Ayịsaya 3 - IWE ỌNỊNỊ

Ẹngụkata ene vee tù Anijerusarẹmị

¹ O yi kuku vee kù dị Ananyị yị Ẹnẹyịmavara Ochẹtẹẹngụ Ochẹtẹngụ ọ̀ kụ́ avaba ịsa ọnịrị aza hụrẹ Ijerusarẹmị ọnịrị Ijuda. Avaba ịsa ẹnị ẹ sị eyi kà vị ọnị ọ vaa kụ́ụ kwooze saka-saka.

² Avọọ ọ mẹ̀ rẹ vaa kụ́ avaba ọnịrẹkụ ẹnịnị beri avaba ohinọyị ọnịrị ọnịsẹ nị. Ọvavo ene hi ịzọọ ne beri ọdọvịdị ẹkụra nịnị vị ọnị ọ rẹ vaa kụ́ụ kwooze saka-saka.

³ Aza ana vọ ọnị ọ rẹ vaa kụ́ụ hụrẹ oze ẹ vị ọga isoja ọnịrị aza ẹbanyị ne beri aza ene eē pè azaa juwe ọnịrị aza ana zụ mẹ ụna ọnịrị aza ana aa sị ẹbẹẹ mẹ ịrẹyị.

⁴ Ohomorihi vaa mẹ ka ezweyi ẹ̀ kụkụụ mẹ ịjọvaa tụra wa, dị ahịka ozweyi ẹ kụkụ vị ọga ẹnịnị nị.

⁵ Aza vaa mẹ ẹchakaa yị ẹngụ, dị aza ẹnyị kwẹẹtẹ tù ọsa. Anokokooro vaa kwẹẹtẹ tù ẹngụ. Ezweyi rẹ vaa kwẹẹtẹ tù azọkụ, dị ẹ yị kụkụ nyị ka aza ẹ̀ sị ụbanyị yị aza ene huna wa.

⁶ Aza vaa sị ụkata-ụkata za anda ẹnịnị ọnị ẹnịrịị vị ịrẹsụ ọnya dị ẹ ka ọ̀ vị ohinọyị ẹnịnị agụvị ka ọ daba nyị awuru. Dị ẹ ka ọ̀ va vị ohinọyị tụ́ ịrẹsụ eburu ene wu hi ẹtẹ.

⁷ Dị ọza ọnọọ ọnị nowu za ẹtẹ dị ọ ka ẹ yị nyị ịsị ọnị zụ mẹ ịnị ịrẹyị ẹnẹnị. Dị ọ ka ọnị ọ yị hyakụ nyị ịsọyịrị àa vị ịta tụ́ ini eehi anị. Dị ọ ka asị a sị ọnị mẹ ohinọyị aza ẹnẹẹ.

⁸ Ogwoo, Anijerusarẹmị ẹ sị và angga, Anijuda ẹ kụ hyẹdụ. Ịrẹyị ọnị ẹ yaa kà ọnịrị ebira ẹnị ẹ yaa mẹ ộ sị zụ̀ ka vị ẹ yaa kụ̀ụ hịrẹ Ẹnẹyịmavara nị. Ẹnịnị vị ana aa sị eyi oweyii re Ohomorihi ọnị ụvọta.

⁹ Ẹ́ mẹmẹ ee re ẹtẹ ộ hyakụ sị zụ̀ ka ẹngụ ebira ẹnị ẹ yaa mẹ ọ vị ọnọọ nị. Ebira odivi ẹnị ẹ yaa mẹ ọ vị ọnọọ nị. Ebira odivi ẹnịnị vị ẹnị ẹ kụ́ tụra eyi anka Anisodọmị avọọ, ẹnịnị ẹ yị sị tẹ vụrụ-vụrụ. Ẹ sị dà ẹnị ụvọta ẹ sị ụvọ tura ụya ve kú ẹngụ ẹnịnị nị.

¹⁰ Kà a ka vi o vee zee yi ọza ana aa mẹ̀ ebira ana vọrọ nị, agụvị ka ẹ vaa rị ọgụ ebira ẹnẹ ẹ̀ẹ mẹ.

¹¹ Ama dị ụ kà a yị aza edivi ka ẹ sị dà. Ụya aa vẹ ịrẹsụ ẹnịnị agụvị ka ebira ẹnẹ mẹ, a vaa sị ọgụ anịị yị wa.

¹² Ọpa ezweyi aa mẹ ẹvaya yị aza amị, anyẹnẹẹ ẹ kụkụ vị ọdọvịdị ẹnịnị nị. Ẹwụ nịnị aza amị, aza ana ka ẹnị vị ọdọvịdị awụ nịnị vị ana aa kụ́ wụ nịnị nyeeyi. Ẹ raà kụ́ wụ nịnị nyeeyi hụrẹ oze.

