Ayịsaya 31 - IWE ỌNỊNỊ

Ọza ana sị ayị tụra Anijipiti ẹ sị dà

¹ Ẹwụ nịnị ana nọ Ijipiti ka vi u wee nee sì ọgụvọ nịnị, wa sị dà nịnị, we yi re ẹpẹ sị va. Mị ka ẹwụ nịnị ana sị ayị tụra umaata Anijipiti ka ệ mẹ̀hị rụrụ, ọnịrị ka ệ nyị ọmụha ana aā sị umaataa kù ịrẹkụ, wa sị dà nịnị. Wẹ yị kụkụ zẹẹ ka wa sị ayị tụra Ohomorihi ọnịnị ana Anisirẹrị aa hẹkẹ. Wẹ yị kụkụ ne tù ọ nịnị ka ọ̀ gụ wụ nịnị ụvọ.

² Ohomorihi ọnị ọ rẹ yẹ ịrẹyị, ộ. Ọ zụ kụ́ ịrẹyị odivi ve tù wu nịnị. Ịrẹyị ọnị ọ̀ọ sị kà, avọọ ọ mẹ̀ raa mẹ̀ ẹ nị. Avaba aza ana aa mẹ̀ ebira odivi ọnịrị aza ana aa sị ọtụụ kà wa ịrẹma ẹnịrị Ohomorihi ẹ raà kụ́ eyi gẹrị ẹngụ.

³ Ama tamayị nịnị o, ka Anijipiti vị aza rị ẹyị ịrẹsụ, ẹ yị vị Ohomorihi ẹ vị. Umaata ẹnịnị vị uye kẹnẹ, ẹnịnị ẹ yị vị arịjẹnụ. Ịjị Ẹnẹyịmavara ọ̀ọ tana ụvọ za wa, aza ana nọ ịnị ọgụvọ ọnịrị aza ana a ka à na gụ ụvọ vi ene dudu vaa và angga dị ẹ hyẹdụ. Avaba ẹnịnị e vee vú ẹtẹ nị.

⁴ Ẹnẹyịmavara ộ kà a nị ka, “Ohi idu ọ̀ọ si uye za, di ee nowu kara a. Òo zee e eyi aza ene ee sere atẹmẹ ẹ̀ kụ́ gụ di èe nowu ka ẹnị ẹ̀ dụ ọ, e yi yèe hí angwa owu ẹnịnị. Ẹ̀ẹ daka nowu pooro, ẹ yị nyị ịzị aa gẹ idu. Avọọ Ẹnẹyịmavara Ochẹtẹẹngụ mè vee tenyi ẹngụ ịrẹkụ vee tù aza ene hi ịrẹsụ ataba nị.

⁵ Wéē re inomi mèe hira kara ịrẹngwẹ anị ka asị a nyị ịsị ẹ kanyị ọ avọọ, avọọ ẹmị Ẹnẹyịmavara Ochẹtẹẹngụ mè vee si eyii pè Ijerusarẹmị ka asị a nyị ịsị ẹ kanyị ọ nị, mi vee sere e, dị mị dọ ọ tụ́.”

⁶ Ẹwụ nịnị Anisirẹrị, wa raà mẹ̀ ebira odivi hi Ohomorihi nịnị. Navọ wa varẹma ka a na nịnị.

⁷ Ẹkụhị ọnya avaba awụ nịnị vee nē ori awụ nịnịị ta. Ebira odivi awụ ọ mẹ ka wa na sị igooru ọnịrị ẹkẹhị dị wa vavọọ sị mẹ ori nịnị nị.

⁸ Ịrẹkụ ọ vaa wụ̀ Anasiriya nị, ama ẹ yị vị ẹmịrị ọzarẹyịrẹsụ ọ vaa kụ̀ ịrẹkụ ọnọọ. Mị ka ịrẹkụ ọ vaa wụ̀ wa nị, ama ẹ yị vị ịrẹkụ ọzarẹyịrẹsụ. Ịrẹkụ vị ana vaa dụ wa, di a za ozwọọmụha ẹnịnị ọrịhị.

⁹ Angwahi vị ana vaa dị waa hụụ ịzị ẹ vịdị naa tẹ ka asị a nyị ịsị ẹ kanyị ẹnị. Ọga isoja ẹnịnị ọ̀ọ maanị sị eyi re ịrẹkụ kẹnẹ dị angwahi ngụ ọ ẹngụ. Ịsị Ẹnẹyịmavara kà ọ vaa mẹ ọ vị ọnọọ nị. Ẹnẹyịmavara ọnọọ á aā yà Ijerusarẹmị hẹkẹ, dị aa sị ịsaa mẹ̀ ịsọvọ dị a rị ọ ịra ịzọọ yọ nị.