Ijeremaya 49 - IWE ỌNỊNỊ

Ịrẹyị Amọnị.

¹ Â nyị ẹkụra ana aā hị́ Amọnị. Ịrẹyị anẹkụra ọnọọ ọnị Ẹnẹyịmavara kà yị. Ẹnẹyịmavara kà, ịzị Anisirẹrị nịnị hi? Aanị ka ẹ́ yị nyị ọza ana vọrọ ka óó sere ẹtẹ Isirẹrị? Sị ẹ vẹ dị ẹ navọ ka aza anaa mẹ ori ana aā hị́ Imorẹkị ẹ̀ va ra ịnị ẹtẹ ịrẹsụ ana aā hị́ Igadi?

² Ọ kà ụmẹ aa vẹ, ọnị ọnị vee nowu ịrẹkụ, dị ọnị mẹ ka aza ana ra ẹtẹ Ịraba ẹ̀ wụ ọ. A vaa jị ọ eburu, dị aa rị ẹkụra eweyi-eweyi ana kara a ịra zẹtẹ. Ịjọnọọ, Anisirẹrị nịnị vaa dọ ẹtẹ ẹnịnị varẹma hụụnị ụvọ aza ana dọ wa ẹtẹ.

³ Ẹwụ nịnị Anihesiboni, wa jị òrèrè boro-boro nịnị! Asị ẹkụra ana aā hị́ Ayị vú ẹtẹ o! Ẹwụ nịnị ana ra hi Ịraba, waa jị òrèrè boro-boro nịnị. Waa zị ẹngụ nịnị di wa kụ́ ịta suku-suku hi ẹngụ nịnị. We zwèe zịịzị nịnị agụvị ka wẹ yị yẹ ịsị aa mẹ nịnị. A vaa sị ori awụ nịnị Imorẹkị beri ohirẹsụ irehi anị, ori ẹnị ọdọvịdị anị naa tụ ẹkụra ọsa.

⁴ Sị ẹ vẹ dị ẹwụ nịnị ẹnẹ ẹ̀ yị nyị ịzẹyịza aanị ee wo oto kẹ? Waa sị ayị tụra ogu awụ nịnị di wee wo nịnị ka ẹ́ yị nyị ọza ana zụ kwẹẹtẹ tu wu nịnị nị.

⁵ Ẹnẹyịmavara kà, re, ọnị vaa kụ ayịhụrịnẹ tu wu nịnị hụrị eyi ẹnyị eyi ọsa. Avaba awụ nịnị vee zwè, ọzọza vee zwè agụvị ẹhẹ anị. Ẹ́ yị vaa nyị ọza ana vaa kụ aza awụ nịnị ene zwè na tẹ̀ẹ gụ.

⁶ Ama Ẹnẹyịmavara kà, ọ̀ vavẹ ịrẹma anị, ọnị vanaa mẹ ka ò zee yị Anaamọnị nịnị.

Ẹkụra ana aā hị́ Edomi.

⁷ Â nyị anẹkụra ana aā hị́ Edomi. Ịrẹyị ẹnịnị ọnị Ẹnẹyịmavara Ochẹtẹẹngụ ka yị. Ọ kà, Aanịka vị Anedomi nịnị ẹ̀ yị vị ana kụkụ nyị ịrẹyọyẹ vụrụ-vụrụ nị? Aanịka ẹ́ yị kụkụ nyị ọza ana zụ pe wa juwe ịsa vọrọ ka ẹ̀ mẹ da? Vị́ ịrẹyọyẹ wa vana tá hụụ ịzọọ nị?

⁸ Ẹnẹyịmavara kà, ẹwụ nịnị Anidedani, vareyi wee zwè, dị wa ne tẹ̀ nịnị, ka ụmẹ o si tu ka ọnị ọ̀ sị ụya rị evere Iisọ, ọnị vee vụ wa ẹtẹ.

⁹ Aza aa há ẹtụtụ ọchị ana aā hị́ ịvayịnị, ẹẹ̄ vọọ tịtẹ ịnị anị. Oyi nịnị ẹ̀ẹ ngụ ọza irehi ịrahụ, ịsị eyee sì kẹnẹ ẹnịnịị̄ sị́ị nị.

¹⁰ Ẹnẹyịmavara kà, ama, ọnị ọ sị evere Iisọ tụ ahwaahụ saka-saka, ẹnịnị ẹ yị kụkụ zụ tẹ. A sị avaba Anedomi vú ẹtẹ, ọza ịnyara ẹ́ yị vẹtẹ ịnị ẹnịnị.

¹¹ Ọ kà wa navọ ezi-oku awụ nịnị hi ẹtẹ yị ọnị ka ọnị vaa sị eyi pe wa. Ese oku awụ nịnị ẹ̀ sị ayị tụra ọnị.

¹² Ẹnẹyịmavara kà, aza ẹnẹ ẹ̀ yị vọrọ ka ẹ̀ rị ụya ọnọnị eyee hú enyi hụụnị ako ụyọrị ọnọnị, ví u wéé ro nịnị ka ẹwụ nịnị vaa haa hụụnị anị nịnị nị? Éyiye de. Ẹ́ yị zụ nyị ka wẹ yị rị ụya nịnị.

