị ẹ wụ̀ avaba aza ene hi ịzọọ ha anka ịsị ẹ mẹ Irakisi avọọ nị.

³⁶ Ịrẹma ọnọọ Ijosuwa ọnịrị avaba Isirẹrị hụrị Egirọnị kụ ịrẹkụ na tana ụvọ za aza ene hi Ihebirọnị nị.

³⁷ Dị ẹ sị ụ̀hwọ̀ wụ̀ ohinọyị ẹkụra ọnọọ ọnịrị avaba aza anị saka-saka, dị ọza ikonya ẹ yị ha anka Egirọnị avọọ nị.

³⁸ Dị Ijosuwa ọnịrị isoja Anisirẹrị varẹma vaa va eyi ka Idebiri nị.

³⁹ Dị ẹ rị ẹkụra ọnọọ vaka avaba ẹkụra eweyi-eweyi ana kara a nị. Di e vu wa ẹtẹ bemi-bemi anka Iribina ọnịrị Ihebirọnị.

⁴⁰ Avọọ Ijosuwa mẹ vu avaba ẹkụra ene hi ịrẹsụ ataba va chi va ngụ Ịnẹgẹvị ọnịrị ẹkụra ene hi inozi. Ẹ yị nyị ọza ana ha anka Ẹnẹyịmavara mẹ mẹ ọda anị yị wa.

⁴¹ Ijosuwa vị ana wụ̀ wa hụrị Ịkẹdẹsị Ibaneya na ngụ Igaza ọnịrị avaba ẹkụra Igoseni na ngụ Igibiyọnị.

⁴² Agụvị ka Ẹnẹyịmavara ộ vụ ịrẹvụ yị Ijosuwa, dị ọ wụ ohinọyị ẹnẹẹ dị ọ dọ wa ẹtẹ nị.

⁴³ Ịrẹma ịrẹkụ ẹnẹnị, dị Ijosuwa ọnịrị avaba Anisirẹrị nịnị vavẹ Igirigari ịzị e hi nị.