Ayịsaya 51 - IWE ỌNỊNỊ

¹ Batọ avaba awụ nịnị ene zi ka a dọ ụ nịnị ha. Ẹwụ nịnị ene si ka wa saasa ịrẹyị Ẹnẹyịmavara sị ụtọ pe ẹtẹ. Tamayị ịzị ụ chi hụrẹ vẹ nịnị.

² Ịzẹyịza, tamayị ka Abụrahamị ọnịrị Isera ẹ vị ohiku awụ nịnị. Ẹnẹyịmavara ộ mẹ̀ ka Abụrahamị ọ́ ma ozi ọrụrụ ịzị ụ chị hụrẹ vẹ nị.

³ Ẹnẹyịmavara vaa sị ayị Anisirẹrị nẹtẹ. Ộ vaa mẹ ka ẹtẹ ẹnịnị ana vị ọpapara ò zoza anka ụbazị Edẹnị avọọ. Ayị ẹnịnị vene vee hine, dị ẹ yaa jị ahẹ ọyịza ga Ẹnẹyịmavara.

⁴ Ẹnẹyịmavara kà ẹwụ nịnị ana vị aza anị e batọ. Ẹnịnị ẹ wụ́ ịrẹyị anị ana vaa kụ amẹrị kwooze dị avaba anẹhẹ nịnị ee re e.

⁵ Ộ ka aza ene hi akẹnẹ enyi vị ana kụ eyi hi ẹba ee zi ọnị eyi. Ọnị vee jintu vayị ẹnịnị, dị ọnị dọ wa ha. Ọnị vaa vị ohinọyị ẹnịnị.

⁶ Ẹnẹyịmavara kà ẹ kana eyi di e re ihinẹba ọnịrị ẹtẹ. Ihinẹba vaa ta anka areyi mẹẹ̄ ta hi ịnị ahị avọọ. Ẹtẹ ọnọnị vee bo anka ụsẹmụsẹ avọọ. Aza ana ra ịrẹsụ ẹtẹ vị ene vee su va ha anka ịsị avọọ. Ama ụkata ọnị ọnị sị dọ azaa ha o yi mē bo. Ọnị vaa nyị ẹbẹẹba pooro zịna-zịna nị.

⁷ Ẹnẹyịmavara kà, Batọ ẹwụ nịnị ana yẹ ịsa ana vọrọ, ene hi ayị ịrẹyị anị. Asị e hí angwa aza ee du wa, dị ẹ yaa kụ wa ụhụ nị.

⁸ Aza ene du wa vee vu ẹtẹ anka idegu mẹ̄ rị achị avọọ. Ama ọnị vaa ẹdọha wa pooro zịna-zịna. Avọọ ọnị mẹ vaa nyị ẹbẹẹba pooro nị.

⁹ Anisirẹrị nịnị ka Ẹnẹyịmavara ọ kwẹẹtẹ ọ gụ ẹnịnị ụvọ! Ọ sị ụkata dọ ẹnị ha anka ọ mẹ kwẹẹtẹ tu ọnịvị ẹnịnị ịnị ụmẹ ịyẹẹyẹ. Ọnị ộ gara Anijipiti, uye odivi ana aā hị́ Ịrahabị nị.

¹⁰ Ọnị ộ wụ̀ enyi ịnị oku, dị ọ tụ oze tụ ịnị akakana anị na jịnẹ agụvị aza ọnị ọ dọ ha ẹ zụ jịnẹ tụ akẹnẹ anị nị.

¹¹ Aza ọnị ọ dọ ha vaa ngụ Ijerusarẹmị ịnị ayohine, dị ẹ yaa jị ahẹ, di e yee na owu booboro agụvị ka ayị ẹnịnị ee hine. Ẹnịnị vị ana vaa jị ịrajẹ pooro agụvị ka ẹ sị hụụnị ayodu ọnịrị ẹngụ ọyị và hí.

¹² Ẹnẹyịmavara kà ọnị aa sị ayị ẹnịnị nẹtẹ. Sị ẹ vẹ di e yee hí angwa ọzarẹyịrẹsụ ọnị ẹhẹ anịị̄ ta anka avị mẹẹ̄ wụ̀ avọọ.

¹³ Ayị ô hi wa ka Ẹnẹyịmavara ana tụ wa, ộ gana ẹbẹẹba ku tụ ịzị ọ ya, dị ọ sị eteesu hi ẹtẹ nị. E yee hí angwa agụvị ka aza ana mẹ ẹvaya yị wa aa kụ ayị ka ẹnị a wụ̀ wa. Ịzị aza ẹnẹẹ hi booro aanị?

¹⁴ Ẹ yị jẹẹ dị aza ana aa mẹ ẹvaya yị ẹ ha. Ẹnịnị vee ku orubo, ụngwẹ ọ yị vaa kụ wa.

¹⁵ Ẹnẹyịmavara kà ọnị ọ vị Ohomorihi ana vara oku dị a jị ayị vụụvụ nị. Ọnị ọ rị Ẹnẹyịmavara Ochẹtẹẹngụ nị.

¹⁶ Ọnị ộ gana ẹbẹẹba ku, dị ọnị sị eteesu hi ẹtẹ nị. A ka yị Ijerusarẹmị ka ọnị ọ nyị aza ene hi ịzọọ nị. Ọnị vee sere wa, dị ọnị sị wa tẹ ịnị ivoku anị.

Ọdịrẹma ụyọrị Ijerusarẹmị

¹⁷ Kwẹẹtẹ Ijerusarẹmị, ha kwẹẹtẹ, Ẹnẹyịmavara ọ raà ka wụ nịnị enyi ụya ịnị ọyịkụ anị. We reè hu ọ ẹnẹmẹhị ana mẹ ka ọọ mẹrị wụ, dị waa vanga nị.

¹⁸ Ẹ yị nyị ọza ana vọrọ ka ọ zụ ọ oze. Ẹ yị nyị ọza ana vọrọ ka ọ mẹ ọgụvọ yọ.

¹⁹ Ịrẹyị odivi oze ẹẹva ọ raà ngụ tu wu. Ịrẹkụ ọnịrị ụngwẹ o reè vu aza awụ ẹtẹ. Ẹ yị nyị ọza ana zụ sị wụ ayị nẹtẹ.

²⁰ Agụvị ka Ẹnẹyịmavara Ohomorihi aa kụ ayị, ezi anị ẹ sị tụ ọkụmị dị ẹ yaa hyẹdụ avaba aha anka epeni ọnị ịrẹpa za avọọ nị.

²¹ Ịrẹyị o tu wụ ẹngụ, waa mẹrị eche ama we yi hu eche.

²² Ẹnẹyịmavara Ohomorihi awụ nịnị anaā vụ ịrẹvụ yị aza anị kà, ọnị ọ raà dọ ako ọnị ọnị sị yị wa ịnị ọyịkụ. A yị kụkụ vaa sị ụkata-ụkata za wa ka e hu dị ọọ vaa mẹrị wa.

²³ Ọnị vaa sị ako ọnọọ yị aza anaa mẹ ẹvaya yị wụ nịnị. Aza ana za wụ nịnị tana tụra ẹtẹ, dị ẹ yaa kụ ahụ hi wụ nịnị parahu anka edudu oze avọọ.