Ịjọọnụ 8 - IWE ỌNỊNỊ

 za ọsẹrẹka ọnya vẹ ịdị Ijeesu

¹ Ijeesu ọnị ộ nọ ịnị Ataba Orivi.

² Ẹnẹnẹ viri-viri eyinẹhẹ anị, dị ọ rẹ vavẹ ini irehi Ohomorihi nị. Dị aza rẹ wara ve tù ọọ nị. Dị Ijeesu yaayịtẹ, dị aa zụ̀ wa ịsa nị.

³ Ọzwọzọda nịnị ọnịrị Anihwarisi nịnị ệ sị ọnẹẹ ọnya aanị vẹ. Ọnẹẹ ọnọọ vị ẹnẹ ẹ za, e mè ne tù ka aa sẹ̀ ịrẹka. Dị ẹnịnị za a va jẹẹ ịnị akakana ẹnịnị nị.

⁴ Dị ẹ kà a yị Ijeesu ka, “Ọga, ọnẹẹ ọnọnị vị ọnị ị za, ọ màa yịị sẹ̀ ịrẹka.

⁵ Anka ọda ayị, Imosiisi vị ana kà a ka ẹngụ ọnẹẹ ọnọnị, asị ịrẹta-ịrẹta wụ ọ. Sị ẹwụ kà tụ̀ ọọ?”

⁶ Ịrẹyị ọnọnị vị ene eyee sii be Ijeesu, agụvị di è zụ re ịrẹyị ẹnẹ ẹnị vaa sị za a. Ama di Ijeesu nyima nẹtẹ, dị aa sị igegee chẹrẹ ịsa tụ́ ini eteesu nị.

⁷ Ẹ màa yịị họ̀ ọ use, dị Ijeesu kwẹẹtẹ jẹẹ nị, dị ọ ka, “Ọza ana àa yẹ ka ọnị ọọ̀ yị mẹ ịvị ịnị ẹngụ awụ nịnị da, ọ̀ vịdị sị ịrẹta, di ò nee nya a.”

⁸ Di o re nyima nẹtẹ, dị ọ raa chẹrẹ ịsaa tụ́ ini eteesu nị.

⁹ Ịjị ẹnịnị vavọọ wụ́, di e nyima hụụnị ọzọkụ ẹnịnị, dị ẹyaa tụ̀ ọnya-ọnya nị. Dị ọ kụkụ sị vọ Ijeesu ọnịnya beri ọnẹẹ ọnọọ ana yị jẹẹ ọvịdị anị nị.

¹⁰ Dị Ijeesu kwẹẹtẹ jẹẹ, dị ọ kà a yị ọnẹẹ ọnọọ ka, “Ọnẹẹ ọnọnị, ịzị ẹ yà? Ẹ yị nyị ọza ana jị ịvị wụụ?”

¹¹ Dị ọnẹẹ ọnọọ ka, “Ọga, ẹ yị nyị, ọ!” Dị Ijeesu kà a yọ ka, “Ẹmị ẹ yị rẹ jị ịvị wụ; waa na, asị ụ kụkụ vana mẹ ịvị!”

Ijeesu ọ vị ẹtohweyi ẹhẹ nị.]

¹² Dị Ijeesu rẹ kà a yị aza, dị ọ ka, “Ẹma vị ẹtohweyi yị anẹhẹ nị. Ọza ana àa dụ mị ịrẹma, o vee re ẹtohweyi anaā mẹ ka ọza ọ̀ yàra obooro. Ọza ọnọọ ọ yị kụkụ vaa zị ụsẹ ịrahụ.”

¹³ Dị Anihwarisi nịnị kà a yị Ijeesu ka, “Ẹwụ ụvọta aa dọ ivenu ẹngụ awụ aanị nọ! Ivenu awụ ọ yị nyị ahụ jẹẹ.”

¹⁴ Dị Ijeesu va kà a yị wa ka, “Ịrẹyị ọnị maa kà vị ịzẹyịza, màa daka aa dọ ivenu ẹngụ amị, agụvị ka mâ yẹ ịzị mị hụrẹ vẹ, ma rẹ yẹ ịzị maa nọ. Ama ẹwụ nịnị ọ yị yẹ ịzị mị hụrẹ vẹ, wẹ yị rẹ yẹ ịzị maa nọ nịnị.