Ẹnẹyịmavara vaa mẹ̀ ọkarẹyị yị aza anị

¹³ Ẹnẹyịmavara o reè tenyi ẹngụ ịrẹyị anị, ọ sị kwẹẹtẹ aa vaa mẹ̀ ọkarẹyị aza anị.

¹⁴ Ẹnẹyịmavara o reè tenyi ẹngụ ka ọnị ọ̀ mẹ̀ ọkarẹyị yị azọkụ ọnịrị ọdọvịdị aza anị. Ọ kà ẹwụ nịnị ọ sị aza anị gara ha. Ogu ene hi ini eehi awụ nịnị vị ẹnya ọnị ụ kụ́ hụrẹ ịda onosiye nịnị.

¹⁵ Ẹmị Ananyị wụ, ẹmị Ẹnẹyịmavara Ochẹtẹẹngụ mee họ̀ use mị ka si u ro dị ụ maanị nyayịnẹ aa chamayịị yị aza amị nịnị? Sị ẹ vẹ dị ụ maanị aa za wa eyi kwọrọ ẹtẹ?

Ohomorihi ộ kà anyẹnẹẹ Ánijerusarẹmị ọ̀nọ̀

¹⁶ Ẹnẹyịmavara kà ọnị ka eyi ana anyẹnẹẹ Anịzayọnị aa mẹ ọ sị vị ẹnẹmẹhị. Ẹ̀ẹ yaa zị ụsẹ dị ệ tana ọrọkọ ẹnịnị. Avọọ ẹ mẹ̀ dọ ọda ịrẹkọyịsẹ nị. Ẹ̀ẹ yaa na, dị ẹ tangwa ee hu ahụ dị ịsa ẹ si tụ́ ahụ ọnị aa sụ́ ịrẹyị;

¹⁷ avọọ Ananyị yị vaa mẹ ka ịtahụ ẹ̀ chị hi ịnị ịrẹsụ anyẹnẹẹ Anịzayọnị, dị ọ mẹ ka ẹnịnị ọ̀ kụ́ ọmarị.

¹⁸ Ụmẹ ọnya aa vẹ, ịhị ọnọọ Ananyị yị vaa dọ avaba ịsa ana anyẹnẹẹ Anịzayọnị aa sii mẹ eyii hụrẹ wa ụvọ. Ẹnya ẹnẹnị vị ọnị ọ vaa dọ wa: ọzwahụ, ubobo, ịsọbẹ,

¹⁹ ịsụtọ ọnịrị ịsụvọ ne beri ubobo ene e siī kú ịrẹsụ.

²⁰ Ọ rẹ vaa dọ wa ịsị e siī kú ịrẹsụ ọnịrị ẹba ana a siī kara ataahụ ọnịrị ọtẹ ne beri ijogo eturare ọnịrị ahọ̀nọ ẹnị ẹẹ̄ za.

²¹ Ịsa ọsa ọnị ọ rẹ vaa dọ wa ẹ vị ochirigege ẹnị ẹ sịị̄ tụ́ ụvọ ọnịrị ẹnị ẹ sịị̄ tụ́ ịnị aahị,

²² avaba awuru ẹnịnị ene zoza ne beri ampo ẹnịnị ọnịrị

²³ ore na vaka ịsị ẹ sịị̄ kara ọrọkọ ọnịrị ubobo ọgọdọ eni e siī kú ịrẹsụ.

²⁴ Eturare e vịdị sii sisi ẹngụ nị, ama ẹngụ ẹnịnị kụkụ vaa ngụ agụ odivi. Ẹnịnị ẹ yị kụkụ vaa sị ịbanụ za ọtẹ, ama ẹda ana a sị tụ́ ọrịhị avọọ ẹ vanaa sịị za ọtẹ nị. Ẹyị ẹnịnị ene vịdị nyị ọyịza-ọyịza vaa ta, dị ẹ kụkụ kụ́ ọmarị. E yi kuku vee re ịta ozozaa kú ẹngụ, ụsẹ ẹ vanaa za nị. Ọvị ẹnẹ ẹ vịdị aa mẹ avọọ, ụhị ọ vanaa dọ ọ ịrẹsụ nị.

²⁵ Ọnọrụ awụ nịnị ana zụ kụ̀ ịrẹkụ vi ene vee sú ịnị ịrẹkụ.

²⁶ Kụkụ vaa nyị aza ana aa kụ́ụ gụ enoze; ịzọọ vị ana vaa tịtẹ anka ịzị a yà aa jị òrèrè oku avọọ. Dị ẹ tịtẹ kẹnẹ anka ọnẹẹ ana tụ́ ahwaahụ dị ọ yaayịtẹ ini eteesu avọọ.