¹³ Ọ kà ọnị ụvọta o sị eku hị́ ka, ẹkụra ana aā hị́ Ibozira vaa jị eburu, di aza ee re e dị ayị aa hụrẹ wa ịnẹ. Aza vị anaa vanaa mẹ̀ ẹ isiya, dị ẹyaa sị ịrẹha anịị chìi hi aza. Avaba ẹkụra eweyi-eweyi ana kara a vị ana vaa jị eburu pooro.

¹⁴ Ijeremaya ka, ẹwụ nịnị Anedomi, ọnị ộ dọ ụtụ ọnị Ẹnẹyịmavara tụ́. Ọ raa tu ọza ka ọ̀ na kà a yị anẹkụra ẹ̀ kụ ọkụrẹkụ (isoja) ẹnịnị gụ, dị è tenyi ẹngụ di e vee pe wu nịnị kụ̀ ịrẹkụ.

¹⁵ Ẹnẹyịmavara vaa tụ́ wụ nịnị ọkụmị, di aza ẹ́ yị kụkụ sị ụbanyị yị wụ nịnị.

¹⁶ Ẹngụ awụ nịnị ọnị waa sịị tụ ẹba, ọ sị wụ nịnị vene. Ẹ yị nyị ọza ene kuku è hí angwa awụ nịnị anka ụ me rò o nịnị. Waa na ra ịnị anaha ịrẹta nịnị, ịrẹsụ ataba. Ama Ẹnẹyịmavara kà, wàa daka na ra ẹbẹẹba huu anka inomi ana aā hị́ ọkasịmẹ avọọ, ọnị vee tura wụ nịnị hụụ ịzọọ vaa nyẹtẹ nị.

¹⁷ Ẹnẹyịmavara kà e vee vú Edomi ẹtẹ divi-divi ana ahịka avaba aza anaa parahu dị e re e nị, ọ vaa za waa zizi, dị angwa ee hí wa.

¹⁸ Ọ kà, é me vú ẹkụra Isodọmị ọnịrị Igomora ẹtẹ beri ẹkụra-ẹkụra ana kara wa avọọ, avọọ a mẹ vee vu Edomi ẹtẹ nị. Ẹ́ ma vana nyị ọza ana vaa ra ịzọọ.

¹⁹ Ẹnẹyịmavara kà, ọnị vaa vẹ anka idu ana tụ hụụnị iruku aa vẹ, dị ọ́ và tụra oze Ijodani aa vaa ngụ ịzị avị Anedomi nịnị hụrị ẹkụra ẹnịnị. Ịjọnọọ, dị ọza ọnị ọnị nyị ka ọ̀ vị ọdọvịdị kụkụ aa mẹ ohinọyị tụra ẹkụra ọnọọ. Ọ kà, ẹnẹ vana wụra juwe anị da? Ẹnẹ vana zụ hị́ ọnị ịrẹvụ kẹ? Ye re ohinọyị ana zụ hị́ ọnị ịrẹkụ da?

²⁰ Ọ kà, agụvị avọọ, wụ ịsị ọnị rò ka ọnị vaa mẹ Anedomi nịnị ọnịrị Anẹkụra ana aā hị́ Itemani nịnị. Ezweyi ẹnịnị vị ana vaa kụụ hara ẹtẹ nee hu, dị angwa ee hí avaba aza.

²¹ Ịhị aza ẹẹ wụ ọ ka Anedomi nịnị ẹ sị sẹ dụ, ọ vaa za avaba ẹhẹ zizi. E vee nowu dị aa wụ́ ọ huu na ngụ ịnị oku enee ví.

²² Ọnịvị Anibozira vaa kwẹẹtẹ tu ọ anka ukokoro mẹẹ gana avaka chii vẹ vee che ịsa obonobono avọọ. Ịhị ọnọọ angwa vee hí isoja Anedomi nịnị anka ọnyẹnẹẹ anaa barẹẹ avọọ.

Ẹkụra ana aā hị́ Ịdamasịkọsị

²³ Â nyị ẹkụra ana aā hị́ Ịdamasịkọsị. Ịrẹyị anị ọnị Ẹnẹyịmavara kà yị: Ọ kà, Anẹkụra ana aā hị́ Ihamati ọnịrị Aripadi nịnị aa hụrẹ ayịnẹ, ẹngụkata ô tu wa agụvị ka ẹnịnị ệ wụ enube ịrẹyị odivi. Ayịhụrịnẹ ọ sị wa vazi anka enyi ịnị oku avọọ, ẹnịnị ẹ́ yị zụ tụhwọ.

²⁴ Anịdamasịkọsị nịnị ẹ raa tụ ọkụmị, ẹnịnị ẹ sị zwe ayị maa hụrẹ wa ịnẹ. Ẹngụkata ô tù wa, ẹ sị mẹ suku-suku anka ọnyẹnẹẹ anaa barẹẹ avọọ.

²⁵ Aza ẹ sị hụ hụrẹ ẹkụra ana maanị ngụ ịrẹyị dị ẹ jẹ ịrajẹ pooro kene.

