Ezikẹẹrị 20 - IWE ỌNỊNỊ

Ebira odivi ọrụrụ-ọrụrụ ọnị Anisirẹrị nịnị mẹ

¹ Ezikẹẹrị ka, ịhị ẹ tụ ọ ẹkụhị ẹẹwụ ịnị ụhwẹ ẹẹhị, ịnị ịrayị ọhụhịmba ana a kụ ẹnị ve hi Ịbabịrọnị, ọdọvịdị Anisirẹrị nịnị ẹnyị ệ kụ ẹngụ ve tu ọnị. Ẹnịnị ệ va yaatụ pe ọnị ka, ọnị ò pe ẹnị họ̀ Ẹnẹyịmavara use ka, sị́ ó sì ka ẹnị ẹ̀ mẹ?

² Dị Ẹnẹyịmavara kà a yị ọnị ka,

³ Ozi-ọza, ọnị kà a yị aza ẹnẹnị, ịsị ọnị Ẹnẹyịmavara Ananyị ụkata hu aa kà ka: Vị́ wáá vẹ ka wa va họ̀ ọnị use ịrẹyị nịnị nị? Aa vị ọnị ọ yị vị Ohomorihi ana yara nị, ọnị ẹyaa zẹẹ ka wa họ̀ ọnị use ịsọnyị-ịsọnyị nịnị.

⁴ Ezikẹẹrị ka Ẹnẹyịmavara ộ kà a yị ọnị ka, ọnị ozi-ọza òó tenyi ẹngụ ka ọnị aa ka ịrẹyị yị aza ẹnẹnị, ọnị kà a yị wa. Ẹnẹyịmavara kà ọnị ọ̀ tama wa ayị avaba ịsị ohiku ẹnịnị mẹ anaa nyị ọnị ịhyẹrẹ.

⁵ Ẹnẹyịmavara kà Ezikẹẹrị ọ̀ kà a yị wa ka, ụmẹ ọnị ọnị sị nyị Anisirẹrị nịnị, ọnị ộ kà ịrẹyị tịtẹ yị wa. Ọnị ộ sị ẹngụ anị zụ̀ wa ẹ́ mẹ yà ẹtẹ Ijipiti, dị ọnị kà a yị wa ka: Ọnị ọ̀ vị Ohomorihi awụ nịnị, Ẹnẹyịmavara nị.

⁶ Ụmẹ ọnọọ ọnị sị kà a yị wa ka ọnị vaa kụ waa hụrị ẹtẹ Ijipiti, dị ọnị kụ wa ne hi ẹtẹ ọnya ọnị ọnị raa nyị tịtẹ yị wa ẹtẹ ọyịza-ọyịza ọnị ịsa gwẹtẹ ịnị anị. Ẹtẹ ọnọọ o zoza hu avaba ẹtẹ ana vọ nị.

⁷ Ọnị ộ kà a yị wa ka ẹnịnị ẹ̀ và ori ẹnẹ ẹ yaa mẹ anaa nyị ọnị ịhyẹrẹ aanị ha, dị a sị ẹ́ sị ori Anijipiti nịnị du ẹngụ ẹnịnịị ẹngụ, agụvị ka ọnị ọ vị Ohomorihi ẹnịnị Ẹnẹyịmavara nị.

⁸ Ẹnẹyịmavara kà, ama ẹnịnị ệ si eyi wụ ọnị, ẹ́ yị saasa ịrẹyị anị. Ẹnịnị ẹ́ yị và ori ẹnịnị ha; ẹnịnị ẹ́ yị sị ụvọ hụụnị ịrẹyị ori Anijipiti nịnị. Ọnị ô tenyi ẹngụ ka ọnị aa sị ọyịkụ anịị zụ̀ wa ẹtẹ Ijipiti ụmẹ avọọ.

