Anẹhwẹsọsị 5 - IWE ỌNỊNỊ

Ebira ana vọrọ tụra Aza Ikirisiti nịnị

¹ Ezi Ohomorihi oni o sì ịrẹyị anị ụ vị nịnị nị. Agụvị avọọ, waa mẹ ebiraa véné ebira Ohomorihi nịnị.

² Wee sì ịrẹyị ẹngụ nịnị ịnị avaba ịsa ọnị ụ wàaa mẹ nịnị, anka Íkirisiti mè re sì ịrẹyị ayị, dị ọ sị ẹngụ anị mẹ ịsọvọọ yị. Ịsọvọ ọnọọ óo hine Ohomorihi ayị ẹtẹẹtẹrẹ.

³ Wa sị vị aza Ohomorihi nịnị; agụvị avọọ ẹ yị kụkụ vọrọ ka à nyị ịrẹyị ịrẹkọyịsẹ ọnịrị ebira ịdọtị beri ọhọha ịnị akakana awụ nịnị.

⁴ Ẹ yị rẹ vọrọ ka waa kà ịrẹyị ịdọtị ọnịrị ịrẹyị kẹnẹ-kẹnẹ nịnị. Ama ịsị a vọrọ ka waa mẹ nịnị ọ vị ka waa kụ́ Ohomorihi avọ nịnị nị.

⁵ Wáa yẹ nịnị ka ọsẹrẹka nịnị ọnịrị onebira ịdọtị anaā há ọhọha, ẹyị vaa ngụ ịzị Ikirisiti ọnịrị Ohomorihi yà aa mẹ ịjọva. Ọza àaa há ọhọha, ori ọ raa hẹkẹ avọọ nị.

⁶ Asị ụ zẹẹ ka ọza ọ̀ sị ịrẹyị kẹnẹ-kẹnẹ vene wu nịnị! Agụvị ịsa ẹnẹẹ Óhomorihi vaa sị sị ụyaa rị aza ẹnẹ ẹ̀ yị mā wụ́ ịrẹyị anị nị.

⁷ Agụvị avọọ, asị ụ bẹ ụvọ tụ́ ọọ yị wa!

⁸ Ẹwụ nịnị ọ rẹ vịdị zị ụsẹ ịrahụ da, ama booro aanị wa va sị ngụ ini ẹtohweyi nịnị, agụvị ka ẹwụrị Ananyị yị ọ sị vị ọnya nịnị. Agụvị avọọ, waa mẹ̀ ebira aza na yà ini ẹtohweyi nịnị!

⁹ Etohweyi ọọ̄ mẹ̀ ka aza ẹ̀ẹ mẹ̀ ebira ene zoza, dị ọ vọrọ, ọnịrị ịzẹyịza nị.

¹⁰ Wee sì iruvo ịsa ene zé Ohomorihi eyi nịnị!

¹¹ Asị ụ nyị ụvọ tụ́ ini ebira ịrahụ kẹnẹ-kẹnẹ ana aza aa mẹ nịnị! Ama ẹwụ nịnị ò re ka wáa sị ẹngụ ebira ẹnẹẹ vẹ ịnị ịnọyị-ịnọyị nịnị!

¹² Ịrẹyị ụhị ọ vị nị ka à hyakụ sị irenu kà a ịsị ẹyaa mẹ ini ewere.

¹³ Etohweyi ọ̀ọ raà sị avaba ịsa tụ́ ẹhẹ, ịjọnọọ a vaa yẹ ịsị ẹ vị gẹdẹ-gẹdẹ.

¹⁴ Ịsị ẹ̀ẹ sị ngụ ịnị ịnọyị-ịnọyị, ịrẹyị ẹtohweyi ọ kụkụ vị nị. Agụvị avọọ a kà a ka, “Ẹwụ ana aa sụ ara, wa ha! Ha hụụnị isu, Ikirisiti vaa sị ẹtohweyi yị wụ!”

¹⁵ Agụvị avọọ sị eyi pe ẹngụ awụ ịnị avaba ebira ọnị ụ waa mẹ nịnị! Asị ụ rẹ̀ mẹ anka aza ẹnẹ ẹ̀ yị nyị ịsị ẹ yẹ; ama waa mẹ̀ ebira ọza ana yẹ ịrẹyị nịnị!

