Iwe Ọhụhị Imosiisi ana aa hị́ Ọyịvatụrọda 30 - IWE ỌNỊNỊ

Anisirẹrị nịnị vaa va ka Ẹnẹyịmavara vẹ

¹ Imosiisi ô ka yị Anisirẹrị nịnị ka, ọnị aa sị oze yị wa ẹ́ nyị ịnị ịsa oze ẹẹva; ọyịza ọnị Ẹnẹyịmavara vaa mẹ yị wa, a vị ụya ọnị ọ vaa sị rị wa ẹnịnị èe yi ọ tịtẹ. Ịjị ịrẹyị ọnọnị aa va mẹ tu wa, ẹnịnị vị ana vaa ra ẹkụra irenyi-irenyi ịzị Ẹnẹyịmavara Ohomorihi ẹnịnị vaa ga wa hi. Ịjọnọọ ẹnịnị vaa tamayị ka ọnị ò si oze yị wa ka ẹ nyị ịsị ẹnịnị ee sị nị.

² Ẹnịrị ụnanka ẹnịnị ẹ̀ẹ varẹma ka Ẹnẹyịmavara vẹ, dị ẹ sị ayị ọnya saasa ọda ọnị ọnị sị yị wa ajịnị nị.

³ Ẹnẹyịmavara Ohomorihi ẹnịnị vaa vayị ẹnịnị, ọ vaa ku wa varẹma hụrẹ ẹkụra irenyi-irenyi ọnị ọ ga wa hi, dị ọ mẹ ka o zee yị wa.

⁴ Ẹnịnị ẹ daka ne hi ẹtaha ẹhẹ, Ẹnẹyịmavara Ohomorihi ẹnịnị vaa kụ́ wa gụ, dị ọ kụ́ wa varẹma vavẹ eehi.

⁵ Ẹnẹyịmavara vaa vavọọ mẹ agụvị dị ụnanka ẹnịnị ẹ dọ ẹtẹ ọnị ohiku ẹnịnị vịdị ra varẹma. Ọ vaa mẹ ka o zee yị wa, dị ẹ rụrụ hụụnị ohiku ẹnịnị mẹ vịdị ya.

⁶ Ẹnẹyịmavara ana vị Ohomorihi ẹnịnị vaa sị ayị yị ẹnịrị ụnanka ẹ nịnị dị ẹ wụ́ chire e, dị ẹ sị avaba ayị ẹnịnị sị ịrẹyị anị agụvị dị ẹ ra ịnị ẹtẹ ọnọọ.

⁷ Dị ahịka ọnịvị ẹnịnị ana nyị ịhyẹrẹ ẹnịnị, dị a mẹ̀ ẹvaya yị wa, Ẹnẹyịmavara kụkụ aa sị ụya rị nị.

⁸ Imosiisi kà ẹnịnị kụkụ vaa wụ́ chire Ẹnẹyịmavara, dị ẹ saasa ọda anị ọnị ọnị aa sị yị wa ajịnị.

⁹ Ọ kà Ẹnẹyịmavara vaa mẹ̀ ka o zee yị wa ịnị avaba ọnị ẹ yaa mẹ. Ezi ẹnịnị vaa rụrụ, dị ịsụpa ẹnịnị aa ha, dị ịsa ịnị aarẹ ẹnịnị aa mẹ ẹtẹẹtẹrẹ. Ayị Ẹnẹyịmavara vị ene vee hine ka ọnị ọ mẹ ka o zee yị wa anka ọ mẹ mẹ̀ yị ohiku ẹnịnị avọọ.

¹⁰ Ẹnịnị ẹ̀ẹ wụ́ chire Ẹnẹyịmavara, dị ẹ saasa avaba ọda anị ana a chẹrẹ tụ iwe ọnọnị ana aa sị zụ aza aanị. Ẹ sị avaba ayị ẹnịnị ro ịnẹ varẹma ka a vẹ.

¹¹ Imosiisi ka, ọda ọnị ọnị aa sị yị wa ajịnị ẹ yị katẹngụ yị wa a vị ka o huna wa ọyị mẹ.

¹² Ọ yị nẹba na ngụ eguhi. Ẹ yị nyị ka wee họ̀ use ka ẹnẹ aa hịrẹ nọ ẹbẹẹba dị ọ na sị ọ chi vẹ va yị, agụvị yaa zụ wụ ọ, dị yaa saasa a?

¹³ Ẹ yị ya akẹnẹ oku. Ẹ yị nyị ka wee họ̀ use ka ẹnẹ aa jịnẹ oku na sị ọ va yị, agụvị yaa wụ ọ, dị yaa saasa a?

¹⁴ Eyiye, ịrẹyị ọnọọ ya ịzẹnị pe wu. Waa yẹ ẹ, dị ụ zụ vatụra a ka nị. Agụvị avọọ saasa a.

¹⁵ Imosiisi kà a ọnị ọ sị tụ ọvịdị ẹnịnị ajịnị ka ẹ nyị, ọyịza a vị odivi, ẹhẹ a vị usu.

¹⁶ Ẹ̀ẹ saasa ọda Ẹnẹyịmavara Ohomorihi ẹnịnị, èe sì ịrẹyị anị, dị ẹ wụ́ chire e, dị ẹ sị ụvọ za ọda anị nị, o vee ze yị wa, dị ẹ vị ẹkụra ana aza anị rụrụ. Ẹnẹyịmavara Ohomorihi ẹnịnị vaa mẹ ka o ze yị wa ịnị ọnị ẹ yaa va dọ.

¹⁷ Ama ẹnịnị ẹ̀ẹ mẹ akamawụ, dị ẹ yị wụ, di e vene wa na hẹkẹ ori nịnị nị,

¹⁸ e yee vu ẹtẹ nị. Imosiisi ộ ka wa ọnọ ka ẹ̀ẹ vavọọ mẹ, ẹnịnị ẹ yị vaa ra ịnị ẹtẹ ana ya akẹnẹ Okuha Ịjọdanị ọnị ẹ yaa vaa dọ.

¹⁹ Ọnị aa sị oze yị wa booro aanị ka ẹ nyị ịnị akakana ẹhẹ ọnịrị usu, a vị Ohomorihi ọ mẹ ize yị a vị Ohomorihi ọ tụ ozirenu hi wa. Agụvị avọọ ọnị ọ sị ẹbẹẹba ọnịrị mẹ ivenu yị ịsị waa nyị. Nyị ẹhẹ.

²⁰ Sì ịrẹyị Ẹnẹyịmavara Ohomorihi awụ nịnị, wụ́ chire e, dị ụ waa mẹ ịzẹyịza ka a na, dị ẹwụrị evere ọ zụ ku orubo ịnị ẹtẹ ọnị ọ hị́ eku anị yị ohiku ẹnịnị Abụrahamị, Ayiziiki ọnịrị Ijekọvụ.