Iwe Ọhụhị Imosiisi ana aa hị́ Ọyịvatụrọda 20 - IWE ỌNỊNỊ

Ọda ịrẹkụ ọyị kụ̀

¹ Imosiisi kà Anisirẹrị àa nọ ịrẹkụ, dị è re ka ọnịvị ẹnịnị ẹ rụrụ hụụnị ẹnị dị umaata ẹnịnị ọnịrị ịkẹkẹ ịrẹkụ ẹnịnị rụrụ huuna ẹnịnị nị, asị e hí angwa. Ẹnẹyịmavara ana dọ wa ha hụụnị ụvọ Anijipiti vaa kụ ịrẹkụ yị wa.

² Ama dị ẹ́ vaa nọ ịrẹkụ ọnọọ, ohirẹsụ irehi Ẹnẹyịmavara ọ̀ nọ ọvịdị isoja ẹnịnị,

³ dị ọ kà a ka; Ẹwụ nị isoja Anisirẹrị sị ụtọ pe ẹtẹ. Wàa nọ ịrẹkụ ajịnị, asị ụ hị́ angwa ọnịvị. Wèe re wa asị ayị hụrẹ ẹwụ ịnẹ.

⁴ Ẹnẹyịmavara ana vị Ohomorihi awụ nịnị vaa saasa awụ nị kụ ịrẹkụ dị ụ nyị ẹbẹẹba ọnịvị awụ nịnị.

⁵ Ịjọnọọ dị ọdọvịdị awụ nịnị vaa ka yị ọkọnị isoja ana gụ ka; Ọza ọọ da irehi ọwọọwa ọnị ẹ yị kụ na ngụ, oo na eehi. Ẹ yị vọrọ ka ẹngụ ọza ọnọọ o su eyi ịrẹkụ dị ọzẹnẹsa kẹnẹ ọ naa ra ịnị irehi ọwọọwa anị.

⁶ Ọza ọ̀ọ da ụbazị ịvayịnị ọnị ẹ̀ yị rị ịsa anị, o zụ aa nọ eehi. Ẹ yị vọrọ ka ẹngụ ọza ọnọọ o su eyi ịrẹkụ, dị ọzẹnẹsa kẹnẹ ọ naa rị ịsa ịnị ụbazị aanị.

⁷ Ọza ọ̀ọ zị ụsẹ ọnẹẹ tụ oze, ọ zụ aa nọ eehi, dị ọ na nyị ose anị. Ẹ yị vọrọ ka o su tụ eyi ịrẹkụ, dị ọzẹnẹsa kẹnẹ ọ na nyị ọnẹẹ ọnọọ.

⁸ Ịrẹma aza ẹnẹnị, ọza ene èe hí angwa, oo na eehi; ọza e yi si isoja ana vaa tụ aza ana vọ angwahi.

⁹ Ịjị aa maanị raa mẹ ọda tịtẹ, dị ọdọvịdị nịnị nyị aza ana vaa vị ọga isoja nịnị.

¹⁰ Ẹnịnị aa na gẹ ịrẹkụ tu ẹkụra, ẹ vịdị sị oze yị anẹkụra ẹnẹẹ ka ẹ jị ụvọ yị ẹnị.

¹¹ Ẹnịnị ẹ̀ẹ na avaba oze ana ngụ ẹkụra hi ẹtẹ, agụvị ka ẹ jị ụvọ yị wa nị, asị ẹnịnị sị ụya rị wa.

¹² Ama anẹkụra ọnọọ ọ yị ụvọ yị wa, dị ẹ nyị ka a gẹ ịrẹkụ nị,

¹³ Ẹnẹyịmavara ana vị Ohomorihi ẹnịnị vaa sị ẹkụra ọnọọ chire wa ụvọ, dị ẹ wụ̀ avaba anọrụ ene hi ịzọọ.

¹⁴ Anisirẹrị nịnị ẹ nyẹngụ kụ anẹẹ ẹnịrị ezi beri ịsụpa ọnịrị ogu ọnịvị ẹnịnị. Ẹnẹyịmavara ọ raà sị avaba ịsa ana vị ọnịvị ẹnịnị yị wa.

¹⁵ Aanị ẹ mẹ vaa mẹ̀ ẹkụra ẹnẹ ẹ noze hị́ ịzị ẹ vaa ra nị.

¹⁶ Àa nyị ẹkụra ọnị ẹnịnị dọ ịnị ẹtẹ ọnị Ẹnẹyịmavara aa sị yị wa, ẹ wụ̀ avaba aza ene hi ịzọọ.

¹⁷ Ẹnịnị e vu avaba aza ene hi ịnị ẹkụra ẹnẹẹ, ọ vị Anihiti, Anamọrị, Anikenaani, Aniperizi, Anihivi, ọ vị Anijebusi, ẹnịnị ẹ saasa ọda Ẹnẹyịmavara.

¹⁸ Imosiisi ka Anisirẹrị nịnị ẹ wụ̀ wa bemi-bemi agụvị asị ẹ zụ wa ịsa odivi ọnị ẹ ya mẹ hẹkẹ ori ana va mẹ̀ ka ẹnịnị ẹ rị ịvị Ẹnẹyịmavara.

¹⁹ Ọ kà ẹnịnị àa dọ ẹkụra asị ẹ da ọchị anaā tụ̀ ẹtụtụ hi ẹtẹ, ẹnịnị ẹ daka ku ịzọọ. Avaba ọchị anaā tù ẹtụtụ ịzọọ ẹ yị kụkụ vị ọnịvị ẹnịnị. Agụvị avọọ ẹ ha wa rị, asị e du wa ha.

²⁰ Ẹnịnị ẹ zụ da ọchị ana vọ dị ẹ sị mẹ ọbụna na hịrẹ ọvọ ẹkụra agụvị dị ẹ zụ rị ẹkụra ọnọọ.