Ẹzịra 7 - IWE ỌNỊNỊ

Ẹzịra ộ vẹ Ijerusarẹmị

¹ Ịrẹma ịsa ẹnẹnị, ọnọrụ ọnya ana a hị́ Atazazasisi va vị ohinọyị Ipesiya nị. Ịnị ụmẹ anị Ẹzịra hụrẹ Ịbabịrọnị vẹ Ijerusarẹmị nị. Ẹzịra ọnọnị vị ozi Iseraya ọnị ada anị vị Azarịya, ozi Ihirikaya,

² ozi Isarumi, ozi Ịzadọkị, ozi Ahitubi,

³ ozi Amarịya, ozi Azariya, ozi Imerayoti,

⁴ ozi Izerahiya, ozi Uzi, ozi Ibuki,

⁵ ozi Abisuwa, ozi Ihwinehasi, ozi Eriyaza, ozi Eerọnị ohirẹsụ ọbanyị irehi Ohomorihi.

⁶ Ẹzịra vị ọka ana zụ ọza ọda ọnị Ẹnẹyịmavara Ohomorihi Anisirẹrị sị yị Imosiisi. Ẹnẹyịmavara ọ mẹ ka ohinọyị o sì ịrẹyị Ẹzịra, dị ọ sị ịsa tụra ịsa ọnị Ẹzịra họ̀ use anị yị ọ nị.

⁷ Ịnị ịrayị ana tu ọ ịrayị, ịhịmba ọnị Atazazasisi sị rị ohinọyị, Aniju ẹnyị ẹnịrị ohirẹsụ irehi Ohomorihi nịnị, Anireevi nịnị, ọjahẹ nịnị, neberi oserẹtẹ ịnị irehi Ohomorihi nịnị sị wara saasa Ẹzịra vẹ Ijerusarẹmị nị.

⁸ Ẹzịra ọ ngụ Ijerusarẹmị ịnị ụhwẹ ọhụhị ịrayị ịhịmba ọnị Atazazasisi sị rị ohinọyị.

⁹ Ộ kwẹẹtẹ hụrẹ Ịbabịrọnị ịnị ẹkụhị ịpaapa ịnị ụhwẹ ịpaapa ịrayị, dị Ohomorihi gụ ọ ụvọ, dị ọ na ngụ Ijerusarẹmị ịnị ẹkụhị ịpaapa ịnị ụhwẹ ọhụhị nị.

¹⁰ Ẹzịra vị ana sị avaba ẹngụ anị yị ọyịkọsẹ ọda Ẹnẹyịmavara, dị a saasa a, dị ọ raa sị ọ zụ aza ana vọ nị.

Atazazasisi ộ sị iwe yị Ẹzịra

¹¹ Ẹzịra vị ohirẹsụ ọbanyị irehi Ohomorihi, dị ọ vị ọka ịnị ịrẹyị ọda ọnị Ẹnẹyịmavara sị yị Anisirẹrị nị. Ẹkụhị ọnya, Atazazasisi ohinọyị chẹrẹ iwe tụ hi ọ nị. Dị ọ ka,

¹² Tangwa o Ẹzịra, ohirẹsụ irehi Ohomorihi, ọka ana zụ ọza ịrẹyị Ohomorihi ana nyị ẹbẹẹba.

¹³ Ọ kà, ọnị ọ sị oze yị Anisirẹrị ọnyọọnyị, ọ daka vị ohirẹsụ irehi Ohomorihi, ọ vị Anireevi nịnị ene e si ka ọnị ọ̀ saasa a nọ Ijerusarẹmị,

¹⁴ Ohinọyị ọnịrị anajuwe anị ịhịmba ka Ẹzịra ọ nọ Ijerusarẹmị ọnịrị Ijuda nee re aza ene hi ịzọọ àa saasa ọda Ohomorihi ana a sị chire ụvọ.

¹⁵ Dị ọ ka ọnịrị Anajuwe anị ẹ sị igooru ọnịrị isiriva yị Ohomorihi Anisirẹrị ọnị irehi anị ya Ijerusarẹmị.