²⁶ Ịzẹyịza, ezwọọmụha ẹnịnị vị ana vaa wụ̀ vàa hi ẹtẹ oze ene hi ẹkụra, dị e vú avaba isoja ẹnịnị ẹtẹ.

²⁷ Ẹnẹyịmavara Ochẹtẹẹngụ ka ọnị vaa jị ịra da avaba irehi ene hi Ịdamasịkọsị. Irehi ohinọyị Ịbẹnịhadadị ịzị isoja nịnị yaa sere ẹtẹ vị ọnị ọnị vaa rị ịra bẹẹ.

Ẹkụra ana aā hị́ Ịkẹda ọnịrị Ịhazọ.

²⁸ Â rẹ nyị ẹkụra ana aā hị́ Ịkẹda ọnịrị Ịhazọ ọnị Inebukadineza, ohinọyị Ịbabịrọnị kwẹẹtẹ tu. Ịrẹyị ẹnịnị ọnị Ẹnẹyịmavara kà yị: Ọ kà, kwẹẹtẹ tu Anikeda nịnị, dị we vu avaba anẹkụra ene hi eyi ọnị ọyịị̄ hụrẹẹ vẹ ẹtẹ.

²⁹ Ọ kà, à dọ wa ajẹngụ ẹnịnị ọnịrị ịsụpa ẹnịnị. À dọ wa avaba ịta ẹnẹ ẹ sị jị ajẹngụ ẹnịnị ọnịrị avaba ịsị ẹ nyị hi ịnị ajẹngụ ẹnịnị. Ọ kà, à dọ wa ịnyaakụmị ẹnịnị, dị à kà a yị wa ayịhụrịnẹ oo tu wa zị ụvọnị-ụvọnị.

³⁰ Ẹnẹyịmavara kà, ẹwụ nịnị Anịhazọ, ọnị aa kà wụ nịnị ọ̀nọ̀ ka we zwe dị wa na tẹ̀ nịnị. Inebukadineza, ohinọyị Ịbabịrọnị o sị eyi awụ nịnị gẹ.

³¹ Ẹnẹyịmavara kà, ọ̀ ka, à kwẹẹtẹ dị ẹnị ẹ̀ kụ́ ịrẹkụ ne tu anẹkụra ana va ẹngụ hi ẹtẹ ka ẹ yị nyị ịsị ẹ vaa mẹ aanị. Ẹkụra ẹnịnị ẹ yị nyị oze ọbanyị, ẹ yị nyị ịsị a zụ sị chire e. Ẹnịnị ẹ yị nyị ịsị e sere wa vụrụ-vụrụ.

³² Ọ kà, à dọ wa ịnyaakụmị ẹnịnị ọnịrị avaba ịsụpa ẹnịnị. Ọ kà avaba aza ana nyị ẹyị ọgọdọ ẹ na dà a ụtụụtọ dị ò weyi; vị ọnị vaa gara wa hi zi oze irenyi-irenyi nị. Ọnị vaa zị avaba oze kụ ẹngụkataa tụ̀ wa.

³³ Ẹnẹyịmavara kà, Ịhazọ vị ọnị ọnị vaa tụ osusu paa dị ahịka irezi ịnị avị ẹ vanaa ra ịzọọ ọnị. Ẹ́ ma vana nyị ọza anaa vanaa ra ịzọọ.

Ẹkụraa ana aā hị́ Erami.

³⁴ Â rẹ nyị ẹkụra ana aā hị́ Erami. Cheechee ọnị Ịzẹdẹkaya rị ohinọyị Ijuda, Ẹ́nẹyịmavara maanị ka ịrẹyị Erami ọnọnị yị Ijeremaya nị.

³⁵ Ọ kà, ọnị vaa wụ̀ avaba aza anaa sị ọkịtaa kụ̀ ịrẹkụ ana mẹ ka Anerami nịnị ẹ̀ vavọọ kata avọọ.

³⁶ Ọ kà ọnị vaa tụ́ ahị hụrị oze ẹyịna ẹbẹẹba a ku Anerami nịnị, dị ọnị gara wa hi avaba aha. Ẹ́ yị vaa nyị ẹkụra ọnị aza ana a du hụrị Erami è yi vee zwè naa ngụ.

³⁷ Ọ kà, ọnị vaa mẹ ka Anerami ee hí angwa ọnịvị ẹnịnị enee sì wa isu. Ayị anaa kụ ọnị, ọnị vaa kụ ẹngụkata tu Anerami, dị ọnị tụ isoja ịrẹyị tu wa nee tu ọnị ọ sị wa vú ẹtẹ kwooze.

³⁸ Ẹnẹyịmavara kà, ọnị vaa sị aga ohinọyị anịị yaatụ ẹtẹ Erami, dị ọnị vú ohinọyị ẹnịnị ọnịrị ẹnị ọdọvịdị ẹnịnị ẹtẹ.

³⁹ Ọ kà, ama ụmẹ aa vẹ, ọnị ọnị rẹ vana mẹ ka oo zee yị Erami.