Aniroomi 12 - IWE ỌNỊNỊ

Sị avaba ẹngụ awụ nịnị yị Ohomorihi

¹ Ẹwụ nịnị ẹyịnyara amị, aarịhịnị, maa sị ayamva Ohomorihii dá ịpẹẹ wụ nịnị ẹtẹẹtẹrẹ. Navọ wa sị avaba ẹngụ awụ nịnị yị Ohomorihi anka ịsa ịsọvọ ana yára, dị ọ vị ọnịnịn, di o re zé Ohomorihi eyi! Ọnọọ ọ vị ahẹkẹ Ohomorihi obooro anaa vọrọ ka waa mẹ nịnị nị.

² Asị ụ rẹ̀ mẹ̀ ebira ana anẹhẹẹ̄ kẹnẹ mẹ nịnị! Ama navọ Ohomorihi ọ̀ vara ayị awụ nịnị ọwọọwa saka-saka! Ịjọnọọ ụ va zụụ yẹ ịsa oni Ohomorihi sì nịnị nị, ọnọọ vị ka ịsa ene zoza, di o zé Ohomorihi eyi, dị ọ rẹ gụ.

³ Ohomorihi ộ vayị amị ẹtẹẹtẹrẹ, agụvị avọọ maa kà a yị avaba awụ nịnị ka: Asị a nyị ọza ene ne re ẹngụ anị huna ọpa ọnọọ vị ịnị awụ nịnị! Ama ọzọza ọ̀ sị ụvọ za ẹngụ anị ịnị ẹngụ ịrẹyị oni u wèe ro nịnị! Anka Óhomorihi ọ̀ọ mẹ̀ sị ụkata yị ọzọza ka ọ̀ dọ wụ́, ọzọza ọ̀ vavọọ yẹ ẹngụ anị!

⁴ Wâ yẹ nịnị ka ẹngụ ọza vị ọnya; ama ọ va nyị ọchẹngụ irenyi-renyi. Ọchẹngụ ọnya-ọnya ộ nyị ụkọrọ anị.

⁵ Avọọ gẹdẹ-gẹdẹ ẹ́yị mẹ̀ rẹ yà nị. Yâ rụrụ ịzẹyịza, ama ẹngụ ikonya ị vị nị, agụvị ka ẹyịrị Ikirisiti ọ sị vị ọnya. Avaba ayị vị ana gẹ ẹngụ, anka avaba ọchẹngụ ọza mẹ̀ gẹ ẹngụ avọọ.

⁶ Anka Óhomorihi mẹmẹ nyị ọzịnya-ọzịnya ayị iyi, dị ọ sị ụkata yị, avọọ a mẹ̀ vọrọ ka yaa sị ụkata ọnọọ mẹ̀ ụkọrọ nị. Ohomorihi ọ̀ọ sị ụkata yị ka ya vị ọnịsẹ, áa vọrọ ka yaa kà ịsẹ ọnọọ, anka ịzị Ohomorihi mẹ̀ ka ya dọ wụ́ ne tù.

⁷ Ohomorihi ọ̀ọ sị ụkata yị ka yaa mẹ ọgụvọọ yị ọza, à vẹ ya jẹẹ pe ọnọọ! Ọza ana àa zụ̀ aza ịsa, ọnị ọ̀ rẹ sị eyi pe ịsa ana aa zụ̀ aza!

⁸ Ọza ana àa tụ́ ọza ọtụtụrụma, ọnị ọ̀ rẹ sị eyi pe ụkọrọ anị! Ọza ana àa mẹ ẹyịza, ọ̀ọ mẹẹ, asị o ti tụ́ ịnị anị! Ọza ana àa nyị ọda tụra ịrẹsụ aza, ò re ka ọnị ọyị nyị uworo! Ọza ana àa vayị ọza, ọ̀ọ sị ayohinee mẹẹ!

Ịsị aa sị yẹ Ẹdọwụ Ịzẹyịza

⁹ Ayị ọnya a vọrọ ka ye sii sì ịrẹyị ọza nị. Waa nyị ịhyẹrẹ ịsa edivi, dụ wa sị ụvọ za ịsa ọyịza.

¹⁰ Wee sì ịrẹyị ẹngụ nịnị ẹtẹẹtẹrẹ, anka ẹyịnyara ini Ikirisiti meē sì ịrẹyị ẹngụ avọọ. Waa sị ụbanyịị yị ọnọhụva awụ huna ẹngụ awụ ụvọta.

¹¹ Waa mẹ̀ ụkọrọ nịnị, asị ụ nyị uworo nịnị. Sị ayị ọnya dụ wa sịị hẹkẹ Ananyị yị nịnị.

¹² Agụvị ka wâ nyị ọyịtureyi nịnị, waa jẹ nịnị. Wàa daka aa rị ụya nịnị, re ka wâ nyị ọyịtureyi nịnị, waa jẹ nịnị! Wàa daka aa rị ụya nịnị, re ka wâ nyị isuuru nịnị, dụ wa yịị mẹ̀ aduwa nịnị!

¹³ Ẹwụrị aza Ohomorihi è duduu gà ịsụ wàa nyị nịnị, dụ wee sì ọzọga nịnị.

¹⁴ Waa mẹ̀ aduwaa yị aza ana aa sị ụyaa rị wụ nịnị. Mị ka waa mẹ̀ aduwaa yị wa, asị u chì hi wa nịnị.

¹⁵ Aza ana àaa jẹ, wee pe waa jẹ nịnị! Aza ana àaa raa jị òrèrè, we ree pe waa jị òrèrè nịnị.

¹⁶ Sị ayị yị ẹngụ nịnị. Asị ụ sị ẹngụ awụ nịnị tụ́ ẹba. Và eyi nẹtẹ, dị ẹwụrị onosiye nịnị ẹ̀ẹ za ọta. Asị u ne roo ka wâ da yẹ ịrẹyị nịnị kẹnẹ.

¹⁷ Ọza ọ̀ọ mẹ wụ nịnị ịsa odivi, asị u sị odivi sí ọọ atọ nịnị! Waa mẹ avaba ịsa ana aza dọ ka hịịn, ịzẹyịza yọ nị!

¹⁸ Ẹwà sị vụrị di u we re ka waa sị ẹngwọọrọ pe avaba azaa mẹ nịnị!

¹⁹ Ẹwụ nịnị ẹyịnyara amị, asị u sí atọ ịrẹyị ẹngụ awụ nịnị, oo! Ama naavọ yị Ohomorihi, di ò sí ọọ, agụvị ka â vịdị chẹrẹẹ ka Ohomorihi Ananyị yị ka, “Emeē sí atọ nị, mi vee sí atọọ varẹma.”

²⁰ Agụvị avọọ, ụngwẹ àaa kụ̀ ọnịvị awụ, dà ịsa yọ! Enyi àaa kụ̀ ọọ, ká enyi yọ hú. Wàa vavọọ aa mẹẹ, ụ vaa mẹ ka ụhị ọ̀ọ nyị ọọ.

²¹ Asị ụ zẹẹ ka ịsa odivi ọ̀ nyị ẹbẹẹba awụ nịnị; ama ẹwụ nịnị ọ̀ sị ịsa ozoza nyị ehuna ịsa odivi nịnị!