¹⁶ Ụmẹ ọnị ụ wàa nyị, ụ sị mẹ̀ ịsa ana vọrọ nịnị, agụvị ka ụmẹ ọnọnị óo divi.

¹⁷ Agụvị avọọ asị ụ vị ọnụra nịnị, ama re ka wáa yẹ ịsa oni Ohomorihi sì ka wa mẹ nịnị!

¹⁸ Asị u ne hú eche ahaahara nịnị, ana ahịka vị ọọ̄ sị ọzaa mẹ kẹnẹ-kẹnẹ nị, ama navọ Ụhwẹ Ọnịnị ọ̀ dọ avaba ayị awụ nịnị!

¹⁹ Waa jị ahẹ irenyi-irenyi nịnị, anka Ụ́hwẹ Ọnịnị ọ̀ọ mẹ̀ sị zụ̀ wụ nịnị, di u we sii pe ẹngụụ kà ịrẹyị nịnị! Waa jị ahẹ ịnị ayị awụ nịnịị ga Ananyị yị.

²⁰ Ịnị avaba ụmẹ ọnịrị tụ́ ịrẹsụ avaba ịsa, waa kụ́ Ohomorihi Ada ayị avọ nịnị ini oze ịrẹha Ijeesu Ikirisiti Ananyị yị.

²¹ Waa sị ịrẹsụụ yị ẹngụ nịnị, agụvị ka wáa nyị angwahi Ikirisiti nịnị.

Ịrẹyị Uze Ẹvarose

²² Ẹwụ nịnị ose, ọzọza ọ̀ọ sị ịrẹsụụ yị ọva anị, anka ụ mẹ̀ sị ịrẹsụ yị Ananyị yị nịnị,

²³ agụvị ka ọva ọ vị ohirẹsụ ose anị, anka Ikirisiti mẹ̀ rẹ vị ohirẹsụ anịragụ anị. Ikirisiti ọ rẹ vị Ọdọzaha anịragụ anị ana vị ẹngụ anị nị.

²⁴ Agụvị avọọ, anka ánịragụ Ohomorihi mẹ̀ sị ịrẹsụ yị Ikirisiti, avọọ ọ mẹ̀ rẹ vọrọ ka ose ọ̀ sị ịrẹsụ yị ọva anị nị ini oze tụra oze nị.

²⁵ Ẹwụ nịnị ọva, sì ịrẹyị ose ewu nịnị, anka Íkirisiti ọnị mè re sì ịrẹyị anịragụ anị, dị ọ sị ẹngụ anị tịtẹ yọ.

²⁶ Ộ sị enyi ọnịrị ịrẹyị Ohomorihi, dị ọ sị vara a ọnịnị, dị ọ sị ọọ tụ́ irenyi yị Ohomorihi nị.

²⁷ Ộ vavọọ mẹ, agụvị anịragụ anị ò nyengu zoza nịkị-nịkị, dị asị ọ rẹ nyị ịdọtị ikonya. Ịjọnọọ dị ọ va sị ọọ yị ẹngụ anị ọgọnị.

²⁸ Áa vọrọ ka ọva ò sì ịrẹyị ose anị, anka o mè re sì ịrẹyị ẹngụ anị. Ọza ene èe sì ịrẹyị ose anị, o re sì ịrẹyị ẹngụ anị.

²⁹ Ọza ọ mā nyị ịhyẹrẹ ẹngụ anị. Ọzọza vị anaā rị ịsaa tụ́ ịnị ọchẹngụ anị, di o si eyi pee, anka Íkirisiti màa mẹ ịragụ anị gẹdẹ-gẹdẹ.

³⁰ Yáa bẹ tụ́ ịnị ẹngụ anị.

³¹ Agụvị avọọ dị ọnọrụ hụụ ịdị ada anị ọnịrị ọnyị anị, dị ọnịrị ose anị vabẹ, dị ẹnị ẹyịva kụkụ sị vara ẹngụ ọnya.

³² Iruvo ireyi ọnọọ ọ́ọ nyịnẹ ẹtẹẹtẹrẹ, mee ro ka ịrẹyị Ikirisiti ọnịrị ịragụ anị aa kà nị.

³³ Ẹwụ nịnị ọ́ raa kà bẹẹ nị: ọzịnya-ọzịnya awụ nịnị ò sì ịrẹyị ose anị anka ẹngụ anị ụvọta! Dị ose ò re ka ọnị ọ́ọ sị ụbanyị yị ọva anị!