¹⁵ Ẹwụ nịnị vị ana aa mẹ̀ ọkarẹyị anka ọza kẹnẹ. Ama ẹmị ẹ yị mẹ̀ ọkarẹyị yị ọzọnyị-ọzọnyị.

¹⁶ Màa daka aa mẹ̀ ọkarẹyị, ọkarẹyị ẹmị vị ịzẹyịza, agụvị ka ẹ yị vị ẹmị ịnya aa mẹ̀ ẹ. Ẹmịrị Ada amị ana tụ́ mị vẹ ẹhẹẹ yọ nị.

¹⁷ Ini iwe ọda awụ nịnị, â chẹrẹ ẹ tụ́ ọọ ka: ‘Aza ẹnị ẹẹva ẹ̀ẹ dọ ivenu tụ́ ịnị ịrẹyị, ịrẹyị ọnọọ vị ịzẹyịza.’

¹⁸ Ẹmị aa dọ ivenu ẹngụ amị, dị Ada amị ana tụ́ mị vẹ ẹhẹ, ọnị raa dọ ivenuu tụ́ ịnị ịrẹyị amị nị.”

¹⁹ Dị ẹnịnị va họ̀ Ijeesu use ka, “Ịzị ada awụ yà?” Dị Ijeesu tụ́ wa ohi, dị ọ ka, “Wẹ yị yẹ mị nịnị, wẹ yị rẹ yẹ Ada amị nịnị. Wàa yaanị yẹ mị nịnị, ụ yaanị rẹ sị Ada amị yẹ nịnị bẹẹ.”

²⁰ Ịrẹyị ẹnẹnị vị oni Ijeesu kà, ọ mẹ yà ịzị aā tụ́ ẹkẹhịị tụ́ ini irehi Ohomorihi dị aa zụ̀ aza. Ẹ yị nyị ọza ana sị ụvọ kanyị ọọ, agụvị ka ụmẹ anị oò yi tù.

Ijeesu ka ọnị vaa vàa nọ ịdị Ohomorihi

²¹ Dị Ijeesu rẹ kà a yị wa ka, “Maa vaa na nịnị, u vee sì mi nịnị, ama di u sú tụ́ ịnị ịvị awụ nịnị. Ịzị maa nọ, wẹ yị va zụụ vẹ ịzọọ nịnị.”

²² Dị Aniju nịnị ka, “Vị ọ́ọ́ vana vaa wụ̀ ẹngụ anị nị, dị ọ maanị aa kà a ka ịzị ọnị aa nọ, ẹyị ẹ yị va zụụ nọ ịzọọ nị?”

²³ Dị Ijeesu kà a yị wa ka, “Ịnị ẹhẹ ọnọnị ụ hụrẹ vẹ nịnị nị, ẹmị vị ana hụrẹ ẹbẹẹba vẹ, ẹ yị vị ẹhẹ ọnọnị ẹmị hụrẹ vẹ.

²⁴ Agụvị avọọ, mị kà a wụ nịnị ka u vee súu tụ́ ịnị ịvị awụ nịnị. Wẹ̀ yị dọ mị wụ́ nịnị ka ‘Ẹma vị Ẹmị’ nị, vi u vee súu tụ́ ịnị ịvị awụ nịnị nị.”

²⁵ Dị ẹnịnị rẹ họ̀ ọ ka, “Ẹwụ ẹnẹ ọ vị?” Dị Ijeesu ka, “M mẹ̀ yị kà a wụ nịnị hụrẹ ụmọrụmọ avọọ, mị vị nị.

²⁶ Â nyị ịsa ọrụrụ-ọrụrụ ọnị mị zụ kà, dị ma rẹ sị jị ịvị wụ nịnị. Ama Ọza ana tụ́ mị vẹ ẹhẹ vị ọnịzẹyịza. Ịrẹyị anị ọnị mị wụ́, m maa kà a yị anẹhẹ nị.”

²⁷ Ẹnịnị ẹ yị yẹ ka ini oze Ohomorihi Ada ayị aa kà a yị ẹnị nị.

²⁸ Dị Ijeesu rẹ kà a yị wa ka, “Ịhị wàa raà sị ẹmị Ozi ọza onigirima tụ́ ẹba, ụ vaa yẹ nịnị ịhị ọnọọ ka ‘Ẹma vị Ẹmị’ nị. Ụ rẹ vaa yẹ nịnị ka mẹ yị dà ịsọnyị-ịsọnyị mẹ yị ẹngụ amị, ama ka ịrẹyị ana Ada amị sị zụ̀ mị, m maa kà nị.