⁹ Ama ọnị ẹ yị rẹ va vavọọ mẹ, ọnị yaanị raa sị ẹngụ anị sìsi ẹtẹ ọnị ọọ vavọọ mẹ, agụvị ka eyi avaba aza ẹnẹ ẹnịrị Anisirẹrị nịnị rá vabẹ ọnị kà a yị wa ka ọnị vaa kụ waa hụrị ẹtẹ Ijipiti nị.

¹⁰ Avọọ, dị ọnị kụ wa hụrị Ijipiti ne hi ịnị ụnọmị nị.

¹¹ Ịzọọ ọnị ya mẹ ọda anị yị wa, dị ọnị mẹ ka ẹnịnị ẹ̀ yẹ ẹ nị. Ẹnịnị àa saasa ọda anị ẹnẹnị, ẹ́ vaa ra ẹhẹ obooro.

¹² Ẹnẹyịmavara kà, ọnị ộ rẹ sị ẹkụhị ụhwọtụ anị yị wa ka ọ̀ vị apọtẹrẹwa yị ọnịrị wa; dị ẹnịnị ẹ̀ yẹ́ ka, ọnị ọ vị Ẹnẹyịmavara ana nyị wa tụ irenyi nị.

¹³ Ama Anisirẹrị nịnị ệ kụ̀ hịrẹ ọnị ịnị ụnọmị ịzọọ. Ẹnịnị ê yị́ ịrẹyị ọnị ọnị kà yị wa tịtẹ; ẹ́ yị saasa ọda anị, ọda ẹnẹnị ọza àaa saasa, dị ọ yara nị. Dị ẹnịnị nyayịnẹ â mẹ kẹnẹ-kẹnẹ ẹkụhị ụhwọtụ anị nị. Dị ọnị vee roo ka ọnị ọ̀ sị ọyịkụ anị zụ̀ wa ịnị ụnọmị ịzọọ, dị ọnị ò vú wa ẹtẹ saka-saka nị.

¹⁴ Ama ọnị ộ hụ agụvị ka a va sị ịrẹha anị sìsí ẹtẹ ọvịdị avaba anẹkụra ọnị ọnị kụ Anisirẹrị nịnị hụrị Ijipiti, ọnị ộ za avọ hi.

¹⁵ Ama dị ọnị hị́ eku ka ọnị ẹ́ yị kụkụ vaa kụ wa naa ngụ ẹkụra ọnị vịdị sị yị wa nị ẹtẹ ọyịza-ọyịza ọnị ịsa gwẹtẹ hi ịnị anị. Ẹtẹ ọnọọ o zoza hu avaba ẹtẹ ana vọ nị.

¹⁶ Ọnị ộ vavọọ kà a, agụvị ka ẹnịnị ê yi ịrẹyị anị tịtẹ, ẹnịnị ẹ́ yị saasa ọda anị. Dị ẹnịnị ệ yị sị ụbanyị yị ẹkụhị ụhwọtụ anị nị. Ori kẹnẹ ayị ẹnịnị yà ịnị anị nị.

¹⁷ Ama, ọnị ô ré wa, dị ayị ẹnịnị aa va ọnị nị. Ọnị ẹ́ yị va sị ụya rị wa; ọnị é yị vee vu wa ẹtẹ saka-saka ịnị ụnọmị.

¹⁸ Ọnị ộ kà a yị ezi ẹnịnị ịnị ụnọmị ka, a sị ẹ saasa ọda ada ẹnịnị, dị asị ẹ mẹ ịsị ada ẹnịnị aa mẹ o. Asị ẹ na mẹ ori dị è ve si du ẹngụ ẹnịnị ẹngụ o.

¹⁹ Ọ kà, ọnị Ẹnẹyịmavara ọ vị Ohomorihi awụ nịnị, waa saasa ịrẹyị anị nịnị, dị wa tangwa sị ụvọ za ọda anị nịnị o.

²⁰ Sị ẹkụhị ụhwọtụ anị tụ irenyi yị ọnị nịnị, agụvị ka apọtẹrẹwa ọ vị yị ọnịrị ẹwụ nịnị nị. Ọ vaa mẹ ka wa yẹ nịnị ka ọnị ọ vị Ẹnẹyịmavara Ohomorihi awụ nịnị nị.

