Ẹsịta 9 - IWE ỌNỊNỊ

Aniju nịnị ệ wụ̀ ọnịvị ẹnịnị

¹ Ịhị ẹ tụ́ ọ ẹkụhị ẹwụrẹta ịnị ụhwẹ ẹwụrẹva ana aā hị́ Ada ọ vị ẹkụhị ọnị ọda ohinọyị kà a ka à wụ̀ Aniju nịnị nị. Ẹkụhị ọnọọ ọnịvị Aniju nịnị ro ka ẹnị vaa nyị ẹbẹẹba Aniju nịnị. Ama ịjị ịrẹyị va sị vara, dị ahịka Aniju nịnị ẹ kụkụ vana nyị ehuna ọnịvị ẹnịnị nị.

² Ẹkụhị ọnọọ mè tù, dị Aniju nịnị kú ẹngụ gụ ịnị okokooro ene hi ịnị ẹkụra irenyi-irenyi ịnị ẹtẹ ohinọyị Ahasẹrọsị nị. Di ẹnịnị tenyi ẹngụ tù aza ana ka ẹnị aa và eyi ịrazịị kà wa nị. Ama a yi va nyị ọza ana nyayịnẹ và eyi ịrazị kà wa agụvị ka eyee hí angwa Aniju ẹtẹẹtẹrẹ.

³ Dị avaba ọdọvịdị ẹkụra nịnị, Ịgọvọnọ nịnị beri avaba anụkọrọ ohinọyị nịnị sị ụvọ pè e yi Aniju nịnị agụvị ka eyee hí angwa Imodekaya nị.

⁴ Ịzẹyịza, Imodekaya vị ana nyị ụkata ịda ohinọyị, dị ụkata anị aa banyị hu avọọ nị. Agụvị avọọ dị a nyayịnẹ yẹ ẹ ẹtẹẹtẹrẹ ịnị ẹtẹ ọnọọ nị.

⁵ Di Aniju mẹ ọnịvị ẹnịnị o mè ze wa eyi nị. Dị ẹ sị ụhwọ di ẹ wụ̀ avaba ọnịvị ẹnịnị ha saka-saka nị.

⁶ Aniju nịnị ệ wụ́ aza akavarẹchẹhị ịnị ẹkụra Isusa ana vị ohi ẹtẹ ẹkụra

⁷ Aza ẹnẹnị hi ịnị aza ana a wụ́. Ipasandata, Idavoni, Asipata,

⁸ Iporata, Adariya, Aridata,

⁹ Ipamasita, Ariseyi, Arideyi, Ivayizata,

¹⁰ ọnịrị ezi Ịhamanị ẹẹwụ. Ịhamanị ọnọọ vị ozi Ihamedata ana vị ọnịvị Aniju nịnị nị. Ama Aniju nịnị ẹ yị sị ụvọ kanyị ogu aza ẹnị ẹ wụ.

¹¹ Ịhị ọnọọ â kà enube zụ ohinọyị ịrịka aza ana a wụ ịnị ẹkụra Isusa.

¹² Dị ohinọyị kà a yi Ẹsịta ose anị ka, “Re, ịnị ẹkụra Isusa kẹnẹ Aniju nịnị ệ wụ̀ aza ịrịka akavarẹchẹhị (500) ha aanị nị. Dị rẹ raà wụ̀ ezi Ịhamanị ẹẹwụ ana vọ ịnị ẹtẹ ọnọnị.” Dị ohinọyị rẹ họ̀ Ẹsịta ka, áá nyị ịsị ẹ vọ ọnị ee sì ka ọnị ọ kụkụ mẹ yọ? Ịsị ọọ vịị ọnị vaa mẹ̀ ẹ yọ.

¹³ Dị Ẹsịta tụ́ ohi ka, “Taarụ, òo nyị ọnị iyi, ọ̀ navọ ò re sị oze yi Aniju ene hi Isusa ụhwọọ dị ẹ̀ mẹ ịsị ẹ mẹ ajịnị. Dị ọ̀ rẹ mẹ ọda ka è zù oku ezi Ịhamanị ẹẹwụ ọnọọ gẹ ọchị.”

¹⁴ Di ohinọyị kà a mẹ ọda ọnị Ẹsịta họ̀ use nị. Dị ọ sị ọda ọnọọ tụ́ ẹhẹ ẹkụra Isusa nị. Di e zù oku ezi Ịhamanị ẹẹwụ gẹ ọchị nị.

¹⁵ Ịzẹyịza, ana tụ ọ ẹkụhị ẹwụrẹna ịnị ụhwẹ ọnọọ ana aā hị́ Ada, dị Aniju nịnị ene hi Isusa kwẹẹtẹ nị. Dị ẹ kụ́ ẹngụ gụ, dị ẹ rẹ wụ́ aza ẹnị ịrẹkarẹchẹhị ịnị ẹkụra ọnọọ nị. Ama ẹ yị kanyị ogu aza ẹnẹẹ.

¹⁶ Dị Aniju nịnị ana vọ hí ịnị ẹtẹ ohinọyị ọnọnị kụ́ ẹngụ gụ dị ẹ tenyi ẹngụ ka ẹnị ẹ̀ dọ ẹngụ ẹnịnị há hụụnị ụvọ ọnịvị ẹnịnị nị. Dị ẹ wụ́ ọnịvị ẹnịnị ịrịka akahị-akahị oze ẹtarẹwụ tụra ẹẹhị nị (75,000). Ama ẹ yị kanyị ogu ẹnịnị.

¹⁷ Ịhị ẹ tụ́ ẹkụhị ẹwụrẹta ịnị ụhwẹ ana aā hị́ Ada ẹ maanị wụ̀ aza nị. Eyinẹhẹ anị ana vị ẹkụhị ẹwụrẹna, dị ẹ̀ yị wụ̀ ọza nị. Dị ẹ yaa jẹ ịrajẹ, dị ẹ yaa rị eche nị.