¹⁶ Dị ọ ka Ẹzịra ọ kụ avaba isiriva (ẹkẹhị) ọnịrị Igooru ọnị oo re ẹtẹ Ịbabịrọnị neberi ẹyịza ọnị ọ dọ huu nị ụvọ aza ọnịrị ohirẹsụ irehi Ohomorihi nịnị. Ẹzịra ọ kụ wa na mẹ̀ ụkọrọ irehi Ohomorihi ana ya Ijerusarẹmị.

¹⁷ Dị ọ ka ọ̀ tangwa sịị ẹkẹhị ọnọọ hị́ imaaru, ịdẹba, atẹmẹ ịsọyịrị ọnịrị eche ọyị sị mẹ̀ ịsọvọ ịrẹsụ ụta Ohomorihi ịnị irehi anị Ijerusarẹmị.

¹⁸ Dị ọ sị ẹkẹhị ana vọ mẹ̀ ịsa ana ngụ Ohomorihi eyi.

¹⁹ Ọ kụ avaba ẹnya ana a kụ vẹ ka a sị mẹ̀ ụkọrọ ini irehi Ohomorihi vẹ ọvịdị Ohomorihi.

²⁰ Dị ọ ka, àa nyị ịsa ọnị ee si agụvị ụkọrọ irehi Ohomorihi, ọ na dọ ọ hụụ ịzị aā kụ ẹnya tẹ̀ ịdị Ohinọyị nị.

²¹ Dị Atazazasisi mẹ ọda ka avaba aza anaā sịị ẹkẹhị ịjọvaa tẹ nịnị ene hi akẹnẹ irehu Iyuhwuretisi ẹ̀ sị ịsị ọnị Ẹzịra ọ̀ọ họ̀ use anịị yị ọ nị.

²² Dị ọ rẹ sị oze yị wa ka ẹ̀ dọ isiriva ịka akahị-akahị oze ịhịmba tụra akavarẹchẹhị (7,500); ihwiti orogo akavarẹchẹhị (500), eche ịgarụwa akavarẹchẹhị tụra ẹvarẹwụ ọ tụra ẹẹhị ọnịrị angwẹ orivi ịka akavarẹchẹhị tụra ẹvarẹwụ, beri anọ ọnị ẹnịnị èe yee sì.

²³ Dị ọ ka ịsa tụra ịsa oni Ohomorihi ana nyị ẹbẹẹba èee si ịnị irehi anị, à sị yị ọ agụvị asị ọ kụ ayị hị́ ọnị avị ezi ịrẹma anị.

²⁴ Dị ohinọyị kà a yị ọ ka, asị a nyị ụmẹ ọnị ohirẹsụ irehi Ohomorihi, Anireevi, ọjahẹ nịnị, oserẹtẹ, ọnịrị Anụkọrọ irehi Ohomorihi sị su ụta ẹkẹhị irehi.

²⁵ Dị Atazazasisi rẹ ka, “Ẹzịra ọ sị ịrẹyọyẹ ọnị Ohomorihi sị yị ọ nyị ọdọvịdị ọnụkọrọ ana vaa mẹ ịjọva ẹtẹ ọnọọ nị. Dị aza ẹnẹẹ ẹ̀ vị aza ana yẹ ọda Ohomorihi dị ẹ zụ zụ ọ yị aza ana vọ.

²⁶ Ọ kà à sị ụya rị ọza tụra ọza ana àa mẹ akamawụ hi ịrẹyị Ẹnẹyịmavara ọnịrị ọda ohinọyị. À wụ̀ wa, ẹ̀ yị vị avọọ à dụ wa hụụnị ẹkụra, àa vị ka à dọ wa ogu ẹnịnị, ẹ̀ yị vị avọọ à jị wa ẹngwa.”

²⁷ Dị Ẹzịra ka, ọnị ộ sị ụga yị Ẹnẹyịmavara, Ohomorihi ohiku ẹnịnị ana mẹ ka ohinọyị ọ̀ maanị sị ụbanyị yị irehi Ẹnẹyịmavara Ohomorihi ana ya Ijerusarẹmị nị.

²⁸ Ọ kà, Ẹnẹyịmavara, Ohomorihi ọ raa gu ọnị ụvọ, dị ọ mẹ ka Ohinọyị ọnịrị Anajuwe anị nịnị ẹ̀ ngụ ayị anị nị. Ộ mẹ ka ọnị ọ̀ kụ ọrụrụ-ọrụrụ ọdọvịdị Aniju nịnị vavẹ Ijerusarẹmị.