²⁹ Ọza ana tụ́ mị vẹ ẹhẹ yàa mị ịrẹma. Ọ yị navọ ẹmị ịnya tịtẹ, agụvị ka ịsa ene zé e eyi mịị̄ mẹ pooro nị.”

³⁰ Íjeesu mẹ̀ maanị aa kà ịrẹyị ọnọnị, aza ọrụrụ-ọrụrụ ệ sị ayị tụra a.

Ẹnẹ vị ada Aniju nịnị?

³¹ Dị Ijeesu kà a yị Aniju nịnị ana sị ayị tụra a ka, “Wàa yịị sị ụvọọ za ịrẹyị amị nịnị, ịjọnọọ ụ vaa vị ezirẹma amị obooro nịnị.

³² Ụ vaa yẹ ịzẹyịza nịnị; ịzẹyịza ọnọọ ọ vaa sị wụ nịnịị hụụnị ọrịhị nị.”

³³ Dị ẹnịnị tụ́ Ijeesu ohi, dị ẹ ka, “Ezi Abụrahamị ị vị nọ! Yẹẹ̀ yị vị ọrịhị ọzọnyị-ọzọnyị da. Sị ẹ vẹ dị ụ waa kà a ka: ị vaa hụụnị ọrịhị?”

³⁴ Dị Ijeesu va kà a yị wa ka, “Ịzẹyịza m maa kà a wụ nịnị nị, ọza tụra ọza ana àaā mẹ ịvị, vị ọrịhị ịvị.

³⁵ Wâ yẹ nịnị ka ọrịhị ọ yị vaa yà ini eehi pooro. Ozi ọọ̄ yà ini eehi pooro nị.

³⁶ Ama àa vị ẹmị Ozi Ada amị ọ mẹ ka wa nyị ẹngụ awụ nịnị nị, ịjọnọọ ụ vaa nyị ẹngụ awụ nịnị obooro ịnị ịzẹyịza.

³⁷ Mâ yẹ ka ezi Abụrahamị ụ vị nịnị nị; ama wee yii sì ka wa wụ̀ mị nịnị, agụvị ka ịrẹyị amị o yi re aha yà ịnị ayị awụ nịnị.

³⁸ Maa kà ịrẹyị oni mi re ị́dị Ada amị, ama ẹwụ nịnị aa mẹ̀ ịsa ana ada ẹwụ nịnị kà wụ nịnị.”

³⁹ Dị ẹnịnị tụ́ ohi, dị ẹ ka, “Abụrahamị ọ vị ada ayị nị.” Dị Ijeesu kà a yị wa ka, “Àa vị ezi Abụrahamị ụ yaanị vị nịnị obooro nị, ụ yaanị aa mẹ̀ ịsa ana Abụrahamị mẹ nịnị.

⁴⁰ Ẹmị vị anaā kà a wụ nịnị ịsa oni Ohomorihi kà mị; ama wee sì ka wa wụ̀ mị nịnị. Abụrahamị ọ yị vavọọ mẹ.

⁴¹ Ịsị ada awụ nịnịị̄ mẹ, ụ waa mẹ nịnị nị.” Dị ẹnịnị rẹ ka, “Yẹ yị vị ozi ọta, Ohomorihi ọnịnya ọ vị Ada ọnị ị nyị nị.”

⁴² Dị Ijeesu kà a yị wa ka, “Àa vị Ohomorihi ọ yaanị vị Ada awụ nịnị nị, ụ yaanị sì ịrẹyị amị nịnị, agụvị ka ịdị Ohomorihi mị hụrẹ vẹ ịzẹnị nị. Ẹ yị vị ẹmị ụvọta ọ tụ́ ẹngụ amị vẹ; ọnị ọ tụ́ mị vẹ ẹhẹ nị.

⁴³ Wáá yẹ ịsị ẹ vẹ dị ụ wẹ̀ yị yẹ ịrẹyị amị nịnị? Ịsị ẹ vẹ ọ vị ka wẹ yị dọ ka wa wụ́ ịrẹyị amị nịnị.