²¹ Ama ezi ẹnịnị ẹnị ệ rẹ kụ̀ hịrẹ ọnị; ẹnịnị ẹ́ yị saasa ịrẹyị anị; ọda anị oni ọza aa saasa dị ọ mẹ ka ọza ọ̀ yara, ẹnịnị ẹ́ yị saasa a. Ẹnịnị ẹ́ yị sị ụbanyị yị ẹkụhị ụhwọtụ anị. Dị ọnị ve roo ka ọnị ọ̀ sị ọyịkụ anị zụ̀ wa ịnị ụnọmị ịzọọ nị.

²² Ama ọnị ộ za avọ hi, ọnị ọ rẹ va mẹ ọyịkụ hi wa agụvị ka a va sị ịrẹha anị sìsi ẹtẹ ọvịdị avaba anẹkụra ọnị ọnị yà eyi ẹnịnị kụ Anisirẹrị nịnị hụrẹ Ijipiti.

²³ Ọnị ô hị́ eku ịnị ụnọmị ịzọọ ka, vị ọnị vaa gara wa hi ịnị akakana anẹkụra ana vọ nị; dị ọnị gà wa hi ẹkụra zịịzị.

²⁴ Ka ẹnịnị ẹ́ yị saasa ọda anị. Ẹnịnị ê yị ọda anị tịtẹ; ẹ́ yị sị ụbanyị yị ẹkụhị ụhwọtụ anị. Eyi ẹnịnị vị ana yà ịnị ori ohiku ẹnịnị.

²⁵ Ọnị ộ hụrẹ wa ụvọ ka ẹ naa saasa ọda kẹnẹ-kẹnẹ ẹnẹ ẹẹ yị vaa mẹ ka ẹnịnị ẹ̀ yara.

²⁶ Ọnị ộ mẹ̀ ka ẹyịza ẹnẹ ka ẹnị aa mẹ ọ̀ ngụ wa agụ; dị ọnị navọ wa ka ẹnịnị ẹẹ sị ozi ịpaapa ẹnịnịị mẹ̀ ịsọvọ yị ori ẹnịnị nị. Ọnị ộ vavọọ mẹ wa agụvị dị ọnị ọ̀ sị ụya rị wa ẹtẹẹtẹrẹ, dị ẹnịnị ẹ̀ yẹ ka ọnị ọ vị Ẹnẹyịmavara nị.

²⁷ Ẹnẹyịmavara kà agụvị avọọ, ọnị ozi-ọza ọ̀ kà a yị Anisirẹrị ka ọnị Ẹnẹyịmavara Ananyị ụkata hu ka, oze ọsa ọnị ohiku ẹnịnị zị kụ ọnị ụhụ rẹẹ yị, dị ẹnịnị ẹ̀ yị mẹ ịzẹyịza hị́ ọnị nị.

²⁸ Ọ kà ọnị ộ kụ wa va ngụ ẹtẹ ọnị ọnị kà a ka ọnị aa sịị yị wa. Ahatụraha aha ẹnẹ ẹnịnị ee ré ataba ana nẹba ọnịrị ọchị avị-avị nịnị kẹnẹ, dị ẹ na yà ịzọọ aa mẹ̀ ịsọvọ. Ịsị ịsọvọ ẹnẹ ẹyaa rị ịra ọnịrị eche ẹnẹ ẹyaa sị mẹ̀ ịsọvọ vị ọnị ẹyaa sịị mẹ ayịị kụ ọnị.

²⁹ Ọnị ộ họ̀ wa use ka, sị aha ana nẹba ọnị ụ maanị nọ nịnị aanị vị ana vị da? Agụvị avọọ a vana kụkụ aa hị́ ọ aha ana nẹba pooro ve tu ajịnị nị.

³⁰ Avọ ọnị Ezikẹẹrị ọ̀ kà a yị Anisirẹrị nịnị ka ọnị Ẹnẹyịmavara Ananyị ụkata hu ka, sị ẹ vẹ dị waa mẹ̀ ebira odivi ọnyọọnya ọnị ohiku awụ nịnị mẹ, dị waa dụ ori ẹnịnịị zịịzị nịnị?

