Aniroomi 16 - IWE ỌNỊNỊ

Ụkụ́ ọdịrẹma

¹ Mee sì ka ma kà a wụ nịnị ka Ipebe onyeyiza ayị vị ọza ọyịza; aa mẹ ọgụvọọ yị anịragụ Ohomorihi ana yà Ikenkire.

² Hụ ụvọ Ananyị yị wa dọ ọ pe ẹngụ nịnị, anka ọ mẹ̀ vọrọ tụra aza Ohomorihi! Ịsị èe sì, ụ mẹ ọgụvọ anịị yọ nịnị, agụvị ka ọnị nyẹmba vị anaā gụ aza ụvọ. Ọ hyakụụ gụ mị ụvọ bẹẹ.

³ Kụ́ Ipirisira ọnịrị Akwira yị mị nịnị! Ẹmịrị wa ô dudu mẹ̀ ụkọrọ yị Ijeesu Ikirisiti.

⁴ Ẹnịnị ệ sị ịrẹsụ tụ́ isu agụvị amị. Mâ kụ́ wa avọ ẹtẹẹtẹrẹ. Ẹ yị vị ẹmị ịnya kẹnẹ, avaba anịragụ Ohomorihi ẹnẹ ẹ̀ yị vị Aniju ẹnị ẹ rẹ kụ́ wa avọ bẹẹ.

⁵ Rẹ kụ́ anịragụ Ohomorihi anaā gẹ ini eehi ịda ẹnịnị mị! Kụ́ Epeenetu mị ẹtẹẹtẹrẹ, mâ da sì ịrẹyị anị kẹnẹ. Ọnị ọ vị ọnịpaapa ịnị ẹtẹ Esiya ana sị ayị tụra Ikirisiti nị.

⁶ Kụ́ Imeri yị mị! Ộ mẹ̀ ụkọrọ yị wụ nịnị ẹtẹẹtẹrẹ.

⁷ Rẹ kụ́ Andironikusi ọnịrị Ijuniya yị mị! Aza amị ẹnẹ ẹmịrịị hi ịnị ẹngwa ẹ vị nị. Apositeri nịnị ệ yẹ wa ẹtẹẹtẹrẹ. Ẹnị ẹ hyakụ vịdị sị ayị tụra Ikirisiti tụ́ mị nị.

⁸ Kụ́ Ampiriyatọsị yị mị! Mê sì ịrẹyị anị ẹtẹẹtẹrẹ. Ọnịrị Ananyị yị vị ọnya.

⁹ Kụ́ Ụbanụsị yị! Ẹyịrị ọọ vị ene dudu aa mẹ̀ ụkọrọ Ikirisiti. Rẹ kụ́ Isitakisi ọta amị booro yị mị!

¹⁰ Kụ́ Aperesi mị! A sị yẹ ka ộ sị ayị yị Ikirisiti ẹtẹẹtẹrẹ. Kụ́ aneehi Arisitoburu yị mị!

¹¹ Kụ́ Iherodiyoni ẹnẹ ẹmịrịị vị Aniju yị mị! Rẹ kụ́ aza ana dọ Ananyị yị wụ́ ene hi ini eehi Inakisusi mị!

¹² Kụ́ Itirihwena ọnịrị Itirihwosa ana aa mẹ ụkọrọọ yị Ananyị yị! kụ́ ọta amị Iperisi ana rẹ mẹ̀ ụkọrọ yị Ananyị yị ẹtẹẹtẹrẹ!

¹³ Kụ́ Iruhwọọsị yị mị! Ananyị yị ộ nyị ọọ. Rẹ kụ́ ọnyị anịị mị! Ọnyị anị vị anaā mẹ mị anka ozi anị avọọ.

¹⁴ Kụ́ Asinikiritusi ọnịrị Ihwiregoni ọnịrị Iherimasi beri Ipatirobasi ọnịrị Iherimesi beri avaba ọdọwụ ana vọ ene hi ịda anị!

¹⁵ Rẹ kụ́ Ihwirorogusi beri Ijuriya ọnịrị Inerusi beri onyeyiza anị ọnịrị Orimpasi ne beri avaba aza Ohomorihi ana vọ ana yà ịda ẹnịnịị mị!

