Ijoovu 27 - IWE ỌNỊNỊ

Ijoovu aa yịị kà ịrẹyị naa

¹ Ijoovu maa ka ịrẹyị anị naa, dị ọ ka,

² Ohomorihi Ochẹtẹẹngụ ana yara ọ yị mẹ̀ ebira ana vọrọ ka ọ̀ me hi ọnị. Di ọ navọ mị tụ ịnị ayodu nị. Dị ọ hị́ eku ka,

³ Ohomorihi ò sere ọnị, dị ọnị e yi su nị.

⁴ Ọnị ẹ yị sị irenu anị cheeche. Ọnị e yi ree vene ọza.

⁵ Asị Ohomorihi zẹẹ ka ọnị ọ dọ ka ọta ẹnẹẹ ẹ ka ịzẹyịza. Ọ kà ọnị ọ daka ee su ọnị vị ana yịị kụ ka ọnị ọ yị rị ịvị.

⁶ Ijoovu ka ọnị ẹ yị vaa va, agụvị ka ayị anị ọ jị ịvị yị ọnị.

⁷ Avaba aza anaa bàrà mị, dị ẹ kwẹẹtẹ tu mi vị ana vaa rị ụya anka ọza ọhịmị avọọ. Vị́ ẹ́ vaa rị ụya anka ọza odivi nị.

⁸ Sị ẹ vaa vị ọyịtureyi ọza odivi, ịjị Ohomorihi ọ̀ọ ka ọ̀ sị ụhwẹ vẹ?

⁹ Ohomorihi wáá vaa wụ́ owu ẹnịnị, ịjị ẹngụkata ọ̀ọ ka wa vẹ, dị ẹyaa da ịpẹ ka à gụ ẹnị ụvọ nị?

¹⁰ Ayị ẹnịnị we vee hinee tu Ochẹtẹẹngụ? Vị́ a vọrọ ka ẹnịnị ẹ̀ yaanị sị avaba ụmẹẹ mẹ̀ aduwa hi Ohomorihi nị.

¹¹ Jẹẹ ma zụ̀ wụ nịnị ịzị ụkata Ohomorihi banyị na za. Mị vaa mẹ ẹhahi ịsa oni Ohomorihi sì ka ọnị aa mẹ yị wụ nịnị.

¹² Avaba awụ nịnị ụvọta ọ sị o re: Sị ẹ vẹ dị ụ kụkụ maanị vaa yịị kà kẹnẹ-kẹnẹ nịnịị?

¹³ Aanị Ohomorihi Ochẹtẹẹngụ mẹẹ sị ụyaa rị aza edivi nị.

¹⁴ Ẹnịnị ẹ zụ ma ezi tatarata, ama avaba ẹnịnị vị ana a vaa wụ̀ ha eyirẹkụ. Ezi ẹnịnị vị ọnị ụngwẹ vaa kụ̀.

¹⁵ Ezi ẹnịnị ana àa vọ eyirẹkụ, vị ọnị ụkụ vaa wụ̀. Osoku ẹnịnị ẹ yị hyakụ vaa jị òrèrè ẹnịnị.

¹⁶ Aza ẹhịmị ẹ zụ kụ ogu gụ ọnị ọza ẹ yị zụ za ịrịka; é zụ gu ịta jẹẹ anka a mẹẹ tọ ụvụụ jẹẹ avọọ,

¹⁷ ama dị ahịka aza ọyịza nịnị ẹ vaa za ịta ẹnẹẹ nị. Ọnịrẹyịzẹyịza nịnị ẹ vaa gà ogu anị nị.

¹⁸ Irehi ana aza ẹhịmị da vị ana vị ụgẹngẹnẹ anka irehi arahị avọọ. Vị́ ọ sị mẹ anka ajẹngụ oserẹtẹ ịzị e chire ọchị ịvayịnị hi nị.

¹⁹ Aza ẹhịmị ẹẹ na sụ̀ ịnị ogu, dị ẹ ha kwẹẹtẹ ịnị ụzọngwa.

²⁰ Ayịhụrịnẹ o chi wa ẹngụ anka ọhaara enyi mẹẹ kụ ẹtẹ avọọ. Opomi ịrahụ vị ene hì wa ne hu.

²¹ Ahị hụrẹ eyi ọnị ọyịị̄ zịị vẹ va sị wa ne hu. O vee hì waa hụrẹ aha ẹnịnị.

²² Ahị ọnọọ ẹ yị vayị ẹnịnị ẹ̀ẹ daka aa sị vụrị ka ẹnị è zwe yọ.

²³ Ahị ọnọọ nyayịnẹ a tụ kukuku, dị ụkata evu ẹtẹ ee chire wa angwa dụ wa ịrẹma e mee zwe nị.