³¹ Tu ajịnị-tu ajịnị vị ọnị waa yịị mẹ̀ ịsọvọ ọnyọọnya ọnị ohiku awụ nịnị ẹnị rẹ mẹ. Dị waa rị ezi ewu nịnịị ịraa mẹ̀ ịsọvọ yị ori ẹnịnị nị. Wa sị ẹngụ awụ nịnị du ẹngụ. Ana ẹwụ nịnị Anisirẹrị ee yii ve họ̀ use ka sị ọnị venee sị da. Àa vị ọnị Ẹnẹyịmavara ọ yị vị Ohomorihi ana yara nị, ọnị ẹ́ yị vaa zẹẹ ka wa yẹ ịsị ẹ vị oyisì anị nịnị.

³² Wa sị ẹngụ tenyi nịnị ka ẹwụrị anẹkụra ana vọ ẹ̀ vị ọnyọọnya dị waa vàa ku ẹtẹ yị ọchị ọnịrị ịrẹta nịnị. Ama ẹ́ yị vaa vị wụ nịnị mẹ.

Ohomorihiī ị ụyaa rị ọza, dị ọ re vagu ọ.

³³ Ẹnẹyịmavara kà àa vị ọnị ọ yị vị Ohomorihi ana yara nị, ọnị vaa rị ohinọyị tụra awụ ịnị ịrẹsụ, ọnị vaa mẹ ọyịkụ hi wu nịnị; ọnị vaa tana ụvọọ za awụ nịnị, dị ọnị sị ụkata anị zụ wụ nịnị.

³⁴ Ịjị ọnị ọọ varẹma kụ wụ nịnị gụ hụrị avaba ẹkụra ọnị ụ che ne hi nịnị, ọnị vaa sị ụkata anị ọnịrị ọyịkụ anịị zụ wụ nịnị.

³⁵ Ọnị vaa kụ wụ nịnị vaa ngụ ịnị ụnọmị anaā rị ọza. Ọnịrị ẹwụ nịnị vaa sị eyii gẹrị eyi ịzọọ, dị ọnị mẹ̀ ọkarẹyị yị wụ nịnị.

³⁶ Ẹnẹyịmavara kà ọnị vaa mẹ̀ ọkarẹyị yị wụ nịnị anka ọnị mẹ mẹ̀ ọkarẹyị yị ohiku awụ nịnị ịnị ụnọmị ẹtẹ Ịsịnayị ịjị ọnọọ.

³⁷ Ọnị kụkụ vaa mẹ ọdaa tụra wụ nịnị ịrẹsụ, dị ọnị mẹ ka waa saasa ịrẹyị ọnịrị ẹwụ nịnị dọ beri nịnị.

³⁸ Avaba aza anaā kụ̀ụ hịrẹ ọnị, dị ẹẹ̄ mẹ̀ ebira odivi-odivi vị ọnị ọnị vaa tọ̀ọ kwooze, ọnị vaa kụ waa hụrị ẹtẹ ẹnẹ ẹ́ ra booro aanị, ama ọnị ẹ́ yị vaa zẹẹ ka ẹnịnị ẹ̀ vavẹ ẹtẹ Isirẹrị. Ịjọnọọ ụ vaa yẹ nịnị ka ọnị ọ vị Ẹnẹyịmavara nị.

³⁹ Ẹnẹyịmavara Ananyị ụkata hu ka, booro aanị, avaba ẹwụ nịnị Anisirẹrị, waa mẹ o me zee wu nịnị eyi, ka tụ ọvịdị, wa naa mẹ ori awụ nịnị. Ama òo ku, òo jintu, waa vàa vẹ vaa saasa ọnị nịnị. Ụ vaa hụụnị ịsọvọ ọnị waa mẹẹ yị ori awụ nịnị, dị wẹ̀ yị sị ụbanyị ịrẹha ọnịnị anị nịnị aanị.