¹⁶ Kụ́ ẹngụ nịnị ẹtẹẹtẹrẹ, ini oze ana sị zụ̀ ka wê sì ịrẹyị ẹngụ nịnị. Avaba anịragụ Ikirisiti ka ẹnị kụ́ wụ nịnị.

Iwọjị ọdịrẹma

¹⁷ Ẹwụ nịnị ẹyịnyara amị, sị ụtọ pe ẹtẹ nịnị, oo! Sị ụvọ za ẹngụ awụ nịnị agụvị aza anaā há azaa hi, di ẹyaa kụ́ azaa nyeeyi, ọnọọ vị ka ẹyaa kà ịrẹyị ana jị ịsị a vịdị sị zụ̀ wụ nịnị nyee. Asị ụ zị ògù ẹngụ aza ẹnẹẹ!

¹⁸ Ẹngụ aza ana aa mẹ̀ ebira ẹnẹẹ, ẹyị vị Ikirisiti Ananyị yị ẹyaa hẹkẹ. Ịsa ọyịrị kẹnẹ ẹ sị ayị tụ́ ịnị anị nị. Dị ẹyaa sị ịrẹyị ohine ọnịrị ọza oyigonoo vene aza ẹnẹ ẹ̀ yị nyị ịsị ẹ yẹ.

¹⁹ Avaba aza ẹ sị yẹ ka wâ ká ịrẹsụ hi yị Ohomorihi nịnị. Ọnọọ ộ mẹ̀ ka maa jẹ agụvị awụ nịnị. Mee sì ka eyi awụ nịnị ò hweyi tù ịsa ozoza, ama dị asị ụ nyị tụ́ ịnị ịsa odivi nịnị.

²⁰ Ohomorihi anaā sịị ẹngwọọrọ yị, o yi vee kù dị ọ̀ kà Echu ngụ ẹtẹ, dị waa kụ́ ahụụ hi ọọ nịnị. Ẹyịza ọọhẹ Ananyị yị Ijeesu Ikirisiti ọ̀ yà pe avaba awụ nịnị.

²¹ Itimoti ẹnẹ ẹmịrịị dudu aa mẹ̀ ụkọrọ ka ọnị kụ́ wụ nịnị. Irusiyọsị ọnịrị Ijasoni, beri Isosipata anda ayị Aniju ka ẹnị rẹ kụ́ wụ nịnị.

²² Ẹmị Ịtẹtịyọsị ana chẹrẹ iwe ọnọnị, mâ sị Ananyị yị kụ́ wụ nịnị.

²³ Ịgayọsị adarehi amị ọnị ịragụ Ohomorihi ịzẹnị aa kụ́ụ gụ ị́da anị ka ẹnị kụ́ wụ nịnị. Ẹrasịtụsị anaā sịị ẹkẹhị ẹkụraa tẹ ka ọnị kụ́ wụ nịnị. Ikuaritu ọhụva ayị ka ọnị rẹ kụ́ wụ nịnị.

²⁴ [Ẹyịza ọọhẹ Ananyị yị Ijeesu Ikirisiti ọ̀ yà pe avaba awụ nịnị. Aamị.]

Ịpọọrụ ộ sị ụga yị Ohomorihi

²⁵ Ohomorihi ọ zụ ka wa jẹẹ geri-geri nịnị anka enube ọyịza ọnị maa kà. Enube ọnọọ vị ịrẹyị Ijeesu Ikirisiti. Enube ọnọọ ọ rẹ kà ịrẹyị ịsa oni iruvo anị nyịnẹ anaa sị zụ̀. Ama ọza ẹ yị vịdị yẹ hụrẹ ụmọrụmọ ịnị ịyẹẹyẹ vẹ.

²⁶ Ama booro aanị a raà sị tụ́ ẹhẹ. Ọnịsẹ nịnị ệ vịdị chẹrẹ ịsa tịtẹ ini oze anị. Anka Óhomorihi ana yà ịzọọ pooro zịna-zịna mẹ̀ mẹ ọda, a raà kà a ngụ avaba ẹhẹ zị, agụvị avaba aza ẹ̀ zụ dọ wụ́, dị ẹ̀ẹ ká ịrẹsụụ hi yị Ohomorihi.

²⁷ Ini oze Ijeesu Ikirisiti, yâ sị ụga yị Ohomorihi pooro zịna-zịna, ana ahịka ọnịnya kẹnẹ ọ nyị avaba ịrẹyọyẹ nị. Aamị.