Ayịsaya 62 - IWE ỌNỊNỊ

Ijerusarẹmị vaa ha

¹ Ẹnẹyịmavara kà a, agụvị Ịzayọnị ọnị e yi vee chi iriji, agụvị Ijerusarẹmị ọnị ẹ yị vaa tụ́ ụhwọ́, ẹ yị ịjị ịzẹyịza anị aa zẹtẹ, dị ẹdọha anị aa za anka ịra ịtọchị.

² Avaba anẹkụra nịnị vee re ka wa raà nyị ehuna. Avaba ohinọyị nịnị vee re ụbanyị awụ. Ẹ vaa hị́ wụ ịrẹha ọwọọwa ọnị Ẹnẹyịmavara raà sị yị wụ.

³ Ụ vaa sị mẹ anka amu ohinọyị yị Ẹnẹyịmavara nị.

⁴ Ọza ẹ yị kụkụ vaa hị́ wụ eneyi, a vị dị aa hị́ ẹtẹ awụ nịnị Enezweyị, ama ịrẹha ọwọọwa awụ nịnị ọ rị onimisi, Ẹtẹ awụ nịnị ọ rị Anaanyị. Agụvị ka ayị Ẹnẹyịmavara ô hine tu wụ, ọnị ọ vaa nyị ẹtẹ awụ nịnị anka ọza ộ nyị ọnẹẹ avọọ.

⁵ Anka ọnọrụ anaa nyị ozwoorihi ẹnẹ ẹ yị yẹ ọnọrụ, avọọ Ẹnẹyịmavara ana mẹ̀ wụ mẹ vaa nyị wụ nị. Ayị ọnọrụ meē hine tu oze avọọ, avọọ ayị Ohomorihi awụ nịnị mee hine tu wu nịnị

⁶ Anijerusarẹmị, Ẹnẹyịmavara ọ raà nyị oserẹtẹ ene vee sere ọvọ awụ nịnị. Ẹnịnị e yi vee si irenu kwoku ọọdụ ọnịrị ịrahụ. Ẹ vaa tamayị Ẹnẹyịmavara ayị avaba ọnị o wo oto anị wụ nịnị. Ẹnịnị ẹ yị vaa zẹ ka ayị o hi ọ.

⁷ Ẹnịnị ẹ yị vaa zẹ ka ọ tụ́ ụhwọ́ pooro dị ọ va Ijerusarẹmị nọ udi anị. Dị ọ mẹ̀ ẹ ẹkụra ọnị avaba anẹhẹ vaa ga.

⁸ Ẹnẹyịmavara o reè wo oto ẹtẹẹtẹrẹ. Ọ vaa sị ụkata anị mẹ̀ ẹ. Ọnịvị Anisirẹrị nịnị ẹ yị kụkụ vaa sị akụ ẹnịnị mẹ ịsọyịrị ẹnịnị. Anikinami nịnị ẹ yị kụkụ vee hu eche ẹnẹ ẹnịnị ka ẹhị mi tụra ịrẹsụ.

⁹ Ama ẹwụ nịnị ana chire akụ, dị mẹ̀ ẹ, ọ vaa rị ịsa anị dị ụ waa ga Ẹnẹyịmavara nị. Ẹwụ nịnị ene tenyi ọchị Igirepi, dị ụ kụ́ ẹtụtụ gụ o vee hú eche anị ịnị ohweje ene hi ini irehi Ohomorihi.

¹⁰ Ẹwụnị aza ene hi Ijerusarẹmị, jịnẹ tụ ẹhẹ hụụnị ẹkụra ọbanyị ọnọnị, dị ụ waa tụ́ oze yị aza ana aa vavẹ.

¹¹ Ọnị Ẹnẹyịmavara aa nọ yị avaba anẹhẹ: “Kà a yị aza ẹnẹ hi Ijerusarẹmị ka Ẹnẹyịmavara aa va dọ̀ wụ ha. Ọ vaa kụ̀ aza ọnị ọ sị dọ ha beri ẹngụ vẹ.”

¹² A vaa hị́ wụ nịnị “aza ọnịnị Ohomorihi”, aza ọnị Ẹnẹyịmavara sị dọ ha Ijerusarẹmị vị ana vaa hị́ ẹkụra ọbanyị ọnị Ohomorihi sị ịrẹyị anị. Ẹkụra ọbanyị ọnị Ohomorihi ọ yị hụrẹ ụvọ.