⁴⁰ Ọ kà, agụvị ka ịnị ataba ọnịnị anị, ataba ana nẹba tụ ẹtẹ Isirẹrị, avaba ẹwụ nịnị Anisirẹrị vaa yaa hẹkẹ ọnị nị. Ayị anị vee hinee tu wu nịnị, dị ọnị ee zì ka wa va mẹ̀ ịsọvọ yị ọnị nịnị ịzọọ dị wa sị ịsị ịsọvọ awụ nịnị ene hu kere-kere ọnị ụ sị tụ irenyi nịnị va yị ọnị.

⁴¹ Ẹnẹyịmavara kà ịjị ọnị ọọ raa kụ wụ nịnị vavẹ eehi hụrị avaba ịzị a gara wụ nịnị ne hi, ụ́ kụkụ vaa sị mẹẹ anka ịsọvọ enee hine ọnị nịnị avọọ yị ọnị nị. Ọnị vaa sịị zụ anẹkụra ka è ré ka ọnịnị ọnị vị nị.

⁴² Ịjị ọnị ọọ raa kụ wụ nịnị vavẹ ẹtẹ Isirẹrị ọnị ọnị kà a ka ọnị vaa sịị yị ohiku awụ nịnị, ụ vaa yẹ nịnị ka ọnị ọ vị Ẹnẹyịmavara nị.

⁴³ Ụ vaa tamayị avaba ịsị ọnị ụ mẹ̀ ọnị ụ sị ngụ ẹngụ awụ nịnị agụ, dị ịhyẹrẹ ẹngụ awụ nịnị aa nyị wụ nịnị, agụvị avaba ịsị odivi ọnị ụ mẹ nịnị.

⁴⁴ Ẹnẹyịmavara Ananyị ụkata hu ka, ẹwụ nịnị Anisirẹrị vaa yẹ ka ọnị ọ vị Ẹnẹyịmavara nị; ịjị ọnị ọọ hụ agụvị ka à sị ụbanyị yị ịrẹha anị, dị ọnị vayị awụ nịnị nị. Ọnị ẹ́ yị vaa mẹ̀ ebira hi wu nịnị anka ẹngụ ebira odivi ọnị ụ mẹ nịnị.

⁴⁵ Ezikẹẹrị ka Ẹnẹyịmavara ộ kà a yị ọnị ka,

⁴⁶ Ozi-ọza ọ̀ va eyi ka eyi-ụvẹtẹ; ọnị ọ̀ va eyi ịrazị kà a, dị ọnị kà ịrẹyịị yọ. Ọnị ọ̀ va eyirazị ka iruku ana ya ẹtẹ Ịnẹgẹvị dị ọnị ọ̀ ka ịsẹẹ yọ.

⁴⁷ Ọ kà ọnị ọ̀ kà a yị iruku ana ya eyi ụvẹtẹ aanị ka, ọ̀ wụ́ ịrẹyị ọnị Ẹnẹyịmavara Ananyị ụkata hu aa ka: Ọ kà, ré, ọnị vaa jị ịraa da a, dị ọnị rị avaba ọchị ohwoohu ọnịrị ọchị ọyịwụ ene hi ịnị anị ịra. Ọza é yi ve zuu mí ịra ọnọọ. Avọọ ọ́ mẹ vaa rị hụrị eyi-ụvẹtẹ huuu naa ngụ eyi ẹbẹẹba nị.

⁴⁸ Avaba anẹhẹ vee re ka ọnị Ẹnẹyịmavara ọ kà ịra ọnọọ nị. Ẹ́ yị nyị ọza ene ve zuu mi ọ.

⁴⁹ Ama, dị ọnị ka tee! Ẹnẹyịmavara Ananyị ụkata hu, aarịhịnị, asị ọ kà a ka ọnị ọ̀ na ka ẹngụ ịrẹyị ọnọnị de, ka aza vana vịdị aa kà a ka vị ọnịị sị avaba ịrẹyịị che ụhị nị.