Ẹtore 8 - IWE ỌNỊNỊ

Ịsa ọhụhịmba ana a sị vá iwe ọnọọ

¹ Ozi Atẹmẹ ọnọọ ộ hụ̀ ịsa ọhụhịmba ana a sị vá iwe ọnọọ, dị avaba ẹbẹẹba tịtẹ sisisi mẹ ẹhụụ achẹva agogo ọnya avọọ nị.

² Di mi re anggẹẹrị ịhịmba ana jẹẹ ọvịdị Ohomorihi, dị a sị ọpanyị ịhịmba yị wa nị.

³ Dị anggẹẹrị ọsa ana nyị ẹnya eturare ana a sị igooru mẹ vẹ, dị ọ va jẹ ẹ pe ụta nị. Â sị eturare rụrụ yọ ka ọ̀ và a hura aduwa avaba aza Ohomorihi, dị ọ̀ sị ọọ nọ ị́rẹsụ ụta ana a sị igooru mẹ ana yà ọvịdị aga ohinọyị ọnọọ.

⁴ Dị areyi eturare ana aa rị ịra aanị dà, beri aduwa avaba aza Ohomorihi hụụnị ẹnya eturare ọnị anggẹẹrị ọnọọ sị rị ụvọ nọ ọvịdị Ohomorihi nị.

⁵ Dị anggẹẹrị ọnọọ nyị ịra hụụ ịrẹsụ ụta ọnọọ tụ́ ịnị ẹnya eturare ọnọọ ohihi, dị o ne e na ngụ ẹhẹ nị, Dị apaana ihinẹba aa sụ́ wara-wara, dị ịrẹka aa sụ́, dị ịnyanya aa rị vee-vee, dị ẹtẹ ee henyi jigi-jigi nị.

Ọpanyị ịhịmba ana sụ́ ịrẹyị

⁶ Dị anggẹẹrị ịhịmba ẹnẹẹ ana nyị ọpanyị ịhịmba aanị tenyi ẹngụ ka eni è hú ọọ nị.

⁷ Anggẹẹrị ịpaapa ô hú ọpanyị anị. Dị ata ihinẹba ọnịrị ịra và hura anya aa zụ̀ụ hi ịnị ẹhẹ nị. Dị achẹta ẹhẹ rị ịra, dị achẹta avaba ọchị rị ịra, dị avaba ohwoohu rẹ rị ịra nị.

⁸ Dị anggẹẹrị ọhụva oni re hú ọpanyị anị nị. Dị a sị ịsa ọnya aanị ana sị mẹẹ anka ataba ọbanyị ana aa rị ịra, di e ne e ngụ ini òkū nị. Dị achẹta oku vara anya tịtẹ nị.

⁹ Dị achẹta avaba ịsa ana ra hi ini òkū sú nị; dị achẹta ẹpa nịnị du va ha nị.

¹⁰ Dị anggẹẹrị ọhụta oni re hú ọpanyị anị nị. Dị ụzọmị ọbanyị ọnya ana aa za giri-giri anka ịra avọọ jị hụrẹ ẹbẹẹba, di o ne ngụ achẹta irehu nịnị ọnịrị enyi ẹtẹ nịnị nị.

¹¹ Ịrẹha ụzọmị ọnọọ ọ rị ẹchịpa nị. Dị achẹta enyi ẹnẹẹ kụkụ aa nyịrẹyị, dị aza ọrụrụ-ọrụrụ ene hú enyi ọnọọ sú, agụvị ka aa nyịrẹyị nị.

¹² Dị anggẹẹrị ọhụna oni re hú ọpanyị anị nị, dị a sị ịsa nya achẹta ọyị ọnịrị achẹta ụhwẹ ne beri achẹta ụzọmị nịnị, dị achẹta ẹtohweyi ẹnịnị sị hozi nị. Achẹta ụmẹ ọọdụ ọnịrị achẹta ịrahụ ẹnị ẹ yị rẹ kụkụ nyị ẹtohweyi.

¹³ Dị mị kana eyi, dị mị wụ́, ọ́kasịmẹ ọnya mee hira ẹbẹẹba, di ee nowu ka: aza ana ra ịnị ẹhẹ ẹ sị da. Ẹ sị da. Ẹ sị da, ịjị ọpanyị anggẹẹrị ẹẹta ana vọ ẹ̀ẹ sụ́ ịrẹyị!