Anikorasi 2 - IWE ỌNỊNỊ

¹ Jẹẹ ma kà a wụ nịnị ka mâ sị vụrị ẹtẹẹtẹrẹ agụvị awụ nịnị ọnịrị Anịragụ Irayodesiya ọnịrị aza ẹnẹ ẹ̀ yị hyakụ yẹ mị tụ́ eyi.

² Mị vavọọ aa vụrị agụvị ayị ẹnịnị ẹ̀ vị́, di è zụ sì ịrẹyị ẹngụ, dị ẹ̀ rẹ zụ vabẹ. Mee sì ka ẹ̀ yẹ ẹtẹẹtẹrẹ ịsa Ohomorihi vị ọnịrị ịrẹyị oni iruvo anị nyịnẹ. Ịrẹyị ọnọọ ọ vị Ikirisiti ọnị nyẹmba nị.

³ Ijeesu Ikirisiti ịnya kẹnẹ ọ zụ mẹ ka ya nyị ịrẹyọyẹ dị ya zụ yẹ ịzẹyịza nị. Ịrẹyọyẹ ọnọọ ọ́ọ nyị ọgụ ẹtẹẹtẹrẹ.

⁴ Maa kà ịsa ẹnẹnịị wụ nịnị, agụvị asị ụ na zẹẹ ka ọza ọ̀ sị ireche ohine vene wu nịnị.

⁵ Ẹmị ụvọta ẹ̀ yị daka yà ịdị awụ nịnị, ayị amị yà ịdị awụ nịnị. Ịnẹ amị ô hine m mẹ̀ wụ́ ka vị ụ nyayịnẹ sị ụvọ za ẹngụ awụ nịnị, dị ụ yị sị ayị tụra Ijeesu, dị ụ yị jẹẹ geri-geri nịnị nị.

Ebira ana vọrọ tụra Anikirisiti

⁶ Ụ mẹ̀ sị Ijeesu Ikirisiti dọ ka ọnị ọ nyị wụ nịnị aanị nị, waa mẹ̀ ebira ana vọrọ tụra ọza ọnị ọnịrị Ikirisiti sị vị ọnya.

⁷ Che ayị za Ikirisiti ana sị ụhwẹ ọnịrị ụkata yị wụ nịnị! Yị jẹẹ geri-geri ịnị ẹdọwụ awụ nịnị, anka a mẹ̀ sị zụ̀ wụ nịnị; dị ụ wa rẹẹ kụ́ Ohomorihi avọ nịnị ẹtẹẹtẹrẹ!

⁸ Sị eyi pe ẹngụ awụ nịnị! Asị ụ zẹẹ ka ọzọnyị-ọzọnyị ọ̀ sị ịrẹyọyẹ ẹhẹ ọnịrị ịsa kẹnẹ-kẹnẹ vene wu nịnị! Ẹngụ ịrẹyọyẹ ẹnẹẹ ịnị ụvọ aza ọnịrị ori ana nyị ụkata hi ịnị ẹhẹ ọnọnị ẹ hụrẹ vẹ nị. Ayị vị ịda Ikirisiti ẹ hụrẹ vẹ.

⁹ Ini Ikirisiti ana a ma anka ọzarẹyịrẹsụ, Óhomorihi ọnịrị avaba ịsị ọ vị yà nị.

¹⁰ Ọnị ọ nyị ẹbẹẹba anggẹẹrị nịnị ana nyị ụkata nị. Ẹwụ rị ọ ọ̀ọ sị vị ọnya nịnị, wa sị gụ nịnị.

¹¹ Ẹwụrị Ikirisiti ọ̀ọ sị vị ọnya nịnị, Ohomorihi ọ raà jị wụ nịnị ụvẹvẹnẹ; ọsọnị ọyị vị ẹngụ ụvẹvẹnẹ ana aā sị ụvọọ jị. Ikirisiti ọ̀ọ jị ọza ụvẹvẹnẹ, ọnị ọ vị ka ọ raà sị ebira anị ịyẹẹyẹ anaā mẹ ịvị kwooze.

¹² A mẹ mẹ̀ ọyịhwọzenyi yị wụ nịnị, vị ọ sị mẹẹ ka vị e ne wu nịnị beri Ikirisiti nị; dị ụ rẹ ha kwẹẹtẹ hụụnị isu beri ọọ nịnị nị, agụvị ka wáa sị ayị tụra ụkata Ohomorihi ana ha Ijeesu hụụnị isu.