Eche Ipurimi hi ẹtẹ

¹⁸ Ama, Aniju nịnị ene hi Isusa ệ kụ́ ẹngụ gụ ịnị ẹkụhị ẹwụrẹhị dị ẹ tụ́ ụhwọ nị, agụvị ka ẹ yị wụ̀ aza ịnị ẹkụhị ẹwụrẹta ọnịrị ẹwụrẹna.

¹⁹ Hụrẹ ụmẹ ọnọọ Aniju ene hi ịnị ẹkụra oweyi-oweyi kụkụ mẹ ẹkụhị ẹwụrẹna ịnị ụhwẹ ana aā hị́ Ada ẹkụhị ụhwọtụ nị. Ịhị ọnọọ ẹ yaa rị eche, di ẹ yaa sị ẹyịza yị ẹngụ nị.

²⁰ Dị Imodekaya kà a chẹrẹ ịsa ẹnẹnị tịtẹ ịnị iwe di a gà a tụ́ avaba Aniju nịnị ene hi ẹtẹ ohinọyị Ahasẹrọsị nị. Aza ana gụrị ẹtẹ ọnịrị aza ana ra hí aha onoze.

²¹ Dị ọ mẹ ka Aniju nịnị ẹ̀ sị ẹkụhị ẹwụrẹna ọnịrị ẹkụhị ẹwụrẹhị mẹ asụsụ ịrayị ẹnịnị nị. Dị ẹ vavọọ a rị eche anị ịrayị-ịrayị nị.

²² Ẹkụhị ẹnẹẹ Aniju nịnị sị dọ ẹngụ ẹnịnị hụụnị ụvọ ọnịvị ẹnịnị nị. Ịnị ụhwẹ ọnọọ, ayodu ẹnịnị si vara ịrajẹ nị, ụmẹ ọnọọ orere ẹnịnị vara ayị ohine nị. Dị ọ chẹrẹ ẹ ka à sị ẹkụhị ẹnẹẹ rị eche, dị a sị jẹ ịrajẹ nị. Dị ẹ yaa da ịsa yị ẹngụ, di àa mẹ onosiye ẹyịza nị.

²³ Di avaba Aniju nịnị dọ beri ịsị Imodekaya chẹrẹ tịtẹ nị. Di e nyima hụrẹ ịhị ọnọọ aa rị eche ọnọnị nị.

²⁴ Ka a sịị tamayị Ịhamanị ozi Ihamedata ana vi Anagagi. Ịhamanị vị ọnịvị avaba Aniju nịnị. Ọnị ọ na gẹ eyi a mẹmẹ vaa wụ́ Aniju nị. Dị a sị ipurimi sì ẹkụhị ana vọrọ ka ọ za nị.

²⁵ Ama ịjị Ẹsịta va ha ohinọyị eyi tu ebira odivi Ịhamanị, dị ohinọyị mẹ̀ ọda ana a chẹrẹ ka ịsị odivi oni o ro tụra Aniju ọ̀ vẹ ịrẹsụ anị nị. Di e zu Ịhamanị ọnịrị ezi anị gẹ ọchị nị.

²⁶ Agụvị ịsa ana a chẹrẹ tụ ini iwe tịtẹ ọnịrị ịsị Aniju nịnị wụ́ beri ịsị ene e re, dị ẹ hị́ ẹkụhị ụhwọtụ ẹnẹẹ Ipurimi nị.

²⁷ Aniju nini e sị ọ hi ẹtẹ ka avaba ezi ẹnịnị ịrẹma-ịrẹma ọnịrị aza ana kụ́ ẹngụ beri wa ẹẹ rị eche ọyị tamayị ẹkụhị ẹẹva ẹnẹẹ ịrayị-ịrayị anka a mẹ̀ kà a ịnị ụmẹ ọnọọ.

²⁸ Hụrị ụmẹ ọnọọ a mẹ̀ ẹ ọda yị avaba ovwoovu Aniju nịnị ka ẹẹ rị eche Ipurimi ẹkụhị ẹẹva ẹnẹẹ ịrayị-ịrayị pooro, dị asị o vu.

²⁹ Dị Ẹsịta, ose ohinọyị ana vi ozi Abiheri ọnịrị Imodekaya rẹ tenyi iwe ọsa chẹrẹ ana sị ụkata yi iwe ịpaapa ọnị Imodekaya chẹrẹ ini oze eche Ipurimi nị.

³⁰ Di Imodekaya gà iwe tụ́ hi Aniju nịnị ene hi ịnị ẹkụra ẹchịhịnọnyị tụra ịhịmba ịnị ẹtẹ ohinọyị Ahasẹrọsị nị. Iwe ọnọnị vị ana sị kụ́ wa ka ẹ nyarị ẹngwọọrọ, ka ẹ yị nyị ịsị ẹ vaa mẹ wa.

³¹ Ộ mẹ ọda ka aanị ẹnịrị ezi ẹnịnị mẹ̀ vanaā rị eche Ipurimi ọnọnị ịnị ụmẹ ana vọrọ nị. Avọọ Imodekaya ọnịrị Ẹsịta ose ohinọyị mẹ̀ kà a yị wa nị. Ẹnịnị ẹ sị ụvọ za ọda anị anka ọda ẹnẹ ẹẹ̄ sịị za awẹ ọnịrị ụmẹ ẹnẹ ẹẹ̄ sịị zị ẹngụ ịsa.

³² Ọda ọnị Ẹsịta mẹ̀ ọnị ọ sị sị ụvọ tụ ini eche Ipurimi vi ana a chẹrẹ tụ́ ini iwe.