⁴⁴ Ezi ada awụ nịnị ụ vị nịnị nị; ada awụ nịnị ọnọọ ọ vị Echu nị. Ịsa ana ada awụ nịnịị̄ sì kẹnẹ, ụ waa mẹ nịnị nị. Ọwọza ọ vị hụrẹ ụmọrụmọ nị. Ọ mā rẹ saasa ịzẹyịza, agụvị ka ẹ yị nyị ịzẹyịza ikonya ịnịnẹ anị. Èe cheeche, ebira anị aa mẹ avọọ nị, agụvị ka onireche ọ vị nị. Ọnị nyẹmba ọ vị ada ireche nị.

⁴⁵ Ẹmị vị anaā kà ịzẹyịza wụ nịnị, agụvị avọọ ụ wẹ̀ yị dọ mị wụ́ nị.

⁴⁶ Ẹnẹ zụ sị zụ̀ ịnị awụ nịnị ka mâ mẹ ịvị da? Ịrẹyị ẹnẹ ẹmị aa kà vị ịzẹyịza, sị ẹ vavẹ dị ụ wẹ̀ yị dọ mị wụ́ nịnị?

⁴⁷ Ọza ana àa vị ozi Ohomorihi vị anaā wụ́ ịrẹyị Ohomorihi; ama ẹwụ nịnị ọ mā wụ́ ịrẹyị Ohomorihi, agụvị ka ẹ yị vị ezi Ohomorihi ụ vị nịnị.”

Ijeesu ọnịrị Abụrahamị

⁴⁸ Dị Aniju nịnị tụ́ Ijeesu ohi, dị ẹ ka, “Aanịka yẹ yị vịdị yị kà a ka Anịsamarịya ụ vị nị, ka wâ nyị ụhwẹ echu?”

⁴⁹ Dị Ijeesu tụ́ ohi, dị ọ ka, “Mẹ yị nyị ụhwẹ echu, ama maa sị ụbanyịị yị Ada amị, dị ẹwụ nịnị ọ̀ yị sị ụbanyị mị nị.

⁵⁰ Ẹ yị vị ụbanyị ẹngụ amị m mee sì. Â nyị ọza enee si ụbanyịị yị mị, ọnị ọ rẹ vị ọmọkarẹyị nị.

⁵¹ Ịzẹyịza m maa kà a wụ nịnị nị, ọza ana àa sị ụvọ za ịrẹyị amị, o yi kuku vee sú paa.”

⁵² Dị Aniju nịnị tụ́ ọọ ohi, dị ẹ ka, “Ya sị yẹ ka wâ nyị ụhwẹ echu. Abụrahamị ô wusu, ọnịsẹ nịnị ẹnị e re wusu; dị ẹwụ kụkụ va ka ọza ana àa sị ụvọ za ịrẹyị awụ, oyi kuku vee sú paa!

⁵³ Ewéé kuku ve huna Abụrahamị ada ayị, ene sú nị? Ọnịsẹ nịnị ẹnị e re wusu. Sị ụ vị ana sị ẹngụ awụ hị́ ka wáa vị?”

⁵⁴ Dị Ijeesu ka, “Àa vị ẹmị ụvọta aa sị ụbanyịị yị ẹngụ amị nị, ẹngụ ụbanyị ọnọọ vị ịyẹyẹ. Ada amị aa sị ụbanyịị yị mị nị. Ada amị ọnọọ ụ ka ộ vị Ohomorihi awụ nịnị nị.

⁵⁵ Ama wẹ yị yẹ ẹ nịnị, ẹmị â yẹ ẹ. Màa na kà a ka mẹ yị yẹ ẹ, ẹmị rẹ sị vị onireche anka ẹwụ nịnị. Ama ẹmị â yẹ ẹ, ma rẹ sị ụvọ za ịrẹyị anị.

⁵⁶ Abụrahamị ada awụ nịnị ọnị ộ jẹ ịrajẹ ka oni vee re ụmẹ amị. Ịzẹyịza ô re e, ịnẹ anị ô hine.”

⁵⁷ Dị Aniju nịnị kà a yọ ka, “Wẹẹ̀ yị va gụ ịrayị ẹvarẹwụ, dị ụ ka wê re Abụrahamị?”

⁵⁸ Dị Ijeesu kà a yị wa ka, “Ịzẹyịza m maa kà a wụ nịnị nị, dị a va yẹ ka aa ma Abụrahamị, mị hụrẹ yà ịzọọ nị.”

⁵⁹ Dị ẹ kụ́ ụvọ kụ́ ịrẹta, ka eni è ne e hi Ijeesu nị, ama dị Ijeesu sị ẹngụ anị tẹ yị wa, di o hụụnị irehi Ohomorihi nị.