¹³ Ịyẹẹyẹ, wée vịdị wusu nịnị, agụvị ka wa sị ịvị mẹ nịnị, Ohomorihi ọ yị vịdị jị wụ nịnị ụvẹvẹnẹ. Ama booro aanị Ohomorihi ọ raà vagu yi ịnị avaba ịvị ayị, dị ọ mẹ ka ẹyịrị Ikirisiti ọ̀ kụkụ yára nị.

¹⁴ Â chẹrẹ ụta ọnị ị rị tụ́ ini iwe tịtẹ yị yị. Ụta ọnọọ ọ vị oyisì Ohomorihi ọnị o sì ka ya yaanịị mẹ nị. Ohomorihi ọ sị ụta ayị ana a chẹrẹ tịtẹ yị du. Ọ raà sị ọọ hụrẹ yị ịrẹsụ, dị ọ kanyị ọọ iso za ọchị apavahị Ikirisiti nị.

¹⁵ Ị́rẹsụ apavahị ọnọọ, Ikirisiti ọ raà nyị ehuna avaba ụhwẹ echu nịnị ana nyị ụkata, dị ọ dọ wa ẹnya ịrẹkụ, dị ọ mẹ̀ ụhị nyị wa éyi avaba aza nị.

¹⁶ Agụvị avọọ asị ụ zẹẹ ka ọza ọ̀ kụkụụ jị ịvịị wụ nịnị ini oze ịsọyịrị ọnịrị isu wee hú nịnị. Asị ụ rẹ kụkụ zẹẹ ka àa mẹ ọdaa wụ nịnị ini oze eche ọyịrị, ẹhụụ eche ụhwẹ ọwọọwa ọnịrị ẹkụhị ụhwọtụ.

¹⁷ Ịsa ẹnẹẹ vị uhwoto ịsị ẹ vaa vẹ kẹnẹ. Ịsa ọnọọ ụvọta ọ vị Ikirisiti nị.

¹⁸ Agụvị avọọ, asị ụ zẹẹ ka aza ẹnyị aanị ẹ̀ẹ mẹ ọdaa wụ nịnị. Aza ẹnẹẹ ka aza ẹ̀ẹ sị ụyaa rị ẹngụ ẹnịnị, dị ẹ̀ rẹẹ hẹkẹ anggẹẹrị nịnị. Aza ẹnẹẹ ka vị eni ee re ẹtẹ nị. Dị ẹyaa sị ẹngụụ tụ́ ẹba kẹnẹ-kẹnẹ. Ịsa ẹhẹ ọnọnị kẹnẹ éyee ro ịrẹyị anị nị.

¹⁹ Ẹyị zẹẹ ka ẹnị ẹ̀ dọ ka Ikirisiti ọ̀ vị ohirẹsụ ẹnịnị. Ikirisiti aa tẹsị ịragụ anị ana jẹẹ yị ẹngụ anị nị. Ọnị ọ rẹ kụ́ wa vabẹ, anka ẹgẹ ẹngụ ọnịrị ọzị mẹ̀ kụ́ ọchẹngụ ọza gẹ nị. Dị ẹnịnị aa vịraa tụ́ ịnị ịsa Ohomorihi.

²⁰ Wê wusu beri Ikirisiti nịnị, agụvị avọọ ẹ yị nyị ịsị ẹ kụkụ kụ́ ẹwụrị ori nịnị gẹ. Sị ẹ vẹ dị ụ kụkụ aa saasa ọda ẹnyị aanị nịnị ana kà a ka:

²¹ Asị ụ sị ụvọ za ọsọnị, asị ụ rị ọsọọ, asị ụ rẹ kanyị ọsọnị?

²² Avaba ọda ẹnẹẹ ẹnẹ ẹyaa sịị zụ̀ aza vị ọda ịsị ẹ̀ yị mā jẹẹ dị è du, àa sịị mẹ̀ ịsa. Aza kẹnẹ ẹ mẹ̀ ẹ nị.

²³ Ini eyi ọza, ọda ẹnẹẹ ẹ́ẹ nyị ịrẹyọyẹ, agụvị ka aa sị ụkataa za ọza ka ẹ̀ẹ mẹ ahẹkẹ, dị ẹ̀ kà ẹngụ ẹnịnị chí, dị ẹ̀ rẹ sị ụya rị ẹngụ ẹnịnị. Ama ịnị ịzẹyịza obooro, ẹyị zụ gụ ọza ụvọ ka ẹ̀ sị ụvọ za ẹngụ ẹnịnị.