Ịjọọnụ 3 - IWE ỌNỊNỊ

Ijeesu ọnịrị Inikodemọsị

¹ Â nyị Anihwarisi ọnya aanị, ana aā hị́ Inikodemọsị. Ọdọvịdị Aniju nịnị nị ọ́nị rẹ vị.

² Ịrahụ ẹkụhị ọnya dị ọ vẹ ịdị Ijeesu nị. Dị ọ va kà a yị Ijeesu ka, “Ọga, yâ yẹ ka ọzwọzịsa oni Ohomorihi tụ́ vẹ ẹhẹ ọnọnị ụ vị nị. Ẹ yị nyị ọza ịnya ana zụ mẹ ẹngụ apọtẹrẹwa ọnị ụ waa mẹ aanị, ẹ̀ yị vị ka vị Ohomorihi yà beri ọ nị.”

³ Dị Ijeesu tụ́ ọ ohi, dị ọ ka, “Dị ma kà ịrẹyị ịzẹyịza wụ: ẹ yị nyị ọza ana nyẹngụ ngụ ịzị Ohomorihi yà aa mẹ ịjọva, ẹ̀ yị vị e tenyi ọọ ma.”

⁴ Di Inikodemọsị tụ́ ohi, dị ọ ka, “Ọza ọ̀ọ sị vị ọzọkụ, a mẹmẹ re kuku zụ tenyi ọọ ma? Vị ọ́ọ́ vị ana zụ ngụ ịnị ịnẹ ọnyị anị, di è re tenyi ọ ma nị?”

⁵ Dị Ijeesu rẹ ka, “Dị ma kà ịrẹyị ịzẹyịza yị wụ, ẹ yị nyị ọza ana zụ ngụ ịzị Ohomorihi yà aa mẹ ịjọva, ẹ̀ yị vị a sị enyi ọnịrị Ụhwẹ Ọnịnị tenyi ọọ ma.

⁶ Ọza ọnị ọza kẹnẹ ma, rẹ vị ọza kẹnẹ; ama ọza ọnị Ụhwẹ Ọnịnị ọ̀ọ ma, ọza Ụhwẹ Ọnịnị ọ́za ọnọọ vị nị.

⁷ Asị o hí wu irenu ka mâ kà a wụ ka: ‘Â nyị ka è tenyi wu nịnị ma’!

⁸ Ahị vị ana aa tụ́ nọ ịzị èe zé e eyi kẹnẹ. Waa wụ́ ọọ ịrẹyị, ama wẹ yị yẹ ịzị ọ hụrẹ aa vẹ, wẹ yị rẹ yẹ ịzị aa nọ. Avọọ gẹdẹ-gẹdẹ ọ mẹ̀ rẹ yà yị ọza ọnị Ụhwẹ Ọnịnị sị ma nị.”

⁹ Di Inikodemọsị re tụ́ ohi, dị ọ ka, “Ị́sa ẹnẹnị mẹmẹ zụ mẹ mẹ?”

¹⁰ Di Ijeesu tụ́ o ohi, dị ọ ka, “Áa vị ọzwọzịsa ẹwụ vị ini Anisirẹrị nịnị, dị ụ wẹ̀ yị yẹ ịsa ẹnẹnị nịị?

¹¹ Dị ma kà ịzẹyịza wụ, ịsa ọnị ị yẹ, ị yaa kà nị, dị ị raa dọ ivenu tụ́ ịnị ịsa oni i si re nị. Ama we yi sì ka wa dọ ịrẹyị ayị nịnị.

¹² Màaa kà ịrẹyị ịsa ẹhẹ ọnọnịị yị wụ, dị ụ wẹ̀ yị dọ wụ́ nị; màa kụkụ va kà ịrẹyị ịsa ẹbẹẹba zụ̀ wụ, ụ mẹmẹ vaa dọ ọ wụ́?

¹³ Ẹẹ̀ yị nyị ọza ana hịrẹ nọ ịdị Ohomorihi da, ẹ̀ yị rẹ vị ẹmị Ozi ọza onigirima kẹnẹ ana hụrẹ ẹbẹẹba ịzọọ chí vẹ.

¹⁴ A vaa nyị ka à sị ẹmị Ozi ọza onigirimaa tụ́ ẹba, anka Ímosiisi mẹ̀ sị ẹwụ tụ́ ẹba ịnị ụnọmị ịyẹẹyẹ avọọ,

¹⁵ agụvị aza ana àa sị ayị tụra mị, asị e kuku vu ẹtẹ, ama dị ẹ̀ zụ yára ị́dị Ohomorihi pooro zịna-zịna.”

¹⁶ Ohomorihi ộ vavọọ sì ịrẹyị anẹhẹ pooro, ne tù ka ộ sị Ozi anị ikonya gene-gene yị anẹhẹ; ka ọza tụra ọza ana àa sị ayị tụra a, asị o kuku vu ẹtẹ, ama dị ọ̀ zụ yára ị́da Ohomorihi pooro zịna-zịna.

¹⁷ Ẹ yị vị Ohomorihi tụ́ Ozi anị vẹ ẹhẹ ka ọ̀ va jị ịvị yị anẹhẹ. Vị ọ ka ọ̀ va dọ anẹhẹ há nị.

¹⁸ Ọza ana àa sị ayị tụra Ozi anị ọnọọ, Ohomorihi ọ yị kụkụ vaa jị ịvịị yọ; ama ọza ẹnẹ ẹ̀ yị sị ayị tụra a, ọ sị ịvị jịị yọ da, agụvị ka ọ yị sị ayị tụra Ozi Ohomorihi ikonya gene-gene.

¹⁹ Ịvị ana aza ẹnẹẹ rị, yị: Ka ẹtohweyi ộ vẹ ịnị ẹhẹ, ama aza ê sì ịrẹyị ịrahụ huna ẹtohweyi, agụvị ka ịsa odivi ẹ́ yaa mẹ nị.

²⁰ Ọza anaā mẹ̀ ịsa odivi, o mē sì ịrẹyị ẹtohweyi, ọ mā rẹ vẹ ịnị anị, agụvị ka e ve re ịsa odivi ana aa mẹ.

²¹ Ama ọza anaā mẹ ịzẹyịza, ọnịị̄ vẹ ini ẹtohweyi, agụvị ka ee sì ka avaba ọzọza ò re e ka Ohomorihi aa mẹ ka ọnị ọ̀ọ mẹ̀ ịsa ẹnẹẹ nị.

Ijeesu ọnịrị Ịjọọnụ ọhwọzenyi

²² Ẹkụhị ọnya Ijeesu ọnịrị ezirẹma anị ệ zị nọ ịnị ẹtẹ Ijudiya. Ijeesu ộ yà ịzọọ dị aa mẹ ọyịhwenyii yị aza nị.

²³ Dị Ịjọọnụ yà ẹkụra ana aā hị́ Enoni, ọgụrị ịzị aā hị́ Isarimi nị. Enyi ộ rụrụ tụ́ ịzọọ, dị aza ve tù Ịjọọnụ ịzọọ, dị ọ mẹ̀ ọyịhwọzenyi yị wa nị.

²⁴ Ọza ọọ̀ yị za Ịjọọnụ tụ́ ịnị ẹngwa ịnị ụmẹ ọnọọ.

²⁵ Ụmẹ ọnya, dị ezirẹma Ịjọọnụ ọnịrị Aniju ọnya aa nyị ahankata ịrẹyị ẹngụ ọyịnyịna nị.

²⁶ Di e ve tù Ịjọọnụ, dị ẹ ka, “Ọga, re, ọza ene ve tù wu ákẹnẹ Ijodani ịhị ọnọọ ọnị ụ dọ ivenu ịrẹyị anị avọọ, ọnị raa mẹ ọyịhwenyii yị aza; dị avaba aza aa nọ ịdị anị nị.”

²⁷ Dị Ịjọọnụ tụ́ wa ohi, dị ọ ka, “Ẹ yị nyị ịsị ọza nyẹngụ nyị, ẹ̀ yị vị Ohomorihi ọ̀ọ sị yọ.

²⁸ Ẹwụ nịnị ụvọta vị onivenu amị ka mâ kà a ka ẹ yị vị ẹma vị Ikirisiti ọnọọ; vị a tụ́ mị dọ ọvịdị anị kẹnẹ nị.

²⁹ Ọza ana aa nyị ọnẹẹ, ọ nyị ose anị nị. Ọta anị ana jẹẹ pe e dị aa wụ́ ọngwẹ anị, ọọ̄ jẹ ẹtẹẹtẹrẹ, ọ̀ọ wụ́ ọngwẹ ọva ọnẹẹ. Avọọ m mẹ̀ yà nị, ayị amị o si hine saka-saka.

³⁰ Â nyị ka ọnị ọ̀ọ nyị ụbanyịị hu avọọ, dị ẹmị èe weyii hu avọọ.”

Ijeesu ọ hụrẹ ẹbẹẹba vẹ ẹhẹ nị.

³¹ “Ọza ana hụrẹ ẹbẹẹba vẹ, o huna avaba aza nị. Ọza ana hụrẹ ẹhẹ vẹ, anẹhẹ kẹnẹ ọ vị nị; vị ọ rẹ vaa kà ịrẹyị anka anẹhẹ avọọ nị. Ọza ana hụrẹ ẹbẹẹva vẹ, o huna avaba aza nị.

³² Ịrẹyị ọnị ọza ọnọọ re, dị ọ rẹ wụ́, ọ va dọ ivenu tụ́ nị, ama ẹ yị nyị ọza ana va dọ ịrẹyị anị.

³³ Ọza ana àa dọ ịrẹyị anị ộ sị ụvọ tụ́ ọọ ka Ohomorihi vị ọnịzẹyịza.

³⁴ Ọza oni Ohomorihi tụ́ vẹ ẹhẹ, vị ana aa kà ịrẹyị Ohomorihi, agụvị ka Ohomorihi ọ́ sị Ụhwẹ Ọnịnịị yọ ẹtẹẹtẹrẹ.

³⁵ Ohomorihi Ada ayị ô sì ịrẹyị Ozi anị, dị ọ rẹ sị avaba ịsavị-ịsavị chire e ụvọ nị.

³⁶ Ọza ana àa sị ayị tụra Ozi Ohomorihi ọnọọ, ộ yàra pooro zịna-zịna. Ama ọza ana àa mẹ akamawụ hi Ozi Ohomorihi ọnọọ, ọ yị vaa yàra pooro zịna-zịna.”